Coleramp jan atipayasiñäniti

“Munat jilatanaka, jumanak purax jan ukhamat ukham lurjasipxamti, [...] ñanqharux askimpi atipja[pxam].” (ROM. 12:19, 21.)

1, 2. ¿Kunjam chuymanïpxatapsa mä qhawqha jilat kullakanakax uñachtʼayapxäna?

 MÄ MARKANXA, Betel uta tukuyasaw mä tantachäwi wakichapxatayna. Ukaruw 34 jilat kullakanakax avionat sarapxäna. Ukampis jan waltʼxasax mä jiskʼa markaruw avionax saytʼxäna. Mä horat sarxakiñäniw sasaw sapxäna. Ukampis niya pä uruw uka chiqan qhiparapxäna. Janiw manqʼas umas taqinitak utjkänti, baños janirakiw sumäkänti. Ukatwa mayninakax wali colerat tuqisipxäna. Ukampis jilat kullakanakax wali pancienciampiw suyapxäna.

² Uka jilat kullakanakax niya tukuyarukiw wali qarit purxapxäna. Janis taqpach tantachäwi istʼapkchïnxa, wali kusisitaw jilat kullakanakampi qhiparapxäna. Kunjamsa uka jilat kullakanakax wali pacienciampi suyapxäna ukxa mayninakax sum amuyapxäna. Ukatwa maynix aeropuerton akham satayna: “Janitï uka kimsa tunka pusini cristianonakax ukankapkaspäna ukhaxa, kuna jan walinakapun paschispäna” sasa.

Kawkins coleratakiw sarnaqasipki

3, 4. 1) ¿Khitis colerampi atipayasiñ qalltawayi, ukat aksarux kuna jan walinakas utjawayi? 2) ¿Cainax pantjasirïkasas kamachañapänsa?

³ Jan walinak utjipanxa coleratakiw jaqix kawkins sarnaqaski (Ecl. 7:7). Ukatwa uñisiñas nuwasiñanakas utji. Yaqhip markanakanxa wal jupanakkamas nuwasipxi, ukat yaqha markanakampis janirakiw waltʼayasipkiti. Ukatxa, familia taypinsa jan waltʼayasiñax nayratpach utjatayna. Amtañäni, Adanampin Evampin Caín jilïr yuqapax sullkapat wal envidiasïna, ukatwa coleran atipatax jiwayäna. Diosax jan coleramti, nayax bendicïmawa sasaw amuytʼayäna, ukampis jan istʼasisaw sullapar jiwayäna (Génesis 4:6-8 liytʼasiñapawa).

⁴ Cainax pantjasirïkchïnsa, kun lurañas jupatäxänwa. Ukhamax sum amuytʼasisax coler apjtayasispänwa. Ukatwa Diosax cuenta mayïna. Pantjasirïtas laykux ukhamarakiw colerampi atipayassna. Ukat aka “jan wali” urunakanxa, jan walinakax utjakipuniwa (2 Tim. 3:1). Awisax qullqit pistʼañas utji ukhax colerañjamakïxiwa. Mä familiax qullqi tuqit jan walin uñjasisax jupanakkamakiw tuqisxapxi sasaw policianakansa ukat familiar yanaptʼir institucionanakansa sapxi.

5, 6. ¿Supayan apnaqat akapachax kunarus wiytistu?

⁵ Maysa tuqitxa, jan sinttʼasiri, jachʼa jachʼa tukuri ukat wali qhuru, ukham jan wali jaqinak taypinwa jakaraktanxa (2 Tim. 3:2-5). Ukatwa awisax colerañjamäspa. Ukat peliculanakansa, televisionansa, colerampi atipayasiñasa, nuwasiñanakasa, ukat jan walit phuqsusiñanakas walikïkaspas ukham uñachtʼayapxi. Mä jan wali jaqimpi ukat suma jaqimpix utjapuniwa. Nuwasiñax utjañapapunïkaspas ukham amuyumpiw wakichapxi. Ukatwa uñtasirinakax suma jaqin atipjañapxa wal suyapxi.

⁶ Ukhamaw Supayax nuwasiñanakar wiytaski. Ukampis ukanakax janipuniw Diosatakix walïkiti (1 Cor. 2:12; Efe. 2:2; Apo. 12:12). Chuymasan ukanakax utjaspa ukhax jan walinakaruw wiytistaspa, ukatxa qullan ajayun achuparjam jan sarnaqasaxa, pachpa qullana  ajay conträksnas ukhamäspawa. Ukhamasti, Jesusan yatichäwinakaparjam sarnaqañasawa; jan walinak luratax jan “kutkatapxamti” sasaw säna (Mateo 5:39, 44, 45 liytʼasiñapawa). Ukampis ¿kunas uka iwxarjam phuqañ yanaptʼistaspa?

¿Khititsa yatiqasïta?

7. ¿Colerampi atipayasisax kunsa Simeonampi ukat Levimpix lurapxäna?

⁷ Colerampi jan atipayasiñatakix walja iwxanakaw Biblian utji. Ukat uka iwxanakarjam sarnaqirinakasa jan istʼasirinakas kunjamas jikxatasipxäna uksa qhanañcharakiwa. Jichhax Jacob tatan Simeón ukat Leví sat pä yuqapat parltʼañäni. Siquem sat mä jaqiw munkir jan munkir Dinampi ikintasitayna. Uk yatisax “walipuniw colerasipxäna” (Gén. 34:7). Ukat jilanakapasti uka markankir chachanakar qʼal jiwarayapxäna, marksa khuyapäñ tukjapxäna; wawanaksa warminaksa katuntat apapxäna. Janiw kullakapat sinttʼasisakix ukham lurapkänti, jan ukasti, jupanakar jiskʼachañatakis Siquemax uk lurkaspa ukham amuyapxpachäna. ¿Ukat tatapax kamspachänsa?

8. ¿Jan walit jan walimpi kuttʼayañ tuqitxa kunsa Jacobun pä yuqapat yatiqsna?

⁸ Phuchapan ukham jan walir puritapatxa Jacob tatax chuym wal usuyasïna, ukampis jan walpun lurapxtaxa sasaw yuqanakapar säna. Ukat jupanakax akham sasaw sapxäna: “[¿]Kullakaxarux kunjamarutix munapxi ukhamar lurasipkakisapänti?” sasa (Gén. 34:31). Diosatakis janirakiw Simeonampin Levimpin luratanakapax walïkänti. ¿Ukat kunas pasäna? Israel markanxa janiw uraq katuqapkätati, wawanakamax ukhamakiw muyupxani sasaw qhipa maranakatxa Jacobux uka pani yuqapar säna (Génesis 49:5-7 liytʼasiñapawa). Ukhamaw colerampi atipayasisax uka paninix jan walir puripxäna, janiw Diosas ni awkipas jupanakar sum uñjxänti.

9. ¿Kunapachas Davitax colerampi niyapun atipayasitayna?

 ⁹ Davitat parltʼarakiñäni. Uñisirinakapat phuqsusirjamäkasas janiw jupax uk lurkänti (1 Sam. 24:3-7). Ukampis niyapuniw mä kutix colerampi atipayasitayna. Amtañäni, Nabal sat mä qamir jaqin ukaruw yanapirinakap khitatayna. Ukampis uka jaqix tuqis tuqisakiw Davitan yanapirinakapar jan kunani kuttʼayatayna; uwij awatirinakapar sums yanaptʼapkchïnxa, antisakiw Davitamppachar jiskʼachatayna. Ukatwa Davitax wal colerasin Nabalar jiwayañ amtampi saratayna. Ukanak uñjasaxa, chachamaruw jiwayapxani sasaw mä waynuchux Abigailar yatiyir tʼijutayna. Ukatwa uka chʼikhi warmix manqʼanak wakichasin Davitar chika thakin jikxatir saratayna. Jikxatasax chachap lantiw perdón mayisïna, ukat jumax Diosan luqtiripästaxaya sasaw Davitar sumachtʼäna. Ukatwa Davitax amuytatasisin akham säna: “Suma amuytʼani warmïta[wa]. [...] Jumaw nayarux jaqi jiwayañata qhispiyarakista” sasa (1 Sam. 25:2-35).

Cristianonakax kunjam chuymanïtansa

10. ¿Jan walit jan wal kuttʼayañax kunatsa jan walïki?

¹⁰ ¿Kunsa Siméon ukat Leví chachanakatsa, ukat Davitampit Abigailampitsa yatiqsna? Jehová Diosatakix colerampi atipayasiñasa ukat nuwasiñas janipuniw walïkiti; ukampis sumankañ thaqhirinakarux bendiciwa. Pablox akham siwa: “Lurasirjamächixa, [...] taqi jaqinakampi sumankäpxam. Jani jumanakpacha ukhamat ukhama apsusipxamti, [...] Diosan qʼapisiñaparu jaytäpxam; kunalaykutix qillqatawa: Nayankiw ukhamat ukhama lurañaxa; nayaw phuqhaskä, siw Tatituxa. Ukhamaxa, uñisirimatix awtjatächixa, manqtʼäyam; pharjatächisti, umtʼäyam; uk lurasasti nina sankʼanakwa pʼiqipxarux qutuchta. Jan ñanqhampi atipjayasimti; jan ukasti ñanqharux askimpi atïpjam” sasa (Rom. 12:18-21, MT). *

11. ¿Mä kullakax kunjamatsa colerar atipañ yatiqatayna?

¹¹ ¿Kunatsa uka arunakarjam sarnaqañax wakisi? Uk amuytʼañatakix mä kullakat parltʼañäni. Irnaqäwipan pʼiqtʼañapatakix yaqha sarayir uttʼayapxatayna. Ukampisa, “uka warmix wal colerayxitu, jan walinak luritu; mistxañ munta” sasaw mä irpir chuymanir satayna. Ukat “amuytʼasiñamawa, ukham colerat jaytañax janiw askïkaspati” sasaw irpir chuymanix sarakitayna. Jan walinak lurataw kullakax kutkatasirakitayna, uk amuyasaw irpir chuymanix iwxtʼäna (Tito 3:1-3). Ukatxa, “inas yaqha irnaqäwi jikxatchisma, ukampis ukham jaqinakax kawkinsa utjakipuniwa. Jesusan arunakapat amtasiñamawa, kunjamtï jumax uñjayasiñ munktaxa, ukhamwa yaqhanakar suma chuymampi uñjañamaraki” sasaw amuytʼayarakitayna (Lucas 6:31 liytʼasiñapawa). Kullakax ukarjamaw sarayiripar sum uñjañatak chʼamachasïna. Qhipatxa sumakiw apasxapxäna, wali sum irnaqtaxa sasaw sarayiripax kullakar satayna.

12. ¿Kunatsa tama taypin chuym usuyasiñax utjaspa?

¹² Diosar jan yupaychirinakan chuym ustʼayatax aguantastanwa, uka kasta jaqinakax akapachan utjapuniwa (Sal. 37:1-11; Ecl. 8:12, 13; 12:13, 14). Ukampis tama taypin maynimpi jan waltʼayasisaw chuym jukʼamp usuyastanxa. Mä kullakax akham siwa: “Jehová Diosan markapanxa janiw khitis pantjasirïkpachati sasaw amuyayätxa, ukampis pantjasir uñjasax walpun mayjtʼasta” sasa. Chiqansa, aka jan wali pachat mistusax tama taypin munasiñampi uñjatäñwa  suytanxa. Ukampis Diosan markapankkasin maynix jan walinak luristaspa ukat sarayirinakas janirak munasiñampi uñjxistaspati ukhax jukʼampwa chuym usuyassna. Inas akham sisna: “Akax Diosan markapächixaya, janiw ukhamäpxañapäkiti” sasa. Chiqansa, ukax janiw jichhaki utjkiti, alaxpachar sarir nayra cristianonakas awisax janirakiw waltʼayasipkänti (Gál. 2:11-14; 5:15; Sant. 3:14, 15). ¿Ukham jan walin uñjasisax kamachsnasa?

13. ¿Kunatsa maynimpi jan waltʼayasisax askichañasa, ukat kunjamsa askichsna?

¹³ Uñisirinakamatakis Diosat mayirapipxam sasaw Jesusax säna (Mat. 5:44). Ukhamax ¿janit jilat kullakanakasataki Diosat mayirapiñax jukʼamp askïkaspa? Jichhaki parlasktan uka kullakax akham saskakiwa: “Chuym ustʼayapkitu uka jilat kullakanakatakix Jehová Diosat mayirapta, ukaw wal yanaptʼitu” sasa. Taqinis mä wawaki markapan sarnaqassna ukwa Jehová Diosax muni, kunjamtï mä suma awkix wawanakapataki munki ukhama. Mä qhawqhatxa wiñayatakiw wali kusisit suman jakasxañäni, ukampis jichhatpach mayninakampi sum apasiñ yatiqsna, munañapsa mayachtʼataki phuqaraksna ukwa muni. Ukatakix maynimpi jan waltʼayasisax jankʼak askichañasawa, jan ukax “janis kunäkaspa ukhamak” armxañasawa (Proverbios 19:11 liytʼasiñapawa). Jan walinak utjipan jilat kullakanakampi jayarstʼayasiñat sipansa, Diosan markapankañataki jiwaskam yanaptʼasiñasawa, ukhamatwa Diosax “wiñayataki” sum uñjistani (Deu. 33:27).

Jiwaskam sumankañax askiwa

14. ¿Kunjamatsa Supayan amtanakapar atipsna?

¹⁴ Familiansa tamansa jiwaskam jachjayasisksna ukat uñchʼukisisksna ukwa Supayampi saxranakapampix wal munapxi, ukham jan walir puriyasaw Diosan arunakapsa amuktʼayañ munapxi (Mat. 12:25). Ukampis ukar jan puriñatakix Pablon arunakapar istʼañasawa, akham siwa: “Tatitun mä  serviripax janiw nuwasiñanakan sarnaqañapäkiti, ukatsipana taqinimpis sumankañapawa” sasa (2 Tim. 2:24). Amtapxapuniñäni, “janiw jaqinak tuqiti nuwasktan, jan ukasti alaxpachan[kir] ñanqha ajayunak [...] contraw nuwastanxa”. Ukhamax kawkïr armanaktix Diosax churkistu ukanakampi jarkʼaqasipxañäni, ukatsti “sumankañ arunak” yatiyapxapuniñäni (Efe. 6:12-18).

15. ¿Uñisirinakan arknaqatax kun lurañas jan walïkaspa?

¹⁵ Diosan uñisirinakapax kunayman tuqitwa cristianonakar aynachtʼayañ munapxistu. Yaqhip jilat kullakanakax nuwjata, televisión tuqis jan ukax radio tuqis jiskʼachjata, taripañ utanakar apata ukhamaw uñjasipxi. Jesusan arunakapax phuqasiskapuniwa (Mat. 5:11, 12). Ukampis kunjamtï Romanos 12:17 jiskʼa tʼaqax siskixa, janiw “ñanqhat ñanqha kuttʼaya[ñasäkiti]” (1 Pedro 3:16 liytʼasiñapawa).

16, 17. ¿Kuna yantʼansa mä tamanxa uñjasipxatayna?

¹⁶ Aynachtʼayañ munatpachasa, “ñanqharux askimpi atipja[skakiñasawa]”, ukhamatwa yaqhanakax suma jaqïtas yatipxani. Uk amuytʼañatakix Pacífico siski uksa tuqinkir islanakan utjir mä tamat parltʼañäni. Jesucriston jiwatap amtañatakiw mä uta maytʼasipxatayna. Ukampis uk yatxatasax jankʼakiw uka chiqan utjir mä iglesian pastoranakapax yaqha tantachäwi uka utan apañ amtapxatayna, pachpa horaruw waktʼayapxarakitayna. Uk yatisax janiw qhiptʼayapxätati sasaw policianxa uka pastoranakar sapxatayna. Ukampis jilat kullakanakax tantachäwi qalltañataki puripxäna ukhaxa, uka utax wali phuqäskänwa, ukhakiw qalltañäni sas sarnaqasipkatayna.

¹⁷ Uk uñjasaxa, uka jaqinakar ananukuñatakiw policiax wakichasiskäna. Ukatwa uka iglesia sarayirix mä irpir chuymanir akham jisktʼäna: “¿Jumanakax tantachasipxarakïtati?” sasa. “Jïsa” sataxa, “janiw yatkayätti” sasakiw säna. Uk istʼasaxa, “¡kamisaraki jan yatipxätasti! Jichha alwakirakis sasipksmaxä” sasaw mä policiax jankʼaki arsunirakïna. Ukham satax lartʼasisakiw uka jaqix jilatar akham sarakïna: “¿Jichhast kamachapxarakïtasti? Phuqäskarakisa. ¿Policiampit ananukuyapxitäta?” sasa. Jilat kullakanakas jupanakar jan wal lurapkaspa ukham uñjayañatakiw uka sipit wakichapxatayna.

18. ¿Kunsa jilat kullakanakax yantʼatäsax lurapxäna, ukat kunas qhanstäna?

¹⁸ ¿Kunsa uka jilatanakax lurapxpachäna? Jumanakay ukhamax nayraqat tantachasipxam sasaw 30 minutonak churapxatayna. Ukat qhiptʼatas tukuyapkchïnxa, sarxapxäna ukhax walikiw jilat kullakanakax tantachasiñ qalltxapxäna. Qhipürusti, kunas pasatayna ukanak yatxatañatakiw marka apnaqirix mä qhawqhanir khitanitayna. Ukatxa, iglesia sarayirin juchapat ukham jan walix utjawayi sasaw qhanstayapxäna, jilat kullakanakax janiw juchanïpkänti. Ukhamax yaqhanakan yatipxañapataki uk qhanañchapxañamaw sasaw uka iglesiankirinakar sapxatayna. Ukat walik ukham paciencia uñachtʼayapxtaxa sasaw uka jaqinakax jilat kullakanakar sapxarakitayna. Ukhamasti, taqinimpi sumankañax wali askiwa.

19. ¿Jaqi masimp sum apasiñatakix kunas wakisiraki?

¹⁹ Ukat jaqi masisampi sum apasiñatakixa, arunakasax “sumäñapapuniwa” sasaw Bibliax qhanañcharaki. Jutïr yatichäwinwa uka tuqit jukʼamp yatxataskañäni.

[Qhanañchäwi]

¿Kamsasmasa?

• ¿Kunatsa jaqix coleratak sarnaqaski?

• Colerampi atipayasiñax janiw walïkiti, ¿kunjamsa Biblian parlki uka jaqinakax uk uñachtʼayistu?

• ¿Cristian masisan chuym ustʼayatax kamachañasasa?

• ¿Uñisirinakan ñanqhachatax kamachañasasa?

[Jisktʼanaka]

[16 janan fotopa]

Simeonampi Levimpix colerampi atipayasisin jan walinak lurasaw kuttʼanipxäna

[18 janan fotonakapa]

Yaqhanakar sumachtʼañatakix munasiñampi arxayañasawa