Jiwaskam yanaptʼasipxañäni
Jiwaskam yanaptʼasipxañäni
“Chʼamañchasipxam maynit maynikama.” (1 TES. 5:11.)
1. ¿Kuna askinaksa cristian taman jikxattanxa, ukat kuna llakinakas utjaraki?
CRISTIAN tamankañax wali askipuniwa. Jehová Diosampis wali sum apastanxa, ukat yatichäwinakaparjam phuqasax sumakiw jakastanxa. Diosan kamachinakap pʼakintasin llakinakar puriñatsa qhispiraktanwa, ukat chiqpach amigonak jikxataraktanxa. Jïsa, ¡Diosan markapanxa walja bendicionanakaw utji! Ukampis kunayman llakinakan uñjasiraktanxa. Yaqhip jilat kullakanakaxa, Biblian yatichäwinakap jan amuytʼirjamäsax wal llakisipxi, ukat yaqhipasti usuntasasa, jan walinakar purisasa wali llakitaw jikxatasipxaraki. Ukatxa, Diosat jithiqtat jaqinak taypinxa kunayman tuqit yantʼataw uñjasiraktanxa.
2. ¿Jiwas taypit maynix llakin uñjasispa ukhax kun lurañasasa, ukat kunatsa?
2 Jilat kullakanakar tʼaqhisiskir uñjasax wal llakistanxa, cristian tamax mä cuerpükaspas ukhamawa sasaw apóstol Pablox säna, ukatxa “cuerposan mayawjatix tʼaqhischi ukkhax taqpacharakiw tʼaqhisi” sasaw sarakïna (1 Cor. 12:12, 26). Kunapachatï jiwas taypit maynix llakinakan uñjasini ukhax yanaptʼasiñasawa. Uka tuqit sum amuytʼañatakixa, kunjamsa nayra cristianonakax llakinakan uñjasisax yanaptʼasipxäna, uka tuqit jichhax mä qhawqha uñjañäni. Ukampis jupanakat yatxatkasax akham jisktʼasiñasawa: “¿Kunjamsa nayax llakit jilat kullakanakar yanaptʼiristxa? ¿Kunjamsa cristian masinakajar yanaptʼasax taman nayrar sartañapataki yanaptʼiristxa?” sasa.
“Utaparuw irpapxi”
3, 4. ¿Kunjamsa Aquilampi Priscilampix Apolos jilatar yanaptʼapxäna?
3 Apolos sat mä nayra jilatat parltʼañäni, jupax Éfeso markar sarasaw Diosan arunakapat jan axsartʼas yatichäna. Kunjamtï Hechos libron siskixa: “Kusisit chuymampirakiw parläna, Jesusxat qhanpach yatichasa”. Ukampis janiw “Awkina, Yuqana, qullan Ajayumpina sutip[xaru]” bautisatäkänti, jan ukasti ‘Juanan bautismopak uñtʼäna’. Jupax 33 maran Pentecostés urut nayraw Diosan arunakapat istʼpachäna, inas Juan Bautistan arkirinakapat yatiqchïna, jan ukax Jesusan pachpa arkirinakapat yatiqchïna. Ukhamaxa, janiw Diosan tamapat sum yatkänti. ¿Kunjamsa jilat kullakanakax jupar yanaptʼapxäna? (Hech. 1:4, 5; 18:25; Mat. 28:19, MT.)
4 Mä kutixa, mä sinagoganwa Apolos jilatax taqi chuyma yatichaskäna. Arunakap istʼasinxa, Aquilampi Priscilampiw utapar irpasin sum yatichtʼapxäna (Hechos 18:24-26 liytʼasiñapawa). Kunjamas cristian tamax uttʼasïna, ukat nayrar sartaskäna ukanakwa munasiñampi sumat qhanañchtʼapxäna. Ukham munasiñampi yanaptʼatax walpun Apolos jilatax uka chacha warmir yuspärpachäna. Qhipatxa, chuymar purtʼkir arstʼäna, Acaya markankir jilat kullakanakarus wal yanaptʼarakïna (Hech. 18:27, 28).
5. ¿Kunsa walja jilat kullakanakax lurasipki, ukat kunsa jikxatapxi?
5 ¿Kunjamatsa jumax Diosan markapar mantawayta? Mayniw Bibliat yatiqañ yanaptʼawaypachätamxa, ukat juparux wal yuspärpachätaxa. Chiqansa, kunatsa Bibliat yatiqañax wakisi, uk amtasaw jumar yatichañatakix walja phaxsinak chʼamachasiwaypacha (Juan 17:3). Jichhax maysa tuqit amuytʼarakiñäni, kunapachatï jumax Bibliat sum yatxatasin ukarjam sarnaqañataki chʼamachasiyäta, ukat Jehová Diosar katuyasiyäta ukhaxa, yatichirimax wal kusisirakpachäna. Jichhax wali sum jupampi apasipxpachätaxa.
“Wali suma jaqitwa uñtʼapxäna”
6, 7. 1) ¿Kunatsa Pablox jupamp chika sarañapataki Timoteor ajllïna? 2) ¿Kunjamsa Pablox Timoteor yanaptʼawayi?
6 Pay kuti misionerjam sarkasaw Pablompi Silasampix Listra markan jakasir mä waynitur uñtʼapxatayna, Timoteo satänwa, inas niya 20 maranïchïna. Uka waynitux ‘wali suma jaqiw’ sasaw “Listrankir ukhamarak Iconionkir” jilatanakax yatiyapxäna. Eunice mamapasa ukat Loida awichitapasa cristianüpxänwa, ukampis tatapax janiw cristianükänti (2 Tim. 1:5). Inas misionerjam nayrïr saräwipan Pablox Timoteon familiapar uka chiqanakan uñtʼchïna. Ukampis jichhaxa, Diosar taqi chuyma luqtaskir Timoteo waynaruw sum uñtʼañ munäna ukat yanaptʼañ munarakïna. Ukat tamapankir irpir chuymaninakar jisktʼasaw Pablox Timoteor jupamp chik irpäna (Hechos 16:1-3 liytʼasiñapawa).
7 Pablomp chik sarasax wali askinak Timoteox yatiqpachäna. Qhipatxa, jupa lanti tamanak tumptʼir sarañapatakiw Pablox khitäna. Niya tunka phisqan maranakaw Pablomp chikax wal irnaqtʼäna, inas nayrax axsarir waynächïna, ukampis qhipatxa wakichtʼat irpir chuymanïxänwa (Fili. 2:19-22; 1 Tim. 1:3).
8, 9. ¿Kunjamsa wayn tawaqunakar yanaptʼsna? Mä experienciat qhanañchtʼam.
8 Jichhürunakanxa, chʼikhi wayn tawaqunakax waliw Diosan markapan utji. Jilïr jilat kullakanakaw Diosar jukʼampi luqtapxañapatakix yanaptʼapxaspa, ukhamatwa wayn tawaqunakax aski luräwinaksa taman katuqapxani. Pachpa tamasat amuytʼañäni. ¿Timoteo waynjam yanaptʼasiñ munir wayn tawaqunakax utjiti? Jilïr jilat kullakanakan yanaptʼatax wali sumaw precursorjamasa, misionerjamasa ukat Betel utansa irnaqtʼapxaspa, ukat tamanak tumptʼirjamas irnaqtʼapxarakispawa. Ukampis ¿kunjamsa uka wayn tawaqunakarux ukham irnaqtʼapxañapatak yanaptʼsna?
9 Martin sat mä jilatat parltʼañäni. Mä urux tamanak tumptʼir jilatampiw Diosan arunakapat yatiyir saratayna, uka jilatax Betel utan waynäkasax luqtatayna. Ukatxa Diosan Utapan irnaqañax wali khusapuniwa, jumax ukan luqtir sararakisma sasaw Martinur wal chʼamañchtʼatayna. Ukhamatwa Martinux Diosan markapan jukʼamp luqtañxa amtawayi. Tunka maranak qhipatxa Betel utan irnaqañ qalltawayi, niya pä tunka maranakaw jichhakamax ukan luqtaski. Wali sumpun uka jilatax yanaptʼawayitu sasaw amtasi. Ukhamax jilïr jilat kullaka, ¡jumax ukhamarakiw Diosar luqtañ tuqitxa wayn tawaqunakar yanaptʼasma!
“Mayjtʼatanakarux chʼamañchtʼapxam”
10. ¿Kunjamas Epafroditox jikxatasïna, ukat kunatsa?
10 Diosan arunakap yatiyatap laykuw Pablox Roma markan carcelan jistʼantat uñjasïna. Ukatwa Filipos markankir jilat kullakanakax Epafrodito sat mä jilatar Pablor uñjir khitapxatayna. Iyaw sasaw Epafroditox Filipos markat Roma markar puriñkamax jilat kullakanakan irayap aptʼasita qarin qarin wali jay saratayna. Ukat Pablor yanaptʼañatakiw mä qhawqha urunak Roma markan qhiparañ munäna. Ukampis purisaxa, walpun usuntäna, niya “jiwirjamarakïnwa”. Ukat jan yanaptʼirjamäsax wali llakitaw jikxatasïna (Fili. 2:25-27).
11. 1) ¿Kunatsa yaqhip jilat kullakanakax llakimp aynachtʼapxi? 2) ¿Kunsa Pablox Filipos markankir jilat kullakanakarux amtayäna?
11 Jichhürunakanxa, ukhamarakiw yaqhipax jan walinakan uñjasisax llakimp aynachtʼapxi. Sapa tunkatxa, paninix kunjamatsa llakinakampix aynachtʼapxakipuniwa sasaw Organización Mundial de la Salud satäki ukan sapxi. Jehová Diosan luqtirinakapas ukhamarakiw awisax llakimp aynachtʼsna. Sañäni, yaqhipatakix familiar uñjañax wali chʼamawa, ukat yaqhipasti usuntasas jan ukax jan walinak lurasas wal llakisipxaraki. ¿Epafroditorux kunjamsa Filipos markankir jilat kullakanakax yanaptʼapxaspäna? Pablox akham sasaw jupanakar iwxtʼäna: “Taqi kusisiñampi juparux katuqapxam kunjämatix mä Tatitunkir jilatarux katuqañäki ukhama. Uka casta jupjam jilatarusti munasipxapunim, niyakitix jiwirjamäxchïnxa Cristor serviñ layku. Jakañapsa niyapuniw nayar yanaptʼasin aptʼasi, niyakixay jumanakax jani yanaptʼiri jutirjamäpkstatixa uka layku” sasa (Fili. 2:29, 30).
12. ¿Kunjamsa llakitanakarux yanaptʼsna?
12 ¿Jiwasax janit llakimp ayñachtʼaskir jilat kullakanakar yanaptʼañasäkarakispa? Diosar luqtañatakix kunjamsa chʼamachasiski ukanak amtayasaw chuymachtʼsna. Sañäni, inas bautisasiñatakisa jan ukax precursorjam luqtañatakis wal chʼamachasiwaychi. “Ukham luqtatamatxa Jehová Diosax wal kusispacha, nänakas ukhamarakiw kusisipxta” sasaw chuymachtʼsna. Ukatxa, usuntata jan ukax chuymankipstat jilat kullakanakarus chʼamachtʼañasarakiwa. Janis Diosar nayrjam luqtxapxchixa, wali respetomp uñjañasawa. Ukat janiw khititsa armasiñasäkiti, Jehová Diosax akham sistuwa: “Mayjtʼatanakarux chʼamañchtʼapxam, tʼukhanakarusti yanaptʼapxarakim, taqinimpis llampʼu chuymanïpxarakim” sasa (1 Tes. 5:14).
“Perdonxapxam chuymachapxarakim”
13, 14. 1) ¿Kuna jan walinsa Corinto markankir tamax uñjasïna, ukat kunas pasäna? 2) ¿Juchanir tamat jaqsuñax kunatsa wakisïna?
13 Corinto markankir tamaxa mä jan walin uñjasïna. Mä jilataw wachuq juchan sarnaqatayna, ukat janirakiw arrepentiskänti. Ukham jan wal sarnaqasax tamaruw qʼañuchäna, ukat jaqinakarus jan wal parlayäna. Ukatwa Pablox “jumanak taypitxa alissupxam” sasin säna (1 Cor. 5:1, 7, 11-13).
14 ¿Uka iwxar istʼañax askïnti? Jïsa, ukhamatwa cristian tamarux jan walinakat jarkʼaqasïna. Ukat jucharar jaqisti, taqi chuyma arrepentisitapwa luratanakampi uñachtʼayarakïna. Ukatxa, payïr cartap apayasinxa uka jaqir katuqxapxam sasaw Pablox Corinto markankir tamar sarakïna. Ukampis janiw aliqaki katuqapxañapäkänti, Pablox akham sasaw jupanakar säna: “Jichhax uka jaqirux perdonxapxam chuymachapxarakim inampis llakisiñatxa sinti mayjtʼasispa” sasa (2 Corintios 2:5-8 liytʼasiñapawa).
15. ¿Tamar kuttʼanirinakarux kunjamsa katuqañasa?
15 ¿Kunsa jiwasax yatiqsna? Kunapachatï maynix tamat jaqsuta uñjasi ukhaxa llakistanwa. Juchar purisax inas Diosan sutipsa tamapsa qʼañuchawaychi. Ukat jiwasarus jan walin uñjasiychistu. Ukampis taman katuqatäxañ mayispa ukhaxa, ¿kamachsnasa? Nayraqatxa irpir chuymaninakaw Diosan Aruparjam amuytʼapxani. Kuttʼaniñ munirix juchapat arrepentisisin sum sarnaqxchi ukhaxa, taman katuqañwa irpir chuymaninakax amtapxañapa, ukhamäni ukhax Jehová Diosan perdonatapaw uñachtʼayasini (Mat. 18:17-20). ¿Janit jiwasax uka jilatar jan ukax kullakar perdonañasäkarakispa? Jan perdonañ munksna ukhaxa, Jehová Dios conträksnas ukhamäspawa. Chiqas taqiniw mä wawaki sum sarnaqasiñ muntanxa, ukat Diosampis sum apasiñ munaraktanxa. Ukhamasti, khitinakatix juchar purtʼasin arrepentisxapxi ukat tamar kuttʼanxapxi ukanakarux munasiñamp katuqxañasawa (Mat. 6:14, 15; Luc. 15:7).
“Nayarux yanapitaniwa”
16. ¿Kunatsa Pablox Marcosatak chuym usuyasïna?
16 Khitinakatix chuym ustʼayapkistu ukanakarus perdonañasarakiwa. Mä kutixa, Juan Marcos jilataw Pablor chuym ustʼayatayna. Kunapachatï Pablompi Bernabeampix misionerjam sarañ qalltapkäna ukhaw uka waynar yanapirit irpapxatayna. Ukampis mä akatjamatak jupanakar jaytasin utapar sarxatayna, kunatxay sarxchïna ukax janiw yatiskiti. Ukatwa Pablox Marcosatak wal coleräna. Ukat kunapachatï, mayampi misionerjam sarañ amtapxäna ukhaxa, Marcosar irpañäni sasaw Bernabeax säna, ukampis Pablox janiw irpañ munkänti, ukatwa jupanakkamas tuqtasipxäna. Mayamp sarxarakikispaw sasaw Pablox sispachäna (Hechos 13:1-5, 13 ukat 15:37, 38 liytʼasiñapawa).
17, 18. ¿Pablompi Marcosampi sumthapipxatapxa kunjamatsa yattanxa, ukat kunsa yatiqassna?
17 Ukampis Pablon jan irpañ munatpachas Marcosax misionerjam irnaqaskakïnwa, Bernabeampiw yaqha chiqar sarapxäna; janiw llakimp aynachtʼkänti (Hech. 15:39). Chiqansa, taqi chuymaw Diosan arunakapat yatiyäna, ukat atiniskay jaqïnwa. Qhipa maranakatxa wali sum Pablox Marcosat parlxäna. Roma markan carcelankkasin Timoteor jawsasaxa, akham sasaw Pablox säna: “Marcosaru thaqtam ukatsti jumamp chika irpanim, irnaqäwixanxa nayarux yanapitaniwa” sasa (2 Tim. 4:11). Ukhamasti, Pablox janiw Marcosatak colerxänti.
18 ¿Jiwasax kunsa jupanakat yatiqsna? Pablon jan irpañ munatpachas Marcosax misionerjam nayrar sartañatakix chʼamachasiskakïnwa. Diosar taqi chuyma luqtirjamax janiw colerat qhiparapkänti. Marcosax wali yanaptʼasiriw sasaw Pablox qhipat sarakïna. Jiwasax ukhamarakiw awisax maynimp jan waltʼayassna, ukampis ¿askichxasax kunamp lurañas wakisispa? Jan walinakxa armasxañasawa, ukatxa yaqha jilat kullakanakar Diosar luqtapxañapataki yanaptʼañasawa. Jïsa, Diosar taqi chuyma luqtaskakiñäni ukhaxa, taman nayrar sartañapatakiw yanaptʼañäni.
Yanaptʼasisipkakiñäni
19. ¿Kunatsa maynit maynikama yanaptʼasiñasa?
19 Aka “jan wali” “qhipa urunakanxa”, taqiniw llakinakan uñjastanxa, ukhamasti maynit maynikam yanaptʼasiñax wakisipuniwa (2 Tim. 3:1). Inas awisax sinti llakinakan uñjasisax aynachtʼsna, ukampis Jehová Diosaw ukanakar saykatañ yanaptʼistaspa. Awisax jilat kullakanakampiw yanaptʼayistaspa, ukat jiwas tuqis jupanakar yanaptʼarakispawa (Isa. 30:20, 21; 32:1, 2). Ukhamasti, sapa maynis Pablon aka iwxanakapar phuqañataki chʼamachasiñasawa, jupax akham sänwa: “Chʼamañchasipxam maynit maynikama, kunjämtix jichhas lurapktas ukhama” sasa (1 Tes. 5:11).
¿Kunjamsa qhanañchasma?
• ¿Taman maynit maynikam yanaptʼasiñax kunatsa wakisi?
• ¿Kuna jan walinakansa jilat kullakanakasax uñjasipxi, ukat kunjamsa yanaptʼsna?
• ¿Kunatsa sapa maynis yanapiritakïtanxa?
[Jisktʼanaka]
[11 janan fotopa]
Jilat kullakanakar yanaptʼapxañäni
[12 janan fotopa]
Walja chʼikhi wayn tawaqunakaw Diosan markapan utji