¿Kunatsa Diosan markapankañasa?

“Waranq waranq jaqinak taypin jachʼar aptäma.” (SAL. 35:18.)

1-3. 1) ¿Kunjamatsa mä cristianox jan walinakan uñjasispa? 2) ¿Kunjamsa Jehová Diosax Supayat jarkʼaqistu?

 MÄ KUTIXA, jachʼa qutar sarañwa Joel jilatampi warmipampix amtapxatayna. Mascarampi uchtʼata ukat samsuñataki tuboni ukhamaw jachʼa qutar matasaxa, jachʼan jiskʼani kunayman color chawllanak uñjapxatayna. Jukʼamp manqhar mantasax akham sasaw warmipax satayna: “Sinti manqharuw manttanxa” sasa. Ukampis “jan llakisimti, walikïskañäniwa” sasaw chachax sarakitayna. Ukatxa mä akatjamat uka chawllanakax chhaqharxatayna, “¿kunas kamachi?” sasaw jisktʼasipxatayna. Tiburón sat mä jachʼa chawllakiw jupanak jakʼan uñstxatayna. Uk uñjasax wal mulljasipxatayna. Janiw kawkir imantasiñas utjkänti. Ukampis wali jakʼankkasaw uka tiburonax kuttʼawayxatayna.

² Mä cristianox ukhamarakiw Supayan apnaqat akapachanxa, jan walinakan uñjasispa. Kusistʼañanakasa, yänak munañasa ukat pachpa irnaqäwis jan walinakaruw puriyistaspa. Uka Joel jilatax irpir chuymanjamaw taman luqtaski, jupax akham siwa: “Ukham añcha jan walin uñjasisaxa, kawkin sarnaqañas wakisi uka tuqitwa sum amuytʼasta. Diosar yupaychañ tuqitxa, kawkinsa jan walinakat qhispsna uka chiqankañasawa, mä arunxa, cristian tamankañasawa” sasa. Jïsa, tama taypinkañataki chʼamachasiñasawa; janiw akapach yänak munasin saparstʼañasäkiti. Ukat jumatix tamat saparstʼatäkasmas ukham amuyassta ukhaxa, mäki tamar jakʼachasiñamawa. Jan ukax Jehová Diosat jayarstʼataw uñjasisma.

³ Cristianonakatakix akapachan sarnaqañax wali chʼamäxiwa (2 Tim. 3:1-5). Supayax manqʼat awtjatjamaw sarnaqaski, ukat tiempopas niyarakiw tukusiski, ukatwa jan amuyasipki ukanakar katuntaski (1 Ped. 5:8; Apo. 12:12, 17). Ukampis jiwasarux Jehová Diosaw Jupampi sum apasiñasatakix markap tuqi arxatistu.

4, 5. ¿Jutïr urunakat jaqinakax kamsapxisa, ukat kunatsa?

⁴ Akapachanxa janiw kʼumar jakasiñax utjkiti. Kawkinsa nuwasiñanaka ukat jiwayasiñanakakiw utjaski. Kun altʼasiñatakis janirakiw qullqis utjasxiti, ukat umas samanas qʼañuchatäxarakiwa. Ukatxa janirakiw khitis chuymankipstañatsa usunakatsa qhispkaspati. Maysa tuqitxa, inas yaqhipax mä utani, suma irnaqäwini ukat qullqisituni ukham kʼumaraki sarnaqasipxchi, ukampis ukanakax tukusirikiwa.

⁵ Inakiw jaqinakax sumankañ thaqhapxi. Familianwa kusisiñ jikxatä sasaw casarasipxi, ukampis amtanakapax janiw phuqaskiti. Ukat Diosar yupaychañ tuqitsa ukhamarakiwa, jaqinakax iglesianakar sarasax antisakiw pantjasxapxi. Pachpa pastoranakaw jan wal sarnaqapxi ukat Diosan arunakap maysar uñtayasaw kʼarinak yatichapxi. Ukatwa jaqinakax jupanakar jan istʼañ munapkiti, janis kunatakïkaspa ukhamak amuyxapxi. Ukat ciencia tuqirukiw atinisxapxi, kuna askinak lurañas sapa maynitäxiwa, ukax chuymasankiwa sasaw sapxi. Ukatwa kunakis pasani sasin jisktʼasipxi, ukat yaqhipax janirakiw jutïr urunakat kuns yatiñ munapkiti.

6, 7. 1) ¿Kunatsa cristianonakax mayninakjam jan amuyapki? 2) ¿Kuna tuqitsa jichhax yatxatañäni?

 ⁶ Cristianonakax janiw akapachankir jaqinakjam amuyktanti. Awisax jupanakjamas llakinakan uñjastanxa, janiw uka llakinakampi aynachtʼktanti (Isaías 65:13, 14 ukat Malaquías 3:18 liytʼasiñapawa). Kunatsa jaqinakax jan walinakan uñjasipxi ukxa Bibliaw sum qhanañchistu, ukat llakinakar saykatañatakis wakichtʼatarakïtanwa. Ukhamasti, kunanakas jutïrin pasani ukanakatxa janiw sinti llakisktanti. Ukat Jehová Diosan luqtirinakapjamax jan wali amuyunakatsa, kʼari yatichäwinakatsa jithiqtatätanwa; wachuq juch lurasin jan walinakar puriñatsa jarkʼaqatarakïtanwa. Ukat kunatsa cristian tamanxa wali sum sarnaqastan ukxa janiw yaqhanakax amuyapkiti (Isa. 48:17, 18; Fili. 4:6, 7).

⁷ Chiqansa, kunjamsa Jehová Diosax nayra luqtirinakapar yanaptʼäna ukanakxa wali sum Bibliax parli. Jiwasarux ukhamaw wali sum uñjarakistu. Ukampis uka nayra luqtirinakat yatxatasinxa, kunjamsa sarnaqasktan, kunjam chuymanïtansa ukanak amuyasiñasawa. Ukhamatwa Diosan wali aski kamachinakaparjam sarnaqañatakix wakichtʼatäñäni (Isa. 30:21).

Niyapuniw tinküna

8. ¿Jehová Diosan luqtirinakapax kunjamsa nayratpach sarnaqapxäna?

⁸ ¿Diosar jan istʼir jaqinakamp sarnaqañax walikïskiti? Janiwa, Jehová Diosan luqtirinakapax nayratpachas janipuniw ukham jaqinakampix sarnaqapxirïkänti. Ukatxa, Supayan arkirinakapaw markajar uñisipxani sasaw Diosax qalltatpach satayna (Gén. 3:15). Ukat cristianonakax janiw Diosan kamachinakap pʼakintañ munktanti, ukatwa akapachat jithiqtat sarnaqtanxa (Juan 17:15, 16; 1 Juan 2:15-17). Ukampis ukham sarnaqañax chʼamakiwa. Ukatwa yaqhip jilat kullakanakax akham sasin jisktʼasipxi: “¿Ukham  chʼamachasis sarnaqañax janit inamayäkpacha?” sasa.

9. ¿Salmo 73 jalja qillqirirux kunas llakisiyäna?

⁹ Diosar luqtasax pantjaskaspas ukhamawa Salmo 73 jalja qillqirix amuyasïna, jupax inas Asaf chachan wawapächïna. ¿Kunatsa jan wali jaqinakax sumaki ukat kusisit sarnaqapxi, ukampis Diosar taqi chuym luqtirinakax tʼaqhisipxi?, sasaw jisktʼasïna (Salmo 73:1-13 liytʼasiñapawa).

10. ¿Kunatï Salmo 73 qillqiriru llakisiykäna uka tuqit amuytʼañax kunatsa wakisi?

¹⁰ Inas jumax ukham jisktʼasiraksta. Ukampis janiw sinti llakisiñamäkiti, janiw Jehová Diosatsa jithiqtkasma ukham amuyasiñamäkiti. Diosan nayra luqtirinakapasa, pachpa Biblia qillqirinakasa ukhamarakiw awisax amuyasipxirïna (Job 21:7-13; Sal. 37:1; Jer. 12:1; Hab. 1:1-4, 13). Chiqas khitinakatix Dios nayraqatan sum sarnaqañ munapki ukanakax sapa mayniw akham jisktʼasipxañapa: “¿Diosar luqtañat sipansa yaqha suma thakix utjaspati?” sasa. Ukarjam amuytʼasiñax wali askiwa. Amtañäni, Diosar luqtañat sipansa yaqha suma thakis utjkaspa ukham parlasaw Supayax Edén huertan Diosan jachʼakankañapar qallasïna (Gén. 3:4, 5). Ukhamasti, kunas Salmo 73 qillqirirux llakisiyäna uka tuqit sapa mayni amuytʼañasawa. “Jan wali jaqinakax kusisitakis sarnaqapxixä, jupanakjamäskirista”, ¿sañax askïspati? ¿Jupanakjam sarnaqañ layku Jehová Diosat jithiqtañax walikïskaspati? Chiqas ukwa Supayax muni.

11, 12. 1) ¿Kunjamatsa Salmo 73 qillqirix amuytatasïna, ukat kunsa jiwasax yatiqassna? 2) ¿Salmo qillqirjam amuytʼasiñxa kunas jumar yanaptʼtamxa?

¹¹ ¿Kunas Salmo 73 qillqirirux amuytʼasiñ yanaptʼäna? Niyapuniw Diosan chiqa thakipat saranukta sasaw säna, ukampis “Diosan qullan utapar manta[saw]” amuytʼasïna, mä arunxa, templor mantasaw amuytatasïna, ukanwa Diosar yupaychir jaqinakampis chikachasïna ukat Diosan amtanakapatsa yatiqäna. Ukhamatwa kunarus juchararanakax puripxani uk amuytʼäna, ukat janiw jupanakjam tukusiñ munkänti. Jan wali jaqinakax “llustʼa chiqa[nkapxiwa]”, ukat khitinakatix qʼañu luräwinakan sarnaqasin Jehová Diosar jaytapki ukanakax “axsarañamp tukjataw” uñjasipxani sasaw amuytʼasïna. Ukampis Diosan taqi chuyma luqtirinakapax yanaptʼatäpxaniwa sasaw sarakïna (Salmo 73:16-19, 27, 28 liytʼasiñapawa). Ukax chiqäskapuniwa. Inas yaqhipax Diosar jan istʼasin munañasar sarnaqañax wali khusäkaspas ukham amuyapxchispa. Ukampis kuntï lurapkani ukarjamaw walinsa jan walinsa uñjasipxani (Gál. 6:7-9).

¹² ¿Kunampsa salmo qillqirit yatiqaraksna? Diosan markapanwa yatiñkankañ jikxatäna ukat jan walinakat jarkʼaqatas jikxatasïna. Ukat Diosan luqtirinakapamp chikachasisaw chiqaparjam sum amuytatasirakïna. Jichhürunakanxa, ukhamarakiw tantachäwinakan yatiñkankañsa, suma iwxanaksa ukat Diosat suma yatichäwinaksa katuqtanxa. ¡Ukatwa Jehová Diosax tantachäwinakar sarapxapunim sasin amtayistu! Uka tantachäwinakanwa sum sarnaqañatakix chʼamsa yanapsa jikxattanxa (Isa. 32:1, 2; Heb. 10:24, 25).

Khitinakat amuyasiñasasa

13-15. 1) ¿Kunarus Dinax purtʼasïna, ukat kunsa jiwasax yatiqsna? 2) ¿Jilat kullakanakampi sarnaqañax kunatsa wali aski?

¹³ Jichhax Dina sat mä tawaqut parltʼarakiñäni, jupax Jacobun phuchapänwa. Jan wali jaqinakampiw chikachasitayna. Utap jakʼan jakasiri Canaán markankir tawaqunakampiw sarnaqäna sasaw Génesis librox qhanañchi. Ukampis uka tawaqunakax janiw Diosan kamachinakaparjam sarnaqapkänti. Canaán markankir jaqinakax yaqha diosanakaruw yupaychapxäna ukat wali nuwasirïpxänwa; jan phinqʼaniw wachuq juchanakansa sarnaqapxäna.  Uka markax ukham jan walinakampi phuqantatänwa sasaw yatxattʼat jaqinakax qhipat sapxi (Éxo. 23:23; Lev. 18:2-25; Deu. 18:9-12). Ukhamasti, ¿uka tawaqunakamp sarnaqasax kunarus Dinax purtʼasïna?

¹⁴ Uka markanxa Siquem sat mä waynaw utjäna, jupasti familiapanxa wali suma sarnaqirit uñtʼata, ‘wali aytat’ waynänwa (Gén 34:19). Ukampis uka waynax “munkir jan munkirwa [Dinampi] ikintäna, ukhamat deshonrarakïna” (Gén. 34:1, 2, NM). ¡Uka jan walir purtʼasiñastï! ¿Dinax uka jan walir puriñ amuyaspachänti? Janiwa, jupax masinakapampi parltʼasirikiw sapa kutis sarpachäna, ukatxa janiw kunas paskaniti sispachänwa. Ukampis uka amuyupax janiw walïkänti.

¹⁵ ¿Kunsa jiwasax yatiqsna? Jan wali jaqinakamp sarnaqasas jan ukax Diosar jan uñtʼir jaqinakamp sarnaqasas jan walinakar purikipunsnawa. Ukatwa Diosan Arupax akham sixa: “Jan wali jaqinakampi sarnaqañax suma luräwinaka chhaqhayañawa” sasa (1 Cor. 15:33). Ukhamasti, jan wali jaqinakamp sarnaqañat sipansa, khitinakatix Diosar munasipki ukat kamachinakapsa phuqapxaraki ukanakampi sarnaqañasawa. Chiqas jupanakaw amuyumpi sarnaqañ yanaptʼapxistani, ukhamatwa jan walinakatsa amuyasiñäni (Pro. 13:20).

“Qʼumachatäxapxtawa”

16. ¿Corinto markankir yaqhip cristianonakat Pablox kamsänsa?

¹⁶ Diosan markapax waljaniruw jan wali luräwinak apanukuñ yanaptʼawayi. Kunapachatï apóstol Pablox Corinto markankir cristianonakar nayrïr cartap apaykäna ukhaxa, “jichhax qʼumachatäxapxtawa” sasaw säna. ¿Kunatsa ukham sispachäna? Nayrax wachuq juchanakan sarnaqiri, yaqha diosanakar yupaychiri, chacha pura jan ukax warmi pura sarnaqiri, lunthatasiri ukat machirinaka ukham jan wali jaqinakäpxataynawa, ukampis Diosan kamachinakap istʼasaw taqi uka jan walinak apanukupxäna (1 Corintios 6:9-11 liytʼasiñapawa).

17. ¿Diosan yatichäwinakapax kunjamsa waljanir yanaptʼawayi?

¹⁷ Diosar jan iyawsirinakax janiw sum sarnaqapkiti. Kunjamtï Corinto markankir jaqinakax janïr cristianükasin sarnaqapkänxa, ukhamaw jaqinakax munañanakapar sarnaqapxi, ukat yaqhipasti jan wali jaqinakar uñtasakiw jan wal sarnaqapxaraki (Efe. 4:14). Ukampis khitinakatix Diosan Arupat sum yatxatapki ukat amtanakapsa yatipxaraki ukanakax sum sarnaqañatakiw chʼamachasipxi. Ukat ukarjam sarnaqasaw nayra jan wali luräwinak apanukupxi (Col. 3:5-10; Heb. 4:12). Yaqhip jilat kullakanakax Diosan kamachinakap janïr yatkasaxa, munañaparuw jan walinak lurapxirïna. Ukampis akham sapxiwa: “Ukham sarnaqasax chuymas chʼamaktʼata, wali llakita ukhamaw jikxatasiyäta, Diosan markapar mantasakiw kusisiñ jikxatta, ukat Diosan kamachinakaparjam sarnaqasax chuymas chuymaw jikxatasta” sasa.

18. ¿Mä kullakitax kuna jan walinakarus purtʼasiwayi, ukat kunsa yatiqsna?

¹⁸ Yaqhip jilat kullakanakax tamat jithiqtasaw wali llakinakar purtʼasipxaraki. Mä kullakat parltʼañäni, jupax wawatpachaw Diosan markapankatayna, ukampis 16 maranïxäna ukhaxa, akapachax wali sumäkaspas ukham  amuyasaw saranukutayna. Ukampis jan wal sarnaqasax wali llakinakan uñjasiwayi; usuriptat uñjasisax purakar wawa jiwayasin apsuyasitayna. Jichhax akham sasaw wal amtasi: “Kimsa maraw Diosan markapat jayarstʼat uñjasiwayta, walpun chuym usuyasta, janiw armasiñjamäkiti. Pachpa wawajar kunaw jiwayasta. [...] Yaqhip wayn tawaqunakax akapachan sarnaqañax kunjamäpachas sasaw yantʼañ munapxi. Ukampis ‘¡janipun uk munapxamti!’ sasaw nayax jupanakar sirista. Inas qalltanxa waljamächispa, ukampis qhipatxa jan walinakanwa uñjasipxäta. Akapachanxa janiw kuna askis utjkiti. Kunas akapachan utji uk yatiñ laykuw nayax ukham jan walinakar purtʼasiwayta. Kusisit sarnaqasiñ munasax janipun Jehová Diosan markapat jithiqtapxamti” sasa.

19, 20. ¿Kunjamsa cristian tamax yanaptʼistu?

¹⁹ ¿Diosan markapat jithiqtasax kunarus purtʼassna? Janïr cristianükasax chuymas kawkstʼata, wali llakita ukhamaw sarnaqayätanxa. Ukhamax Diosan markapat jithiqtasin akapachar kuttʼsna ukhax janipuniw akchʼas walïkaspati (Juan 6:68, 69). Supayan apnaqat akapachanxa jan walinakakiw utjaski, ukampis ukanakat qhispiñatakix Diosan markapankañasawa. Ukatsti, jilat kullakanakar jakʼachasiñasawa, tantachäwinakar sarañsa janirakiw armasiñasäkiti. Ukhamatwa Diosan aski kamachinakaparjam sarnaqañatakix chʼam katuqañäni. ¿Jichhax kun lurañas waktʼistu? Kunjamtï salmonak qillqirix “waranq waranq jaqinak taypin” Jehová Diosar jachʼar aptkänxa, ukham jachʼañchañasarakiwa (Sal. 35:18).

²⁰ Maysa tuqitxa, kunayman llakinakanwa jilat kullakanakas uñjasipxaraki, Diosan kamachinakap jan pʼakintas sarnaqañas chʼamarakiwa. Ukhamax jiwaskam yanaptʼasiñaw wakisi. ¿Jumax kunjamsa jan walin uñjasir cristian masimar yanaptʼasma ukat chuymachtʼasma? Uka tuqinakatwa jutïr yatichäwin yatiqaskañäni (1 Tes. 5:11).

¿Kamsasmasa?

• ¿Salmo 73 qillqirin sarnaqäwipat kunsa yatiqsna?

• ¿Kunsa Dinan sarnaqäwipat yatiqsna?

• ¿Kuna jan walinakatsa Diosan markapax jarkʼaqistu?

[Jisktʼanaka]

[7 janan fotopa]

Jan walinakar puriñjamäki uka chiqanakat jithiqtapxañäni, tamankapxañäni