¿Yaqhampit sarxi? ¿Kunas yanaptʼiristamxa?

MARGARITAMPI Raulumpix walja maranakaw Jehová Diosar precursorjam luqtapxäna. * Ukampis wawanïxapxäna uka qhipatxa, jukʼat jukʼatwa Raulux Diosat jithiqtawayxäna, ukat qʼañu luräwinakan sarnaqxäna, ukhamatwa tamat jaqsuta uñjasiwayi. “Kunapachatï taqi ukanakax paskäna ukhax wali aynachtʼatapuniw jikxatasiyäta. Janipuniw chuymas chuymäkayätti, ukat janirakiw kunas kamachañjamäkänti” sasaw Margaritax amtaraki.

Kullaka Juanarux niya ukhamarakiw chachapax chuym pʼakintatayna. Casarasxapxäna ukat mä qhawqha tiemporuxa, nuwjirïnwa. Juanax akham siwa: “Nayraqat chʼakhuntkitu ukhaxa, janiw chiqaw sañjamäkänti, ukat jiskʼachata, pʼinqachata ukhamaw jikxatasiyäta. Ukat perdonxita sipanxa nayax perdonxtwa. Qhipanakatxa walj kutiw uka pachpax pasäna, ukat nayax perdonxarakiyätwa. Cristianjamax perdonañajawa, uka jan walinaksa armxañajawa, sasaw sirïta. Kunatï paskäna ukanak yaqhar yatiyasax chachajarus aljantkirista ukham amuyirïta, irpir chuymaninakarus janiw yatiyañajäkaspati sirïtwa. Ukhamaw walja maranak pasawayi, sapa kuti nuwkitäna ukhax perdonxirïtwa. Ukat nayar munañapatakix nayaw kuns lurañajäxa sasaw amuyarakirïta. Ukampis kunapachatï jiskʼa imill wawajampir  jaytanukupxitu ukhaxa, wali llaktʼatapuniw jikxatasiyäta. Jan sarxañapatakix kunataraki jan kuns lurkpachätxa sasaw nä pachpa juchañchasirïta” sasa.

Inas jumax uka kullakanakjam jikxatasiraksta. Inas chachaman yaqhampi sarxatapat llakita jikxatasta, qillqi tuqitsa, Diosar yupaychañ tuqitsa aynachtʼaraksta. Jan ukax inas warmiman jan wal sarnaqatap laykux chuymas pʼakintata ukat wali llakita uñjasiraksta. Kunjamtï Biblian siskixa, “jan wali tiemponakan” jikxatastanxa. Ukat “qhipa urunakanxa” familianakax jan walinakan uñjasipxani, munasiñas janiw utjxaniti, ukat jan wali sarnaqatanakapampix Diosar jan istʼañ munapxatapwa walja jaqinakax uñachtʼayapxarakini sasaw uka pachpa profecian qhanañcharaki (2 Tim. 3:1-5). Chiqpach cristianonakax uka jan waltʼäwinakan uñjasiraktanwa. Ukhamasti, yaqhampi sarxatap layku, llakimpi jan aynachtʼañatakixa, ¿kunas yanaptʼiristamxa?

¿Jehová Diosax kamsisa?

Kamisarak jupapuni ukham luritanisti sañjamäspawa. Ukat chachaman jan ukax warmiman jan wal sarnaqatapatxa inas juchañchasiraksta.

Jan juchañchasimti, Jesusax janis pantjasirïkchïnxa, uka kasta jan walin uñjasirakïnwa, mä munat amigopaw aljantäna. Jesusaxa, Diosar maytʼasisa ukat wali amuyumpiw tunka payan apostolanakar ajllïna, jupanakasti taqi chuymaw Jehová Diosar luqtapxäna. Ukat kunapachatï Judas sat mä arkiripax “aljantäna” ukhax wal chuym usuyaspachäna (Luc. 6:12-16). Judasan jan wal sarnaqatapatxa Jehová Diosax janiw Jesusar juchañchkänti.

Chiqas taqiniw juchararätanxa. Ukatwa chachatsa warmitsa pantjasiraktanxa. Diosan amuytʼayatäsax akham sasaw salmonak qillqirix säna: “Dios Tatay, jumatix taqpach juchanak amxäsiskakismaxa, ¿khitirak nayraqataman saytʼaspasti?” sasa (Sal. 130:3). Ukhamasti, chachas warmisa, Jehová Diosat yatiqasisin mayninakan pantjasitanakap perdonapxañasawa (1 Ped. 4:8).

Ukampisa, sapa “mayni[w] Diosarux luräwinakasat cuenta churañäni” (Rom. 14:12). Chacha warmit maynitï nuwchi, jan ukax arunakampi chuym usuchjchi ukaxa, Jehová Diosaruw cuenta churani. Maynir ukham tʼaqhisiyañax janipuniw Diosatakix akchʼas walïkiti. Jaqichatanakax janipuniw kunäkipansa ukham tʼaqhisiyasipxañapäkiti, respetompi uñjasipxañapawa (Sal. 11:5; Efe. 5:33; Col. 3:6-8). Chiqas mä jilatas jan ukax mä kullakas colerampi sapa kuti atipayasiskchi, ukat janiraki cambiañ munkchiti ukhaxa, tamat jaqsutaw uñjasispa (Gál. 5:19-21; 2 Juan 9, 10). Maynitï wachuq juchan sarnaqchixa, chachas jan ukax warmis irpir chuymaninakar yatiyatapatxa janiw chuym liqʼisiñapäkiti. Jehová Diosax ina chʼusat jan walin uñjasipki ukanakat khuyaptʼayasiwa.

Wachuq juchan sarnaqir jaqix janiw warmipa jan ukax chachap contraki juchachaskiti, jan ukasti Jehová Dios contraw juchachasi (Mat. 19:4-9; Heb. 13:4). Khititï Diosan kamachinakaparjam sarnaqañataki chʼamachaski ukax janiw maynin jan wal sarnaqatapat juchañchasiñapäkiti.

Kunjamas jikxatasta ukxa Diosax sum yati. ¿Kunatsa ukham sistanxa? Jehová Dios pachpaw ukham chuym usuchata jikxatasïna. Jupax Israel markan esposopäkaspänsa ukhamwa Biblian parli, ukat kunapachatï uka markax yaqha diosanakar yupaychäna ukhaxa, wal chuym usuyasïna sasaw qhanañcharaki (Isa. 54:5, 6; Jer. 3:1, 6-10). Ukhamasti, yaqhampi sarxatap laykux kunja chuyma usutas jikxatasta ukxa, Diosax sum yati (Mal. 2:13, 14). Ukat kunas yanaptʼiristam uksa yatirakiwa.

¿Kunjamsa Diosax yanaptʼistu?

Jehová Diosax markap tuqiw yanaptʼarakistu. Ukhamaw kullaka Juanarux yanaptʼarakïna,  jupasti akham siwa: “Chachajan divorcio mayitapatxa, wali llaktʼatapuniw jikxatasiyäta. Uk yatisaw tamanak tumptʼir jilatax utajkam chuymachtʼir jutatayna. Bibliat jiskʼa tʼaqanak liytʼarapitu, ukat kamsañs muni uk amuytʼayarakitu, mayasti 1 Corintios 7:15 jiskʼa tʼaqawa. Ukhamatwa nä pachpas jan juchañchasxti, ukat janiw añcha llakisxayätti” sasa. *

Margaritarux ukhamarakiw Jehová Diosax tamap tuqi yanaptʼäna, jupasti akham siwa: “Jan wal sarnaqatapatxa, chachajax janiw arrepintiskänti, ukatwa jiskʼa wawanakajampix yaqha markar sarxta. Purisax pä cuarto alquilasta. Qhipürusti wali llaktʼatapuniw qʼipinak jaratataskayäta, ukhamaruw punk liqtʼanipxi, utanijäpachaw sayätwa. Ukampis jistʼarta ukhaxa, kawkïr kullakatï mamajarus ukat taqpach familiajärus Bibliat yatichapkitäna uka kullakarukiw uñkatta. Jupasti janiw nayan ukankataj yatkänti, jan ukasti, utanijan Bibliat yatiqañ munatap laykuw jutatayna. ¡Uka kullakar uñjasax chuym qhanartayasta! Taqi kunatï paskäna ukanak yatiyta, ukat panpachaw jachaqtʼasipxta. Jupasti ukürpach tantachäwir sarañatakiw yanaptʼitu. Uka tamansti sum katuqtʼapxitu, irpir chuymaninakas jankʼakirakiw Diosar yupaychañ tuqit wali sum yanaptʼapxitu” sasa.

¿Jilat kullakanakax kunjams yanaptʼapxarakispa?

Kunayman tuqitwa jilat kullakanakax yanaptʼapxarakispa. Amuytʼañäni, Margaritax irnaqiriw sarañapäna, ukatwa mä familiax nänakaw wawanakamar escuelat mistunipxani ukhax uñjarapipxirisma sasaw sapxäna.

“Diosan arunakapat yatiyirix nänakamp sarapxañäni sasaw jilat kullakanakax jawsanipxitu, ukwa walpun yuspärtxa” sasaw Margaritax saraki. Chiqas ukhamaw jilat kullakanakax “taqi kuna apañanakanxa” maynit maynikam yanaptʼasisax “Criston leyip phuqha[sipki]” (Gál. 6:2).

Ukham jan walinakan yanaptʼatax walpun Jehová Diosar yuspärapxi. Jichhax Mónica sat kullakat parltʼañäni, pusi wawampi ukat 15.000 dólar qullqi manumpwa chachapax apanukuwayäna, Monicax akham sasaw amtasi: “Jilat kullakanakax walpun yanaptʼawayapxitu. Jan ukax kunakïkasapäna. Jehová Diosax wali sumpun jupanak tuqix yanaptʼawayitu, uka jilat kullakanakaw wawanakajarus wal yanaptʼawayapxi. Ukhamatwa wawanakajax jichhakamas Diosampix sum apasipxi. Kuna amtar puriñatakis irpir chuymaninakarupuniw jisktʼasirïta,  jupanakasti sum amuytʼayapxirïtu. Llakita jikxataskayäta ukhax wali sum istʼapxirïtu” sasa (Mar. 10:29, 30).

Jan walinakan uñjasiwayktan ukanak amtañax janiw walïkiti, llakisiyistaspawa, ukatwa chiqpach amigonakasax uka tuqit jan parlxapxistuti (Ecl. 3:7). Uka tuqitxa Margarita kullakax akham siwa: “Kullakanakampix llakinakaxat parlañat sipansa, Diosan arunakapat yatiyañ tuqita, Bibliat maynir yatichañ tuqita ukat wawanak tuqit parlañaw wali khusänxa. Chiqas jan walinak armxasin machaqat qalltañwa jilat kullakanakax wal yanaptʼawayapxitu” sasa.

Jan kikpat kikpa kuttʼayamti

Maysa tuqitxa, kunatsa chachapas jan ukax warmipas jan wal sarnaqi ukxa wal amuyasipxi. Ina chʼusat jan wali uñjasisax wal chuym usuyasipxi. Ukampis ukham colerataki sarnaqaskaspa ukhaxa, Diosat armasisaw jan walinak lurañ amtarakispa. Sañäni, inas ukhamat ukhama kuttʼayañ munapxchispa.

Jumatï ukhaman jikxatasirakstaxa, Josué ukat Caleb chachanakat amtañaw yanaptʼätamxa. Jupanakax Suma Uraqi uñaqir sarasax niyaw jiwañarus puripxatayna. Ukampis maynïr uñaqirinakax janiw Diosarux atinisipkänti, mayni israelitanakarus pantjasiyapxänwa, ukhamatwa markas Diosat jithiqtat uñjasïna. Yaqhip israelitanakax qalamp kunaw Josué ukat Caleb chachanakar kʼupjañ munapxäna (Núm. 13:25–14:10). Uka paninix janis juchanïpkchïnxa, juchaninakamp chikaw pusi tunka maranak wasar pampanakan sarnaqapxäna.

Josué ukat Caleb chachanakax wal chuym usuyasipxpachäna, ukampis janiw colerampix atipayasipkänti, ni coleratas qhiparapkarakïnti. Jan ukasti, Diosar taqi chuyma luqtaskakiñatakiw wal chʼamachasipxäna. Pusi tunka maratsti, Josué, ukat Caleb chachanakax levitanakamp chikaw Suma Uraqirux mantapxäna, Jehová Diosax jupanakarukiw ukham bendicïna (Núm. 14:28-30; Jos. 14:6-12).

Yaqhamp sarxatap laykux walja tiempow llakita uñjasisma. Matrimoniomax inas ukharuki tukuschini, ukat chuyma usuchjatas uñjaschïta, jan ukax qullqi tuqit pistʼañas utjarakchini. Ukampis janiw uka llakinakampix aynachtʼañamäkiti, Jehová Diosaw jan istʼasir jaqinakampix kuns luraskani. Kunjamtï uñjaniwayktanxa, jan istʼasir israelitanakarux Diosaw taripaskäna (Heb. 10:30, 31; 13:4).

¡Uka llakirux atipasmawa!

Jehová Diosan yatichäwinakapat yatxatañaw llakinakar saykatañ yanaptʼätamxa. Juana kullakat amtañäni, jupax akham siwa: “La Atalaya ukat ¡Despertad! sat revistanakat discor apsutäki ukanak istʼaña, ukat tantachäwinakar sarañaw wal yanaptʼawayitu. Taqpach tantachäwinakan arstʼañatakiw chʼamachasirïta, ukaw jan wali amuyunak apanukuñ yanaparakitu. Diosan arunakapat yatiyañax ukhamarakiw wal yanaptʼitu. Diosar iyawsapxañapataki yaqhanakar yanaptʼasax nä pachpas yanaptʼaskirista ukhamïriwa. Ukat Bibliat yatiqirinakar yanaptʼasaxa, kunatï jukʼamp wakiski ukanak lurañatakiw yanaptʼawayarakitu” sasa.

Kullaka Monicasti akham sarakiwa: “Tantachäwinakar sarasa ukat Diosan arunakapat yatiyir sarasax janiw llakimp aynachtʼawaykti. Wawanakajampi chikax jukʼampwa jilat kullakanakar jakʼachasipxta. Uka jan walinakan uñjasisax kuna tuqinakat chʼamachasiñajas wakisi ukanakwa amuytʼasiwayta. Uka jan waltʼäwir saykatañax wali chʼamänwa, ukampis jan aynachtʼañatakix Diosaw wal yanaptʼawayitu” sasa.

Jumax uka kasta jan waltʼäwinakarux atipjarakismawa. Yaqhampi sarxatap laykux llakitas jikxataskstaxa, apóstol Pablon aka iwxanakaparjam phuqañaw yanaptʼätamxa: “Aski lurañanxa janiw qarjasiñasäkiti, janitix qarjkañäni ukaxa, horasaparuw cosechxa apthapiñäni” (Gál. 6:9).

[Qhanañchäwinaka]

[31 janan fotopa]

Yaqhampi sarxipanxa, Diosat yatiyir sarañaw waljanir yanaptʼawayi