Amuyapxapuniñäni ukat askinakwa jikxatañäni

TAMAMAX yatiyki uka chiqanakanxa, ¿khitinakarus yatiyasma uk amuyapuntati? Turku markankir jilat kullakanakaxa, kunjamatsa yatiyapxaspa ukwa amuyapxatayna ukat askinakwa jikxatapxatayna. Turku markax lamar quta thiyankiwa, Finlandia markana.

Turku markankir jilat kullakanakaxa, Asia tuqinkir walja jaqinakar purinir uñjapxatayna. Uka jaqinakaxa, barconak lurapki uka chiqaruw lamar qutnam sarir mä jachʼa barco tukuyañatak purinipxatayna. Jupanakax markan hotelanakan qurpachasipxäna ukat sapüruw wali alwat irnaqäwipar autonakat sarapxäna, ukwa mä jilatax yatitayna ukat jankʼakiw inglés arut tamankir jilat kullakanakar yatiyir saratayna.

Anqäx markat jutir walja jaqinakar uñjasinxa, Diosan Apnaqäwipat yatiyañax wali askispaw sasaw irpir chuymaninakax amuyapxäna, ukatwa uka jaqinakar yatiyañatakix chʼamachasipxäna. Uka semanatxa domingpachaw kawkhantï autonakax sayapki uka jakʼanakan tunka jilat kullakanakax paqallq alwa horasar tantachasipxatayna. Ukampis janiw mä irnaqiris utjkänti, ukatwa akham jisktʼasipxäna: “¿Qhiptʼanipxpachätanti? Jan ukaxa, ¿Turku markat sarxapxpachacha?” sasa. Ukampis mä akatjamatwa irnaqañ isimp isthapit mä jaqix esquinat uñstanïna. Ukat yaqhaw purinïna, ukat yaqhampis purisinkakïnwa... Ukat mä jukʼxarux waljanïxapxänwa. Ukat Jilat kullakanakax Bibliat apstʼat inglés arut qillqatanak lakirañwa qalltapxäna. Autonakax mä hora qhipatwa mistupxäna, uka tiemponx sumpunwa uka jaqinakar parlttʼawayapxäna. Sarxapxäna ukhaxa, 126 folletonaka ukat 329 revistanakwa apasiwayapxäna.

Ukham walja askinak jikxatasaxa, jutïr semanax wasitamp yatiyir sarañatakiw jilat kullakanakax amtawayapxäna, uka semanax tamanak tumptʼir jilataw visittʼaskäna. Suxta chikatan alwa horasaruw tamanak tumptʼir jilatax yatiyir mistuñatak tantachäwi sarayäna, ukat pä tunka pusini yatiyirinakaw autonakax sayapki uka chiqar sarapxäna, uka urux jalluskänwa. Pasïrinxa, Filipinas markat jutir jaqinakaruw jikxatapxatayna, ukatwa Bibliat apstʼat tagalo arut walja qillqatanak apapxäna. Uka alwaxa, uka jaqinakax irnaqäwipar autonakat sarxapxäna ukhaxa, 7 libronaka, 69 folletonaka ukat 479 revistanakwa katuqasipxatayna. Yatiyir sarañatak chʼamachasipxäna ukanakax wali kusisitapuniw jikxatasipxäna.

Anqäx markanakat jutir jaqinakax janïr markanakapar sarxapkipanxa, jilat kullakanakax waljaniruw hotelanakapar visittʼir sarapxatayna ukat Diosan Apnaqäwipat sumpach qhanañchtʼapxatayna. Uka irnaqir jaqinakatxa, waljaniw jilat kullakanakar akham sapxatayna: “Jehová Diosan Qhanañchirinakapampix yaqha markanakanx parlapxtwa ukat Finlandia markankasax nänakamp parltʼapxatamatxa yuspärapxsmawa” sasa.

Tamamax yatiyki uka chiqanakanxa, ¿khitinakampirus yatiyasma uk amuyapuntati? ¿Yaqha markat jutirinakar thaqhañataki ukat yatiyañatak chʼamachasisktati? Ukhamächi ukhaxa, Turku markankir jilat kullakanakjamarakiw walja askinak jikxatasma.

[32 janankir mapa/foto]

(Sumpach amuytʼañatakix qillqatn mistki uk uñxatañamawa)

FINLANDIA

HELSINKI

Turku