Yapu apthapiñax waliw utji

“Irnaqasipkakim jukʼampi jukʼampi Tatitun luräwipanxa.” (1 COR.15:58.)

1. ¿Jesusax arkirinakapar kamsänsa, ukat kunatsa?

 KHÄ 30 maranxa, akham sasaw Jesusax arkirinakapar mä phuju jakʼan satayna: “Uñtapxam, yapunakax niyaw puquratäxi” sasa, Samaria tuqinkir Sicar sat mä marka jakʼanwa ukham satayna (Juan 4:35). Ukampis ¿chiqa yapunakatti parlaskäna? Janiwa, suma chuyman jaqinak apthapiñ tuqit parlaskäna, jupanakaw arkiripar tukupxañapäna. Uka arunakampixa, tiempox jukʼakiw utjxi, jankʼaki jaqinak apthapir sarapxam sasaw saskäna.

2, 3. 1) ¿Kunjamatsa yapu apthapiñ tiemponkatas yattanxa? 2) ¿Kuna tuqinakatsa aka yatichäwin yatxataskañäni?

² Jiwasatakixa, uka arunakax wali askirakiwa. Jichhas yapu apthapiñ horasäkaspa ukhamawa. Chiqansa, taqi chiqanwa Diosan arunakapax aka maranakan yatiyasiski, ukhamatwa waranq waranqa jaqinakax Jesusan arkiripar tukusin bautisasiwayapxi. Ukat ¿janit jiwasatakix Yapuniru, mä arunxa, pachpa Jehová Diosar suma chuyman jaqinak apthapiñ yanaptʼañax askïki? Jïsa, wali askipuniwa. Ukampis ¿sapa maynit yapu apthapiñ “jukʼampi jukʼampi” yanaptʼasktanxa? (1 Cor. 15:58.)

³ Jesusax kimsa mara chikataniw suma chuyman jaqinakar apthapiñ tuqit arkirinakapar sum yatichawayäna. Kunjam chuymanïpxañapänsa ukanak qhan uñachtʼayäna. Jiwasax ukham chuymanïsarakiwa Diosan yapupxa sum apthapsna, mä arunxa, Jesusan arkiripar jaqinak tukuysna. Ukhamasti, uk jichhax kimsa tuqit uñjañäni.

Altʼat chuymanïñasawa

4. ¿Kunjamsa Jesusax altʼat chuymanïñ arkirinakapar yatichäna?

⁴ Amuytʼañäni: Jesusan arkirinakapax khitis jilïrixa sasaw jupanakkam jiskhisisipki. Ukat chuymas ustʼata ukhamaw uñchʼukisisipki. Uk uñjasaw Jesusax jupanak taypir mä jiskʼa yuqall wawar jawsi, ukat akham siwa: “Kawkïritix aka jiskʼa yuqalljama altʼat chuymani tukunixa, ukawa jilïrix alaxpach qhapaq markanxa, [Machaka Testamento]” sasa (Mateo 18:1-4 liytʼasiñapawa). Khititï aytatäki, qamirïki ukat munañanïki ukarukiw jaqinakax respetomp uñjapxäna. Ukampisa, Jesusan arkirinakapax janiw ukham amuyapxañapäkänti, jan ukasti, “kawkïritix [mä] jiskʼa yuqalljama altʼat chuymani tukunixa” ukaw jilïrïni sasaw Jesusax säna. Ukhamasti, arkirinakapax chiqpach altʼat chuymanïpxañapänwa, ukhamatwa Diosan bendicionapsa katuqapxaspäna.

5, 6. ¿Kunatsa Diosar luqtañatakix munañanakasat armasiñasa? Mä uñachtʼäwimpi uk qhanañchtʼma.

⁵ ¿Janit jaqix jichhürunakan ukhamäkaraki? Jïsa, kawkinsa qamirïña, munañanïña ukat aytatäña ukak jaqix munaski. Diosat yatxatañatakis jan ukax luqtañatakis janiw tiemponïxapxiti (Mat. 13:22). Ukampis khitinakatix Diosan bendicionap katuqañsa ukat chuymapar purtʼañsa munapki ukanakaxa, mayninakat sipansa “altʼat chuymani” sarnaqapxañapawa, mä arunxa, janiw munañanakapak thaqhapxañapäkiti. Ukhamaw Diosan luqtirinakapax kusisit sarnaqasipxi (Mat. 6:24; 2 Cor. 11:7; Fili. 3:8).

⁶ Franciscot parltʼañäni, jupax irpir chuymanjamaw luqtaski. Waynäkasax mä jachʼa yatiqañ utanwa yatiqaskäna, ukampis precursorjam luqtañatakiw mistxatayna. Ukat akham siwa: “Jaqichasiñatak parlatanïxayät ukhaxa, mä suma irnaqäwi thaqhasin walja qullq jikxatiriskayäta. Ukampis precursorjam  irnaqtʼañatakiw chacha warmpacha amtawayapxta. Ukat wawanïxapxayäta ukhax chʼamakïxänwa, ukampis Jehová Diosaw kuntï amtawayapkta ukanak phuqañ yanaptʼawayapxitu. Niya kimsa tunk maranak jilaw irpir chuymanjam taman yanaptʼaskta, ukat yaqha tuqinakans yanaptʼawayaraktwa. Chiqansa, Diosar ukham luqtasax janiw amtasipkti” sasa.

7. ¿Kuntï Romanos 12:16 qillqatax siski ukarjam phuqasktati?

⁷ Ukhamasti, Jehová Diosaru, mä arunxa, Yapunir suma chuyman jaqinak apthapiñ yanaptʼañatakisa ukat bendicionanak katuqañatakisa, ‘altʼat chuymanïñasawa’, janiw kunanakatix jachʼar aptkistaspa ukanak thaqhañasäkiti (Rom. 12:16; Mat. 4:19, 20; Luc. 18:28-30, NM).

Qʼaphäñasawa

8, 9. 1) Qullq katuqir kimsa uywatanakat parlir uñachtʼäwit qhanañchtʼma. 2) ¿Khitinakarus uka uñachtʼäwix wal chuymachtʼaspa?

⁸ Ukat Jehová Diosan yapup apthapiñatakix qʼaphäñasarakiwa. Uka tuqit sum amuytʼañasatakixa, qullq katuqir kimsa uywatanakat Jesusax parläna. * Uka uywatanakar qullq jaytasaw uywirix yaqha markar saratayna. Maynirux phisqa waranqa qullq jaytawayäna, maynirusti pä waranqa ukat maynirux mä waranqaraki. Uywirin saratapatxa, phisqa waranq katuqirimpi, pä waranq katuqirimpixa jankʼakiw uka qullqimpix “negocio” lurapxäna. Ukampis mä waranqa katuqkäna uka uywatax jayränwa, uka qullqxa uraqiruw imantäna. Ukat kunapachatï uywirix kuttʼankäna ukhaxa, walja yänakxaruw qʼapha uywatanakarux uchäna. Ukampis jayra uywatatxa qullq aparasïnwa, ukat utapatsa alisnukurakïnwa (Mat. 25:14-30).

⁹ ¿Jumax kawkïr uywatjamäñsa munasma? Chiqasa, kunjamtï uka qʼapha uywatanakax irnaqapkänxa, ukhamarakiw taqinis Jehová Diosatak wal irnaqañ muntanxa. Ukampis yaqhipaxa, ukham irnaqañ munkasas janiw phuqirjamäpkiti. ¿Kunatsa? Yaqhipax chuymankipsta jan ukax usuntata ukhamaw uñjasipxi, ukat yaqhipasti, familiatakiw walja horanak irnaqapxaraki. Jiwasatix ukhaman jikxatastan ukhaxa, uka uñachtʼäwix wal chuymachtʼistani.

10. ¿Uywatanakapar sum uñtʼatapxa kunjamsa uywirix uñachtʼayäna, ukat kunatsa jiwasar ukax chuymachistu?

¹⁰ Uywirix “sapa mayniruw [...] chʼamaparjama” qullq churawayäna (Mat. 25:15). Ukhamaxa, qhawqsa lurapxaspa uk sum amuyäna. Phisqa waranqa qullqi katuqirixa, pä waranqa  katuqirit sipans walja qullq uywirir kuttʼayäna. Ukampis ¿pä waranq katuqirirux kamsänsa? “Walikiwa, jumax wali suma servirïtawa” sasaw sarakïna, ukat panpachaniruw jukʼamp suma lurañanak churäna (Mat. 25:21, 23). Jehová Diosax ukhamarakiw qhawqsa sapa maynis lurirjamätan ukanak sum yati. Jupar luqtañatakix qhawqsa chʼamachasisktan ukxa sum uñjaski, ukat ukarjamaw bendicistani (Mar. 14:3-9; Lucas 21:1-4 liytʼasiñapawa).

11. ¿Kunjamsa Jehová Diosax qʼapha luqtirinakapar bendici? Uk mä uñachtʼäwimp qhanañchtʼma.

¹¹ Jan walinakan jikxataskasas Jehová Diosarux qʼapha chuymamp luqtaraksnawa, ukwa Selmirax uñachtʼayistu, uka kullakax Brasil markan jakasi. Mä uruxa, pä lunthatanakaw chachapar jalxatasin jiwayapxatayna, ukat aksaruxa pä tunk maranakaw pasxi, sapakiw kimsa imill wawanakapar uywarawayi. Uka kullakax empleadjamaw walja horanak irnaqäna, ukat irnaqäwir puriñatakix wali jay autot sararakïna. Ukhampachasa, precursorjam luqtañatakiw tiempo apstʼasïna. Ukat phuchanakapatxa paniniw precursorjam jupamp chik luqtawayapxaraki. Selmirax akham siwa: “Jichhakamaxa, pä tunka jilaniruw Diosan markapar mantañ yanaptʼawayta, familiajäpkaspas ukhamwa jupanakampix jichhakamas wali sum apasipxta. Chiqansa, ukham mä suma familiax janiw nayatakix kawkins utjkaspati” sasa. ¿Kunjamsa Yapunix mä arunxa, Jehová Diosax uka qʼapha kullakar uñjpacha? Selmirax walja bendicionanak katuqawayi.

12. ¿Kunjamatsa Diosar taqi chuym luqtañ munatas uñachtʼaysna?

¹² Kunjamtï yatktanxa, janiw taqinis yapu apthapirix walja horanak sarirjamäktanti. Ukampis sapa mayniw qʼapha chuymampi Diosar sum luqtañatakix chʼamachassna. ¿Kunas ukham luqtañatakix yanaptʼistaspa? Yatiyañatak Tantachäwix walpun yanaptʼasi. Uka tantachäwinwa Diosan arunakapat sum yatiyañatakisa ukat kawkin yatiyañsa yatiqtanxa (2 Tim. 2:15). Maysa tuqitxa, tamamp chik walja tiempo yatiyir mistuñatakix sapa mayniw amuytʼasiñasaraki, inas yaqha luräwinak jittʼayañas jan ukax apunukuñas wakischispa (Col. 4:5).

13. ¿Diosar taqi chuym luqtañatakix kunas yanaptʼistani?

¹³ Kunapachatï maynix kuns muni ukhaxa, wal uk jikxatañatakix chʼamachasi, janiw jayraskiti (Sal. 40:8). Ukampis mä waranq qullqi katuqir jayra uywatat amtañäni, uywirix jan sinttʼasir qhuru jaqïkaspas ukham amuyäna. Ukatwa qullq katuqasax uraqir ukhamak imantxäna. ¿Kunsa uka uywatat yatiqsna? Jan jupjam amuyañatakixa, Yapunimpi, jan ukax Jehová Diosampi sum apasiñasawa. Ukatakixa, Arup liyiñatakisa ukat munasiñapata, pacienciapat ukat khuyapayasiñapat lupʼiñatakis tiempo apstʼasiñasawa. Ukhamatwa Yapunitakix taqi chuym irnaqañäni; janiw jayraskañäniti (Luc. 6:45; Fili. 1:9-11).

‘Qullanäñasawa’

14. ¿Diosan yapupa apthapiñ yanaptʼañatakix kunjam sarnaqañasasa?

¹⁴ Hebreo Arut Qullan Qillqatanakat amtasax akham sasaw Pedrox sistu: “Qʼuma jakañanpun jakxapxam, jumanakar jawsir Diosasti qullanätap layku. Diosan arunakapan qillqatasti sarakiwa: ‘Jumanakax qullanäpxam, nayasti qullanätwa uka layku’ sasa” (1 Ped. 1:15, 16; Lev. 19:2; Deu. 18:13). Ukhamasti, Diosan yapup apthapiñ yanaptʼañatakix Dios nayraqatan qʼum sarnaqañataki chʼamachasiñasawa. Ukampis ¿ukham sum sarnaqañatakix kunas yanaptʼistaspa? Diosan chiqa yatichäwinakapaw Jupatakjam sum sarnaqañ wal yanaptʼistani.

15. ¿Diosan yatichäwinakapax kunatakis sapa maynir wal yanaptʼistaspa?

¹⁵ Diosan yatichäwinakapax umamp sasiwa, ukaw jan wali luräwinakat qʼumachasiñ  yanaptʼitu. Alaxpachar sarir cristianonakaxa, tamjamax Cristotaki mä esposar uñtatawa sasaw Pablox säna, jupanakax Dios nayraqatan “umampi ukhamarak arupampi” Criston qʼumachatawa ukat ‘yaqhachatäpxarakiwa’ sasaw säna (Efe. 5:25-27). Jïsa, Diosan yatichäwinakapax jan wali sarnaqäwinakat qʼumachasiñasatakix wali chʼamaniwa. Jesusax akham sasaw arkirinakapar sarakïna: “Jumanakax qʼumäxapxtawa, yatichapksma uka arunak tuqi” sasa (Juan 15:3). Ukhamasti, Dios nayraqatan katuqatäñatakixa, kunjamtï Arupax yatichki ukarjam qʼum sarnaqañasawa, mä arunxa, uka yatichäwinakampi yanaptʼayasisaw jan walinak apanukuñasa.

16. ¿Kunanakas Diosatakjam sum sarnaqañ yanaptʼistani?

¹⁶ Ukhamasti, Jehová Diosar yapu apthapiñ yanaptʼañ munasaxa, sarnaqañ tuqita yupaychäw tuqita nayraqat qʼumachasiñasawa. Ukat yanaptʼaskakiñatakix janiw qʼañuchasiñasäkiti, jan ukasti, kamachinakap istʼasin Jupatakjam sarnaqañasawa (1 Pedro 1:14-16 liytʼasiñapawa). Kunjamatï qʼumäñatakix umampi sapür jariqasktanxa, ukhamarakiw Diosan yatichäwinakapampix qʼumachasiñasa. Ukatakix Arupat sapür liyiñasawa ukat tantachäwinakar sarasinsa sum istʼañasarakiwa. Ukxarux kamachinakaparjam sarnaqañatak chʼamachasiñasawa. Ukhamatakwa jañchin munañanakaparus aka ñanqha pacharus atipañäni (Sal. 119:9; Sant. 1:21-25). Jïsa, Diosan yatichäwinakapax ukhamaw nayra jan wali sarnaqäwinakatsa qʼumachistaspa (1 Cor. 6:9-11).

17. ¿Akapachamp jan qʼañuchayasiñatakix Biblian kawkïr yatichäwinakapar istʼañasasa?

¹⁷ ¿Jumax Diosan yatichäwinakapampix qʼumachayasisktati? Sañäni, ¿jan walinakamp kusistʼañ tuqit iwxtʼatax kamstasa? (Sal. 101:3.) ¿Diosar jan yupaychir masinakamp sarnaqaktati, jan ukax jupanakat amuyastacha? (1 Cor. 15:33.) ¿Dios nayraqatan qʼañuchkiristam uka jan wali amtanakar atipañatakix taqi chuymat chʼamachasiskta? (Col. 3:5.) ¿Politiconakas chʼaxwapxi ukat marka tuqit saytʼasiñas utji ukhax jithiqtasktati, ukat ukanakax anatañanakan uñjasi ukhas amuyasisktati? (Sant. 4:4.)

18. ¿Sarnaqañ tuqita ukat yupaychañ tuqita qʼumäñax kunatakis yanaptʼistani?

¹⁸ Uka tuqinakat Diosan yatichäwinakaparjam sarnaqäta ukhaxa, wali askïniw jumatakixa. Kunapachatï Jesusax mä uva alin layminakapat parlkäna ukhaxa, alaxpachar sarir arkirinakapat parlaskäna, ukat akham sänwa: “Kawkïri layminakaxatix jan achki ukanakarux [Awkijax] khuchhurarakiwa, ukampis kawkïri layminakatix achki ukanakarux qʼumacharakiwa jukʼampi achuñapataki” sasa (Juan 15:2). Jïsa, jumatix Diosan yatichäwinakapampi qʼumachasïta ukhaxa, walja achunak uñachtʼayäta.

¿Kuna bendicionanaksa jichhas jutïrins katuqañäni?

19. ¿Yapunir wal yanaptʼasax kuna bendicionanaksa Jesusan nayra arkirinakapax katuqapxäna?

¹⁹ Jesusan khä nayra arkirinakapat amtapxañäni, jupan yatichäwinakapar phuqasaw 33 maran Pentecostés urux qullan ajay katuqapxäna, uka qullan ajayun yanaptʼataw “taqi aka uraqpachana” qhanañchapxäna (Hech. 1:8). Uka ajllit cristianonakatxa, yaqhipax Jilïr Irpirinakjamaw sarayapxäna, yaqhipasti misionerotsa ukat tamanak tumptʼiritsa irnaqtʼapxarakïnwa, ukhamaw ‘qhispiyasiñ  arunakat taqi chiqan parlasiñapataki’ wal yanaptʼapxäna (Col. 1:23). Diosan arunakapampi yaqhanakar yanaptʼasax walja bendicionanak katuqapxäna.

20. 1) ¿Yapunir taqi chuym yanaptʼasax kuna bendicionanaksa jumax katuqawayta? 2) ¿Jichhax kun lurañsa jumax amtawayta?

²⁰ Ukhamasti, kusisit chuymampi Diosar yapu apthapiñ sum yanaptʼañatakix altʼat chuymanïñasawa ukat qʼaphäñasarakiwa, ukatsti Diosan yatichäwinakaparjam sarnaqasin qʼumachasiñasawa. Chiqansa, ukanak phuqasax wali kusisitaw sarnaqastanxa, chuymas chuymarakiwa. Ukampis akapachanxa, jaqix janiw qullqimpis ni jañchin munañanakapampis sisthapirjamäkiti, ukatwa wali llakita, chuymas pʼakintata ukham sarnaqapxi (Sal. 126:6). ¿Ukat kunampis jiwasatakix utji? Kunjamtï Biblian siskixa, “Tatitumpi mayaki irnaqa[tasax] janiw inamayäkiti” (1 Cor. 15:58). Jïsa, Yapunixa, mä arunxa, Jehová Diosax ‘janiw armaskaniti kuntix lurktan’ ukanakatxa, wiñayapuniw amtasini (Heb. 6:10-12).

[Qhanañchäwi]

¿Yatiqatax utjiti?

• ¿Altʼat chuymanïñax kunjamsa Yapunitak taqi chuym irnaqañ yanaptʼistu?

• ¿Kunas Yapunitak qʼapha chuymampi irnaqañ yanaptʼistani?

• ¿Kunatsa sarnaqañ tuqitsa yupaychäw tuqitsa qʼumäñasa?

[Jisktʼanaka]

[17 janan fotopa]

Janiw qamirïñ thaqhañasäkiti, Diosar luqtañaw nayrankañapa