¿Jumax amttati?

¿Aka qhipa phaxsinakan mistkäna Yatiyañataki sat revista liytʼtati? Ukhamächi ukhaxa, aka jisktʼanakar qhanañchtʼma:

• ¿Jesusax sapa wawakïpachänti?

Mateo, Marcos, Lucas, Juan qillqatanakanxa Jesusax jilat kullakanakanïnwa siwa. Marcos qillqatarjamax Nazaretankir yaqhip jaqinakax akham jisktʼasipxäna: “¿Janiti akax [...] Jacobona, Joseana, Judasana, Simonana jilapäkarakixa? ¿Janirakiti kullakanakapax akana jiwas taypinkapkarakixa?” sasa (Mar. 6:3, MT). Ukampis sapa wawakïsapäna ukhaxa, ¿Nazaretankirinakax ukhamti sapxasapäna? Waljaniw Mariarux sapa kuti usur jaqiptir uñjapxpachäna, uk uñjasaw Jesusax jilat kullakanakanïtap yatipxäna (4/1, 13 jana).

• ¿Kunatsa Jesusarux “Cristo” sasïnxa?

“Cristo” aruxa kjristós uka griego arutwa juti, hebreo arutxa maschíaj (mesías) sasirakispawa. Uka pachpa aruxa “ajllita” sañ muni. Nayrax yaqha jaqinakarus ukham sasirakïnwa, kunattix Diosaw jupanakarux kunayman aski luräwinak lurapxañapataki ukat pʼiqtʼapxañapatak uttʼayäna (2 Sam. 22:51). Niyakixay Jesusax jutaniw sat Mesiasächixa, jupaw Jehová Diosan ajllitapaxa, ukatwa ‘Cristo, jakkir Diosan Yuqapa’ sataxa (Mat. 16:16; 4/1, 15 jana).

• ¿Kunatsa Diosax Aaronar mä vaca qallu qurit luratapat jan jiwaykäna?

Aaronax janiw yaqha diosanakar yupaychapxätati siski uka kamachwa pʼakintäna (Éxo. 20:3-5). Ukampis Moisesaw jilapatakix Diosar achiktʼasïna, uka mayisïwipasti ‘wali chʼamanirakïnwa’ (Sant. 5:16). Walja maranakaw Aaronax Diosar taqi chuym luqtäna. Jupax janiw qurit vaca qall lurañ munkpachänti, jan ukasti mayninakan waytʼatakiw lurpachäna. Ukatwa, Leví tatan taqi wawanakapax uka jan wal chhaqtayañ amtapkäna ukhaxa, Aaronas jupanakamp chik Dios tuqit saytʼasïna (Éxo. 32:25-29; 5/15, 21 jana).

• Yaqhampi sarxipanxa, ¿kunjamsa jilat kullakanakax yanaptʼapxaspa?

Diosan Aruparjam sarnaqañataki chʼamachaski uka cristianoxa, chachapan jan ukax warmipan jan wal sarnaqatapat janiw juchañchasiñapäkiti. Diosax kunjamas jikxatasta ukat kunas yanaptʼiristam uk sum yati. Ukat markap tuqis yanaptʼarakiristamwa (6/15, 30 janat 31 janakama).

• ¿Machjayir umañanakampi jan jilanchjañatakix kunanakas yanaptʼiristamxa?

Diosat mayisiñamawa, Biblia liyiñamawa, munañamampi jan atipayasimti ukat suma jaqinakampi sarnaqañamawa. Kuntï amtkta ukanak phuqañataki chʼamachasiñamawa. Ukat qhawqsa umtʼäta uk amuyasiñamawa. Janiw sañsa yatiñamarakiwa (7/1, 7 janat 9 janakama).

• ¿Kunjamsa wawanakamar liytʼañ yatichasma?

Munasiñampi ukat luräwinakamampi yatichätaxa, liytʼañxa wal munapxani. Ukat libronak churasma, jachʼat liytʼarapisma, liytʼawayki uka tuqit arstʼapxañapatakiw mayisma, jachʼat liytʼarapita sarakismawa ukat jisktʼapxañapatakiw chʼamañchtʼarakisma (7/15, 26 jana).

• ¿Kunatsa jaqin parlatapar jan istʼañäki?

Kunatï walïki jan walïki ukanakatxa, Diosax kamspachas sasin jaqinakax janiw jisktʼasipkiti. Ukampis cristianonakjamax Jesucristot yatiqastanxa, jupax mä lawan chʼakkatataw tʼaqhisïna, jan uka kasta jiwañaru phinqʼasisa, ukhamatwa Awkiparu jachʼañchäna (Heb. 12:2; 8/15, 3 jana).

• ¿Kunatsa Jesusax mä jucharar warmirux perdonpachäna?

Adanampi Evampix Diosar kutkatasipkäna ukhaxa, Diosax mä profecía arsuwayäna. Ukarjamax mä Wawaw naciñapäna, mä arunxa, Mesiasaw jutañapäna. Amtap phuqasiñapatakix janipuniw kunas jarkʼkaspati, ukatwa Génesis 3:15 qillqatankki uka profeciax arsuskäna ukhatpach Diosatakix niyas phuqaskaspa ukhamänxa. Ukatwa uka juchachar warmjam arrepentisirinakarux Diosax perdonasapänxa (8/15, 6 jana).