¿Kunatsa horasaparupuni sarnaqañasa?

AWISAX jaya sarañaw waktʼistaspa, ukar puriñatakix tiempo apaqanakas utjakispawa, jan ukax walja lurañanakaw utjistaspa, ukat yaqha jan waltʼäwinakas utjarakispawa, ukatwa horasapar puriñax chʼamäspa. Ukampis horasapar puriñax wali wakiskiripuniwa. Chiqas irnaqäwir tiempopar puririnakaxa, suma irnaqtʼirit uñtʼatäpxiwa ukat atiniskañapxarakiwa. Ukampis qhipa qhip sarnaqirinakansti janiw suma luratanakapax irnaqäwipan uñstkiti ukat mayninakax qhipa qhip sarnaqañwa munapxarakispa. Yatiqañ utanxa, qhiptʼapki ukanakax janiw yaqhip materianak sum yatiqxapxiti. Ukat doctorar jan ukax dentistar sarañats qhiptʼapki ukanakaxa, janiw sums qullayasxapxiti.

Ukampis yaqhip chiqanakanxa, horasapar puriñax janis wakisirïkaspa ukham amuyapxi. Jiwasatï jupanakjam amuyxstanxa, tiempopar puriñataki chʼamachasiñasawa. ¿Kunas ukatak yanaptʼistaspa? Kunatsa horasapar puriñax wali askix ukanak amuytʼañasawa. Ukat sapa maynis akham jisktʼasiñasawa: “¿Kunatsa horasapar sarnaqañataki chʼamachasiñasa, ukat kunas yanaptʼistaspa? ¿Horasapar puriñ yatiqasax kuna askinaksa jikxatsna?” sasa.

Diosax horasapar phuqiriwa

Jehová Diosax yatiqaskañpunwa taqi kuns horasapar phuqi, ukatwa cristianonakjamax Jupat yatiqasiñ muntanxa (Efe. 5:1). Diosax kuntï lurañ amtki ukxa tiempoparupuniw  phuqi. Amtañäni, jan wali jaqinakar Uma Juiciompi tukjañ amtkäna ukhaxa, akham sasaw Noé chachar säna: “Jichhax mä arca lurasim gofer sat maderata” sasa. Ukat Uma Juicio puriniñap jakʼasti, arkar matxam sasaw Diosax sarakïna, ukatsti akham yatiyäna: “Akat paqallqu ururusti nayax mä jachʼa jallu puriyanï, ukasti pusi tunka urumpi, pusi tunka arumampiw jallurakini. ¡Aka uraqitsti taqi kunatix jakki, ukhamarak taqi kuntix nayax uskkta taqi ukanakwa qʼal tukjä!” sasa. Uka arunakapax tiempoparupuniw phuqasïna, “paqallqu uru phuqhasxipansti, jallux walipuniw purintxäna, uraqsti chhaqtayarakïnwa” (Gén. 6:14; 7:4, 10). Noé chachampi familiapampi arkar jan mantapkaspäna ukhaxa, ¿kunakis pasasapäna? Kunjamtï uñjktanxa, Jehová Diosat yatiqasisaw horasapar phuqapxañapäna.

Pusi patak phisqa tunkani maranakatxa, Abrahamarux mä wawanïyätaw sasaw Diosax säna, uka tuqiw jutaniw sat Wawax jutañapäna (Gén. 17:15-17). ¿Kunapachas Abrahaman wawapax naciñapäna? “Akat mä mararuxa”, wawanïpxätaw sasaw Diosax säna.  ¿Uka arunakapax phuqasïnti? Jïsa, kunjamtï Bibliax siskixa, “Sarax usur jaqiptänwa, ukatsti Abrahamatakix mä yuqall wawa wawachasïna, kunapachatix Abrahamax wali chuymanïxan ukapacha. Wawasti Diosan arsutaparjamaw horasapar nacïna” (Gén. 17:21; 21:2).

Jehová Diosax taqi kunsa horasapar phuqirïtapxa, Biblianx walja kutiw uñsti (Jer. 25:11-13; Dan. 4:20-25; 9:25). Ukatwa uka iwxaparjamax Jehová Diosan taripañ urupxa niyas purinkaspa ukham suyañasa. Diosan urupax kunapachay purisinkchini sasaw jaqinakax amuyapxaspa. Ukampis ‘horasaparuw purisinkani’ sasaw Bibliax qhanañchi (Hab. 2:3).

Diosar luqtañatakix horasapar sarnaqañasawa

Diosax ‘qullän tantachäwinak’ uttʼaykäna ukaruxa, maran kims kutiw israelit chachanakax horasapar puripxañapäna (Lev. 23:2, 4). Ukat kuna horarus sacrificionak luqtapxañapäna uksa Diosax yatiyarakïnwa (Éxo. 29:38, 39; Lev. 23:37, 38). Ukhamasti, ¿Jehová Diosax janit uka pachpa maykarakpachïstu?

Nayra maranakanxa, kunjamsa tantachäwinakax apasiñapäna ukwa Pablox Corintonkir cristianonakarux walja tuqit iwxtʼäna. Uka iwxtʼanakatxa maynïrix akänwa: “Taqi kunsa sum lurapxam” sasa (1 Cor. 14:40). Uka arunakarjamaxa, tantachäwinakax mä horaruw qalltañapäna. Jichhürunakanxa ukham lurasiñapwa Diosax munaraki (Mal. 3:6). Ukhamasti, ¿tantachäwinakar horasapar puriñatakix kun lurañas wakisispa?

¿Kunas yanaptʼistaspa?

Suma amuytʼampi kunas wakichasi ukhaxa, sumakiw ukanakax phuqasi (Pro. 21:5). Mä chiqarus sarañamäkaspa ukham amuytʼañäni, horasapar puriñatakix tiempükipanwa utat mistuñama, kunattix jan waltʼañ horasax utjakispawa (Ecl. 9:11). José sat mä wayna jilataxa, horasapar sarnaqirit uñtʼatawa, jupasti akham siwa: “Qhawqha tiempotsa puriñäni uk sum amuytʼañaw horasapar puriñatakix yanaptʼistaspa” sasa. *

Tantachäwinakar horasapar puriñatakixa, inas awisax irnaqäwit tiempükipan mistuñax wakischispa. Etiopía markankir mä jilatarux yaqha horan irnaqxäta sasaw yatiyapxäna. Ukham irnaqasaxa, pusi tunka phisqani minutunak qhiptʼataw tantachäwir purisapäna, ukatwa mayni irnaqir masiparux akham sas achiktʼasitayna: “Tantachäwi urunakax janiräkipanwa irnaqäwit sarxäxa, jumax nä lanti uka horanakan irnaqtʼasmati, ukat nayax paqallq horanakaw juma lantix yaqha horanakan irnaqxäxa” sasa.

Wawaninakatakixa, tantachäwinakar horasapar puriñax chʼamakïspawa. Chiqas taykaw wawanakar wakichtʼi, ukampis mayninakax yanaptʼapxañaparakiwa. México markankir Esperanza kullakat parltʼañäni, jupasti sapakiw kimsaqallqu wawanakapar uywaski, jilïr wawapasti 23 maraniwa, sullk sullkasti 5 maranirakiwa. Jupanakax ¿kunjamatsa tantachäwinakar tiempopar puripxi? Kullakax akham siwa: “Jilïr phuchanakajaw sullkanakar wakichtʼañ yanaptʼapxitu. Ukat nayax kuna lurañanakatï utan utjki ukanak tukuyta ukat wakichtʼasirakta. Ukhamatwa kuna horasarutï mistuñ amtapta uka horasar mistupxta” sasa. Uka familiax kuna horarus utat mistupxani ukxa jupanakaw amtapxäna, ukat ukarjam phuqañatakiw taqinis yanaptʼasipxäna.

Tantachäwinakar tiempopar purisax kuna askinaksa jikxatsna

Horasapar purisax kuna askinakas utjaspa, uk amuyañaw tiempopar puriñatak chʼamachistani. Sandra tawaqut parltʼañäni, uka kullakax janïr qalltkipanwa Tantachasiñ Utar puriñ yati, jupasti akham siwa: “Ukham purisaxa, taqiniruw aruntta ukat parltʼasipxarakta, ukhamatwa jilat kullakanakarux jukʼamp uñtʼaraktxa, ukaw wal kusisiyitu” sasa. Jïsa, tantachäwinak janïr qalltkipan purisaxa, kunjamsa  mayni jilat kullakanakax jan waltʼäwinakan aguantasipki ukat Diosar taqi chuyma luqtasipki ukanak istʼasax chʼamañchtʼasiraksnawa. Ukat jupanakarus chʼamañchtʼaraksnawa. Ukhamatwa taman maynit maynikam munasiña ukat suma luräwinak utjañapatak yanaptʼsna (Heb. 10:24, 25).

Diosar yupaychäwisanxa, qʼuchumpi ukat mayisïwimpi tantachäwinak qalltañax wali wakiskiripuniwa (Sal. 149:1). Qʼuchtʼasax Jehová Diosaruw jachʼañchtanxa, ukat kunjam jaqïñasasa ukwa amtayarakistu, ukat taqi chuyma yatiyir sarañatakiw chʼamañchtʼarakistu. ¿Tantachäwinak mä oracionampi qalltañat kamsaraksnasa? Nayra maranakanxa, templox “oración lurañ” utajawa sasaw Diosax säna (Isa. 56:7). Jichhürunakanxa, Jehová Diosar mayisiñatakiw tantachasiraktanxa. Tantachäwinak mä mayisïwimpi qalltasaxa, Diosan qullan ajayupa ukat yanaptʼap maytanxa, ukat amuyussa, chuymassa wakichtʼañatakiw yanaptʼarakistu, ukhamatwa kuntï yatiqkañäni ukanakxa sum katuqañäni. Ukatwa qalltatpach puriñatakix wal chʼamachasiñasa.

Pä tunk kimsa marani Elena kullakax akham siwa: “Tantachäwi janïr qalltkipan purisaw Jehová Diosar wal munasitax uñachtʼayta, kunattix taqi kuntï ukan yatichaski ukanakax Jupatwa juti, qʼuchunakasa ukat mayisiñasa Diosat jutaraki” sasa. Uka kullakjam amuyañax wali askiwa. Ukatwa taqi kunansa tiempopar phuqañataki chʼamachasiñasa, yämas Diosar yupaychäwisanxa jukʼampïñapawa.

[Qhanañchäwi]

[26 janan fotopa]

Tiempükipan wakichtʼasiñasawa

[26 janan fotopa]

Tiempükipan wakichtʼasiñäni, kunattix jan waltʼañ horasax utjakispawa

[26 janan fotonakapa]

Tantachäwinakar horasapar puriñax wali askiwa