Suma chuymampi ukat munasiñampi parltʼasipxañäni

“Jupax yatiñampiwa parli, ukatsti munasiñampiw yaticharaki.” (PRO. 31:26.)

1, 2. 1) ¿Kunjam jaqïñasasa Jehová Diosan luqtirinakapjamaxa? 2) ¿Kuna tuqinakatsa aka yatichäwin yatxataskañäni?

 LEMUEL sat mä nayra apnaqirirux akham sasaw mamapax satayna: “[Suma warmix] yatiñampiwa parli, ukatsti munasiñampiw yaticharaki” sasa (Pro. 31:1, 10, 26). Chiqansa, janiw warminakakix munasiñampi parlapxañapäkiti. Jan ukasti, taqi cristianonakaw suma chuymampi ukat munasiñampi sum parltʼasipxañapa.

² Ukampis ¿munasiri ukat suma chuymani jaqix kunjamasa? ¿Khitinakarus ukham chuymampi uñjañasa? ¿Kunas munasiñampi ukat suma chuymampi parlañatakix yanaptʼistani? Ukat ¿tama taypin jan ukax familia taypin sum parltʼasiñatakis kunatsa suma chuymanïñasa?

Suma chuymanïñampi ukat munasiñampi

3, 4. 1) ¿Munasiri ukat suma chuymani jaqix kunjamasa? 2) ¿Mä suma jaqix kunjamsa jan uñtʼat jaqinakarus amigonakaparus uñji?

³ Suma chuymanïñampi ukat munasiñampix mayakïkaspas ukhamawa. * Sañäni, suma chuyman jaqix janiw laka mayakix munasiñ uñachtʼaykiti, jan ukasti luratanakampiw mayninakat llakisitapsa, yanaptʼañ munatapsa uñachtʼayi. Ukat munasir jaqisti, janiw jupan askipaki thaqkiti, jan ukasti mayninakan askipwa thaqharaki. Jïsa, kunapachatï maynix ukham suma jaqïki ukhaxa, taqi chuymaw jaqi masipar munasi, janiw sapaki jaytjkaspati.

⁴ Khititï munasirïki ukat suma chuymanïki ukax ‘wali suma katuqtʼasiriwa’ sasaw Bibliax qhanañcharaki. Jïsa, ukham suma jaqix taqiniruw sum katuqtʼañ yati, ukat jan uñtʼatanakar yanaptʼañatakis jankʼakiwa. Ukhamaw Malta islan jakasir jaqinakax 276 payinukut jan uñtʼat jaqinakar wali sum katuqtʼapxäna, apóstol Pablos uka payit jaqinak taypinkänwa (Hech. 27:37–28:2). Maysa tuqitxa, suma jaqinakax taqi chuymaw amigonakaparus munasipxi, mayakïpkaspas ukhamaw wali yatita sarnaqasipxi. Kunjamtï Davitax Mefi-bosetar ‘wali sum uñjkänxa’ ukhamarakiw uñjasipxi (2 Sam. 9:7).

Diosat mayisiñas lupʼiñasa, ¿kunatsa wakisi?

5. ¿Laxras sum apnaqañ kunas yanaptʼistani?

⁵ Ukampis munasiñampi ukat suma chuymampi parlañax chʼamakïspawa. Kunjamtï Santiago 3:8 qillqatan siskixa, “janiw khitis laxrapxa apnaqkaspati. Jan atipjkañjama ñanqhawa laxrasaxa, janirakiw apnaqañjamäkiti. Venenon phuqantatarakiwa”.  Ukampis ¿kunjamatsa laxras sum apnaqsna? Jesusax akham sasaw fariseonakar säna: “Jumanakax arsupxtawa kunatï chuymanakaman phuqhantatäski ukanaka” sasa (Mat. 12:34). Jïsa, kunatix chuymasan utjki ukarjamaw kuns parltanxa. Ukhamax sum parltʼasiñatakix chuymasanwa munasiñax nayraqat utjañapa. Ukatakix janiw Diosat mayisiñsa lupʼiñsa armasiñasäkiti

6. ¿Diosan munasiñapat lupʼiñax kunatakis yanaptʼistu?

⁶ Jehová Diosax “jachʼa munasiriwa” ukat “akapachax munasiña[pa]mpi phuqantatawa” sasaw Bibliax qhanañchi (Éxo. 34:6; Sal. 119:64). Kunjamtï Arupax siskixa, Jehová Diosax wali munasiñampi ukat suma chuymampiw nayratpachas luqtirinakapar uñjirïtayna. Ukat jiwasatix “luratanakapat” lupʼiñäni ukhaxa, Jupjamarakiw jaqi masisarux sum uñjañäni (Salmo 77:12 liytʼasiñapawa).

7, 8. 1) ¿Lot chacharus familiaparus kunjamsa Jehová Diosax munasiñap uñachtʼayäna? 2) ¿Diosan khuyaptʼayatax kunjamsa Davitax jikxatasïna?

⁷ Kunjamsa Jehová Diosax nayra luqtirinakapar qhispiyäna, uk amuytʼañatakix Abrahaman Lot sobrinapat amtañäni. Kunapachatï Sodoma markax niya tʼunjasiñapäkän ukhaxa, Lot chachampir familiapampir qhispiyañatakix pä angelanakwa Diosax khitanitayna. Bibliax akham siwa: “Lot chachasti janiw jankʼachaskänti, ukatwa angelanakax amparat waythapipxi, Tatitun jupat khuyapayasitap layku. Ukhamarakiw warmiparusa, pä phuchaparusa waysuwayapxäna, ukatsti marka anqäxaruw irpanukxapxäna” sasa (Gén. 19:16). ¡Ukhamaw Jehová Diosax luqtirinakapar wali munasiñampi qhispiyäna!

⁸ Davitat parltʼarakiñäni, jupax akham sasaw qʼuchüna: “Tatituw taqpach juchanakaxat pampachitu, jupaw taqi usunakaxat kʼumarachitu” sasa. Betsabé warmimpi juchachasitapat perdonatax walpun Jehová Diosar yuspäräna, akham sasaw säna: “Kamisatix alaxpachax uraqit [‘sipansa wali jachʼäkixa’, NM], ukhamaw munasiñapax arkirinakapatakixa” sasa (Sal. 103:3, 11). Jïsa, Jehová Diosax wali munasir suma chuyman Diosawa. Ukat Bibliat yatxatasin ukham yaqha sarnaqäwinakampit wal amuytʼktan ukhaxa, wal Jupar yuspärtansa jachʼañchtansa. Ukatxa Jupat yatiqasisaw yaqhanakarus ukham chuymampi uñjaraktanxa (Efe. 5:1).

9. ¿Kunatsa Jehová Diosan luqtirinakapax munasiñsa ukat suma chuymanïñsa sapüru uñachtʼayapxañapa?

⁹ Kunjamtï Davitarus Lot chacharus wali munasiñampi uñjkänxa, ukhamarakiw Jehová Diosax jichha tiempo luqtirinakapar munasiñ chuymampi uñji. Ukampis ¿Jupat jithiqtatanakarux kunjamsa uñjpacha? ¿Jupanakat sinttʼasiskpachati? Jesusax akham sänwa: “Diosax khuyapayasirirakiw, jupar jan yuspagaririnakatsa, juchararanakatsa”, ukat “taqinitakiw intsa jalsuyani, ukhamarak aski jaqinakatakisa, jan aski jaqinakatakisa jallsa puriyaniraki” sasa (Luc. 6:35; Mat. 5:45). Ukax chiqäskapuniwa, janïr arunakapat yatkayätan ukhaxa, mayninakjamarakiw Diosan uka bendicionanakap katuqayätanxa. Ukampis Jupar yupaychañ qalltawaytan ukhaxa, jachʼa munasiñapan jakañwa qalltawayaraktanxa (Isaías 54:10 liytʼasiñapawa). ¿Ukax janit jumatakix wali askïki? ¿Jichhax kun lurañas wakisispa? Sapa maynis Jupat yatiqasisin munasiñampi ukat suma chuymampi kunsa sapüru lurañasawa, ukatxa ukarjam parltʼasiñasarakiwa.

10. ¿Kunas munasiñampi parltʼasiñatakix yanaptʼistani, ukat kun lurañasasa?

¹⁰ Maysa tuqitxa, Jehová Diosat qullan ajayupa mayisiñasarakiwa ukat ukarjam sarnaqañasawa (Luc. 11:13). Uka qullan ajayuw suma chuymanïñsa ukat munasir suma jaqïñsa wal yanaptʼistani. Ukatxa, qullan  ajayumpi yanaptʼita sasin walja kuti taqi chuym mayisiñasawa. Jïsa, Diosat mayisiñasa, ukat kunjamsa nayra luqtirinakapar munasiñampi uñjäna uka tuqinakat lupʼiñasa wali askipuniwa. Ukanakaw munasiñampi ukat suma chuymampi parltʼasiñ yanaptʼistani.

Jaqichat jilat kullakanaka, munasiñampi parltʼasipxam

11. 1) ¿Kunsa Jehová Diosax chachanakat suyi? 2) ¿Suma chuymanïñax kunjamsa munasiñampi parlañ chachanakar yanaptʼi?

¹¹ Pablox akham sasaw chachanakar säna: “Munasipxam warminakamaru, kunjämtix Cristox [tamar] munasi, ukhamarak jakañapsa jupa layku aptʼasiwayi ukhama” sasa (Efe. 5:25). Ukat kuntï Diosax Adanampir Evampir siskäna uk amtasax akham sasaw sarakïna: “Chachax awkip taykap jayta[ñapawa] warmipampi mayachasiñatakixa, ukatsti paninitxa mä sapakïpkaspas ukhamaw tukupxani” sasa (Efe. 5:31). Uka arunakax wali qhanawa, chachax wali munasiñampiw warmipar uñjañapa, ukat janirakiw jaytañapäkiti. Ukatxa, suma chuymampi parlañapawa, janiw warmipatakix jachʼa lakanïñapäkiti, janirakiw jan walinaksa warmipxat parlasiñapäkiti. Jan ukasti, suma arunakampi chʼamachtʼañapawa (Pro. 31:28). Ukat chacha warmi jan waltʼayasiñas utjani ukhaxa, janiw chuym usuchjir arunakampi tuqisiñapäkiti.

12. ¿Kunjamatsa warmix suma chuymanïtapsa munasirïtapsa arunakapampi uñachtʼayaspa?

¹² Maysa tuqitxa, suma chuymani ukat munasir warmix sumataki kuns parltʼasiraki, janiw akapachankirjam jan walinak parlkaspati. Chachaparus wali respetompiw uñjaraki, jaqinak jakʼansa jan ukax sapa puras janiw chachapar jiskʼachkiti. Ukhamatwa yaqhanakampis chachapar respetayi (Efe. 5:33). Ukat chachax kun lurañs amti ukhaxa, janiw jupax wawanak jakʼata yaqh parlkiti. Ukham luraspa ukhaxa, janiw wawanakax awkipar istʼañ munxapxaspati. Jan ukasti, paninikiw sumat parltʼasipxi. Kunjamtï Bibliax siskixa, ukhamaw mä suma warmix ‘utap sum uñjasi’ (Pro. 14:1). Ukatxa sumakiw qamasipxi, janiw khitis mayjtʼaskiti.

13. ¿Kawkinsa suma chuymampi parlasiñatakix wal chʼamachasiñasa, ukat kunjamsa?

¹³ Ukatxa, janirakiw chacha warmis arunakampi chuym usuchjasipxañapäkiti, purapat respetasipxañapawa. Kunjamtï Pablox siskänxa, “thithiñanakatsa, colerat chuymampi jachʼat artʼasiñanakatsa, jan wali arunakampi tuqisiñanakatsa” amuyasipxañapawa. Purapat ‘khuyaptʼayasipxañapawa’ ukat ‘perdonasirïpxañaparakiwa’. Ukatsti, mayachtʼat sum jakasiñatakix jupanak pura ‘wal munasipxañapawa’ (Efe. 4:31, 32; Col. 3:8, 14). Wawanakas uk uñjasax wal kusisipxani ukat ukham suma chuymanïñwa yatiqapxarakini.

14. ¿Kunjamsa awk taykanakax familiapar arunakampi yanaptʼapxaspa?

¹⁴ “Khuyapayasiñama[w] yanaptʼitu” sasaw salmonak qillqirix Jehová Diosar säna  (Sal. 94:18). ¿Kunjamsa yanaptʼäna? Sum sarnaqañapatakiw ‘Arunakap’ tuqi iwxtʼäna (Sal. 119:105). Awk taykanakax ukhamarakiw wawanakapar yanaptʼapxaspa. Jan maysar saranukupxañapatakiw chʼamachapxañapa ukat iwxtʼapxañapa. ¿Kunapachas ukham yanaptʼapxaspa? Familiana Diosar Yupaychañataki Aruma satäki uka wakichäwinwa Diosan Arupat yatxatasin wal yanaptʼapxaspa (Pro. 24:4).

Tama taypin munasiñampi parltʼasipxañäni

15. ¿Kunjamsa irpir chuymaninakasa ukat yaqha jilïr jilat kullakanakas tama taypinxa suma arunakampi yanaptʼapxaspa?

¹⁵ “Khuyapayasiñamamp aski kankañamampix imapunitpan” sasaw Davitax Jehová Diosar mayisïna (Sal. 40:11). Kunjamtï Diosax luqtirinakapar imkänxa, ukhamarakiw irpir chuymaninakasa ukat yaqha jilïr jilat kullakanakas cristian masinakaparux imapxañapa jan ukax yanaptʼapxañapa. Jan walinakat amuyasipxañapatakiw Diosan arunakaparjam suma chuymampi iwxtʼapxañapa (Pro. 17:17).

16, 17. ¿Kunjamatsa jilat kullakanakarux munasiñ uñachtʼayaraksna?

¹⁶ Kunapachatï maynix jan wali thakir saraski ukhaxa, ¿kun lurañas wakisispa? ¿Janit munasiñampi chiqañchtʼañax askïkaspa? (Sal. 141:5.) Ukat maynin mä jachʼa juchar puritap yatsna ukhaxa, ¿kamachsnasa? Irpir chuymaninakar yatiyañapataki chʼamachañasawa, ‘jupanakaw oración lurapxani, ukat Jehová Diosan sutipxar’ yanaptʼapxani (Sant. 5:14). Ukampis juchanix jan yatiykaspa, ukat jiwasax ukhamakiraki amuktʼxsna ukhaxa, janiw walïkaspati, munasiñat yatiyañasawa. Maysa tuqitxa, yaqhip jilat kullakanakax wali llaktʼataw jikxatasipxaraki, chuymas kawkstʼata, saparstʼata ukhamaw jikxatasipxi, ¿janit jupanakar munasiñampi chuymachtʼañax wakiskaspa? Jïsa, “mayjtʼatanakarux chʼamañchtʼapxam” sasaw Bibliax amtayistu (1 Tes. 5:14).

¹⁷ Ukat ¿kunapachatï yaqha jaqinakax jilat kullakanakat jan walinak parlapxani ukhax kamachañänisa? Janiw istʼañasäkiti, cristian masisat payachasiñax janiw walïkaspati. Ukampis ukham parlirix istʼirjamäskani ukhaxa, “¿kunatsa ukham sista?” sasin sumat jisktʼañasawa. Maysa tuqitxa, mä jilatar jan ukax kullakar ñanqhachañataki thaqhapxaspa ukhaxa, janiw kunäkipansa kawkinkis  ukxa yatiyañasäkiti, ukhamaw jiwaskamax munasiñampi sum uñjasiñasa (Pro. 18:24).

Aski jaqix “jakañwa jikxatani”

18, 19. ¿Kunas munasiñampi ukat suma chuymampi parlirinakatakix utjani?

¹⁸ Khititix suma chuymanïki ukax qhanaw jilat kullakanakampix sum apasi. Ukat jan walinak utjipansa, munasiñampiw kuns arsuraki. Jehová Diosax ukham suma chuymani ukat taqi chuym munasir luqtirinakaparuxa, wali munasiñampiw kuna bendicionanaksa churi. Ukampis kunapachatï nayra israelitanakan munasiñapax “qhantati sullar uñtataki” tukusxäna ukhaxa, wal chuymap usuyasïna (Ose. 6:4, 6).

¹⁹ Bibliax akham siwa: “Khititix chiqana, askina sarnaqañ thaqki ukaxa, jakañwa jikxatani, jachʼar aptatarakïniwa” sasa (Pro. 21:21). Jïsa, khititix suma chuymanïsin askin sarnaqki ukaxa, jakañwa jikxatani; ukampis janiw mä qhawqha maranakaki jakkaniti, jan ukasti wiñayan wiñayapatakiw jakani. Chiqansa, pachpa Jehová Diosaw “chiqpach jakañäki” uk churani (1 Tim. 6:12, 19, MT). Ukhamasti, “maynit maynikama” taqinis munasiñampi ukat suma chuymampi uñjasipxañäni (Zac. 7:9).

[Qhanañchäwi]

¿Qhanañchtʼasmati?

• ¿Munasiñampit suma chuymanïñampit kamsis Bibliaxa?

• ¿Kunjamatsa taqi chuyma munasiñax askinak parlañ yanaptʼistaspa?

• ¿Chacha warminakax kunjam arunakampis taqi chuyma munasiñ uñachtʼayasipxaspa?

• ¿Jilat kullakanakar munasiñampi uñjatasxa kunjamsa uñachtʼaysna?

[Jisktʼanaka]

[23 janan fotopa]

Davitax Diosan munasiñapwa jachʼar aptäna

[24 janan fotopa]

Familiana Diosar Yupaychañataki Aruma sat wakichäwxa, ¿sapa semanati apasipkta?