Taqiniw jawstʼatäpxtaxa

BETEL ut visittʼapxañamatakiw jawstʼapxsma, mä arunxa, Jehová Diosan Qhanañchirinakapan 118 sucursalanakapax Uraqpachan utjki ukanakat mä qhawqhar sarapxañamataki. Visittʼirinakatxa waljaniw kuntï uñjawayapxi ukanakat muspharapxäna.

México markanxa, mä waynaw Bibliat yatxataskäna ukat markapan utjki uka sucursalaruw visittʼatayna. Ukan jilat kullakanakar Jehová Diosar wali kusisit luqtir uñjasax wal muspharäna. Ukatwa akham jisktʼatayna: “¿Akan irnaqañatakix kun lurañajas wakisi?” sasa. Ukat akham sapxänwa: “Nayraqatxa bautisasiñamawa. Ukat precursorjam irnaqañamax askirakïspawa” sasa. Ukat jupax ukarjamaw luräna ukat pä mara qhipatsti Betelanwa irnaqxäna, jichhax pä tunka maraw ukankxaraki.

¿Kunas Betel utaxa?

“Betel” siski uka hebreo aruxa, “Diosan utapa” sañ muni (Gén. 28:19). Uraqpachanxa, patak waranqa jila tamanakaw utji, sucursalanakaw uka tamanakar Diosar yupaychañ tuqit yanaptʼapxi. Ukat yaqhip sucursalanakaxa, Biblianaka ukat Bibliat apstʼat qillqatanakwa lurapxi ukat tamanakar apayapxaraki. Betelanxa, kunayman markanakat ukat kunayman familianakat jutat pä tunka waranqa jilat kullakanakaw sapür irnaqtʼapxi. Ukat Jehová Diosatakisa jilat kullakanakatakisa jan kun suyasakiw irnaqtʼapxi. Ukanxa, walja maranak irnaqtʼir jilat kullakanakax wayn tawaqu jilat kullakanakamp chikaw irnaqtʼasipki. Betelitanakaxa, irnaqañ tukuyasasa ukat sabadompi domingompisa Diosan arunakapat yatiyiriw sarapxi ukat tamanakapampiw tantachasipxi. Ukat Bibliat yatxatapxi, kusistʼapxi ukat yaqha lurañanakaps lurapxarakiwa.

Betelitanakax sapa phaxsiw gastonakapataki qullq katuqapxi. Ukhamarus chʼamachtʼkir suma phaytʼat manqʼanakwa manqʼtʼasipxi ukat cuartonakapansa kunatï wakiski ukanakaniwa, ukat qʼumarakiwa, ukampis janiw jachʼa hotelanakjamäkiti. Visittʼirinakaxa, taqi kuns qʼuma ukat yäpar apnaqasiskir uñjasax wal muspharapxi. Ukat kunja munasiñampis uñjasipxi ukat jupanakpuras yanaptʼasipxi, ukanak uñjasax muspharapxarakiwa. Betelanxa, janiw khitis mayninakat sipansa jilankkaspas ukham amuyaskiti, ni yaqhachasiñas utjkiti. Taqi kunatï ukan luraski, qʼumachañasa, phayañasa, panqaranaka ukat alinak uñjañasa, qillqatanak luraski ukan irnaqañasa jan ukax oficinanakan irnaqañasa wali wakiskiripuniwa. Jehová Diosan Qhanañchirinakapax Diosan Apnaqäwipat yatiyapki ukar yanaptʼañatakiw betelitanakax mayachtʼat irnaqtʼapxi (Col. 3:23).

 Mä qhawqha betelitanakar uñtʼañäni

Uraqpachan utjki uka betelitanakatxa, mä qhawqhanir uñtʼañäni. ¿Kunatsa Betelar irnaqtʼir jutapxpacha? Uk amuytʼañatakix Mario jilatat parltʼañäni. Bautisaskäna ukhaxa, Alemaniankir mä jachʼa empresanwa wali sum pagat irnaqaskäna ukat inas jukʼamp suma cargo churapxchispäna. Mä qhawqha tiempotxa, markapan utjki uka sucursalaruw mä semanataki irnaqtʼir saräna, ukanxa qillqatanak lurapki ukanwa irnaqäna. Ukanxa, betelitanakax janiw irnaqir masinakapjamäkänti, uk uñjasaw Betelan irnaqxañatak mä solicitud phuqantäna. Janisay familiaranakapas ukat irnaqir masinakapasa ukham amtatapat sum amuyapkchïnxa, Mariox wali kusisitapuniw Alemania markankir Betelan irnaqtʼaski.

Betelitanakatxa, waljaniw jachʼa yatiqañ utanakar jan sarapkänti. Abel jilatat parltʼarakiñäni, jupax tunka phisqan maranakaw México markankir Betelan irnaqtʼaski. Jupax akham siwa: “Betelanwa walja lurañanak yatiqta. Ukanwa qillqatanak lurañataki uka jachʼa maquinanak apnaqañs yatiqawayta, yatiqatajampix walja qullq yaqha chiqan irnaqasax jikxatiristxa, ukampis kuna bendicionanaktï akan utjki ukanakxa janiw kawkins utjkaspati. Akanx chuymas chuyma, jan kuna llakini irnaqtxa, ukat janirakiw akapachankirinakjam atip atip irnaqañas utjkiti. Janipuniw kawkins ukham yatiqkiriskayätti, ukanakaw Diosar jukʼamp sum luqtaskakiñataki ukat sum amuytʼasiñatak yanaptʼawayitu. Ukham askinakxa, janipuniw jachʼa yatiqañ utanakan jikxatkiriskayätti” sasa.

Diosar luqtañatakiw chʼamañchtʼätam

Betelar visittʼirinakaxa, Diosar yupaychañ tuqit wali chʼamañchtʼataw jikxatasipxaspa. Ukhamwa Omar jilatax jikxatasitayna, jupax México markankiwa. Mamapaw Bibliat yatichatayna, ukampis 17 maranïxasax janiw tantachäwinakarus ni yatiyiris sarxänti. Jan ukasti jan walinakaruw yatintxäna ukat yänakakwa thaqxäna. Tiempompisti, mä jachʼa empresan irnaqxäna ukat kunjamsa maquinanakax apnaqasiñapa uk uñachtʼayañatakiw irnaqir masinakapamp México markan utjki uka Betelar sarapxäna. Ukat Omarax akham siwa:  “Maquinanak uñachtʼayañ tukuyxapxta ukhaxa, kunjamas Betelax uk uñachtʼayapxitu. Ukat kunja munasiñampis katuqtʼapxitu ukat taqi kuntï uñjawaykta ukanakxa, kunjamsa nayax Diosat jayarstʼat jakaskayäta uka tuqit wal lupʼiyitu. Ukat jankʼakiw Bibliat wasitat yatxatañ qalltawayta ukat tantachäwinakarus sarxta. Betelar visittʼataxatxa, suxta phaxsi qhipatwa bautisasiwayta. Kuntï ukürux uñjawayta ukax walpun chʼamañchtʼawayitu, ukatwa Jehová Diosarux wal yuspärtxa” sasa.

Japón markankir Masahiko sat jilataxa, Jehová Diosar luqtir mä familia taypin jilsuwayarakitayna. Ukat cristianjam sarnaqasax chinkatatäkaspas ukham amuyasïna. Ukatwa yatiqañ utan utjkäna uka yaqha lurañaruk tiemp aptʼasïna, janiw tantachäwinakarus ni yatiyiris sarxänti. Jupax akham siwa: “Mä uruxa, familiajampi ukat mä qhawqha jilat kullakanakampiw Betelar visittʼir sarañ amtapxäna. Ukat ‘sarañäni, sarañäni’ sasaw wal jariyapxitu ukat iyaw sasaw jupanakamp chik sarawayta. Jilat kullakanakamp Betelar sarasaxa, wali kusisitaw jikxatasiyäta, Diosar jan yupaychapki uka amigonakajampix janipuniw ukham jikxatasirïkti. Ukat cristianjam sarnaqañ amtawayta ukat Bibliat yatxatañatakiw yanaptʼa mayta” sasa. Jichhaxa, Masahiko jilataxa, precursorjamaw tamapan irnaqtʼaski.

Francia markankir mä kullakaxa, Moscú markaruw irnaqañatak sarxatayna. Ukanxa, Jehová Diosan Qhanañchirinakaparux janiw jikxatkänti, ukatwa Diosar yupaychañ tuqit aynachtʼxäna. Ukat tiempompixa, kunanaktï Diosatakix jan walïki ukanakwa lurxäna, ukatxa Diosar jan yupaychir chachampiw jaqichasxäna. Mä urux Francia markat mä kullakaw jupar visittʼir saratayna ukat San Petersburgo (Rusia) markaruw Betel ut visittʼir sarapxatayna. Ukat akham sasaw mä cartan qhanañchi: “Wali munasiñampiw katuqtʼapxitu uk uñjasax walpun chuym chʼallxtayasta. ¡Wali sumapuniw jikxatasiyäta! Jehová Diosan qullan ajayupax ukankatap qhanaw amuyasïna. ¡Diosan markapat jithiqtatajästi! Janipuniw akchʼas walïkiti. Ukat Jehová Diosaruw yanaptʼa mayista, ukatxa taqi chuymarakiw phuchanakajar Bibliat yatichañ qalltawayta” sasa. Yaqha jilat kullakanakaw jupar yanaptʼapxatayna, ukampis Betelar visittʼasaw wali chʼamañchtʼat jikxatasïna. Ukhat jichhakamax Diosar yupaychañ tuqit nayrar sarantaskakiwa.

Jehová Diosan Qhanañchirinakapar jan uñtʼapki ukanakarux ¿kunjamsa Betel ut visittʼañax yanaptʼi? Brasil markankki uka Betelaruw Albertox 1988 maran visittʼir saratayna, jupax politicar mitisitänwa. Ukat Betelan taqi kunas qʼuma, yäparu ukat jan kuns jamasat lurir uñjasaxa, wal muspharäna. Janïr Betel utar visittʼir sarasaxa, warmipan jilapar visittʼiriw saratayna, uka jilapax sacerdotenwa ukat kawkhantï seminarionak luraski ukanwa jakasïna, ukanxa taqi kunas jamasatwa lurasïna janiw Betelanjamäkänti. Betelar sarkäna uka qhipatsti, Bibliat yatxatañ qalltawayäna ukat janirakiw politicarus mitisxänti, jichhax irpir chuymanjamaw tamapan luqtaski.

Betel utar visittʼir jutapxam

Markapankir Betelar visittʼañatakix waljaniw chʼamachasipxi. Amuytʼañataki, Paulompi Eugeniampixa, Brasilankir Betelar sarañatakix pusi maraw qullq tantasipxatayna. Ukat pä uruwa 3.000 kilometronak autot sarapxatayna. Betel ut uñtʼxasaxa, uka chacha warmix akham sapxänwa: “Sarapxatajax janiw inamayäkiti. Kunjamas Jehová Diosan markapax uk jichhakuchaw sum amuyxapxta. Ukat kunapachatï Bibliat yatiqirinakarux kunsa Betelan lurasi uk qhanañchtʼapxirïta ukhaxa, ‘¿jumanakax ukar sarapxtati?’ sasaw awisax jisktʼapxirïtu. Jichhax ‘jïsa sarapxtwa’ sasaw sapxiristxa” sasa.

Kawkhantï jumax jakasta uka markana, jan ukax yaqha jakʼa markanakansa, ¿mä Betel utax utjiti? Ukhamächi ukhaxa, ukar visittʼañamatakiw jawstʼapxsma. Ukar sarasaxa, kunja munasiñampis katuqtʼapxätam uk uñjata ukat Diosar yupaychañ tuqitsa, walja bendicionanakwa katuqarakïta.

[18 janan fotopa]

Mario

[18 janan fotopa]

Abel

[18 janan fotopa]

Alemania

[18 janan fotopa]

Japón

[18 janan fotopa]

Brasil