Bulgaria markanx jukʼampiw yatiyasiwayi

“Cosecha apthapiñax waljawa, ukampis irnaqirinakax jukʼanikirakiwa. Mayipxamaya yapunirux jukʼamp irnaqirinaka khitaniñapataki.” (MAT. 9:37.)

EUROPA tuqinkir Bulgaria markanxa, walja lurañanakaw utji, ukwa Jesusan arunakapax qhan amuytʼayistu. Uka markanxa, 7.000.000 jila jaqinakaw utji, ukatwa jupanakar yatiyañatakix irnaqtʼirinakax munasi. Jichhax 1.700 yatiyirinakas utjchixa, markpachar yatiyañatakix jukʼanikïpxiwa. Ukatwa Uraqpachan Jilïri Irpirinakax Europa markankiri búlgara aru parlir jilat kullakanakar jawstʼasiñapataki sucursalar yatiyapxäna. 2009 maranwa juntʼu pachan jukʼamp yatiyañax qalltasiñapäna, paqallqu semananak yatiyasinsti “Amuyasipxapunim” sat kimsa uru jachʼa tantachäwitakiw tukuyasiñapäna. Uka tantachäwisti 2009 maran agosto phaxsin 14 urut 16 urukam Sofía markan apasiñapäna.

Waljaniw yanaptʼawayapxi

Alemania, España, Francia, Grecia, Italia ukat Polonia markanakatxa, qhawqhanikis yanaptʼir jutapxpachäni sasaw Sofia markan jikxataski uka sucursalan jisktʼasipxäna. Chiqansa, yanaptʼañ munirinakax qullqipatwa gastasipxañapäna ukat irnaqäwipats vacación apsusipxañapäna. Semananak pasatatsti 292 jilat kullakanakaw jutañatak qillqanipxäna. Kazanlak, Sandanski ukat Silistra markanakar khitañatakix utjxänwa. Maysa tuqitsti, tamanak tumptʼir jilatanakaxa, uka markankir precursoranakaru ukat mayni jilat kullakanakaruxa, jupanakamp chik yatiyapxañapatak jawstʼapxäna. Ukat 382 jilat kullakanakaw kawkhantï mä qhawqha kutik yatiyaskan uka chiqanakar sarapxäna.

Kawkins qurpachasipxani uk jikxatanipxañapatakiw uka jakʼankir tamanakat mä qhawqha jilatanakar khitasïna. Jupanakaw utanaksa alquilapxäna ukat iraqtʼat hotelanaksa jikxatapxäna. Ukat yanaptʼir sarapkäna uka jilat kullakanakan puripxañapatakisa ukat kunatï wakiski ukanakamp yanaptʼañatakis walpun irnaqtʼapxäna. Ukatxa utanakwa tantachasiñatakix alquilapxäna, uka tantachäwinakxa, purinir jilatanakaw sarayapxañapäna. Jehová Diosan Qhanañchirinakapax jan utjkäna uka markanakansa phisqa tunka yatiyirinakaw Diosar yupaychañatak tantachasipxäna, ukax wali kusiskañänwa.

Yaqha markanakat jutirinakax wali kusisitaw jan saytʼas irnaqtʼapxäna. Yaqhip urunakax wali juntʼükchïnsa, yatiyasipkakïnwa. Kimsa semanänwa Silistra markpachan yatiyasxäna, uka markasti, Danubio sat jawir thiyankiwa ukat 50.000 markachirinakats jilaw utji. Ukankir jilat kullakanakaxa, uka jakʼanakankir markanakan yatiyañatakiw amtawayapxäna ukat inti jalant tuqinkir Tutrakan sat markaruw puripxäna, uka markax 55 kilómetro sarañankiwa. Niya 9:30 alwa horasaruw yatiyañ qalltapxirïna ukat manqʼasiñ horasakiw samartʼapxirïna, jaypʼusti 7:00 horaskamaw yatiyapxirïna. Niya ukhamarakiw Kazanlak ukat Sandanski markankir jilat kullakanakax  taqi chuyma irnaqtʼapxäna, yatiyañ tukuyasax uka jakʼankir markanakar yatiyiriw sarxapxäna.

¿Kuna askinaksa jikxatawayapxäna?

Uka paqallqu semananxa, jan armkañapuniw yatiyasïna. Nayrïr maranakanxa, apostolanakatxa akham sapxirïnwa: “Yatichäwinakamampix Jerusalén markpacharuw phuqtʼayapxtaxa” sasa. Jilat kullakanakat ukhamarakiw uka markanakan sapxpachäna (Hech. 5:28). Uka markankirinakarux 50.000 revistanak jaytasïna ukat 482 jaqinakampiw Bibliat yatiqañ qalltasïna. 2009 maran septiembre phaxsit mä uru saraqataruw nayrïr tamax Silistra markan uttʼayasïna, Kazanlak ukat Sandanski markanakansti gruponakas utjxarakiwa. Diosan arunakapat istʼapkäna ukanakaxa, jichhakamaw Diosar yupaychañan nayrar sarantasipki.

Búlgaro aru parliri mä precursor especial kullakaw España markat purinitayna. Nayrïr semananxa, periodiconak aljir Karina warmiruw Silistra markan yatiyatayna. Uka warmix taqi chuymaw istʼatäyna ukat Bibliat yatiqañ qalltawayäna, tantachäwinakarus sararakïna. Ukampis Diosax janiw utjkiti sasaw chachapax säna, ukatwa uka warmix pä phuchanakapampi plazan Bibliat yatichayasipxäna. Daniela jilïr phuchapax Biblian yatichäwinakaparux wal munasïna, Kunsa yatichi sat librxa mä semananakwa liyiñ tukuyäna ukat Biblian iwxapar istʼasax janiw idolonak apnaqxänti. Amigonakaparus Bibliat yatiyañ qalltarakïna. Kimsa semananak tantachäwinakar sarxasaxa, akham sasaw precursor kullakarux satayna: “Jumanakampïsax Diosan Qhanañchiripäkiristsa ukham amuyasta, ¿jumanakamp yatiyir sarañatakix kuns luriristxa?” sasa. Danielax sullkapampi ukat mamapampiw Diosar yupaychañan nayrar sarantasipkaki.

Búlgaro aru parliri Orlin sat jilataxa, Italia markatwa jutatayna ukat Kazanlak markaruw khitapxäna. Mä urux qurpachaskän ukar kuttʼasaxa, pä waynaruw plazan quntʼat uñjatayna ukat Diosan arunakapat yatiyatayna. Kunsa yatichi sat libro jaytasax qharüruw kuttʼanï sataynawa. Svetomir sat waynaw Bibliat yatiqañ munäna. Qhipärmantix yatiqasipkakïnwa, llätunk urunakatsti Svetomir waynax kimsaqallq kutiw Bibliat yatiqxäna. Ukat Orlin jilatarux akham sänwa: “Planzan parlkista ukhat pä uru nayrakiw Diosat mayisiskayäta, uñtʼañ munsma ukat yanaptʼitäta ukhax Jumaruw jakäwix katuyasxäma sayätwa” sasa. Orlin jilatax Italia markar kutʼxäna  ukhaxa, Kazanlak markankir jilatanakaw Svetomir waynarux Bibliat yatichasipkakïna, jichhax nayrar sarantaskakiwa.

Walja bendicionanakaw utjawayi

Yatiyañ layku sarapkäna uka jilat kullakanakaxa, qullqipat gastasisa ukat vacación apsusisaw Bulgaria markar sarapxäna, ¿uka jilat kullakanakax kamsapxisa? España markankir mä irpir chuymanix akham qillqäna: “Yatiyir sarasaxa, España markankir búlgaro arut parlir jilat kullakanakax jukʼamp mayachtʼata ukat chʼamañchtʼataw jikxatasipxi” sasa. Ukat Italia markankir mä chacha warmix akham sapxänwa: “Uka phaxsix nänakatakix khusapunïnwa [...] jukʼamp yatiyañax wal yanaptʼapxitu, jichhax janiw nayrjamäxapxti” sasa. Uka chacha warmix Bulgaria markan jukʼamp yatiyirinakax munaski ukar sarañ amtasipki. Españankir Carina soltera kullakaxa, Silistra markaruw sararakïna. Qhipatsti, irnaqäwipat mistxasaw machaq taman yanaptʼañatakix kuttʼäna. Ukan jakañatakixa, mä maratakiw qullq tantasitayna. ¿Jichhax kunjamsa jikxatasi? Jupax akham siwa: “Wali kusisitapunïtwa, Jehová Diosaw Bulgaria markar jutañatakix yanaptʼawayitu; akankaskakirista ukax walipunïspawa. Phisqaniruw Bibliat yatichaskta, ukanakatxa kimsaniw tantachäwinakar sarxi” sasa.

Italiankir mä kullakaxa, yatiyir sarañ munarakïnwa. Ukampis irnaqäwipanx jukʼa tiempokiw irnaqaskäna, ukatwa jan vacacionanïkänti. Ukhampachas jan axsarasaw mä phaxsitak permiso mayisïna, jan churapkitanix mistxaw sasaw amtäna. Ukampis patronapax akham sänwa: “Walikiwa, ukampis Bulgaria markat mä foto apayanitäta” sasa. Mayisitanakapar Diosan istʼatapxa, uka kullakax sum amuyasïna.

Varna (Bulgaria) markankir Stanislava kullakaxa, jurnälpachaw suma pagat irnaqtʼäna. Jupax Silistra markan jukʼamp yatiyañatakiw irnaqäwipat permiso mayisitayna. Uka markar purisinsti, yaqha markankir precursoranakar wali kusisit yatiyaskir uñjasax jachaqtʼasïnwa, ukat jakäwipat wal lupʼitayna. Utapar kuttʼasax pä semanatwa irnaqäwipat mistxäna, ukat precursor regularjamaw irnaqxäna. Jichhasti, wali kusisitapuniwa, kunattix tawaqükasïnwa Diosar luqtaski (Ecl. 12:1).

¡Jehová Diosar taqi chuyma luqtirinakax walja bendicionanakwa katuqapxi! Diosan arunakapat yatiyañataki ukat Jesusan arkiripäpxañapataki jaqinakar yanaptʼañatakiw chʼamsa tiempsa apsusiñasa, ukaw jukʼamp wakiskirixa. Jiwasax qhispiyasiñ arunakwa yatiytanxa, ¿jumax jukʼamp yatiyasmati? Inas pachpa markaman yaqha chiqanakan yatiyirinakax wal munaschi, ¿ukar sarañ munasmati? Inas yaqha aru yatiqchisma, ukhamatwa Bibliat yatiqañ munirinakar yanaptʼasma. Diosar luqtañ laykux kunanakxay amtawaychïta, ukampis walja bendicionanakwa Jehová Diosat katuqäta (Pro. 10:22).

[32 janan recuadropa/fotopa]

Jan armkañ uru

Yaqha markanakat yatiyir saririnakatxa, Sofia markan apaskäna “Amuyasipxapunim” sat kimsa uru jachʼa tantachäwir waljaniw sarapxäna. Uka markankir jilat kullakanakaxa, Europa tuqinkir jilat kullakanakar uñtʼasax wal kusisipxäna. Uka jachʼa tanchäwinsti, viernes urux Uraqpachan Jilïri Irpirinakat Geoffrey Jackson sat jilatawa, Traducción del Nuevo Mundo de las Santas Escrituras sat Biblia búlgaro arut uñachtʼayäna. Ukat 2.039 tantachasirinakaxa, kusisiñat chuym chʼallxtayasipxäna ukat taqi chuyma tʼaxllirtʼasaw yuspärapxäna, yaqhipanakasti kusisiñats jachaqtʼasipxänwa. Búlgaro arur jaqukipat Bibliaxa, yäparu ukat qhana arunakamp qillqtʼatawa. Ukaw Bulgaria markankir suma chuyman jaqinakarux Jehová Diosar uñtʼapxañapatak yanaptʼani.

[30, 31 jananakankir mapa]

(Sumpach amuytʼañatakix qillqatan mistki uk uñxatañamawa)

BULGARIA

SOFÍA

Sandanski

Silistra

Kazanlak

[31 janan fotonakapa]

Paqallqu semananak irnaqtʼasax wali sumaw yatiyasïna