Diosan bendicionap katuqañatak chʼamachasiñäni

‘[Diosax] Jupar thaqirinakarux bendiciwa.’ (HEB. 11:6.)

1, 2. 1) ¿Bendicionanak katuqañatakix kunanaksa jaqinakax lurapxi? 2) ¿Kunatsa Diosan bendicionapax wali wakisiripunixa?

 KUNA yanaptʼa katuqasas “Diosay jumar bendispan” sasaw walja markanakan yuspärasipxi. Maysa tuqitxa, jaqinakaru, uywanakaru ukat yänakaruw iglesianakan pʼiqtʼirinakax bendicipxi. Yaqhipasti wali jayanakwa Diosan bendicionap katuqañ laykux sarapxi. Yaqhip politiconakas markapatakiw bendición mayipxi. Ukampis ¿uka mayisitanakapax walikïskpachati? ¿Diosax jupanakar bendispachati? ¿Khitinakarus Diosax bendici ukat kunatsa?

² Qhipa urunakanx suma chuymani ukat qʼuma sarnaqir jaqinakaw markajankani sasaw Diosax profecianak tuqi arsüna, uka markaw uñisitpachas arknaqatpachas Diosan Apnaqäwipat aka Uraqpachan yatiyañapäna (Isa. 2:2-4; Mat. 24:14; Apo. 7:9, 14). Jiwasax Diosan markapankañwa amtawayaraktanxa. Uka amtas phuqañatakixa, Diosan bendicionapaw wakisi (Sal. 127:1). Ukhamarus ¿kunjamatsa bendición katuqsna?

Istʼasirinakaw bendicionanak katuqapxi

3. ¿Istʼasiripxasapäna ukhax kuns israelitanakax katuqapxasapäna?

³ (Proverbios 10:6, 7 liytʼasiñapawa.) Israelitanakax janïr Suma Uraqir mantapkäna ukhaxa, nayar istʼapxitätax wali suma ukat jan axsarasaw jakasipxäta sasaw Diosax arsüna  (Deu. 28:1, 2). Ukat “bendicionanakaw jumataki jutani” sarakïnwa.

4. ¿Kunas chiqpach istʼasirïñaxa?

⁴ ¿Kunjam chuymampis israelitanakax Diosar istʼapxañapäna? Diosan Leyiparjamaxa, “kusisiñamp” ukat taqi chuymaw istʼapxañapäna, jan ukax Diosaruw chuym ustʼayapxasapäna (Deuteronomio 28:45-47 liytʼasiñapawa). Chiqpachansa, janiw phuqañ laykuki Diosan kamachinakap istʼañasäkiti. Animalanakasa saxranakasa istʼasiñ yatipxarakiwa (Mar. 1:27; Sant. 3:3). Ukampis Diosar taqi chuyma istʼirixa, munasiñampi ukat wali kusisitaw kamachinakap phuqi, kunattix Diosax ‘jupar thaqirinakarux bendecirïtapa’ ukat kuntï phuqirjamäktan ukak mayirïtapxa sum yati (Heb. 11:6; 1 Juan 5:3).

5. Deuteronomio 15:7, 8 qillqatankki uka kamachir istʼañatakixa, ¿kunjamsa israelitanakarux Diosar atinisiñax yanaptʼäna?

⁵ Diosar taqi chuyma istʼasaw israelitanakax Jupar atinisipxatap uñachtʼayapxasapäna. Uka tuqit amuytʼañatakixa, kuna kamachtï Deuteronomio 15:7, 8 (liytʼasiñapawa) qillqatan utjki uk uñxattʼañäni. Israelitanakax munkir jan munkir uka kamachi istʼasax pisinkirinakarux yanaptʼapxasapänwa, ukampis ukham pata chuymaki phuqasaxa, ¿jupanak purax sumti apasipxasapäna? ¿Khuyapayasir Diosat yatiqasiñ munapxatap uñachtʼayapxasapänti? Ukat ¿Diosax kunatï wakiski ukanak churirïtaparux atinisipxatap uñachtʼayapxasapänti? ¡Janiwa! Diosax kunjam chuymanïpxänsa ukxa sum yatïna, ukat jupanakatï khuyapayasiripxasapäna ukhaxa, taqi luräwinakapsa amtäwinakapsa Diosax bendicisapänwa (Deu. 15:10). Israelitanakatï Diosan arsutapar atinisipxasapänxa, yaqhanakar yanaptʼapxasapänwa ukat bendicionsa katuqapxarakisapänwa (Pro. 28:20, NM).

6. Hebreos 11:6 qillqatarjamaxa, ¿kuna tuqitsa jan pächasiñasäki?

⁶ Hebreos 11:6 qillqatanxa, Diosax bendecirïtapwa qhanañchaski, uka arunakar atinisisaw bendicionap katuqsna, ukampis uka qillqatarjamaxa bendicionap katuqañatakix ‘Jupar thaqhañax’ wali wakiskiriw sasaw qhanañchasiraki. Griego arunxa, “taqhaña” arux taqi chuym chʼamachasis thaqhaña sañ muni. Ukhamax Diosan bendicionap katuqsnawa, ukwa uka jiskʼa tʼaqax qhanañchistu. Diosaw uk arsuwayi, Jupax ‘janiw kʼariskaspati’ (Tito 1:2). Jupan arsutanakapax ¡phuqasikipuniwa! Waranq waranqa maranakaw uk uñjasiwayi (Isa. 55:11). Jiwasatï iyawsäwinïtas uñachtʼayañänixa, Diosax bendicistaniwa.

7. ¿Kunjamsa Abrahaman wawanakap tuqix bendicionanak katuqsna?

⁷ Bibliarjamaxa, Abrahaman wawanakap jutir Wawax Jesucristowa, ukxarusti alaxpachar sarañatak ajllitanakaraki. Uka ajllitanakaw ‘Diosan muspharkañ luräwinakap yatiyapxañapataki’ uttʼayatäpxi. Diosarakiw jupanakarux ‘chʼamakat irpsunïna, suma muspharkañ qhanapar mantxapxañapataki’ (Gál. 3:7-9, 14, 16, 26-29; 1 Ped. 2:9). Jiwasatï uka ajllitanakar jan istʼkañäni ukhaxa, Diosampix janiw sum apasksnati. Chiqas Amuyasiri Chiqapa Uywataruw Jesusax taqi kunatix jupan utjki ukanakxar uttʼayawayi (Mat. 24:45-47, MT). Jupanakan yanaptʼapampiw Diosan Arupax kamsisa ukat kunjamsa sarnaqäwisan yanaptʼistaspa ukanak amuysna. Ukhamax Bibliarjam sarnaqañataki chʼamachasiñäni ukhaxa, Diosan bendicionap katuqañäni.

Diosan munañapaw nayrankañapa

8, 9. ¿Diosar atinisitap uñachtʼayañatakix kunsa Jacobox luräna?

⁸ Diosan bendicionap katuqañatakix chʼamachasiñasawa. Uka tuqit parlkasax Jacob chachat amtañäni. Kuntï Diosax Abraham achachilapar siskäna uka arunakapax kunjamas phuqasiñapäna ukxa janiw Jacobox yatkänti. Ukampis Diosaw Abrahaman wawanakaparux mä jachʼa markar tukuyañkama waljaptayani sasaw atinisïna. Ukatwa 1781 nayrïr  pacha maranxa, Haran markar mä warmi thaqhir saräna. Ukampis janiw mä suma warmik munkänti, jan ukasti, Diosar luqtir warmimpiw jaqichasiñ munäna ukat wawanakapatakis mä suma taykañapänwa.

⁹ Kunjamtï yatktanxa, Jacobox Raquelaruw uñtʼäna ukat wal munasïna. Ukat jupamp jaqichasiñatakix paqallq maraw tatapatakix irnaqäna. ¿Raquelar munasakit irnaqpachäna? Janiwa. Jan ukasti, kuntï Diosax Abraham achachilaparus ukat Isaac tataparus arskäna uk sum yatïna (Gén. 18:18; 22:17, 18; 26:3-5, 24, 25). Qhipatsti Isaac pachpaw Jacoborux akham säna: “Taqi chʼamani Diosaw jumaru bendecïtam, wawanakamsa waljaniru tukuyarakpan, ukhamat jumatxa walja markanaka mistuñapataki. Kuntix Abraham awkisaru arsuwaykän uka bendicionanaksa jumaru, ukhamarak wawanakamaru churpan, aka uraqina, kawkhantix jichhax sarir jaqjama jakasktan ukat dueñöpxañapataki, Dios kipkarakiw ukham sasax Abrahamarux arsuwayi” sasa (Gén. 28:3, 4). Jacobox Diosar yupaychir warmimp jaqichasisaw Diosar atinisitap uñachtʼayäna.

10. ¿Kunatsa Diosax Jacobor bendicïna?

¹⁰ Familianïxan ukhaxa, Jacobox janiw yänak thaqkänti, jan ukasti, kuna yatichäwtix jupax katuqkäna uka tuqit wawanakapar yatichañatakiw chʼamachasïna. Diosan munañap lurañaw jupatakix nayrankäna ukat bendicionap katuqañ laykuxa, kuna jan waltʼäwinakarus saykatakisapänwa. Chuymanïxan ukhas uka pachpa amuyunikïskänwa ukatwa Diosax bendicïna (Génesis 32:24-29 liytʼasiñapawa).

11. ¿Diosan amtapat yatisax kun lurañasas wakisi?

¹¹ Jiwasax kunjamsa Diosan amtapax phuqasini ukxa janirakiw yatktanti. Ukampis Bibliat yatxatasaw kunjamäpachänis Jehová ‘Tatitun urupax’ uk amuysna (2 Ped. 3:10,17). Sañäni, kunürus ukat kuna horasarus purinini uk janiw yatktanti ukampis jakʼankatapxa sum yattanxa. Kunjamtï Biblian siskixa, aka qhipa urunakan sum yatiyañatak chʼamachasiñäni ukhaxa, jiwasasa ukat istʼapkistu ukanakas qhispipxañäniwa (1 Tim. 4:16).

12. ¿Kunarus taqi chuym atinistanxa?

¹² Akapachax akatjamatwa tukjatäni, uk sum yattanxa. Ukat kunapachas tukjatäni ukxa Diosax amtxiwa. Uka tukjäwi  puriniñapatakix janiw taqi jaqinakarux Diosan arunakapat yatiyasiñapapunïkiti (Mat. 10:23). Ukampis Jehová Diosaw jukʼamp sum yatiyañasatakix yatichistu. Ukat chʼamasarjamaw taqi chuym yatiytanxa, ukat kunatï utjkistu ukanak churasaw yatiyasiñapatak yanaptʼaraktanxa. Chiqans yatiyktan uka jaqinakax iyawsapxanit janicha uk janiw yatktanti (Eclesiastés 11:5, 6 liytʼasiñapawa). Ukampis Diosan arunakapatxa yatiyañasawa ukat Jupaw uka yatiyatasarux bendiciskani (1 Cor. 3:6, 7). Yatiyañataki chʼamachasitasxa Diosax sum yati ukat sum yatiyañatakis Jupaw qullan ajayup tuqi yatichaskistani. Ukaruw taqi chuym atinistanxa (Sal. 32:8).

Qullan ajayu mayipxañäni

13, 14. Diosax qullan ajayupampi luqtirinakapar yanaptʼatapxa, ¿kunjamsa uñachtʼayäna?

¹³ Yatiyir sarañatakisa, jan ukax taman kuna luräwi katuqasax jan phuqirjam amuyastan ukhasa, ¿kun lurañasäspasa? Jehová Diosat qullan ajayup mayisiñasawa, uka ajayuw kuns jukʼamp sum lurañataki yanaptʼistani (Lucas 11:13 liytʼasiñapawa). Inas maynix mä luräwi katuqasax kunjamsa lurasiñapa uk jan yatkchiti, ukampis uka luräwi phuqañapatakix Jehová Diosaw qullan ajayupampi yatichi. Amuytʼañäni, israelitanakax awatirinaka ukat esclavonakapxänwa, guerran nuwasiñ tuqitxa janiw kuns yatipkänti, ukampis Egiptot mistxapxäna uka qhipatxa, Diosaw qullan ajayupampi uñisirinakapar atipapxañapatak yanaptʼäna (Éxo. 17:8-13). Qhipatsti qullan ajayurakiw Bazaleel ukat Aholiab chachanakar tabernáculo utan planonakap lurapxañapatak yatichäna (Éxo. 31:2-6; 35:30-35).

¹⁴ Diosan markapax Bibliat apstʼat qillqatanak lurañ qalltapxañapäna ukhaxa, qullan ajayurakiw Diosan luqtirinakaparux yanaptʼäna. Robert J. Martin jilataw uka qillqatanak lurasiñapatakix pʼiqtʼaskäna ukat kunjamsa nayrar sarantasiskäna ukxa akham sasaw mä cartan qhanañchäna: “Horasaparupuniw Tatitux yanaptʼawayapxitu, Bibliat apstʼat qillqatanak lurañatakiw mä jachʼa máquina jikxatapxta. Ukat kunjam luratänsa, kunjamsa apnaqasiñapa uk janiw yatipkayätti. Ukampis Diosaw taqi chuym luqtirinakaparux sum amuytʼañ yanaptʼi. Mä qhawqha semananakatxa qillqatanak lurxapxayätwa. Uka maquinampix jichhakamaw irnaqasipkta ukat uka máquina luririnakas janiw ukham sum irnaqtʼani sasin sapkpachänti” sasa, uka cartax 1927 maranwa apsusïna. Jichhürunakanx ukham chʼamachasisipki ukanakarux Jehová Diosax bendicirakiwa.

15. Jañchin munañanakapar atipañatak chʼamachasisktan ukhaxa, ¿kunjamsa Romanos 8:11 qillqatax yanaptʼistaspa?

 ¹⁵ Yantʼanakar saykatañatakix kunaymanitwa qullan ajayux cristianonakarux yanaptʼi. Sañäni, jañchin munañanakapar jan atipirjamästan ukhaxa, ¿kun lurañas wakisispa? Kuntï Pablox Romanos 7:21, 25 ukat 8:11 qillqatan qhanañchkäna uka tuqit lupʼiñasawa, uka qillqatarjamax ‘Jesusar jaktayki jiwatanak taypita uka Ajayuw’ jañchin munañanakampi jan atipayasiñasatakix yanaptʼistu ukat chʼam churarakistu. Uka qillqatax alaxpachar sarañataki ajllitanakatakïnwa, ukampis Diosar taqi luqtirinakapatakix askirakiwa. Chiqas wiñay jakañ katuqañatakixa, Cristoruw iyawsañasa, chuymasat jan wali amuyunak apsuñasa ukat qullan ajayumpi irpayasiñasawa.

16. ¿Kun lurañasas qullan ajayu katuqañatakixa?

¹⁶ Diosan qullan ajayup katuqañ munstan ukhaxa, jiwaspachas chʼamachasiñasarakiwa. Janiw qullan ajayu mayiñasakïkiti, jan ukasti Diosan Arupatxa sum yatxatañasarakiwa (Pro. 2:1-6). Niyakixay Diosan qullan ajayupax tama taypinkchixa, jan qhiparasaw taqi tantachäwinakar sarañasa. Ukhamatwa kuntï “Ajayux iglesianakaru [tamanakaru] siski ukxa” wal istʼañ munatas uñachtʼayañäni. (Apo. 3:6). Ukat tantachäwinakan yatichaski ukanakxa altʼat chuymampiw istʼañasa. Chiqansa, ‘qullan ajaysti Diosarakiw churi, taqi khitinakatï jupar istʼapki ukanakaru’ (Hech. 5:32).

17. Diosan bendicionapax kunjamsa yanaptʼistu uk mä uñachtʼäwimp qhanañchtʼma.

¹⁷ Diosan bendicionap katuqañatakixa, wal chʼamachasiñasawa. Cristianonakax taqi askinak katuqktan ukanakxa, janiw suma luräwinak luratas laykukix katuqksnati. Uk amuytʼañatakix kunjamsa manqʼax yanaptʼistu uka tuqit parltʼañäni. Kunjamtï manqʼax cuerposaru yanaptʼkixa, ukhamarakiw Diosan bendicionapax chʼamachasitasar yanaptʼistu. Manqʼasktan ukhaxa, cuerposax alimentonakwa apsu. Ukampis kunjamsa uka alimentonak apsu ukat chʼam churistu ukanakxa janiw yatktanti. Ukampis chʼamañchtʼkir manqʼanak manqʼasaw cuerposar alimentonak apsuñapatak yanaptʼtanxa. Niya ukhamarakiw wiñay jakañ katuqañatakix chʼamachasipxañamaw sasin Diosax sistu ukat uk phuqañatakix Juparakiw yanaptʼistu. Chiqpachansa, Diosaw wiñay jakañ katuqañatakix walpun yanaptʼistu, ukatwa wal yuspärañasaxa. Ukhamax Diosan munañap lurañasawa, ukhamatakwa bendicionanakap katuqañäni (Hag. 2:18, 19).

18. ¿Kun lurañsa amtawaytan ukat kunatsa?

¹⁸ Ukhamax kuna lurañanaktï Diosat katuqktan ukanakxa taqi chuym phuqañäni. Ukat ukanak sum phuqañatakix Jehová Diosar atinisirakiñäni (Mar. 11:23, 24). Jan armañäniti, “thaqiristi jikxatarakiwa” (Mat. 7:8). Ajllit cristianonakaxa, “mä coronar uñtata” alaxpachan wiñay jakañ katuqapxani (Sant. 1:12). Ukat Abraham wawanakap tuqi bendicionanak katuqañ suyapki uka “yaqha ovejanakaxa”, wali kusisitaw Jesucristo awatiriparux akham sir istʼapxani: “Jutapxam, jumanakax Awkixan bendecitanakapa, katuqapxarakimay wiñay jakañxa jumanakataki wakichatäkis uka, kawkïritix aka uraqi qalltatpacha luratäki” sasa (Juan 10:16; Mat. 25:34). Ukhamaxa, khitinakarutï Jehová Diosax bendiski uka “jaqinakax [...] uraq katuqapxani, wiñayatakiw ukan jakapxarakini” (Sal. 37:22, 29).

¿Qhanañchtʼsnati?

• ¿Kunas chiqpach istʼasirïñaxa?

• ¿Diosan bendicionap katuqañatakix kun lurañasasa?

• ¿Kunjamatsa qullan ajayu katuqsna ukat kunjamsa yanaptʼistu?

[Jisktʼanaka]

[9 janan fotonakapa]

Jacobox Diosan bendicionap katuqañatakix mä angelar janiw antutkänti.

¿Jiwasax ukhamarakit chʼamachastanxa?

[10 janan fotopa]

Bazaleel, Aholiab chachanakarux qullan ajayuw yanaptʼäna