Jilïr pʼiqtʼirix irnaqtʼaskakiwa
Jilïr pʼiqtʼirix irnaqtʼaskakiwa
“Mä atipjirjamaw mistuwayäna jukʼampi atipjäwinaka atipjañapataki.” (APO. 6:2.)
1, 2. 1) ¿Cristox 1914 marat aksarux kunanaks luraski uk kunjamsa Bibliax uñachtʼayi? 2) ¿Apnaqirjam uttʼayatäxasax kunanak lurañsa Cristox qalltäna?
KHÄ 1914 maranwa Diosax Jesusarux Reyit uttʼayäna. ¿Cristox Diosan Apnaqäwipan kunjamas apnaqaskpacha? ¿Janis lurañanïkaspa ukhamäkit tronopan quntʼatäskpacha? Ukat ¿aka Uraqinkir tamapax kunjamäskis uk awisakit uñtanpacha? Ukham amuyañax janiw walïkiti, kunattix Jesusax janiw ukham Reyïkiti. Ukat Apocalipsis, Salmos qillqatanakanxa, Cristorux wali irnaqtʼir apnaqirjamaruw uñachtʼayi ukat “jukʼampi atipjäwinaka atipjañapata[kix]”, mä caballor latʼxatat nayraqatar ‘Atipjañamp sarantaski’ sasaw qhanañchasiraki. (Apo. 6:2; Sal. 2:6-9; 45:1-4).
2 Cristox apnaqirjam uttʼayatäxäna ukhaw Dragonampiru angelanakapampirux atipjäna, ukanwa nayrïr atipjäwipaxa. Chiqas angelanakar pʼiqtʼir arcángel Migueljamaxa, Supayampiru saxranakapampiruw aka Uraqir jaquqanïna, ukhat jichhakamax janiw uka saxranakax alaxpachar sarapkaspati (Apo. 12:7-9). Qhipatsti, Jesusax mä ‘suma arustʼäwi apanirjamaw’ Awkipampix templo uñjir sarapxäna (Mal. 3:1). Uñjir sarasaxa, cristianüpxtwa sirinakaruw jukʼamp juchan jikxatapxäna. Kunattix jupanakaw wil wartapxäna ukat akapachankir apnaqirinakampi mitisisaw qʼañuchasipxäna, chiqas Jachʼa Babiloniankirinakatxa jupanakaruw jukʼamp juchañchasiñapäna (Apo. 18:2, 3, 24).
Cristox Uraqinkir uywataruw qʼumachi
3, 4. 1) ¿Diosan ‘Suma arustʼäwi apanirjamax’ kunanaks Cristox lurawayi? 2) ¿Templo uñjir jutasax kuns jikxatapxäna? 3) ¿Tama pʼiqtʼirjamax khitirus Jesusax tamap uñjañapatakix uttʼayäna?
3 Jehová Diosampi ukat ‘suma arustʼäwi apanir’ Jesusampiw templon patiop uñjir jutapxäna, mä arunxa, kunjamsa Jesucriston luqtasitapxar yupaychasiski uk uñjiriw jutapxäna. Ukat chiqa cristianonakaruw jikxatapxarakïna, ukanakasti cristianüpxtwa sirinakampix janiw mitisitäpkänti. Ukampis Leví tribunkirinakjam uñtʼatäpki uka ajllit cristianonakax janiw suma qʼumapunïpkänti. Ukatwa Diosar yupaychañ tuqit qʼumachatäpxañapäna, kunjamtï Malaquiasax siskänxa: “[Jehová Diosax] Leví tribur qʼumachañatakiw quntʼasini, kunjämatï maynix qullqsa, qursa ninampi qʼumachki ukhama. Ukatsti jupanakax ofrendanakapxa Diosarux luqtapxarakiniwa kunjämtï jupanakax luqtapxirïki ukhama” sasa (Mal. 3:3). Diosax ‘suma arustʼäwi apanir’ Jesucristompiw alaxpachar sarañataki ajllitanakar qʼumachayäna.
4 Diosar taqi chuyma luqtir uka ajllitanakaxa, tamanakar horasapar manqʼa churañatak wal chʼamachasiskir Cristox uñjäna. Yatiyañataki revistax 1879 maratpachwa apsusiwayi, ukat jan waltʼäwinkasas uka qillqat tuqiw Diosan Apnaqäwipat yatiyasipkakïna. Ukat pachpa Jesusaw akham säna, ‘akapach tukusiskani uka urunakanwa’, kunsa utankis ukanakax luraski uk uñjir ‘purinï’ ukat “horasapar manqʼanaks” churaskiri mä uywataruw jikxatä sänwa. Ukatxa kusisiñanïpxaniwa, ukat ‘taqi kunatix utjitu ukanakxaruw uchä’ sarakïnwa Jesusaxa (Mat. 24:3, 45-47). Chiqas ukhampuniw pasawayäna, Cristox taman pʼiqtʼirjamaxa, taqi kunatï aka Uraqin utji ukanak uñjañapatakiw Amuyasiri Chiqapa Uywatar churäna. Ukhamax alaxpachar sarañataki ajllitanakarusa yaqha uwijanakarusa, Uraqpachan Jilïri Irpirinak tuqiw Jesusax uñjaski (Juan 10:16).
“Yawthapxam cosechxa”
5. Juanan mä unañchäwipanxa, ¿kunsa Cristox Diosan Apnaqäwipankxasax luraski?
5 Jesusax Apnaqirjam uttʼayatäxäna ukhaw ‘Tatitun urupax’ 1914 maran qalltäna. Cristox Diosan Apnaqäwipankxasaxa, kunanakampsa lurañapäna ukwa apóstol Juanax mä unañchäwin uñjäna, ukat akham qillqäna: “Ukatsti uñtasinxa mä janqʼu qinaya uñjta, uka qinayxansti mä jaqiw quntʼatäskäna, jupasti Jaqin Yuqapar uñtatänwa. Pʼiqiparux quri coronampi asxatatänwa, [cosecha qallantañatakix] amparaparusti mä yawiñ hoz aytʼatarakïnwa, uka yawiñ hosisti wali arïnwa” sasa (Apo. 1:10; 14:14). Ukatsti, mä angelaruw Reyir akham sir istʼäna: “¡Uka yawiñ hosimampi yawthapxam cosechxa, [...] yapusti qʼilluratäxarakiwa!” sasa (Apo. 14:15, 16).
6. Jesusan uñachtʼäwipanxa, ¿cosecha apthapiñ puriniñapkamax kunas trigomp chik jilañapäna?
6 Cosecha apthapiñat parlkasaxa, Jesusan mä uñachtʼäwipat amtayistu, jupax trigompit jan wali qurampit parläna. Jesusax suma trigo jatha satantir jaqjamätwa, suma cosecha apthapiñ suyasa sasaw säna. Uka trigoxa, ‘Diosan ajllit wawanakapäpxiwa’, mä arunxa, Cristomp chik apnaqañatak ajllitanakäpxiwa. Ukat jaqinakax ikirasipkäna ukhaw mä uñisirix mä arunxa, “Supayawa” jan wali qurampi phawantawayi, sasaw Jesusax säna, uka jan wali quranakax ‘Supayan wawanakapawa’. Yapunisti, yawthapiñ horaskam jan wali qurampi trigompi aliskpan sasaw säna, mä arunxa, ‘akapachan tukusiñapkamaw’ aliskañapäna. Ukhaw Jesusax jan wali qurampiru trigompir jaljapxañapatak angelanakapar khitanini (Mat. 13:24-30, 36-41).
7. ¿Kunjamsa Cristox aka Uraqin “cosecha” apthapiski?
7 Juanan unañchäwiparjamaxa, Uraqpachanwa Cristox cosecha apthapiski. Nayraqatxa, 144.000 ‘Diosan ajllit wawanakaparu’, jan ukax “trigomp” sasipki ukanakaru. Nayrïr Jachʼa Chʼaxwäwi tukuyat aksaruw khitinakas chiqa cristianüpxi ukat khitinakarakis kʼari cristianüpxi ukax qhan uñjasïna. Ukatwa payïr apthapiwix qalltasiwayi, mä arunxa, yaqha uwijanakjam uñtʼatäpki ukanakaruw apthapisiwayi. Jupanakaxa, janiw ‘Diosan ajllit wawanakapäpkiti’, jan ukasti, taqi markankiri ukat kunayman kasta parlani, ‘walja jaqinakjam’ uñtʼatäpki ukanakäpxiwa. Diosan Apnaqäwipanxa, Jesusampi ukat 144.000 ajllitanakampiw alaxpachat apnaqanipxani, ‘walja jaqinakax’ jupanakamp apnaqatäñwa wal suyasipki (Apo. 7:9, 10; Dan. 7:13, 14, 18).
Cristow tamanakar pʼiqtʼaski
8, 9. 1) Jesusax sapa tamaru ukat sapa mayniru uñjatapxa, ¿kunjamats yattanxa? 2) 26 janankir fotorjamaxa, ¿“Supayan imantat yatichäwi[nakapatxa]” kawkïrinakatsa jithiqtañasäspa?
8 Kunjamsa nayrïr tamanakax Diosar luqtasipkäna ukxa, Cristow sum uñjaskäna, ukwa pasir yatichäwin uñjawaytanxa. Jichhürunakanxa, Jilïr pʼiqtʼirjamax Cristow “alaxpachansa, akapachansa” munañanixa, ukatwa Uraqpachankir taqi tamanakarusa tamanak uñjir irpir chuymaninakarus uñjaski (Mat. 28:18; Col. 1:18). Ajllitanakxar “pʼiqïñapatakix Cristo pachparurakiw” Diosax uchawayi (Efe. 1:22). Ukatwa Diosan markapan patak waranq jila tamanakan kunas pasaski ukxa Cristox uñjakipuni.
9 Nayra maranakanxa, akham sasaw Jesusax Tiatira tamar yatiyatayna: “Akham siw Diosan Yuqapax, khititï ninjam nayranïkis [ukaxa] [...]. Taqi luratanakamxa sumwa yatta” sasa (Apo. 2:18, 19). Uka tamankir yaqhip cristianonakax jilanchjañanakana ukat qʼañu lurañanakanwa sarnaqapxäna, ukwa Cristox ninjam nayranïsax sum yatïna, ukatwa akham iwxtʼäna: “Nayax jaqin amuyupsa, chuymapsa [uñtʼtwa]; jumanakarusti luräwinakamarjamarakiw sapaqat mayniru churapxäma” sasa (Apo. 2:23). Ukhamax Jesusax janiw tamanakan luräwinakapak uñjkiti, jan ukasti sapa mayniruw uñji. Maysa tuqitsti Tiatira tamankir yaqhip cristianonakax “Supayan imantat yatichäwi[kapatxa]” jithiqtatäpxänwa, ukatwa Jesusax jupanakar askit uñjäna (Apo. 2:24). Jichhürunakanxa, “Supayan imantat yatichäwi[nakapaxa]” Internetana, nuwasiñanak uñachtʼayir anatañ videonaka ukat jan walinakax walikïskiw sirinak tuqiw jutaspa, ukampis uka yatichäwinakat jithiqtir cristianonakarux ukhamarakiw Cristox wali askit uñji. Chiqansa walja cristianonakaw Jesusar taqi kunan istʼañatakix chʼamachasisipki, ¡uk uñjasaw Jesusax kusisi!
10. ¿Kuna uñachtʼäwis Cristox irpir chuymaninakar pʼiqtʼaskatap uñachtʼayistu, ukat irpir chuymaninakax khitirus atinisipxañaparaki?
10 Irpir chuymaninak tuqiw Jesusax munasiñamp tamanakar pʼiqtʼaski (Efe. 4:8, 11, 12). Nayrïr maranakanxa, uka irpir chuymaninakax Jesusan kupi amparapan warawaranakjamaw sasaw Apocalipsis libron qhanañchasi (Apo. 1:16, 20). Uka tiemponxa taqi irpir chuymaninakaw alaxpachar sarañatak ajllitäpxäna. Jichhax niya taqi irpir chuymaninakaw ‘yaqha uwijanak’ taypitäpxi, ukampis Jesusan kupi amparapankapxarakiwa, mä arunxa, jupan apnaqataw lurañanakap phuqapxi, kunattix oración tuqi ukat qullan ajayump yanaptʼataw jupanakarux ajllisiwayi (Hech. 20:28). Jesusaxa, Uraqpachan Jilïr Irpirinak tuqiw cristianonakar pʼiqtʼaski, ukaruw taqi irpir chuymaninakax atinisipxi (Hechos 15:6, 28-30 liytʼasiñapawa).
“¡Jutaskakim, Tatit Jesús!”
11. ¿Kunatsa Jilïri pʼiqtʼirisan jutañap muntanxa?
11 Juanan unañchäwipanxa, walja kutiw Jesusax “jankʼakiw jutä” sasin arsüna (Apo. 2:16; 3:11; 22:7, 20). Jachʼa Babiloniaru ukat Supayan apnaqat akapachar tukjañataki jutañatwa parlaskäna (2 Tes. 1:7, 8). Juanax uka unañchäwin uñjkäna uk phuqasiñap wal munasaw akham säna: “Ukhamäpan. ¡Jutaskakim, Tatit Jesús!” sasa. Jiwasax ukhamarakiw kunjamsa Jilïri Rey Jesucristox Diosan sutip qʼumachani ukat Apnaqäwiparus jachʼañchani uk uñjañ wal muntanxa.
12. ¿Tukjañataki thayanak janïr antutaskipanxa, kuna luräwsa Cristox tukuyañapa?
12 Jesusax Supayan ñanqha pachapar janïr tukjkipanxa, alaxpachar sarañataki ajllitanakax taqiniw qhip qhip sellompi chimputäpxañapa. Kunapachatï 144.000 ajllitanakar sellan tukuyasxani, ukhakiw Supayan ñanqha pachapar tukjañataki ‘thayanakax’ antutasini sasaw Bibliax qhanañchi (Apo. 7:1-4).
13. ¿Jachʼa tʼaqhisïwi qalltkani ukhaxa, kunjamsa Jesusax Apnaqaskatap qhanstayani?
13 Cristox 1914 maratwa Diosan Apnaqäwipan apnaqaski, ukxa niya taqi jaqinakaw jan amuyapkiti (2 Ped. 3:3, 4). Ukampis Jesusax niyaw Supayan ñanqha pachapar tukjani, ukhamatwa apnaqaskatap qhanstayani. Ukat “ñanqha jaqix”, mä arunxa, cristianüpxtwa sirinakan pʼiqtʼirinakapax tukjatäni ukhaw Criston apnaqatapax qhan amuyasini (2 Tesalonicenses 2:3, 8 liytʼasiñapawa). Ukhamatwa Jesusax Diosan uttʼayat taripirïtap uñachtʼayani (2 Timoteo 4:1 liytʼasiñapawa). Jachʼa Babiloniar tukjañatakixa, cristianüpxtwa sirinakaruw nayraqat tukjasiñapa, kunattix jupanakaw jukʼamp juchanïpxi, ukxarusti mayni kʼari yupaychäwinakaruw tukjasirakini. Ukatakixa, Jehová Diosaw qʼañu warmir tukjañ amtapxa, marka apnaqirinakan chuymapar uskuni (Apo. 17:15-18). Ukhamaw ‘jachʼa tʼaqhisïwix’ qalltani (Mat. 24:21).
14. 1) ¿Kunatsa tʼaqhisiñ urunakax ‘jiskʼaptayatäni’? 2) ¿‘Jaqin Yuqapat alaxpachan mä chimpux uñstanini’ ukhax kunjamsa Diosan markapax jikxatasini?
14 Uraqin jiltʼapki uka ‘ajllitanakap laykuw’ Diosax tʼaqhisiñ urunakxa ‘jiskʼaptayani’ sasaw Jesusax säna (Mat. 24:22). Akapachan apnaqirinakax kʼari yupaychäwir tukjapxani ukhaxa, Jehová Diosax alaxpachar sarañataki ajllitanakarusa yaqha uwijanakarusa janiw tukjaykaniti. Ukat Jesusan arunakaparjamaxa, jachʼa tʼaqhisiñ uru pasatatsti, unañchäwinakaw utjani intina, phaxsina ukat warawaranakana, “ukapachaw alaxpachan mä chimpux uñstanini Jaqin Yuqapata”, ukatwa “taqi markan jakir jaqinakasti [...] jachapxa[rakini]”. Ukampis alaxpachar saririnakasa ukat aka Uraqin jakañ suyirinakasa, janiw ukham jikxatasipkaniti, jan ukasti, Jesusan aka iwxtʼaparuw istʼapxani: “chʼamachasipxam, ukhamarak suyapxam jankʼakirakiw qhispiyatäxapxäta” sasa (Mat. 24:29, 30; Luc. 21:25-28).
15. ¿Cristox jutkani ukhax kuns lurani?
15 Jesucristox atipjäwip janïr tuktʼaykasaxa, kunanakampsa lurañapäna ukxa akham sasaw arsuwayäna: “Kunapachatix Jaqin Yuqapax reyjama jutkani ukapachaxa, angelanakapampi muyuntataw jupax quntʼasini tronoparuxa taqi chʼaman kankañapampi. Taqi markanakankir jaqinakarakiw jupan nayraqataparux tantachtʼasipxani. Jupasti jupanakarux jaljarakiniwa, kunjämtix awatirix ovejanakarux cabritonakat jaljkix ukhama. Ovejanakaparusti kupïxaparuw ucharakini, cabritonakarusti chʼiqäxaparuraki” sasa (Mat. 25:31-33). Ukhamax Cristox mä Taripirjamaw ‘taqi markanakankir jaqinakar’ jaljañatak jutani. Kupïxapankki uka ‘uwijanakaxa’ Uraqin jiltʼapki uka ajllit cristianonakaruw yanaptʼapxi. Ukat chʼiqäxapankki uka cabritonakasti, “Jesucristosan qhispiyasiñ arunakapar jan [istʼapki]” ukanakäpxiwa (2 Tes. 1:7, 8). Uwijanakjamäpki uka “aski jaqinakasti” Uraqin ‘wiñay jakañwa’ katuqapxani. Ukampis cabritonakax ‘wiñay mutuñaru’, mä arunxa, jan mayampitak tukjatäpxaniwa (Mat. 25:34, 40, 41, 45, 46).
Jesusax atipjäwip tuktʼayi
16. ¿Kunjamsa Jilïr pʼiqtʼirisax atipjäwip tukuyani?
16 Khitinakatï reyinakjama ukat sacerdotenakjama apnaqapkani ukanakaxa, sellompi chimputäxapxani ukat yaqha uwijanakas Jesusan kupïxapankxapxani ukhaw Jilïr pʼiqtʼirisax mä atipirjam sarantani, “jukʼampi atipjäwinaka atipjañapataki” (Apo. 5:9, 10; 6:2). Jesusax wali chʼamani angelanakarusa alaxpachankxapxani uka ajllitanakarusa mä ejercitorjamaw pʼiqtʼani, ukhamatwa Supayan apnaqat akapachankir ejercitonakarusa, politiconakarusa ukat jachʼa alakip luririnakarusa qʼal tukjapxani (Apo. 2:26, 27; 19:11-21). Ukhamax aka ñanqha pachar tukjani ukhaw Criston atipjäwipax phuqatäxani. Ukat Supayarus saxranakarus mikʼayaruw waranqa maranakatak jaquntani (Apo. 20:1-3).
17. ¿Waranq Maranak Apnaqäwipanxa Cristox kawkirus uwijanakapar irpani, ukat kunsa taqi chuym amtañasaxa?
17 Jachʼa tʼaqhisiwi jakkir pasapkani uka ‘walja jaqinakatxa’ akham sasaw Juanax säna: “Trono taypinkkis uka Corderow jupanakarux ovejanakarjama awatini, jakkir uma jalsunakaruw anakirakini” sasa (Apo. 7:9, 17). Uka arunakarjamaxa, Cristox Waranq Maranak Apnaqkani ukhaxa, jupan arup istʼir uwijanakarux irpaskakiniwa ukat wiñay jakañ jikxatapxañapatakis yanaptʼarakiniwa (Juan 10:16, 26-28 liytʼasiñapawa). Ukhamasti, ¡Jilïr pʼiqtʼirisar arkaskakiñäni, jupaw suma uraqir irpistani!
Amtañataki
• ¿Reyit uttʼayatäxasax kunsa Cristox luräna?
• ¿Khitinak tuqis Jesusax tamanakar uñjaski?
• ¿Jilïr pʼiqtʼirisax kunjamanakatsa jutarakini?
• ¿Kunjamsa Cristox suma Uraqin irpaskakistani?
[Jisktʼanaka]
[29 janan fotopa]
Jesusax Supayan ñanqha pachapar tukjasaw Diosan Apnaqäwipankxatap qhanstayani