“Jaqinakan chuymapar purtʼañatakiw yanaptʼitu”

BRASIL markat aynach tuqinkir Porto Alegre sat markanxa, jichha maranakakiwa, jaqin jan waltʼäwinakapat parlañatakix kunaymani jachʼa markanakat tantachasipxäna. Ukarusti walja jaqinakarakiw 135 markanakat puripxäna. Ukat kunapachatï uka tantachäwin samartʼaña horasäkän ukhaxa, mä tamankiri jilat kullakanakaxa, uka jaqinakatxa waljaniruw Diosan Apnaqäwipat yatiyapxäna. ¿Kunjamatsa uka jaqinakamp parltʼapxpachäna?

Uka tamankir, Elizabete sat precursora kullakax akham qhanañchi: “Buenas nuevas para gente de todas las naciones sat folletompiw yatiyapxta” sasa. Ukat akham saskakiwa: “Yaqhipanakaxa janipuniw Diosan Apnaqäwipat suma yatiyäwinakxa nayrax istʼapkataynati. Ukhamatwa Bolivia, China, Francia, India, Israel ukat Nigeria markankir jaqinakampix parltʼapxta. Ukat yaqhipanakax arupat Bibliat apstʼat qillqatanak churatax taqi chuymaw katuqtʼasipxitu” sasa.

México markankir Raúl sat precursor jilataruxa, ukhamarakiw uka folletox askinak jikxatañatakix yanaptʼatayna. Mä kutixa árabe parlir 80 maran viudo jaqiruw yatiyañatak jikxatatayna ukat kunapachatï árabe arut Diosan Apnaqäwipat folleton liytʼäna ukhaxa, chuym chʼallxtayasisaw jachaqtʼasitayna. Chiqansa, jupatakix wali kusiskañänwa, kunatix pachpa arupatwa janiw jiwañax utjxaniti sasax liytʼasïna, kunjamtï Apocalipsis 21:3, 4 qillqatanx qhanañchki ukhama. Ukat mä uruxa, Raulux callenakan yatiykasax portugués arut parliri mä jaqiruw uñtʼatayna, jupax ukhamarakiw yuqapan jiwatapat llakitaskäna, ukat portugués urut uka folletot liytʼayäna ukhaxa, jukʼamp yatiqañ munirista sasaw säna, ukat Bibliat yatiqañsa munarakïnwa.

Buenas nuevas para gente de todas las naciones sat folletompix Raulux alemán, armenio, chino, coreano, francés, hindi, inglés, mixe, persa, ruso ukat zapoteco arunakanwa wali sum yatiyatayna. Ukat akham sarakiwa: “Nayatakix wali wakiskiriw uka folletompi yatiyir sarañaxa, ukat janisay yaqha arunak yatkstxa, jaqinakan chuymapar purtʼañatakiw yanaptʼitu” sasa.

Chiqas, waljaniw yaqha markanakat markasar jutapxi, ukhamax jiwasatix Buenas nuevas para gente de todas las naciones sat folleto apasiñänixa, jankʼakiw Diosan Apnaqäwipat suma yatiyäwinak yatiyañäni. ¿Jumax apnaqasisktati?

[32 janan fotonakapa]

Uka folletomp yanaptʼayasisaw Raúl jilatax jaqinakan chuymar purtʼi