Jehová Diosan markapanxa walpun irnaqtʼawayta

Vernon Zubko sat jilatan arsutaparjama

STENEN marka jakʼanwa mä granjan jilsuwayta, uka markaxa, Canadá markan Saskatchewan sat provinciapankiwa. Fred tatajampi ukat Adella mamajampixa, Aurellia jilïr kullakajampiru ukat Alvin, Allegra ukat Daryl sullkanakajampiruxa, Diosar yupaychapxañajatakisa ukat kunatï jakañatak wakiski ukanak churañatakis walpun chʼamachasipxäna. Jichhakamaw chiqa yatichäwinakat yatichapxatapat wal yuspärapxta.

Tatajax alaxpachar sarañatak ajllitänwa ukat jan axsartʼasaw Diosan Arupat parlirïna. Wali irnaqtʼirirakïnwa. Jaqinakampix Jehová Diosan Qhanañchiripjam uñtʼatäñwa munäna, chiqa yatichäwinakatxa parlapunirïnwa. Ukham taqi chuyma ukat jan axsaras Diosar luqtatapax chuymajarupuniw purtʼitäna. Tatajax akham sirïtuwa: “Diosan markapanx wal irnaqtʼañamawa, ukhamatwa kuna jan walinakarus jan purtʼaskätati” sasa

Stenen markan callenakapana ukat uka jakʼankir markanakanwa yatiyapxirïtxa, ukampis nayatakix chʼamakïnwa. Kunattix sapa markanxa, jan wali jaqinakaw utjäna, jupanakaw waynitunakat sawkasipxirïtu. Kimsaqallq maranikïskayät ukhaxa, mä esquinan saytʼasisaw Yatiyañataki ukat ¡Despertad! Resvistanakamp yatiyaskayäta, ukhamaruw mä yuqallanakax muyuntapxitäna, ukat machaq sombrerox aparasinsti, ladoxänkän uka posteruw warkkatawayapxi. Ukampis mä jilïr jilataw uñchukisinkatayna, jakʼachasisinsti, “Vern, ¿walikïsktati?” sasaw jisktʼanitu. Uk istʼasax jankʼakiw yuqallanakax chhuktawayxapxäna. Chiqas ukhaman uñjasiñax janis nayatakix walikchïnxa, ak yatiqawayta: callenakan yatiykasax janiw mä poster uñtat sayjañasäkiti. Taqi ukanakaw jan axsartʼas yatiyañatakix yanaptʼawayitu.

Mayo phaxsina 1951 maranwa, tunka kimsani maranïkayät ukhaw Alvin jilajamp bautisasiwayapxta. Bautisasirinakatakix Jack Nathan jilataw arstʼäna, janipuniw ni mä phaxsis Jehová Diosat parlañ jaytapxañamäkiti sasaw chʼamachtʼapxitäna, uka arstʼäwipxa janipuniw armaskti. * Familiajanxa, precursorjam luqtañarux wali askiruw uñjapxirïta. Ukatwa 1958 maranxa, colegio tukuyxasax precursorjam luqtañatak Winnipeg (Manitoba) sat markar sarawayta. Tatajampix maderanak cepillasaw familiatak irnaqtʼapxirïta, ukampis tatajamp mamajampix precursorjam luqtañarupuniw chʼamañchtʼapxirïtu, ukhamax sarañ amtkayät ukhax wal yanaptʼapxitäna.

Yaqha chiqanwa Diosatak irnaqta, ukat mä suma warmimpiw jaqichasta

Khä 1959 maranxa, sucursalax Quebec sat provinciar sarapxañapatakiw yatiyirinak thaqhaskäna. Ukanxa, yatiyirinakax wal  munasïna. Nayax Montreal markaruw precursorjam Diosatak irnaqtʼir sarawayta. Ukanx francés arut parlañ yatiqañajänwa ukat yaqha costumbrenakarus yatintañajänwa. Ukampis tamanak tumptʼir mä jilatax akham sasaw iwxtʼitäna: “‘Kawkhankkayättix ukanxa, janiw ukham lurapxirïkti’ sasax janipuniw sätati” sasa, uka iwxtʼapax walpun yanaptʼawayitu (1 Cor. 9:22, 23).

Quebec markanxa, sapakiw yatiyir sarirïta. Ukampis 1961 maranwa, Shirley Turcotte kullakampix jaqichasiwayta, juparux Winnipeg markänwa uñtʼayäta. Jupasti Jehová Diosar luqtir familiat jutirirakïnwa. Ukat kunjamsa jupax chʼamañchtʼitani ukxa janiw amuyaskayätti.

Gaspé markpachanwa yatiyapxta

Casarasxapta ukat pä mararuxa, precursor especialjam luqtañatakiw Rimouski (Quebec) markar sarxapxayäta. Ukar purisaxa, Canadá markankir Gaspé markaruy yatiyanipxam sasaw sucursalax sapxitäna. Chiqpachansa, chiqa yatichäwin jathap satantiriw sarapxañajänxa (Ecl. 11:6). Ukhamax waranqats jila revistanakampi, niya pusi patak libronakampi ukat mä jukʼa isinakampi, manqʼañanakamp kunaw autorux apapxta, ukat mä phaxsitakiw sarawayapxta. Purisax mayat mayatwa taqpach jiskʼa markanak muytanipxta. Ukampis uka markankir mä radionxa, Jehová Diosan Qhanañchirinakapat janipuniw kuna qillqatanakaps katuqasipxätati sasaw jaqinakarux yatiyapxäna. Ukampis jila parte jaqinakatxa janiw uka radion yatiyäwipat amuyapkänti, katuqasipxam siskaspans ukham amuyapxatayna, ukhamasti Bibliat apstʼat qillqatanakxa katuqtʼasipxänwa.

Quebec markanxa, nayra maranakanx Diosan Arupat yatiyañax jarkʼatänwa, ukampis sarapkayät uka nayrakiw yaqhip chiqanakan yatiyañax jan jarkʼatäxänti. Ukhamasti awisax policianakamp jarkʼataw uñjasipxirïta. Mä kutix niya taqpach utanakaruw Bibliat apstʼat qillqatanak jaytasipkayäta, ukhamaruw mä policiax purinïna ukat oficinar sarañäni sasaw irpapxitu. Uka markankir mä abogadow jan yatiyapxañajatakix mä kamach apsutayna. Policianakan jilïripax janiw ukankänti, ukhamax uka abogadoruw Toronto markankir Sucursalat apayanit mä carta uñachtʼayta, uka cartanxa, jan jarkʼata yatiyañ tuqitwa parläna. Liytʼasinxa, uka abogadox akham sänwa: “Janiw kuna problemanaks munkti, parroquiankir tatakuraw uk lurañajatakix mayitu” sasa. Ukatsti, jaqinakax chiqas yatiyäwisax jarkʼatäkaspa ukham jan amuyapxañapatakixa, policiax jikxatäpkitan uka pachpar kuttʼasaw yatiyasipkakiyäta.

Qhiphärmantisti, kunatï paskäna ukanak polician jilïripar yatiyañatakiw kuttʼapxayäta, uk yatisinsti wal colertʼasïna, ukatwa abogadorux telefonot jawsasin tuqinuqäna. Ukat akham sapxitäna: “Kunas utjanixa nayaruw nayraqat jawsanipxitäta, nayaw taqi kuns uñjaskäxa” sasa. Nanakax janiw uka markankiripkayätti, janirakiw francés arut parlañ sum yatipkayätti, ukampis jaqinakax wali munasiñampiw katuqtʼapxitäna. Ukat akham sasaw jisktʼasipxirïta: “¿Aka jaqinakax Jehová Diosar yupaychapxpachäniti?” sasa. Ukxa walja maranak qhipatwa yatxapxayäta, kunattix Tantachasiñ Utanak lurañatakiw Gaspé markarux kuttʼapxayäta. Yatiyapkayät uka jaqinakatxa, waljaniw Jehová Diosan Qhanañchiripar tukupxatayna. Chiqas Jehová Diosapuniw ‘jiltayirixa’ (1 Cor. 3:6, 7).

Mä herencia katuqawayapxta

Khä 1970 maränwa, Lisa sat imill wawajax nasiwayi. Chiqans jupax Jehová Diosan mä herenciapawa, walpun kusisipxayäta. Shirley esposajampi ukat Lisa sat wawajampi chikax walja Tantachasiñ Utanak lurañanwa irnaqtʼawayapxta. Yatiqañ utat mistxasax akham sasaw wawajax sapxitäna: “Naya laykuw jumanakax Diosatak sapürunjam irnaqañ jaytawayapxtaxa, ukatwa precursorjam irnaqañ amtawayta” sasa. Pä tunka maranakatxa jichhakamaw Sylvain chachapampix precursorjam irnaqtʼasipki. Jehová Diosar yupaychañ laykuw kunanakatï wakiski ukanakampik jakasiñ familjamax amtawayapxta. Lisa sat wawajax  kuntï precursorjam irnaqañ qalltkasax sapkitän ukxa janipuniw armaskti. 2001 maranxa, jupaw sapürunjam Diosar luqtañatak yanaptʼawayitu, ukhamatwa precursorjam jichhakam luqtawayta. Chiqas precursorjam luqtañax Jehová Diosar atinisiñataki ukat kunatï munaski ukamp kusisita jakañatakiw yanaptʼitu.

Tantachasiñ Utanak lurañatakix munasiña ukat jan jithiqtas taqi chuyma Diosar luqtirinakaw munasi.

Yanaptʼañatakix jankʼakïki jan ukax kun luram satas iyawski ukanakaxa, Jehová Diosan bendicionap katuqapxiwa, ukwa yatiqawayta. Comité Regional de Construcción ukan irnaqtʼañax wali askipuniwa, Quebec provinciana ukat yaqha chiqanakanwa Tantachasiñ Utanak lurañ yanaptʼta, jilat kullakanakar ukham yanaptʼañax wali askiwa.

Yaqhip jilatanakax inas jan sum arstʼañ yatipkchiti, ukampis Tantachasiñ Utanak lurasaxa kunjamtï warawaranakax kʼajapkixa ukhamarakiw kʼajapxi. Uka munat jilatanakax taqi chuymaw irnaqtʼapxi, luratanakapas wali qhanaw uñjasiraki. Chiqpachansa, Jehová Diosaw Tantachasiñ Utanak lurasiñapatakix jupanak tuqi yanaptʼaski.

Yaqhipanakax akham sasaw jisktʼapxitäna: ¿“Tantachasiñ Utanak lurañ yanaptʼañajatakixa, kunjam jaqïñajas wakisi?” sasa. Ukxarux nayax siristwa: “Nayraqatxa, Jehová Diosaru, Yuqapampiru ukat taqi jilat kullakanakar munasiñaw wakisi” sasa (1 Cor. 16:14). Diosat jan jithiqtasa ukat taqi chuyma yupaychañasarakiwa. Taqi kunas jan munatasarjam luraskani ukhaxa, Diosat jan jithiqtir cristianoxa, Diosan markaparux yanaptʼaskakiniwa. Ukat jutïrin irnaqtʼaskakiñatakis Diosar taqi chuyma yupaychatapaw yanaptʼani.

Jehová Diosarux walpun yuspärta

Awkijax 1985 maranwa jiwawayxäna. Jupax Diosan markapan walpun irnaqtʼäta sasaw iwxtʼitäna, uk janipuniw armaskti. Chiqas alaxpachar sarañatak mayni ajllitanakjamaw alaxpachan irnaqtʼaskpacha (Apo. 14:13). Mamajasti 97 maranïxarakiwa, apoplejía usump usuntatawa, janiw sum arsurjamäkiti. Ukampis Biblian yatichäwinakap janiw armaskiti. Cartapanxa, Biblian jiskʼa tʼaqanakapat qillqtʼanipxitu ukat Jehová Diosat jan jithiqtas yupaychasipkakim sasaw chʼamañchtʼanipxarakitu.¡Wali munasiri ukham awk taykanïsax jilat kullakanakajampix walpun kusisipxta!

Jehová Diosar taqi chuyma chupaychir Shirley esposajatxa, ukhamarakiw Diosarux wal yuspärtxa. Jupasti, Mamapan aka iwxtʼapatxa, amtasipuniwa: “Vern chachamax Diosar yupaychañ tuqitxa walja lurañanakapaw utjani, ukhamasti jan tiemponïkanixa janiw chuym ustʼayasïtati” sasa. Casarasipkta ukhaxa, Jehová Diosar luqtasaw chuymankipstañäni sasaw amtawayapxta, akapachax tukusxan ukhax jakkiriw machaq jutir pachar mantañäni, ukat wiñayatakiw Diosarux luqtañäni sasaw amtawayapxta. Casarasipxta ukhat jichhakamax 49 maranakäxiwa. Chiqas esposajamp chikaxa, ‘Tatitun luräwipanx’ walpun irnaqtʼawayapxta (1 Cor. 15:58). Jehová Diosax janipuniw kuns faltayapxirïkituti.

[Qhanañchäwi]

[31 janan fotopa]

“Jehová Diosar luqtañatakiw kunatï munaski ukanakampik kusisit jakasiñ Familjam amtawayapxta”