Jehová Diosan markapar uñtʼañ wawanakamar yanaptʼapxam

WAWANAKAX yatiqañ wal munapxi. Israelitanakax Egipton pascua amtañ qalltapkäna ukhaxa, ¿wawanakapax kamsasas awk taykanakapar jisktʼapxpachäna sasin jisktʼasirïtati? Inas akham jisktʼasipxchïna: “¿Kunatsa uka uwijar jiwayapxi?”, “¿kunatsa tatajax punku wilanchaski?”, “¿Kawkirus sarañäni?” sasa. Uka jisktʼanakaxa, Diosarux janiw coler churkänti, ¿kunatsa ukham sistanxa? Israelit awk taykanakarux Dios pachpaw kunjamsa pascua amtapxañapa ukxa sum qhanañchäna, ukat akham sarakïnwa: “Wawanakamatix sapxätam ‘¿kun sañsa muni aka fiestaxa jumanakatakixa? sasa ukkhaxa, jumanakax sapxätawa: ‘Aka uywasti Tatitur jachʼañchasina Pascuan sacrificiot luqtatawa. Jupasti kunapachatix egipcionakaru jiwaraykäna ukkhaxa, Egipto markan jakapkäna uka israelitanakan utanakapsti pasawayakïnwa, ukhamatwa taqi familianakasaru qhispiyäna’” sasa (Éxo. 12:24-27). Qhipatxa, “mandamiento arunaka, leyinaka, arsutanaka[ta]”  wawanakaman jisktʼatax qhanañchapxañamawa sasaw Jehová Diosax israelitanakar säna (Deu. 6:20-25).

Ukhamasti, chiqa yupaychäw tuqitxa, wawanakar sum qhanañchasiñapwa Diosax munäna, ukanak istʼasin wawanakax Jupar munasipxañapa ukat qhispiyiriparjam uñjapxañapwa Diosax munarakïna. Jichhürunakanxa, Diosax ukwa wawanakatakix munaraki. ¿Kunjamsa wawanakarux Jehová Diosaru ukat markaparu munasipxañapatakix yanaptʼsna? Diosan markaparu sum uñtʼapxañapatakiw yanaptʼañasa, ukat kunjamsa uka tamax sapa mayniru yanaptʼistu uksa amuyapxañapawa. Kunjamsa wawanakarux Diosan markapar sum uñtʼapxañapatakix yanaptʼsna uka tuqit iwxtʼanak uñjañäni.

Tama

Wawanakax kawkïr tamarutï familiapax sarki ukarux sum uñtʼapxañapawa. Ukatakixa, awk taykanakaw jupanakamp chika tantachäwinakar irpapxañapa. Ukhamatwa kuntï israelit awk taykanakar Diosax iwxtʼkäna ukarjamax phuqapxani, jupanakarusti akham sänwa: “Taqpach markaw tantachasiñapa, taqi jaqinaka, warminaka, wawanaka [...], ukhamat uka leyinak leetʼasiri istʼapxañapataki, ukhamat Tatitu Diosamar jaysaña yatiqapxañapataki, ukhamaraki uka leyinakas siski ukhamarjam sarnaqapxañapataki. Ukhamatwa jumanakan wawanakamasa jan kun yatkasinxa, ukanakaru istʼapxani, Tatitu Diosaparu jaysañsa yatiqapxarakini taqi jakañapana, kawkïri uraqtix katupkäta ukana, kunapachatï Jordán jawira khurkataru makhatapkäta ukapacha” sasa (Deu. 31:12, 13).

Wawanakax jiskʼatpachwa Diosan Arupat yatiqañ qalltapxaspa. Apóstol Pablosti Timoteorux akham sänwa: “Jumax wawatpachwa Tatitun arunakapxa yatta” sasa (2 Tim. 3:15). Tantachäwinakanxa, jiskʼa wawanakas yatiqapxiwa,  ukat qʼuchunaksa sum uñtʼasipkaraki. Tantachasiñ Utanwa Bibliarusa ukat qillqatanaqakarus respetomp uñjañsa apnaqañsa yatiqapxaraki. Ukat chiqpach cristianonakax wali munasiñampi jupanakkam uñjasipxatapsa sum amuyapxaraki. Jesusax akham sänwa: “Aka machaq mandamientwa churapxsma: Maynit maynikama munasipxam. Kunjämtix nayax munasipxsma, ukhama jumanakax maynit maynikam munasipxañamarakiwa. Jumanakatix maynit maynikama munasipxätaxa, taqiniw amuyapxani nayan discipulonakaxäpxatama” sasa (Juan 13:34, 35). Tantachäwinakan jilat kullakanakax manasiñampi uñjasipxani ukat sumankapxarakini ukhaxa, wawanakax wal sarañ munapxani.

Awk taykanakatix tantachäwi janïr qalltkipan puripxani ukat tukuyatarus mä jukʼamp qhiparapxani ukhaxa, wawanakax amigonakwa taman jikxatapxaspa. Ukat mitanakapampik jan chikachasiñapatakixa, ¿janit jilïr jilat kullakanakar uñtʼayañax wakiskaspa? Jupanakax walja experiencianïpxiwa, ukat yatiñanïpxarakiwa, wawanakax jupanakampïsax wal yatiqapxaspa. Biblia qillqaskäna uka tiemponakanxa, Zacarías sat mä chachax “Diosar axsartañwa yatichäna”, jupaw Judá markankir Uzías sat wayna reyirux wal yanaptʼäna. Jichhürunakanxa, ukhamarakiw walja maranak Diosar taqi chuyma yupaychir jilat kullakanakax wawanakar wal yanaptʼapxaspa (2 Cró. 26:1, 4, 5). Ukatxa, Tantachasiñ Utankkasax biblioteca, tablero ukat yaqhanakampwa wawanakamarux kunatakis ukanakax ukanki ukanak qhanañchtʼapxasma.

Uraqpachankir Jehová Diosan Qhanañchirinakapa

Jehová Diosan markapanxa, Uraqpachanx patak waranqat jila tamanakaw utji. Wawanakaxa uka tamanak taypinkatapxa yatipxañapawa. Uraqpachankir uka tamax kunjamasa, kunanaksa lurapxi ukat kunjamsa wawanakas uka lurañanakan yanaptʼapxaspa uksa qhanañchtʼapxañamawa. Kunatsa taqpach jachʼa tantachäwinak wali kusisita suyapxta, ukat tamanak tumptʼir jilatan tamar puriniñapsa wal suyapxta ukanakasa qhanañchtʼapxarakismawa ( “Familiana Diosar Yupaychañataki Arumanxa kuna tuqinakatsa yatxatsna” siski uka recuadro 28 janan uñxattʼäta).

Puedepkäta ukhaxa, tamanak tumptʼir jilataru, misioner jilat kullakanakaru, betelitanakaru, jan ukax khitinakatï Diosatak sapür irnaqtʼapki ukanakaruw maqtʼasiñatakix utamar jawstʼapxasma. Jupanakax wawanakatakix janiw tiemponïpkiti sañax janiw walïkaspati. Uka jilat kullakanakax Jesusat yatiqasisin wawanakar wali munasiñampi uñjañatakiw chʼamachasipxi (Mar. 10:13-16). Wawanakasa waynitunakasa, uka jilat kullakanakan experiencianakap istʼasa ukat wali kusisita Diosar luqtasipkatapa yatisax inas jupanakjam Jehová Diosatak irnaqtʼañ amtapxchispa.

¿Diosan markapar jukʼamp sum wawanakamar uñtʼayañatakix kunanakampsa lurapxasma? Inas Familiana Diosar Yupaychañataki Arumanxa, Los testigos de Jehová, proclamadores del Reino de Dios sat librot yatxatapxchisma, ukat kunjamsa jilat kullakanakax altʼat chuymampi Jehová Diosar taqi chuyma yupaychapxäna ukanak qhanañchtʼapxchisma. Ukat kunjamsa jupanak tuqix taqi jaqinakar Arupat yatiyasiñapatakix Diosax yanaptʼawayi uksa qhanañchtʼapxarakchisma. Jan ukax Jehová Diosan Qhanañchirinakapan lurat videonakatxa, kunasa nayra tiemponakatsa jichha tiempotsa yatiqsna ukanakwa yatichtʼapxarakisma. Ukatxa, markamankiri jan ukax yaqha markankir Betel Uta uñjiris wawanakar irpapxarakismawa. Ukhamatwa, kunjamsa Amuyasiri Chiqapa Uywatax nayrïr maranakanjam Diosar yupaychañ tuqit Uraqpachankir jilat kullakanakar yanaptʼasipki ukanak amuyapxarakini (Mat. 24:45-47, MT; Hech. 15:22-31).

Sapa mayni wawatakjam yatichapxma

Wawanakamar yatichkasaxa, kunjamsa Jesusax apostolanakar yatichirïna uk amtasipxañamawa. Mä kutixa akham sänwa: “Jukʼampiw jumanakar arsuñanakaxax utjaskitu, ukampis jichhax janiw amuytʼapkasmati” sasa  (Juan 16:12). Jesusax janiw taqi kunat yatichasax qariykänti, jan ukasti jukʼat jukʼatwa sum amuyapxañapatakix yatichirïna. Ukhamasti, awk taykanaka, jan wawanakamarux walja yatichäwinakampi qariyapxamti. Jukʼa arunakampiki ukat sapa kuti qhanañchtʼasaw Diosan markapar uñtʼañ yanaptʼapxasma. Ukhamatwa, Diosan markapat jukʼamp yatiqañ munasipkakini ukat kusisitas jikxatasipxarakini. Jiltataparjamaw tiempompix kuntï yatiqawayapkta ukanak amtayasma, ukat jukʼampinak yatichtʼarakisma.

Chiqas cristian tamax Diosar yupaychañ tuqit suma saytʼatäñatakix wal yanaptʼistu. Ukatwa Diosatak taqi chuyma irnaqtʼiri waynitunakas tawaqitanakas Supayan apnaqat pachapar saykatañatakix jukʼamp wakichtʼatäpxi (Rom. 12:2). Jïsa, wawanakamar Jehová Diosan markapar sum uñtʼañ yanaptʼapxätaxa, chuymas chuymaw jikxatasipxäta. Nänakax wawanakaman Diosan bendicionapampix Jupar taqi chuyma luqtasipkakiñapa ukat markaparus yanaptʼasipkakiñapwa munapxta.

[28 janan recuadropa/fotopa]

 ¿Familiana Diosar Yupaychañataki Arumanxa kuna tuqinakatsa yatxatsna?

Jehová Diosan markapar jukʼamp sum uñtʼañatakix kuna tuqinakatsa yatxatapxarakisma ukwa jichhax mä qhawqha uñjañäni.

▪ Tamamaruw sum uñtʼapxasma, sañäni: kuna marasa ukat kunjamsa uttʼasiwayi, kawkïr Tantachasiñ Utarus nayrax sarapxäna uka tuqinakatwa yatxatapxasma. Yatiqapkäta uka arumatakix inas walja maranak uka taman irnaqtʼir mä jilatar jawstʼapxchisma, ukat jupaw wawanakan jisktʼanakapar qhanañchtʼaspa.

▪ Tantachasiñ Utan apaski uka tantachäwinakasa, ukat jachʼa tantachäwinakasa kunjamsa wawanakar yanaptʼaspa uksa qhanañchtʼapxasmawa.

▪ Jehová Diosan markapan utji uka escuelanakax kunatakisa ukwa qhanañchtʼasma. Uka escuelat graduasirinakax kunjamsa wal yanaptʼasipki, uka tuqitwa experiencianaka arstʼasma.

▪ Diosan arunakapat jan jaytas yatiyir sarañax kunatsa wali wakiskirix ukwa amuytʼayapxasma. Anuario de los testigos de Jehová sat libronxa, qhawqhas maran irnaqtʼasiwayi uk yatiyi, ukarux kunjamsa wawanakamax yanaptʼaspa uksa yatichtʼarakismawa.

▪ Kunjamanakatsa waynanakax Diosatak sapüru irnaqtʼapxaspa, ukwa qhanañchtʼasma. Ukatakixa, Organizados para hacer la voluntad de Jehová sat libron 10 yatichäwip uñxattʼasma, ukanwa uka tuqit jukʼamp qhanañchtʼaski.

▪ Irpir chuymaninakax kuna lurañanaksa taman phuqapxaraki ukanak qhanañchtʼapxasma. Ukat Diosan tamapanxa, munañasaruk sarnaqañax kunatsa jan walïki ukanaksa amuytʼayapxarakismawa. Irpir chuymaninakan iwxanakaparjam sarnaqasax kunjamsa taman mayachtʼatäñapatakix yanaptʼaspa uksa wawanakamarux amuytʼayañamarakiwa.

[Foto]

Kunjamtï israelitanakax wawanakapan Jehová Diosan markapat jisktʼatax sum qhanañchapxirïkänxa, ukham lurañatakiw awk taykanakax jichhürunakan chʼamachasipxaraki

[26 janan fotonakapa]

Wawanakamatï walja maranak Diosatak irnaqtʼir jilat kullakanakampi amigüpxani ukhaxa wali askïniwa