Jilat kullakasar jachʼar aptañanx nayrankapxañäni

“Maynit maynikamaw munasipxañama jila purjam taqi chuymampi, purapat jachʼar aptasiñanx nayrankapxam.” (ROM. 12:10, NM.)

1, 2. 1) ¿Apóstol Pablox kamsasas romanonakar iwxtʼäna? 2) ¿Kuna jisktʼanakarus qhanañchañäni?

 APÓSTOL Pablox romanonakar apaykäna uka cartanxa, taman munasiñ utjañapax wali wakiskiripuniw sasaw qhanañchäna. Ukatxa, munasiñasax ‘chiqäñapawa’, “maynit maynikamaw munasipxañama” ukat “jila purjam” munasipxam sarakïnwa (Rom. 12:9, 10a).

² Maynit maynikam munasiñax luratanakampiw uñachtʼayasiñapa. Chiqans janitï munasirïtas uñachtʼaykañänixa janiw khitis amuykaniti. Ukatwa Pablox akham iwxtʼpachäna: “purapat jachʼar aptasiñanx nayrankapxam” sasa (Rom. 12:10b, NM). ¿Uka arunakax kamsañs muni? ¿Kunatsa jilat kullakasar jachʼar aptañan nayrankañasax wali wakiskirixa? ¿Kunjamanakatsa uk uñachtʼaysna?

Jachʼar aptaña ukat respetaña

3. Hebreo ukat griego arunakanxa, ¿Jachʼar aptañax kamsañs muni?

³ Hebreo arunxa, “respeto” sasax maynir sum uñjaña sañ muni. Ukhamasti, jachʼar aptatäki uka jaqix wali askirjama ukat wali munasiñamp uñjatawa (Gén. 45:13). Griego arunxa, ‘jachʼar aptañax’ askirjama ukat munasiñamp sum uñjaña sañ munaraki (1 Ped. 3:7). Chiqas khitinakarutï jachʼar aptañ munktan ukanakarux wali munasiñampi ukat wali askirjamaw uñjtanxa.

4, 5. Jachʼar aptañampi respetañampixa, ¿kunatsa mayakïkaspas ukhamaxa? Mä uñachtʼäwimp qhanañchtʼma.

⁴ ¿Maynir jachʼar aptañax kamsañs muni? Kunapachatï maynix parlatapampi, luratanakapampi maynir respeto uñachtʼayki ukhaxa, jachʼaruw aptaski. Mä arunxa, respetañax kunjam chuymampis jilat kullakasar uñjtan ukawa, ukampis jachʼar aptañax kunjamsa luratanakasamp askirjam uñjtan ukarakiwa.

⁵ Jilat kullakanakar jan respetkañänixa, janirakiw jachʼar aptkañäniti (3 Juan 9, 10). Kunjamtï mä ayrux walja tiempo aliñapataki, ukat jiltañapatakix suma uraqir saphintatäñapäkixa. Ukhamarakiw maynïr jachʼañchañatakixa, respetox chuymasan saphintatäñapa. Ukampis pata chuymaki, jan ukax kʼari chuymaki jaqi masipar jachʼar aptapki ukanakaxa, janiw chuymanakapan respetox utjkiti, ukat mä ayrur uñtatarakiw wañsuwayxapxi. Ukatwa Pablox maynit maynikam jachʼar aptasipxam sasin janïr iwxtʼkasaxa, cristianonakarux akham sarakïna: “Chiqa munasiñax jumanakanxa maynit maynikam utjpan” sasa (Rom. 12:9; 1 Pedro 1:22 liytʼasiñapawa).

“Diosar uñtasita uskut jaqi” masisar respetapxañäni

6, 7. ¿Kunatsa jaqi masisar respetañasa?

⁶ Maynir jachʼar aptañatakix taqi chuyma respetañasawa. Bibliarjamax kunatsa taqi jilat kullakanakasar respetomp uñjañasa ukxa  janipun armañäniti. Ukhamax uka tuqit pay uñjañäni.

⁷ Jehová Diosan aka Uraqin taqi luratanakapat sipansa, jaqinakax “Diosar uñtasita” luratätanwa (Sant. 3:9). Ukatwa Diosjam munasiñani, yatiñani ukat chiqapar uñjiri jaqïtanxa. Kunanakampsa Lurir Awkisat katuqawaytan uk uñjarakiñäni. Salmonak qillqirix akham siwa: “[Jehová Diosay] ¡Qhapaq kankañamax alaxpachat jukʼamp khurikamawa! [...] Jaqirux angelanakat mä jukʼa sullkak lurtaxa, aytat kankañampi, jaqi kankañampiw juparux pillunttaxa” sasa (Sal. 8:1, 4, 5; 104:1). * Jehová Diosaxa, jachʼar aptañämpi ukat gloriampiw jaqinakarux pillunti. Ukhamasti, kunapachatï jaqi masisar respetomp uñjtan ukhaxa, Jehová Diosarus respetomp uñjasksna ukhamawa. Niyakixay taqi jaqinakar respetomp uñjstanxa, cristian jilat kullakanakarux jukʼamp respetañasawa (Juan 3:16; Gál. 6:10).

Mä familiakïtanwa

8, 9. Pablon arunakaparjamaxa, ¿kunatsa jilat kullakanakar respetañasa?

⁸ Ukat kunatsa respetompix maynit maynikam uñjasiñasaraki ukwa apóstol Pablox mayamp amtayarakïna. Ukatxa nayraqatxa, jumanak pura jachʼar aptasipxam sasaw säna, ukxarusti akham sasaw cristianonakar iwxtʼäna: “Maynit maynikamaw munasipxañama jila purjam taqi chuymampi” sasa. ‘Jila purjama’ munasiña siski ukaxa, Griego arunx familia taypin taqi chuyma munasiña ukat yanaptʼasiña sañ muni. Uka arunakampixa, kunjamtï mä familia taypin mayachtʼata ukat munasiñamp jakasiñax utjkixa, ukhamarakiw tama taypin munasiñax utjañapa, sañwa munäna (Rom. 12:5). Amtapxañäni, “jila purjam” munasipxam sasinxa, Alaxpachar sarañatak ajllitanakaruw parlaskäna, uka ajllitanakarux Jehová Dios Awkiw wawanakaparjam katuqäna, ukhamatwa mä familiakïpxäna. Ukatwa, Pablon urunakapan jakir ajllit cristianonakax jupanakkam respetasipxañapäna, jichhaxa ajllit cristianonakas ukhamarakiw respetomp uñjasipxi.

⁹ ¿Ukat ‘yaqha uvejanakat’ uñtʼatäpki ukanakatxa kamsaraksnasa? (Juan 10:16.) Chiqas janïraw Diosan wawanakapjam katuqatäpkiti, ukampis Uraqpachan mayachtʼat mä familiakïpxiwa, ukatwa jupanakkamax taqi chuyma “jilata” “kullaka” sasipxaspa (1 Ped. 2:17; 5:9). Jupanakatï kamsañsa uka arunakax muni uk sum amuyapxanixa, taqi chuymaw jila purjam respetomp uñjasipxani (1 Pedro 3:8 liytʼasiñapawa).

¿Kunatsa wali wakiskiripunixa?

10, 11. ¿Kunatsa jilat kullakanakasar respetañasa ukat jachʼar aptañas wali wakiskirixa?

¹⁰ ¿Kunatsa jilat kullakar respetañasa jachʼar aptañas wali wakiskirixa? Chiqansa, ukham lurasax tama taypin mayachtʼata ukat wali sum sarnaqañasatakiw yanaptʼtanxa.

¹¹ Jehová Diosamp sum apasisa ukat qullan ajayun yanaptʼataw cristianonakax wali chʼamañchtʼata jikxatastanxa (Sal. 36:7; Juan 14:26). Ukat jilat kullakanakax wali munasiñampi uñjapxistu ukhaxa, ukhamarakiw chʼamañchtʼat jikxatastanxa (Pro. 25:11). Kunapachatï maynix arunakapampi luratanakapampi munasiña ukat respeto taqi chuym uñachtʼaykistu ukhaxa, wali sumaw jikxatastanxa. Ukarakiw wiñay jakañ irpir thakinjam wali kusisita ukat taqi chʼamampi sarantañatakix yanaptʼistu. Jumas ukhamarakiw yanaptʼatax wali chʼamañchtʼat jikxatasirïpachätaxa.

12. ¿Kunjamsa sapa maynis taman munasiñ utjañapatakix yanaptʼsna?

 ¹² Taqiniw respetompi uñjatäñ muntanxa, ukxa Jehová Diosax sum yati, ukatwa Arupanxa taqi cristianonakarux akham iwxtʼistu: “Purapat suma respetompi uñjasi[pxam]” sasa (Rom. 12:10, Aymar Biblia, 1992). Uka iwxtʼa katuqasirinakaxa, taman taqi chuym munasiña utjañapatakiw yanaptʼapxi. Ukhamasti, sapa mayniw akham jisktʼasiñasa: “¿Jilat kullakanakar arunakajampi ukat luratanakajampi respetataj uñachtʼayatajatxa, qhawqha tiempöxisa?” sasa (Rom. 13:8).

Taqinitak mä iwxtʼa

13. 1) ¿Khitinakas jachʼar aptañatakix nayrankapxañapa? 2) Romanos 1:7 qillqatarjamaxa, ¿kunsa Pablon arunakapat yatiqtanxa?

¹³ ¿Khitinakas mayninakar jachʼar aptañatakix nayrankapxañapa? Apóstol Pablox Hebreonakar qillqkäna uka cartapanxa, irpir chuymaninakaw nayrankapxi sasaw säna (Heb. 13:17). Chiqas jupanakaw kunayman lurañanakan nayrankapxi, ukampis jilat kullakanakaru ukat mayni irpir chuymaninakar jachʼar aptañatakis nayrankapxañapawa. Amuytʼañäni, Diosar yupaychañ tuqit jilat kullakanakar yanaptʼañatak tantachasipki ukhaxa, sapa maynin arstʼatap sum istʼasaw jachʼar aptasipxatap uñachtʼayasipxi. Mä amtar puriñatakis taqinin arstʼatanakapar yäqasaw jachʼar aptasipxaraki, jan ukax respeto uñachtʼayasipxi (Hech. 15:6-15). Amtapxañäni, Romanonakar apaykän uka cartapanxa, Pablox janiw irpir chuymaninakaruk qillqkänti jan ukasti taqpach jilat kullakanakaruw apayäna (Rom. 1:7). Ukhamasti, Pablon uka iwxtʼaparux taqiniw istʼapxañasa.

14. 1) Jachʼar aptañampi ukat jachʼar aptañataki nayrankañampix jan pachpätap mä uñachtʼäwimp qhanañchtʼma. 2) ¿Kamsasas sapa maynix jisktʼasiñasäspa?

¹⁴ Pablon iwxtʼapat yatxataskakiñäni, jupax janiw Romankir jilat kullakanakaparux maynit maynikam jachʼar aptasipxañamawa sasakix siskänti, jan ukasti jachʼar aptasiñanxa nayrankapxam sasaw iwxtʼäna. Uka arunakampix ¿kamsañs munäna? Amuytʼañäni, ¿mä yatichirix liytʼasiñ yatirinakarux liytʼasiñ yatiqañamaw sasin saskakispati? Janiwa, antisas jukʼamp sum liytʼapxañapatakiw yanaptʼaspa. Ukhamarakiw jilat kullakanakampix maynit maynikam wal munastanxa ukat jachʼar aptasiraktanxa, ukhamatarakwa chiqpach cristianonakarux  uñtʼasiraki (Juan 13:35). Ukampis kunjamtï liytʼasiñ yatirinakax jukʼamp sum liytʼañ yatiqasax nayrar sarantasipkakispaxa, ukhamarakiw cristianonakax jachʼar aptasiñanx nayrar sarantasipkaksna (1 Tes. 4:9, 10). Ukhamasti tamankir jilat kullakanakar jachʼar aptañatakix jiwasaw nayrankañasa, chiqas sapa mayniw akham jisktʼasiñasa: “¿Nayax ukham lurañatakix chʼamachasiskti?” sasa.

‘Pobre jaqinakar’ jachʼar aptapxañäni

15, 16. 1) Tamankir jilat kullakanakasar jachʼar aptkasax ¿khitinakatsa jan armasiñasäki? 2) ¿Kunjamsa jilat kullakasar taqi chuyma respetatas uñachtʼaytanxa?

¹⁵ Tamankir jilat kullakanakasar jachʼar aptkasax ¿khitinakatsa jan armasiñasäki? Diosan Arupax akham siwa: “Mä pobre jaqir maytʼirix [Jehová] Tatituruw maytʼaski, ukatsti Tatit pachpawa uka manxa phuqxani” sasa (Pro. 19:17). Biblian uka yatichäwipaxa, ¿kunjamsa jilat kullakasar jachʼar aptañan nayrankañatakix yanaptʼistaspa?

¹⁶ Niya taqi jaqinakaw jilïrinakaparux jachʼar aptapxi, uk taqiniw yattanxa. Ukhamarus uka pachpa jaqinakax janiw pobrenakarux respetompi uñjapkiti. Ukampis Jehová Diosax janiw ukhamäkiti. Jupax akham sistuwa: “Nayaru yäqapxitäni ukanakarusti suma yäqarakïxa” sasa (1 Sam. 2:30; Sal. 113:5-7). Jehová Diosax luqtirinakaparus ukat Jupar jachʼar aptapki ukanakarus jachʼar aptarakiwa. Chiqans Diosax janipuniw ‘altʼat chuymaninakat’ armaskiti (Isaías 57:15 liytʼasiñapawa; 2 Cró. 16:9).Niyakixay Jehová Diosat yatiqasiñ munstanxa, ukhamax akham jisktʼasiñasawa: “¿Jilat kullakanakar jachʼar aptaskpachätti? Taman lurañanak jan katuqapki ukanakarux ¿kunjams uñjaskpachatxa?” sasa. Kunjamxay uka jisktʼar jayschiñäni, ukaw taqi chuymati jilat kullakasar respetasktan janicha uk amuytʼasiñ yanaptʼistani (Filipenses 2:3, 4 liytʼasiñapawa).

Jilat kullakanakasatak tiempo apstʼasipxañäni

17. ¿Kunjamsa jilat kullakanakar jachʼar aptatas uñachtʼaysna ukat kunatsa ukham sistanxa?

¹⁷ ¿Kunjamsa tamankir jilat kullakanakar jachʼar aptatas uñachtʼaysna? Jupanakatak tiempo apstʼasiñasawa. ¿Kunats ukham sistanxa? Cristianonakjamaxa, walja lurañanakaw utjistu ukat taman kunayman lurañanak phuqañatakix jan tiemponirakiw irnaqtanxa. Chiqas tiempox wali askiw jiwasatakixa. Ukhamaxa, jilat kullakasatix jan tiemponïkanixa janiw tiempo apsusiñapxa sinti mayiñasäkiti. Ukat kunapachatï tiempo apsusiñas jan sinti waytʼapkistu ukhaxa yuspäraraktanwa.

18. Tunka kimsaqallqun janankki uka fotorjamaxa, ¿kunjamatsa jilat kullakasatak tiempo apstʼasiñatak jankʼakïtas uñachtʼaysna?

¹⁸ Jilat kullakanakasar yanaptʼañatakix tiempo lurañanakasat apsusktan ukhaxa, respetomp uñjataswa uñachtʼaytanxa, (jukʼampis irpir chuymaninakaw ukham lurapxañapa). Kunapachatï jilat kullakanakar yanaptʼañatak tiempo apsusktan ukhaxa, lurañanakasat sipansa jukʼamp wakiskirïpxatapwa uñachtʼaytanxa (Mar. 6:30-34). Maysa tuqitxa, jupanakar yanaptʼañatakix tiempo lurañanakasat jan apsusksnaxa, janis yäqksna ukham amuyasipxaspa.  Chiqas awisax yaqhip lurañanakax janiw saytʼayañjamäkaspati, ukampis jilat kullakanakatak jankʼak tiempo apsusiñäni ukhaxa, qhawqsa chuymasan jupanakar respettan ukax qhan amuyasini (1 Cor. 10:24).

Respetomp uñjasiñanx nayrankapxañäni

19. ¿Jilat kullakasar jachʼar aptañatakix kunanakamps lursna?

¹⁹ ¿Jilat kullakasar jachʼar aptañatakix kunanakamps lursna? Sañäni, jupanakampïñatak tiempo apstʼasktan ukhaxa, taqi amuyumpi istʼañasarakiwa. Ukhamatwa Jehová Diosat yatiqasitas uñachtʼaytanxa, kunattix ‘Tatituw aski jaqinakar imaski, arnaqasitanakaparusti istʼarakiwa’ sasaw salmonak qillqir Davitax säna (Sal. 34:15). Ukhamasti jilat kullakanakamp parlktan ukhaxa taqi chuyma ukat taqi amuyumpiw istʼañasa, yämas yanap maykistu ukhax jukʼamp sum istʼañasawa, ukhamatwa jupanakar jachʼar aptatassa jan ukax respetatassa uñachtʼayañäni.

20. Jachʼar aptañ tuqitxa, ¿kunsa jan armañasäki?

²⁰ Kunjamtï yatiqawayktanxa, kunatsa jilat kullakanakar taqi chuyma respetañasa ukxa janipuniw armañasäkiti. Ukatxa, taqiniru mä arunxa pobrenakamppacharu jachʼar aptañanxa jiwasaw nayrankañasa. Ukhamatwa jila purjam munasiñasa mayachtʼat sarnaqañas tama taypin utjani. Ukhamasti, jilat kullakanakasar janiw jachʼar aptañasakïkiti, jan ukasti, maynit maynikama jachʼar aptasiñanxa jiwasaw nayrankañatak chʼamachasiñasa. ¿Jumax ukham lurañatak amtasktati?

[Qhanañchäwi]

¿Amttati?

• ¿Maynir jachʼar aptañampi ukat respetañampix kunatsa mayakïpxi?

• ¿Kunatsa jilat kullakanakasar jachʼar aptañasa?

• ¿Kunatsa maynit maynikam jachʼar aptasiñax wali wakiskirixa?

• ¿Kunjamanakatsa jilat kullakanakasar jachʼar aptatas uñachtʼaysna?

[Jisktʼanaka]

[18 janan fotopa]

¿Kunjamsa jilat kullakasar jachʼar aptatas uñachtʼaysna?