Aka revista liytʼirinakan jisktʼäwinakapa

“Askïpxamaya, kunjämatix alaxpachankir Awkimax askïki ukhama” sasaw Jesusax säna, ¿kunjamsa jucharar jaqjamax uka arunakap phuqsna? (Mat. 5:48.)

Uka jisktʼar qhanañchañatakixa, “askïpxamaya” mä arunxa “jan juchanïpxamaya” ukat “jan pantjasirïpxamaya” sasin Biblian uñsti uka arunakax kamsañsa muni uk amuytʼañasawa. Qullan Qillqatanxa “aski” sasax janiw jan juchanipuni sañ munkiti. Chiqas Jehová Dios sapakiw ukham jan juchanipunixa. Ukampis jaqinakas yänakasa janiw phuqatpun askïpkaspati. Hebreo ukat griego arunakanxa, kunatï phuqatäki, jan kamachtʼatäki ukat puqtʼatäki ukanakaruw autoridadanakan arsutaparjamax “aski” sasixa. Jichhürunakanxa, jaqinakax amtap phuqasir uñjasax askirjamapuniw phuqasiwayi sapxiwa.

Qalltanxa, Adanampi Evampix jan juchanïpxänwa, ukat Diosan kamachinakapxa wali askirjamaw phuqapxäna. Ukampis jan istʼapxatapatxa, janiw Diosatakjamäxapxänti, ukatwa jucharar jaqir tukuwayapxi, wawanakapas juchararäpxarakiwa. Ukhamatwa Adanax taqi wawanakaparux juchampiru jiwañampir aptʼawayi (Rom. 5:12).

Jucharar jaqinakax askïpxaspawa, ukampis janiw phuqatpachpun askïpkaspati sasaw Jesusax Wali Uñtʼat Arstʼäwipan arsuwayäna. Ukanwa phuqatpach munasiñax kamsañs muni uk qhanañchäna. Diosax ukham munasiñampirakiw jaqinakarux uñji. Jesusasti sänwa: “Uñisirinakamarux munapxam, Diosat mayirapipxarakim khitinakatix [arknaqapktam] ukhamarak jan walinaks lurapktam ukanakatakisa. Ukhamatwa jumanakax alaxpachankir Awkiman wawanakapäpxätaxa. Jupasti taqinitakiw intsa jalsuyani, ukhamarak aski jaqinakatakisa, jan aski jaqinakatakisa jallsa puriyaniraki” sasa (Mat. 5:44, 45). Ukham munasisaxa, Jesusan arkirinakapax Diosat yatiqasipxatapwa uñachtʼayapxi.

Uraqpachan Jehová Diosan Qhanañchirinakapax uka pachpa munasiñwa jaqi masisar uñachtʼayañ muntanxa. Kawkit jutirïskpasa kuna kastäskpasa, yaqha religionatäskpasa, taqiniruw chiqa yatichäwinak yatichañ muntanxa. Chiqas 236 markanakanwa, paqallq millón jila jaqinakarux Bibliat yatichasktanxa.

Jesusax sänwa: “Jumanakatix munapxsta khitinakatix jumar munapktam ukanakaruki ukaxa, ¿kuna askirak katuqapxätasti? Impuesto cobririnakasa uka kipkrakwa lurasipki. Ukhamaraki jilanakamarukitix aruntasipksta ukaxa, ¿kuna suma askirak lurapxta? Jan Diosar uñtʼiris ukxa lurarakiwa” sasa (Mat. 5:46, 47). Chiqa cristianonakaxa, janiw yatxattʼata, jan ukax mä kasta jaqinakarukis askirjam uñjapkiti. Janirakiw munasitakix munasipkiti. Jan ukasti, pobrenakaru, usutanakaru, wayn tawaqunakaru ukat chuymaninakaruw yanaptʼapxi. Janis phuqatpun aski jaqïpkchixa, Jehová Diosjam munasirïsaw aski jaqïpxatap uñachtʼayapxi.

¿Adanax jan juchanïkäna ukhamar kuttʼañäniti? Jïsa. Jesusax waranq mara apnaqxani ukhaxa, Jesusan jiwatapar iyawsapki ukanakax askiru, jan ukax jan juchaniruw tukupxani, ukhaw Jesusax “Supayan luratanakap tʼun[jani]” (1 Juan 3:8).