Llakimp aynachtʼatanakan mayisïwipxa Diosax istʼiwa

KUNJAMTÏ wali yatiñani Salomón reyix siskänxa, “horasax jan waltʼañax taqiniruw puri” (Ecl. 9:11). Inas mä akatjamat jan walinakax utjchispa, ukanakaw jakäwis mayjtʼayaspa. Sañäni, kunapachatï familiasat maynix mä akatjamat jiwxi ukhax wali llakiskañawa. Yaqhipax walja semananaka, jan ukax phaxsinakaw wali llakit qhiparapxi. Awisaxa, Diosar oracionan jakʼachasiñsa janiw munxapxiti.

Kunapachatï maynix wali aynachtʼat jikxataski ukhaxa, yanaptʼatäña, chuymachtʼatäña ukat munasitäñwa muni. Davitasti akham sasaw Diosarux qʼuchüna: “Tatituw tinkurinakarux katxäsiski, tʼukhasirinakarusti chʼamañchaskaraki” sasa (Sal. 145:14). Biblia qillqiri mayni chachasti, siwa: “[Diosax] sumwa uñjaski taqi akapachana kunanakatix lurasiski ukanakxa, ukhamata chʼama churañataki khitinakatix chiqpachana juparu iyawsasipki ukanakaru. ¡Jumasti mä luqjamawa ukham lurtaxa! ¡Jichhat uksarusti jukʼampi guerranakawa jumataki utjani¡” sasa (2 Cró. 16:9). Jïsa Jehová Dios pachpaw akham saraki: “Nayax [...] khititix altʼat chuymani, llaktʼata sarnaqaraki ukanakarusti chʼamañcharaktwa” sasa (Isa. 57:15). Ukampisa, ¿kunjamsa Diosax yanaptʼpacha ukat chʼamañcharakpacha?

“Horasapar arsut arunaka”

Jehová Diosaxa, tama tuqiw awisax arkirinakapar yanaptʼaraki. “Mayjtʼatanakarux chʼamañchtʼapxam” sasaw Biblian amtayistu (1 Tes. 5:14). Llakitanakaru ukat mayjtʼatanakaru munasiñampi yanaptʼasaw jilat kullakanakax wal yanaptʼapxarakispa. Mä jukʼa arunakakiw maynir wal yanaptʼaspa, yämas kunapachatï pachpa llakinakan uñjaskäna ukan arunakapasa, jan ukax wali yatxattʼat mä amigon arunakapas walpun yanaptʼasi. Chiqas ukhamaw Diosax llakitanakar chuymachi ukat yanaptʼaraki.

Jichhax irpir chuyman Alex sat mä jilatat parltʼañäni. Jupax mä qhawqha tiempokiw jaqichatäskäna, ukhamaruw esposapax jan qullani usumpix mä akatjamat jiwatayna. Tamanak tumptʼir mä jilataw chuymachtʼäna, jupan esposapax jiwarakitaynawa, ukampis qhipatxa wasitatwa casarasitayna. Ukat jupampi parltʼasax akham sänwa: “Nayax ukhamarakiw wali aynachtʼata ukat jan chʼamanjam jikxatasirïta. Ukat utat uta mä jilatampi yatiyasasa ukat tantachäwinakansa, wali chʼamañchtʼataw jikxatasirïta, ukampis utar purisax saparstʼat jikxatasisax wal llakisirïta” sasa. Alex jilatax akham sarakiwa: “Janiw nayak ukhaman jikxataskatätti, ukwa uka jilatan  arunakapax amuytʼayitu, ukat chuymachtʼarakitu” sasa. Kunjamtï uñjaniwayktanxa, kunapachatï wali llakit jikxatasktan ukhaxa, “horasapar arsut arunakax” walpun yanaptʼistu (Pro. 15:23, NM).

Ukatxa, mä irpir chuymaniw Alex jilatar chuymachtʼañatak thaqhatayna, jupasti viudo jilat kullakanakarux waljaniruw uñtʼäna. Ukat Alex jilatarux akham chuymachtʼäna, Diosax kunjamas jikxatastan ukat kunas jiwasatakix wakisi ukanakxa yatiwa sasa. Ukat akham sarakïnwa: “Tiempompix inas mayamp casarasiñ munchïta. Ukhamänixa, Jehová Diosax janiw jarkʼktamti” sasa. Chiqas janiw taqi jilat kullakanakax mayampi casarasipkiti. Uka jilatan arunakapat amuytʼasaxa, Alex jilatax akham siwa: “Wasitat jaqichasisax esposaparus jan ukax Diosarus traicionkaspa ukham maynix amuyasispa. Ukat mayampi casarasiskasmawa, Diosax janiw jarkʼktamti sasin amtaykistu ukhax wal chuymachistu” sasa (1 Cor. 7:8, 9, 39).

Davit chachax ukhamarakiw walja llakinakana ukat jan waltʼäwinakan uñjasïna. Mä kutix akham qillqäna: “Tatitux aski jaqinakaruw imaski, arnaqasitanakaparusti istʼarakiwa” sasa (Sal. 34:15). Ukhamasti, Jehová Diosax horasaparuw llakitanakan mayisitanakapxa istʼi. Ukat wali amuytʼasir jilat kullakanakan suma arunakap tuqiw wal yanaptʼaraki. ¡Ukax wali suma yanaptʼapuniwa!

Tantachäwinakax walpun yanaptʼistu

Aynachtʼat jikxatasipki uka jilat kullakanakax mayninakat jithiqtapxaspawa. Ukampis Proverbios 18:1 qillqatanxa akham siwa: “Khititix jupatakiki kuns munki ukaxa, munañaparukiwa sarnaqi, ukatsti taqi suma amtäwinak contraw tuku” sasa. Alex jilatax akham sarakïnwa: “Kunapachatï esposamax jiwxi ukhaxa, juma pachpaw juchañchastaxa. Nayax akham sasaw jisktʼasirïta: ‘¿Kunanak lurañajas wakisïna, jan ukax kunsa jan lurañajäkäna? ¿Jukʼamp suma jaqiñajänti?’ sasa. Nayax janiw sapakïñ munkayätti, jaqichatäñ munayäta. Ukampis ukanak pʼiqit apsusiñax wali chʼamawa, kunattix sapüruw sapaki jikxatastxa” sasa.

 Llakimp aynachtʼat jikxatasktan ukhaxa, suma amigonakwa muntanxa, ukham suma jaqinakxa, tantachäwinwa jikxatañäni. Ukat ukanwa pʼiqisarus suma yatichäwinakamp phuqantañäni, ukhamarak Diosan chuymachtʼkir arunakapsa istʼarakiñäni.

Jan walinakan jikxatasktan ukhaxa, tantachäwinakaw amuytʼasiñasatakix yanaptʼistu. Jïsa, kunapachatï tantachäwin Bibliat liytʼaski ukhaxa, llakinakatsa armastanwa, kunattix wali aski yatichäwinakatwa ukan lupʼtanxa. Sañäni, kunjamsa Jehová Diosax taqi kunxar munañani Apnaqirïtap uñachtʼayani ukat kunjamsa sutipsa qʼumachani uka tuqinakat yatxattanxa. Ukatxa, janis mayninakax kunjamsa jikxatasisktan ukat kunatsa llakitätan ukanak jan sum amuyapkchixa, Jehová Diosax sumwa taqi ukanak yati, ukwa tantachäwinakan amuyaraktanxa. “Llakit chuyman jaqisti” wali aynachtʼata sarnaqatapxa Diosax sum yatiraki, ukatwa yanaptʼañ munistu (Pro. 15:13). Taqi ukanak yatiñaw wal chuymachtʼistu, ukat nayrar sarantaskakiñatakis wal chʼamañchtʼistu (Sal. 27:14).

Wali qhuru, jan chuyman jaqinakaw Davitar arknaqapxäna, ukatwa Diosar akham säna: “Ajayuxax aynachtʼatawa, chuymaxax llakimp tukusitawa” sasa (Sal. 143:4). Rey Davitarjamarakiw jan waltʼäwinakax kunayman tuqit aynachtʼayistaspa, ukat janirakiw amuyumpi kuns lurxsnati. Inas mä akatjamat usuntsna, jan qullani usun uñjassna, jan ukax yaqha ukham jan waltʼäwinakans uñjassna, ukampis Diosaw taqi ukanak aguantañatakix yanaptʼistani (Sal. 41:1-3). Jichhürunakanxa, Diosax janiw mä milagro tuqix qullkistuti, jan ukasti, amuytʼasirïña ukat chʼama churistu, ukhamat uka jan walinakar saykatañataki. Amtañäni, Davitax llakimpi aynachtʼat jikxataskäna ukhaxa, Jehová Diosarupuniw atinisirïna. Ukatwa akham qillqäna: “Nayra pachanakat amtasta, taqpach luräwinakamat lupʼta, amparamamp luratanakamat amuykipta” sasa (Sal. 143:5).

Davitan uka arunakapax Biblian qillqasiñapatakix Diosaw qullan ajayupamp yanaptʼäna, ukhamatwa Diosax kunjamas jikxatastan uk yatitapsa ukat mayisitanakas istʼirïtapsa yattanxa. Jupampi yanaptʼayasiñänixa, “chʼaman tuku[yistani]” (Sal. 55:22).

“Jan inaktʼas orapxam”

Santiago 4:8 qillqatanxa akham siwa: “Diosar jakʼachasipxam, jupasti jumanakarux jakʼachasirakiniwa” sasa. Chiqas oración tuqikiw Diosarux jakʼachassna. Apóstol Pablox akham sasaw iwxtʼäna: “Jan inaktʼas orapxam” sasa (1 Tes. 5:17). Ukampis kunatï chuymasan utjki ukanak janis arsuñjamäkchixa, “qullan ajayuw Diosarux achiktʼaski jiwasatxa jan amuytʼkaya ayquñanakampi” (Rom. 8:26, 27). Ukhamasti, kunjamas jikxatastan ukanakxa Jehová Diosax sum yati.

Monika sat kullakaxa, Diosampix wali sum apasi, jupax akham siwa: “Nayax Diosat mayisipuntwa, Biblia sapür liyta ukat sapakis Diosan arunakapat yatxatapuntwa, ukhamatwa Jehová Diosax wali suma amigojar tukuwayi. Sapürus irpnaqaskitaspa ukham amuyasta. Kunjamas jikxatasta uk janis sum yatiykstxa Jupax yatxiwa, ukaw chuymachtʼitu. Chiqas munasiñapasa, khuyaptʼayasiñapasa jan tukuskiriwa” sasa.

Ukhamasti jilat kullakanakan chuymachtʼatasa, yanaptʼatasa taqi chuym katuqtʼasiñäni. Tantachäwinakan munasiñampi iwxtʼapkistu ukarjam sarnaqañataki chʼamachasipxañäni. Ukat taqi chuymaw Diosat mayisiñasaraki. Amtapuniñäni Diosax taqi ukanak tuqiw munasiñap uñachtʼayistu. Alex jilatax jupa pachpat amtasax akham siwa: “Jehová Diosax kunaymanitwa iyawsäwisan chʼamañchtʼasiñasatakix yanaptʼistu. Ukat jiwasatï ukham yanaptʼatax Diosar yupaychaskakiñataki wal chʼamachtʼasirakiñäni, ukat iwxanakapsa sum katuqasiñäni ukhaxa, Diosan ‘jachʼa chʼamap’ katuqañäni, ukhamatwa kuna jan waltʼäwins aguantañäni” sasa (2 Cor. 4:7).

[18 janan recuadropa/fotopa]

Llakitanakataki chuymachtʼäwi

Diosan yupaychirinakapax wali llaktʼatäsax aynachtʼapxaspaw sasaw Salmo qillqatanx walja kuti qhanañchi. Ukatxa, Jehová Diosax mayisitanakapxa istʼapuniw sasaw walj kuti qhanañcharaki. Ukanakwa aka qillqatanakax uñachtʼayi:

“Llakisiñaxan Tatitur artʼasta, Diosaxat yanap mayista: Jupasti templopatpach istʼanitu, arnaqasitaxax jinchupkamaw puri.” (Sal. 18:6.)

“Tatitux llakimp aynachtʼatanakan jakʼapankaskiwa, jupanakar qhispiyañataki, aynachtʼat chuymanakap waytañataki.” (Sal. 34:18.)

“[Jehová Diosaw] chuyma usuchjatanakarux waliptayi, chhuxrinakap kʼumaracharaki.” (Sal. 147:3.)

[17 janan fotopa]

¡“Horasapar arsut arunakaxa”, llakitanakarux walpun yanaptʼaspa!