Wayn tawaqu, ¿kunsa jakäwimampix luräta?

“Janirakiw nuwasiñansa aliqa ina chʼusaru chʼakkiristsa ukham nuwaskti.” (1 COR. 9:26.)

1, 2. ¿Jumatï sum sarnaqañ munstaxa kunanakas wal yanaptʼiristamxa?

 JUMATÏ monte manqhanak sarañ munsta ukhaxa, kawknämsa saräta uk amuyañatakix janit mä mapa apaskasma, ukat jan chhaqhañatakix janiti Inti uñtaskarakisma. Ukampis kawkirus puriñ munta uk jan amtawaykätaxa, inamayäniw mapamaxa, ukat inamayaw Intsa uñtaskarakïta. Ukhamasti, monte manqhan inamay jan muyuskañatakix, kawkirus puriñ munta ukxa sum amtañamawa.

² Jumax niya ukhamanwa jikxatasiraktaxa, kunattix jilïr jaqiruw tukusktaxa. Ukat ukhamarakiw mä suma mapanirakïtaxa, ukasti, Bibliawa. Ukanwa kawknäm sarañamas jukʼamp askix uk amuytʼayätamxa (Pro. 3:5, 6). Ukatxa, concienciamax Intïkaspas ukhamwa wal yanaptʼarakïtamxa. Concienciamatï suma yatichatächixa, suma thakinjampun irpaskätamxa (Rom. 2:15). Jumatï sum jakasiñ munstaxa, kunanaksa jakäwiman luräta, ukat kunanaksa jan lurkarakïta ukanak sum amtañamawa.

3. 1 Corintios 9:26 qillqatarjamaxa, ¿kunanaksa luräta ukanak amtañax kunjamsa yanaptʼätamxa?

³ Apóstol Pablox kunanaksa lurani uk sum amtäna, ukat ukanak phuqañatakis wal chʼamachasirakïna, ukatwa jupax ukanakaw nayarux wal yanaptʼitu sänxa, ukat akham qhanañchäna: “Nayax janiw ina pampaki jalkti, janirakiw nuwasiñansa aliqa ina chʼusaru chʼakkiristsa ukham nuwaskti” sasa (1 Cor. 9:26). Jumax kunanaksa jakäwiman luräta ukanak janiräkipan sum amtätaxa, ukanak phuqañ laykux wal chʼamachasïta. Tiempompix Diosar yupaychañ tuqita, irnaqäwita, jaqichasiñata ukat familia tuqinakat kunanaksa luräta ukanak amtañamaw wakisini. Awisaxa, kunayman lurañanakaw uka tuqinakat uñstaspa. Ukampis jumatï tiempükipan kuns luräta ukanak Biblian jikxataski uka iwxanakarjam sum amtxätaxa, janiw jan wali thakirux saranukkätati (2 Tim. 4:4, 5).

4, 5. 1) Jumatï kuns luräta ukanak jan amtkätaxa, ¿kunas pasaspa? 2) Kuns luräta uk janïr amtkasaxa, ¿Diosatakix walikïskpachati janicha sasin kunatsa jisktʼasiñama?

⁴ Ukampis kunanaksa luräta ukanak jan amtkätaxa, masinakamampi yatichirinakampiw kunas jumatak walïspa ukanak amuyuparjam juma lanti amtapxaspa. Jakäwimampix kuns luräta ukanak sumsa amtkchïtaxa, mayninakax kunas jumatakix walïspa ukanakxa sasipkakïtamwa. Ukatpï, parlxayapkätam ukhax akham jisktʼasiñamaxa: “¿Iwxtʼanakapax Jehová Diosat amtasiñti yanaptʼitani, jan ukax jithiqtayitanicha?” sasa (Eclesiastés 12:1 liytʼasiñapawa).

⁵ Kuns luräta uk janïr amtkasinxa, Jehová Diosatakix walikïskpachati janicha, sasin jisktʼasiñamax wali askipunïniwa. ¿Kunatsa? Kunattix Jupaw kunatï utjktam ukanak churtamxa (Sant. 1:17). Ukatwa Diosarux walpun yuspärañasaxa (Apo. 4:11). Chiqas kun lurañatakis Diosat amtasipuntan ukhaw wal yuspäratas uñachtʼaytanxa. Jichhaxa, kunanak lurañ amtañamas wali askïspa, ukat kunjamsa uka amtanak phuqasma ukanak uñjañäni.

 ¿Kunanak lurañsa amtasma?

6. ¿Kun lurañsa amtañama, ukat kunatsa?

⁶ Kunjamtï nayrïr yatichäwin uñjaniwayktanxa, Biblian yatichäwinakapax chiqapunïskiti janicha ukanakxa juma pachpa yatxatañatakiw amtasma (Rom. 12:2; 2 Cor. 13:5). Masinakamax inas monot jutatätanwa sas yatichatax ukaruk iyawsapxchi, jan ukax kʼari yupaychäwinakan yatichäwinakapat istʼasax ukanakar iyawsapxarakchi. Ukampis jumax janiw jupanakjamäñamäkiti. Amtasipunim Jehová Dios Awkimax taqi amuyumampi yupaychañamwa muni (Mateo 22:36, 37 liytʼasiñapawa). Ukatxa, Biblian chiqa yatichäwinakaparjam iyawsäwinïsma ukwa Diosax munaraki (Heb. 11:1).

7, 8. 1) ¿Jichpacha phuqañataki amtkäta ukanakax kunjamsa iwaysäwiman chʼamañchtʼätamxa? 2) ¿Amtanakam jichpach phuqätaxa, kunjamsa jutïrin yanaptʼätamxa?

⁷ Iyawsäwiman chʼamañchtʼatäñamatakix kunanaksa jichpach lurasma ukanak amtañamax ¿janit wakiskaspa? Diosat sapür mayisiña. ¿Kunas Diosat taqi chuyma mayisiñamatakix yanaptʼiristamxa? Kunanakatsa jichhürun mayisiñ munta ukanakwa qillqtʼasisma, jan ukax pʼiqimar amxäsisma. Ukatxa janiw llakinakamak yatiyañamäkiti, jan ukasti kunanakas wal kusisiytam ukanakatsa parltʼarakismawa (Fili. 4:6). Ukatxa, Biblia sapür liyiñwa amtarakisma. Sapür mä pusi jananak liytʼasax mä maranakwa Biblia taqpach liytʼañ tukuyasma. * Kunjamtï Salmo 1:1, 2 qillqatan siskixa, khititï Tatitun Arup “arumay uru lupʼki’, jan ukax liytʼki ukaw kusisiñanixa.

⁸ Ukatxa kunampsa jichpach phuqañatakix amtasma uk uñjarakiñäni, sapa tantachäwin arstʼañatakiw wakichtʼasisma. Qalltanxa inas pachpa tʼaqat liytʼchisma, jan ukax Bibliat liytʼarakchisma. Ukampis tiempompix pachpa arunakamampiw arstʼasma. Amtasipunma, tantachäwinakan mayn  mayni arstʼapki ukhax jumas arstʼarakta ukhaxa, Diosarus mä regalo churkasma ukhamawa (Heb. 13:15). Taqi ukanak phuqätaxa, wali chʼamañchtʼataw jikxatasïta, Diosarus wal yuspärarakïta, ukat jutïr maranakan kunanak lurañtï amtkta ukanak phuqañatakis wakichtʼatäxätawa.

9. Yatiyir janïr mistkstaxa, ¿kunanak lurañsa amtasma?

⁹ ¿Jutïr maranakan kunanak lurañsa amtasma? Jumatï Diosat yatiyir janïr sarkstaxa, wali askïspaw Diosan yatiyiripäxañ amtañamaxa. Ukat yatiyir sarxasaxa, sapa phaxsin yatiyir sarañataki wal chʼamachtʼasiñamawa. Ukat Bibliamsa sum uñtʼañama, mä arunxa, Bibliampi yatiyañatakiw chʼamachasiñama, ukhamatwa yatiyir sarasax wali kusisit jikxatasïta. Utat uta yatiyir sarañatakisa ukat maynir Bibliat yatichañatakisa jukʼampi tiempo apstʼasiñamaw wakisirakispa. Ukat Diosan arunakapat yatiyirïxasaxa, ¿janit Bautisasiñataki mayitanak phuqañamax wakiskaspa?

10, 11. ¿Bautisat wayn tawaqunakax jutïr maranakan kunanak lurañsa amtapxaspa?

¹⁰ Jumatï bautisatäxstaxa, Jehová Diosatak jukʼamp irnaqtʼañatakix kunanakampsa lurasma ukanakwa amtarakisma. Sañäni: awisax inas yaqha tamar yanaptʼchisma, ukhamat mä jukʼaki yatiyaski uka chiqanakan yatiyañataki. Ukat kʼumaräkasina, chʼamanïkasin precursor regularjama, jan ukax auxiliarjamas irnaqtʼarakisma. Chiqas walja jilat kullakanakaw ukham wal irnaqtʼasipki. Jupanakaw kunja kusiskañas ukham irnaqtʼañax uk sapxiristamxa ukat waynäkasin irnaqtʼasaw Diosat amtasisma sapxarakiristamwa. Jïsa, awk taykamamp jakkasaw taqi ukanak jichpach lurasma. Tamamarus wal yanaptʼarakisma.

¹¹ Ukat jutïr maranakan kunsa luräta ukanak jichjat amtasaxa, yaqha tamankir jilat kullakanakaruw yanaptʼarakisma. Sañäni: inas pacha markamansa, jan ukax yaqha markanakan yatiyirinakax wal munaski uka chiqanakar sarchisma. Ukatxa Tantachasiñ Utanaka, jan ukax yaqha markanakan Betel utanak luraña yanaptʼarakisma. Inas Betel utan irnaqtʼaña jan ukax misionerot sarañ munchisma. Chiqas ukanak lurañatakix nayraqat bautisatäñamawa. Jan bautisatäkstaxa, kunatsa bautisasiñax wali wakiskirix uk amuytʼasiñamawa.

Bautisasiñ amtapxma

12. ¿Kunataksa yaqhip wayn tawaqunakax bautisasiñ munapxi, ukat kunatsa ukham amuyañax jan walïki?

¹² ¿Kunatsa maynix bautisasiñapa? Yaqhip wayn tawaqunakaxa, juchar jan puriñataki, jan ukax amigonakapjamäñ munasa ukat awk taykapar kusisiyañ laykukiw bautisasipxi. Ukampis bautisasitamax janiw munkir jan munkir sum sarnaqañamatakix waytʼkätamti, ukat janirakiw chuymaman lurañ munkta ukanakat munkir jan munkir jarkʼkätamti. Ukatxa janirakiw bautisasipunim satakis bautisasiñamäkiti. Jan ukasti, Jehová Diosan Qhanañchiripäñax kamsañsa muni uk amuyxsta, ukat wakichtʼatäxaraksta, ukat mayitanakapsa taqi chuyma phuqañ munaraksta ukhakiw bautisasiñama (Ecl. 5:4, 5).

13. ¿Kunatsa bautisasiñama?

¹³ Jesusaw arkirinakaparux “nayar arkir tukuyapxam; bautisapxam” sasin säna, ukatwa bautisastanxa. Chiqas Jesusaw umar chhaqhantasin bautisasïna (Mateo 28:19, 20 ukat Marcos 1:9 liytʼasiñapawa). Ukatxa, bautisasisakiw qhispirakiñänixa. Apóstol Pedrox Noé chachan mä arca luratapata ukat familiapampi uma juiciot qhispipxatap qhanañchasaxa, akham sarakïnwa: “Uka umasti bautismo umaruw uñtasixa, uka tuqirakiw jichhax qhispitätanxa. [...] Jesucriston jaktäwip tuqirakiw qhispitätanxa” sasa (1 Ped. 3:20, 21). Ukampis taqi jan walinakat jarkʼaqasiñ laykuki bautisasiñ munañax janiw walïkarakiti, jan ukasti, Jehová Diosar wal munasitamata  ukat taqi chuymampi, taqi almampi, taqi amuyumpi, taqi chʼamamampiraki yupaychañ munatam laykuw Bautisasiñama (Mar. 12:29, 30).

14. ¿Kunatsa yaqhipanakax bautisasiñ jan munapki, ukampis kunatsa jan pächasiñamäki?

¹⁴ Yaqhipax inas tamat jaqsut uñjasirista sasin bautisasiñ jan munapkaspati. ¿Jumax ukhamti axsarayasirakta? Ukham amuyañax janiw jan walipunïkiti. Kunattix Jehová Diosan Qhanañchiripäsax mayitanakapampi phuqañamätapwa sum amuyxpachätaxa, ukatwa ukham axsarayasisma. ¿Kunata bautisasiñ jan munkarakisma? Diosan kamachinakaparjam sarnaqañax waliti janicha sasin inas pächasisksta. Ukham amuystaxa, khitinakatï Diosan kamachinakapar jan istʼas sarnaqapki ukanakax kunjamakis jikxatasipxi uk amuytʼañaw yanaptʼätamxa. Jan ukax Diosan kamachinakaparjam sarñaqañax wali askïtap inas yatisksta, ukampis janiw phuqkiristi sasaw axsarayasisma. Chiqas ukham axsarañax walikïskiwa, kunattix altʼat chuymanïtamwa uñachtʼaytaxa. Biblianxa jaqin chuymapax pantjasiriwa ukat ñanqharakiwa siwa (Jer. 17:9). Ukampisa jumax kunatï askïki ukampixa phuqasmawa. ¿Kunjamsa? Diosan ‘arunakaparjam sarnaqasa’ (Salmo 119:9 liytʼasiñapawa). Ukhamasti bautisasiñ tuqit pächasïta, jan ukax kuns jisktʼasïta ukhaxa, juma pachpaw uka jisktʼanakamat yatxatañama. *

15, 16. ¿Bautisasiñataki wakichtʼatäxatamxa kunjamsa amuyasisma?

¹⁵ Bautisasiñatakix wakichtʼatäxtati janicha ukxa, ¿kunjamatsa yatisma? Aka jisktʼanakaw amuytʼasiñ yanaptʼätamxa: ¿Biblian qallta yatichäwinakap qhanañchiristti? ¿Awk taykajax janis yatiyir sarapkchixa, nayax sarapuntti? ¿Taqpach tantachäwinakar sarañatakix chʼamachasiskti? ¿Kunjamsa jan walinakar wiytatax atipjawayta uka tuqit qhanañchiristti? ¿Amigonakajas awk taykajas Diosat jithiqtxapxaspa ukhaxa, nayax Diosar yupaychaskakiristti? ¿Diosarux Jumampi sum apasiñax wali wakiskiriw nayatakixa sasin oración tuqix yatiytti? ¿Mä oración tuqix jakäwix Diosar katuyastti? sasa.

¹⁶ Bautisasiñaxa, jakäwinxa wali wakiskiripuniwa, ukatwa bautisasiñatakix sum amuytʼasiñax wakisi. Jumax ¿bautisasiñ amtañatakix amuytʼasirïxtati? Chiqas janiw nayraqatat sum arstʼanitamasa, ni tantachäwinakan sum arxattʼatamas wali amuytʼasirïtam uñachtʼaykaniti. Jan ukasti, amuytʼasirïñax Biblian yatichäwinakaparjam taqi kun amtaña sañ muni (Hebreos 5:14 liytʼasiñapawa). Jumatï Diosar yupaychañ tuqit wali amuytʼasirïxasin bautisasxchïtaxa, Jehová Diosarux taqi chuymaw luqtxasma, ukatxa sapürurakiw jakäwim  Diosar katuyasxatam sum sarnaqasin uñachtʼayasma.

17. ¿Bautisasxäta uka qhipat yantʼanakar saykatañxa kunas yanaptʼätamxa?

¹⁷ Bautisasxasax wali kusisitapuniw Diosatak irnaqtʼätaxa. Ukat ukhamarakiw jan waltʼäwinakax utjaspa, ukat iyawsäwimas yantʼata uñjasirakispa (2 Tim. 3:12). Ukampis janiw juma sapakix uka jan waltʼäwinakar saykatañamäkiti. Awk taykamaw yanaptʼapxiristamxa. Ukat amuytʼasir jilat kullakanakaruw yanaptʼa mayiñamaraki. Jïsa, kawkïr jilat kullakanakatï Diosar taqi chuyma yupaychañ yanaptʼapkiristam ukanakampi amigüñamawa. Janipun armasimti, Jehová Diosax walpun munastamxa, ukat Jupaw yantʼanakar saykatañatakix chʼam churarakïtamxa (1 Ped. 5:6, 7).

¿Kunas amtanakam phuqañatakix yanaptʼiristamxa?

18, 19. ¿Kunanaksa nayraqat luräta ukanak amuytʼasiñax kunatsa wali askixa?

¹⁸ Walsa chʼamachtʼasiskstaxa, ¿kunanaktï lurañ munkta, ukat kunanakatï lurañamäki ukanakatakix tiempox pistʼaktamti? Ukhamächixa, kunanaksa nayraqat luraskta ukanak amuytʼasiñamawa. Amuytʼañataki, mä balder jachʼa qalanak irantasma, ukxarux chʼallampi phuqantayarakismaxa, qalanakani chʼallani mä baldenïsmawa. Ukat waranukusin pachpa chʼall nayraqat balder warantasma, ukxarux pachpa qalanakampi irxatasma, ¿taqpachati mantarakikini? Janiwa, qalanakaw jilarani.

¹⁹ Tiemposampix niya ukhamarakiwa. Jumatï anattʼañataki tiempo nayraqat apsusïtaxa, kunanakatï jukʼamp wakiskirïki, mä arunxa, Diosar yupaychäwimanxa tiempox pistʼätamwa. Ukampis jumatï “askïkis ukpin” nayraqat ajllïtaxa, ¿kunas pasaspa? (Fili. 1:10.) Chiqas Diosan munañanakap phuqañatakix tiempox utjaniwa.

20. Diosar jukʼamp yupaychañataki amtawaykta ukanak phuqañataki chʼamachaskasin pächasïtaxa, ¿kunas yanaptʼiristamxa?

²⁰ Jutïr maranakansa, jan ukax jichpachas kunanaksa luräta, ukat bautisasïtati janicha, ukanak amtasin phuqañatak chʼamachaskasax inas pächaschïta. Ukhamänixa “Diosar llakinakam katuyam, jupasti chʼaman tukuyätam” (Sal. 55:22). Kunjamtï jichhürunakan Diosan arunakapat yatichaskixa, janipuniw mayampis ukham lurasxaniti, jichhaw uka wali wakiskir luräwinxa yanaptʼarakisma (Hech. 1:8). Ukhamasti, ¿kunsa jumax luräta? ¿Ukhamakit uñchʼukïta, jan ukax jankʼakich Diosan arunakap yatiyañatakix chʼamachtʼasïta? Diosan Apnaqäwipat yatiyañ amtañamax wali askipunïniwa. Ukat “waynäkasina jumar irnuqir Diosamat amta[tamatxa]” janipuniw akchʼas arrepentiskätati.

[Qhanañchäwinaka]

¿Kamsasmasa?

• ¿Kunanaksa luräta ukanakxa kunatsa amtañama?

• ¿Kuna aski luräwinak phuqañsa amtasma?

• Bautisasiñatakixa, ¿kunanak lurañamasa?

• Amtanakam phuqañatakixa, ¿kuns nayraqat luräta ukanak amuytʼañamax kunatsa wakisi?

[Jisktʼanaka]

[13 janan fotopa]

¿Biblia sapür liyiñ amtasktati?

[15 janan fotopa]

Bautisasiñ munstaxa, ¿kunanakas yanaptʼiristamxa?

[16 janan fotopa]

¿Kunsa aka uñachtʼäwix yatichistu?