¿Jumax amttati?

¿Aka qhipa phaxsinakan mistkäna Yatiyañataki sat revista liytʼtati? Ukhamächi ukhaxa, aka jisktʼanakar qhanañchtʼma:

• ¿Diosax israelitanak nayraqat khitkäna uka angelax khitïpachänsa?

Niyakixay Jehová Diosax “nayan sutixaruwa taqi kunsa luri” sischïnxa, uka angelax Diosan nayrïr wawapänwa (9/15, 21 jana).

• ¿Kuna suma iwxtʼanakas jichhak jaqichatanakatak utji?

Jehová Diosaruw jisktʼasiñasa, kunattix Jupakipuniw uka tuqit suma yatxattʼataxa, ukat iwxtʼanakaparjam sarnaqañarakiwa. Ukatxa maynit maynikam wali amuyumpi parltʼasiñawa, chacha warmjam sarnaqañ yatiqañawa ukat pantjasirïtas amuyañasarakiwa (10/1, 10 janat 13 janakama).

• ¿Kunatsa Jesusax Lázaro amigopar ukspach jan qullkpachäna?

Jesusax purkäna ukhaxa, Lazarox pusi uruw jiwatäxäna. Jehová Dios Awkipa wali chʼamanïtap uñachtʼayañapänwa, ukatwa Jesusax amigopar ukspacha jan yanaptʼir sarkpachänti. Ukat uk uñjasax waljaniw jupar iyawsapxäna (Juan 11:45; 10/1, 14 ukat 15 jananaka).

• ¿Khitimpis Caín chachax jaqichasïna?

Caín chachan warmipax Evan familiapat naschïna, ukampis kunapachay yuriskchïna uk janiw yatktanti (Gén. 5:4; 10/1, 18 jana).

• ¿Bibliat jukʼamp sum yatxatañatakix kunas yanaptʼistani?

Suma chuymampiw liytʼañama, qhana arunakampi qillqtʼat Bibliatwa liytʼañama, Diosatwa mayisiñama, sapüruw liytʼañama, kunayman tuqit liytʼañ yantʼañama, lupʼiñatakiw tiempo apstʼasiñama ukat maynimpi yanaptʼayasiñamawa (10/1, 19 janat 21 janakama).

• ¿Kunatsa Jesusax Politicar jan mitiskäna?

Jesús pachpaw akham säna: “Nayan reinoxax janiw akapachankkiti” sasa (Juan 18:36). Ukhamasti, jupax Diosan Apnaqäwipan apnaqirit uttʼayatäñapänwa. Jupatï politicar mitisispäna ukhax alaxpachankir Awkipan Apnaqäwip contraw kutkatasisapäna (10/1, 22 janat 25 janakama).

• Diosar yupaychäwisanxa, ¿kunjam parlañasa Diosatak jan walïki?

Diosan munañap jan phuqañ munasax akhamanak parlañaw jan walïkiti: “Sinti chʼamapuniwa”. “Janiw phuqañ munkti”. “Janiw tiemponïkti”. “Janiw sum phuqkiristti”. “Chuym ustʼayapxitu” sasa (10/15, 12 janat 15 janakama).

• ¿Kuna iwxtʼanakas tantachäwinakan chʼamañchtʼasiñatak yanaptʼistaspa?

Janïrjat wakichtʼasiñamawa. Janipun faltasimti. Jan qhiptʼamti. Kawkïr qillqatanakattï yatxataskani ukanak apäta. Sum istʼañamawa. Tantachäwin arstʼasma. Mä qhawqha arunakampik arstʼma. Taman lurañanakam phuqapunma. Arstʼirinakar yuspärma. Tantachasirinakamp parltʼasma (10/15, 22 jana).

• ¿Aaronax masinakapampi jan walir wiytatax iyaw satapatxa kunsa yatiqtanxa?

Mä kutixa, Moisesax jan ukankkäna ukhaw israelitanakax mä ídolo lurarapipxita sasin Aaronar mayipxäna, jupasti iyaw sasaw luräna. Kunjamtï yatiqktanxa, janiw wayn tawaqunakakix ukhaman uñjasipkiti. Jan ukasti jilïr jaqinakas jan walinakar wiytatax uñjasipxarakiwa. Ukhamasti, masinakan jan walir wiytatax janiw sañasawa (11/15, 8 jana).