¿Wawanakamax kunjamsa qhanañchtʼapxaspa?

Awk taykanaka, Yatiyañataki enero 15, 2010 (16 janat 20 janakama) revistanxa, yatiqatarjam yatsuñatakiw awk taykanakar chʼamañchtʼaskäna. Aka yatichäwinxa, escuelan jisktʼapkani ukhax wawanakamax kamsapxaspasa uka tuqit wakichtʼañatakiwa. Wawanakarux Familiana Diosar Yupaychañataki Aruma sat wakichäwinwa uka tuqit yatichtʼapxasma.

WALJA yantʼanakanwa Jehová Diosar yupaychiri wawanakax uñjasipxi. Masinakapax kunatsa banderar jan aruntkta, kunatsa mara uruyasiñanakar jan sarkta, ukat kunatsa yaqha fiestanakarus jan sarkarakta sasaw jisktʼapxi. Uka jisktʼanakaruxa, ¿kunjamsa wawanakamax qhanañchapxaspa?

Yaqhipanakax akham sapxakirakiwa: “Janiw uk lurkiristti. Religionajätakix janiw ukax walïkiti” sasa. Ukham chʼamachasipxatapax wali askiwa. Ukat arsusir uñjasax inas jan jukʼamp jisktʼxapxchiniti. Ukampis Biblianxa, cristianonakarux “wakichtʼatäpxarakim khitinakatix jumanakaru suytʼañanakamxat jisktʼapkätam ukanakar sañatakixa”, jan ukax qhanañchañatakixa, sasaw iwxtʼarakistu (1 Ped. 3:15). Ukatakixa, “janiw uk lurkiristti” sañakïkaspati. Yaqhanakax kunatsa ukham jan lurktan uk janis amuyapkchixa, kunatsa ukanak jan lurktan uk qhanañchtʼañäni ukhax yuspärapxistaniwa.

Kunapachatï maynix kunatsa yaqhip luräwinak jan lurki, jan ukax kunatsa ukham luri ukanak qhanañchañapäki ukhaxa, Jehová Diosar yupaychir wawanakax Aprendamos del Gran Maestro sat libro, jan ukax Bibliat apstʼat yaqha qillqatanakan utjki uka sarnaqäwinakampiw yanaptʼasipxi. Yaqhipax uka sarnaqäwinak istʼasaxa, Bibliat jukʼamp yatxatañ munapxi. Ukampis mä qhawqhanix ratukiw yaqhanakat amtasax lupʼiwayxapxi. Ukat yaqhip chiqanakanxa, wawanakax janiw sum amuyapkiti, ukatwa yatichtʼañax munasi. Minhee sat 11 marani tawaqitat amuytʼañäni. Kunapachatï escuelankir amigapax cumpleañopar jawsäna ukhaxa, akham sänwa: “Biblianx janiw ukham uruyasiñ tuqit yatichkiti. ¿Bautisir Juanar mä ukham uruyasïwin jiwayapxatap yatiyätati?” sasa. Uka arunakampix kamsañs muni ukxa, amigapax janiw sumpach amuykänti.

Chiqas, qillqatanakasan fotonakapasa ukat yatichäwinakapasa askipuniwa. Ukampis escuelanakan yaqhip autoridadanakax janiw uka qillqatanakamp mayni wawanakar yatichasiñapxa munapkiti. Ukhamasti, ¿wawanakamax jan qillqatanakampix iyawsäwipat qhanañchtʼapxaspati? ¿Iyawsäwipat qhanañchtʼapxañapatakix kunjamsa wawanakamar yanaptʼapxasma?

Yatiqatarjam yatsuñatak yanaptʼapxam

Utan yatsuñaw wali askïspa, awk taykanaka, wawaman masipäkasmas ukham lurapxasma. Ukat kunjamsa Biblian yatichäwinakapat qhanañchtʼapxi ukanak uñjasasti, suma arunakampi chʼamachtʼañamawa. Ukat kunjamsa jukʼamp sum qhanañchtʼapxaspa ukat kunatsa ukhampun lurapxañapax wali askïspa uksa uñachtʼayapxarakismawa. Ukatakixa,  amuytʼañ arunakamp qhanañchtʼañwa yatichapxasma. Llätunk marani Joshua sat waynituxa, yatiqir masinakajax janiwa conciencia ukat Diosat jan jithiqtaña siski uka arunakxa uñtʼapkiti sasaw saraki. Ukatwa yaqha arunakampi masinakapar amuytʼayañapänxa (1 Cor. 14:9).

Yaqhip wayn tawaqitanakax jupanakas jisktʼapkchixa, walja arunakampi qhanañchatax janikiw yäqxapxiti. Ukampis Diosar yupaychir wawanakax masinakapar arstʼayapxani, ukat amuytʼayapxani ukhaxa, istʼañ munasipkakiniwa. Uka tuqit parlkasinxa, tunka marani Haneul sat tawaqitax akham siwa: “Masinakajax arstʼañx walpun munapxi, janiw maynin parlañapakxa munapkiti” sasa. Mayninakamp parlakiptʼañatakixa, jisktʼañaw wakisi, ukat maynin qhanañchtʼäwinakapsa sum istʼañasawa.

Recuadron utjki uka yanaptʼampiw kunjamsa wawanakax masinakapar qhanañchtʼaspa uk uñachtʼayaski. Janiw pʼiqir yatsupxañapax wakiskiti. Chiqas wawanakax mayj mayjäpxiwa, jisktʼanakas may mayarakiwa. Ukatwa wawanakax sum amuytʼapxañapa, ukhamatwa khitimpïy parltʼapxchini, ukat kuna tuqitxay parltʼapxchini  ukarjamax arunakapamp qhanañchtʼapxani. Wawanakamatï escuelankasipkchixa, ¿janit recuadronkki ukarjamax parltʼapkasma?

Chiqas wawanakan iyawsäwip arxatapxañapatak yatichañatakixa tiempow munasi, ukat chʼamachasiñasarakiwa. Cristian awk taykanakax Diosan iwxtʼanakap yatichañpun munapxi, ukat sapa kutis ukarjam sarnaqapxañapatakiw yanaptʼapxaraki (Deu. 6:7; 2 Tim. 3:14).

Ukhamax Familiana Diosar Yupaychañataki Aruma satäkis ukanwa recuadronkki ukarjamax yatsupxasma, ukat wali wakisirïtapwa amuyapxäta. Amtapxapunim: janiw kunjam qillqatäki ukhampun yatiqapxañapäkiti. Inas mä qhawqha kuti ensaykasax amuytʼasiñapatak yaqha arunakamp jaysañax wakischispa, ukhamatwa yaqha arunakampix qhanañchtʼapxaspati janicha ukxa amuyxapxäta. Wawanakamax qhanachtʼañ munapkani ukhaxa, wali amuyumpi ukat qhana arunakampi yatichtʼapxañapatakiw yanaptʼapxäta. Ukhamatwa iyawsäwip arxatañxa yatiqapxani, janiw escuelankir masinakaparukix parltʼkaniti, jan ukasti yatichirinakaparusa, uta jakʼankirinakarus qhanañchtʼarakiniwa.

[4, 5 jananakan recuadropa/fotonakapa]

MARA URUYASIÑANAKA

Melisa: Julio, kamisaki. ¿Cumpleañojar jutañ munasmati?

Julio: Yuspära. Ukampis may jisktʼäñ munsma: ¿Kunatsa jumax uruyasta?

Melisa: Taqinirakis ukham uruyasipxixä. ¿Jumasti janit uruyasirïkta?

Julio: Chiqas janiwa.

Melisa: ¿Kunata? Nayax nasiwaykta ukhaxa, awk taykajax walpun kusisipxäna.

Julio: Nayan awk taykajas kusisipxarakïnwa. Ukampis janiw nasiwaykta uka urux fiesta lurapkti. Awisaxa, uruyasirix jupas taqinit sipansa jukʼamp importantïkaspa ukham amuyasispa. Ukampis Jehová Diosaw taqinit sipans jukʼamp importantexa, ¿janicha? ¿Ukat janit jakäwisat Diosar yuspärañasax wakiskaspa?

Melisa: ¿Ukampix kamsañsa munta? ¿Janit mara phuqatajat uruyasiñajäkaspa?

Julio: Melisa, jumaw ukxa amtxañama. Uruyasïwipan regalonak katuqañax waljaniruw kusisiyi, ukampis Biblianxa, “katuqirit sipansa jukʼamp kusisiñaniw khititï churki ukaxa” siwa. Ukhamasti, ¿kunas jukʼamp wakiskirïspa? ¿Urusan regalonak katuqañati, jan ukax Diosar yuspärañacha ukat mayninakar yanaptʼañacha?

Melisa: Chiqas janiw ukham amuytʼirïkti. ¿Awk taykamax janit kuns regalapktamxa?

Julio: Awk taykajax regalonakxa churapxituwa. Ukampisa, janiw mara phuqañajäk suyapkiti. Kunapachas churapxakituwa. Melisa, ukhamaxa ¿kunatsa mara uruyasiñanakax qalltawayi uk yattati?

Melisa: ¿Jumasti yattati?

Julio: Ukhamaxa, nayra maranakan kunjamätänas mä uruyasïwix uka tuqit qharüruw qhanachtʼäma.

BANDERAR ARUNTAÑA

Gisela: Carla, ¿kunatsa banderar jan aruntkta?

Carla: ¡Uka jisktʼamax wali askiwa! Ukampis ¿kunatsa jumax aruntta?

Gisela: Markajarux wal munastxa, ukatwa aruntta.

Carla: Ukampis mamamar walsa munaskstaxa, ¿janixay amparam chuymar aykatasisin aruntktatixa?

Gisela: Janiwa. Chiqas respetotwa banderar ukham arunttxa. ¿Jumasti janit banderar respetkta?

Carla: Respetasktwa, ukampis janiw taqi kunarusa, ni respetktan uka jaqinakarus ukham aruntktanti, ¿janicha?

Gisela: Ukax chiqäskapuniwa. Nayax profesorarux respetwa ukampis janiw banderarjam aruntkti. Chiqas janiw kamsirjamäxsmasa.

Carla: ¿Kunatsa waljanix banderar aruntapxi uk yattati? Banderarux markaparjam uñjasaw aruntapxi, ukat markap laykux jakäwipsa churirjamäpxiwa. Ukampis janiw ukham amuykti. Nayax janiw jakäwix churkiristti, kunattix Diosaw jakäwxa churitu, ukatwa juparukix churarakïxa. Nayax benderarux respetompis uñjkstxa, janiw aruntkti.

Gisela: Ah, amuyxtwa.

Carla: Walikpun ukham jisktʼistaxa. Mayanxa kunatsa jan lurkpachäta, jan ukax kunatsa ukham lurta ukanak jisktʼaskakitätawa. Babilonia markan mä idolon nayraqatapan killtʼasipxañapa, jan ukax qunqurtʼasipxañap mayipkäna uk ¿yatiyätati? Jan killtʼasipkätax jiwarayapxämaw satpachas janiw taqini killtʼasipkänti.

Gisela: ¿Chiqapuni? ¿Ukat kunas pasäna?

Carla: Qharüruw recreon uk awistʼäma.

ESCUELAN PʼIQTʼAÑAPATAKI AJLLIÑA

Miguel: Diego, ¿escuelan presidentëñapatakix khitis jukʼamp khustʼayaspa?

Diego: Nayax janiw khitirus ajllkiristi.

Miguel: ¿Kunata?

Diego: Nayax mä suma apnaqirirux ajllisiwayxtwa. Cristianjamaxa, Jesucristorukipuniw arkäxa sasaw taqi chuyma arsuwayta. Ukatwa juparuk arkäxa. Ukampisa, Jesucristokipuniw wali suma apnaqistani sasax ¿kunatsa sispachäta uk yattati?

Miguel: Janiwa, janiw nayax uka tuqit yatiñs munkarakti.

Diego: Walikiwa, yaqha uruntix yatiñ munätaxa, taqi chuymaw qhañanchtʼäma.

[Foto]

“Julio, kamisaki ¿cumpleañojar jutañ munasmati?”

[3 janan fotopa]

“¿Kunatsa jumax banderar jan aruntkta?”