Aka revista liytʼirinakan jisktʼäwinakapa

¿Kunatsa Moisesax Nadab ukat Abiú chachanakan jiwatapxarux Eleazar ukat Itamar chachanakatakix colerasïna, ukat kunjamatsa colerap apjtayasïna? (Lev. 10:16-20.)

Tabernáculo utan sacerdotenakjam yupaychapxañapataki uttʼaykäna uka qhipatakwa Jehová Diosax Aaronan Nadab ukhamarak Abiú wawanakaparux “jan luqtapxamti siskäna uka nina luqtapxa[tap]” laykux jiwarayäna (Lev. 10:1, 2). Moisesasti, Aaronan Eleazar ukat Itamar yuqanakaparux janis mayni jilanakamax jiwatäpkaspa ukham taqi kuns lurasipkakim sänwa. Ukampis Moisesax jupanakatak colerasïnwa, kunattix juchanakat luqtaskäna uka urqu cabriton aychap janiw manqʼapkataynati (Lev. 9:3). ¿Kunatsa ukham coleraspachäna?

Jehová Diosax Moisesar churkäna uka Leyinxa, sacerdotenakax juchanakat ofrenda luqtat animalan aychapwa tabernáculo pation manqʼapxañapäna. Ukham manqʼasaxa, sacerdotjamax Diosatsa ofrenda luqtiritak mayirapkaspa ukwa uñachtʼayäna. Ukampis ofrendan wilaptï tebernáculo manqhar qullanäkis ukar apasisapänxa, janiw aychap manqʼapxañapäkänti. Taqpach ofrendaw nakhantayasiñapäna (Lev. 6:24-26, 30).

Ukürux llakinakaw pasäna, ukatwa Moisesax Diosan kamachinakapax sumat phuqasiskpacha janicha uk yatiñ munpachänxa. Ukat juchanakat ofrendan mä urqu cabra luqtasin nakhantayapxatap yatisaxa, Moisesax chuym ustʼataw Eleazar ukhamarak Itamar chachanakarux ¿kunatsa Jehová Diosan kamachinakap jan istʼapkta, ukat kunatsa aychapsa jan maqʼapkta? sasin jisktʼäna, uka sacrificion wilapax janiw Diosatakix qullanäkis ukar apaskänti, ukatwa manqʼapxañapäna (Lev. 10:17, 18).

Aaronaw ukxarux arxatarakïna, kunattix inas jupax wawanakapar janiw maqʼapxätati sischïna. Ukürukiw Nadab ukat Abiú wawanakapax jiwapxatayna, ukat inas akham jisktʼaschïna, ¿sacerdotenakjamax qʼuma conciemciampit juchanakat ofrendan aychap maqʼapxaspa? sasa. Uka pä wawapax janis Nadab ukat Abiú mayni wawanakapan jan wal lurapxatapat juchanïpkchïnxa, sacrificion luqtat aycha manqʼapxatapax Diosatak janiw walïkaspati sasaw amuypachäna (Lev. 10:19).

Aaronan familiapatxa, sacerdotjam phuqañatakix uküruw qalltasipkäna, ukatwa Diosan chuymap kusisiyañatakix sacrificionak luqtasax taqi kunas sumapuniw phuqasiñapa sasin inas Aaronax amuychïna. Ukampis Nadab ukat Abiú wawanakapax Jehová Diosan sutipwa qʼañuchapxäna, ukatwa jiwapxarakïna. Juchachasirinakan familiapjamax janiw ofrendan aychap manqʼapxañapäkiti sasaw amuyarakpachäna.

Moisesasti Aaronan qhanañchatapxa sum katuqpachäna, Bibliansti akham siwa: “Moisesasti ukanak istʼasinxa amukïxarakïnwa” sasa (Lev. 10:20). Amuyatax Jehová Diosas ukhamarakwa uñjpachäna.