¿Bendicionanak katuqasax yuspärtanti?

DIOSAX mä milagro tuqiw israelitanakarux Egiptot qhispiyäna. ¡Jupanakasti jan khitin jarkʼata Diosar yupaychasax walpun kusisipxäna! (Éxo. 14:29–15:1, 20, 21.) Ukampis uka kusisiñapax ratukirakiw chhaqtawayxäna, kunattix janipuniw akchʼas walïkiti sasaw arusipxäna. Kunanaktï Diosax jupanak laykux lurawayki ukanak lupʼiñat sipansa, wasar waña pampanakan jakañax kunja chʼamas ukakwa lupʼisipkäna. Ukatwa Moisesar akham sapxäna: “¿Kunatsa jumanakax Egiptot irpsunipxista? ¿Wasaran jiwarañatakiti irpsunipxista? Janiw umasa, manqʼas utjapkituti. Nanakasti aka [maná] manqʼampix amjayasxapxaraktwa” sasa (Núm. 21:5).

Patak patak maranak qhipatxa, Davitax akham sasaw Diosar säna: “Nayax khuyapayasiñamaruw taqi chuymamp iyawsta: chuymaxax nayar qhispiyatamat kusisi. ¡[Jehová] Tatituruw nayar aski luratapat qʼuchü!” sasa (Sal. 13:5, 6). Israel mark apnaqir reyisti kunja munasiñampis Diosax uñjatayna ukxa janiw armkänti. Jan ukasti, kunjamsa yanaptʼäna ukanakatxa lupʼipunirïnwa (Sal. 103:2). Alaxpachankir Awkisax ukhamarakiw wal yanaptʼistu, ukampis inas jiwasax janis kunäkaspa ukhamak amuyxsna. Ukatpï jan ukhamäñapatakix kuna bendicionanaktï Diosax jichhürun churkistu ukanakat lupʼiñasapunixa.

Jehová Diosamp ‘sum parlasiña’

Salmonak qillqirix akham sänwa: “[Jehová] Tatitux arkirinakapampix sum parlasi” sasa (Sal. 25:14). ¡Kunja askis jiwir jaqïkasin Diosan amigopäñasa, Jupamp sum parlasiñasa! Ukampis sapür lurañanakasampi phuqasaxa, inas Alaxpachankir Awkisamp parlasiñ armasxsna. Ukhamächixa, Diosampi jan parlasxsnax kunas pasaspa uka tuqit amuytʼasiñasawa. Jehová Diosax amigosawa, ukatwa taqi chuyma Jupar confiasin kunarus  axsartan, kunas llakisiyistu ukat kuns muntan ukanak sum yatiyañas muni (Pro. 3:5, 6; Fili. 4:6, 7). Ukhamasti, kunjamsa Diosar mayisisktan ukxa amuyañasapuniwa.

Pablo sat wayna jilatax kunjamsa Diosat mayisiskäna uk lupʼisax oracionajax jukʼamp sumäñapawa sasaw amuyasïna. * Jupax “pachpa arunakampiki mayisiskataxwa amuyasiyäta” sarakiwa. Ukatwa Índice de las publicaciones Watch Tower satäkis ukan oracionat parlki uk thaqtäna, ukhamatwa Biblian 180 mayisïwinak utjatap jikxatäna. Ukanakansti, Diosan nayra yupaychirinakapax taqi chuyma mayisipxirïtapaw uñachtʼayasïna. Pablo jilatasti akham siwa: “Uka mayisïwinakat lupʼisaxa, qhana arunakampi Diosat mayisiñwa yatiqawayta, ukhamatwa taqi chuyma mayisiñ yatiqarakta. Jichhasti wali kusisitaw Diosarux oracionan jakʼachasta” sasa.

‘Horasapar manqʼanaka’

Yaqha bendicionasti, Biblian chiqa yatichäwinakapawa, taqi ukanakasti suma manqʼäkaspas ukhamawa. Ukatwa “qʼuchu[pxtanxa], chuymanaka[san] kusisiñax utjatap layku” (Isa. 65:13, 14). Ukampis amuyasiñasawa, janipuniw jan wali yatichäwinakampix kunatï chiqäki ukanak maysar apanukuñ munktanti. Amuytʼañäni, khitinakatï Dios contra saytʼasin kʼarinak yatichapki ukanakar istʼsnaxa, pantjayistaspawa ukat janirakiw “amuyasiri chiqapa uywatan” “horasaparu manqʼa”, mä arunx Diosan chiqa yatichäwinakap wakichanipki ukanak munxsnati (Mat. 24:45-47, MT).

Ukhamaw Andrés sat jilatarux pasatayna, jupasti walja maranakaw Diosarux yupaychäna. Ukampis Dios contra yatichäwinakaruw jalantäna. Internetan mä jukʼanak uñakiptʼañax janiw kunäkanisa sasaw amuyäna. Jupasti akham sasaw amtasi: “Internetan liytʼañ qalltkayäta ukhaxa, kuna yatichäwinaktï chiqapunïskiw sapki ukwa liytʼta. Ukat jukʼamp liytʼasaxa, janiw tamar sarañ munxayätti. Ukampis Jehová Diosan Qhanañchirinakap contra yatichäwinakap sumpach amuytʼasax, kʼarinakak yatichapxatapa ukat wali engañerïpxatapwa sum amuyxayäta. Jupanakatak ‘jan kamskay arunakäki’ ukanakaxa, yaqha tuqit parlki ukanakat apsut jiwas contra kʼari yatichäwinakawa. Ukatwa Bibliat apstʼat qillqatanak liytʼaskakiñsa ukat tantachäwinakar kutʼxañsa amtawayta. Kuna askinaksa aptʼasiskatätxa uksa jankʼakirakiw amuytatasta” sasa. Andrés jilatan tamar kuttʼanxatapax wali kusiskañawa.

“Mä familiakïtanwa”

Wali munasiri, mä wawak sarnaqiri ukat Uraqpachankir familiankañax Jehová Diosan mä suma bendicionapawa (Sal. 133:1). Ukatwa Pedrox akham qillqpachäna: “Jilatanakarusti munapxarakim” sasa (1 Ped. 2:17). Chiqas Diosan tamapanxa munasitätanwa, ukat jilat kullakanakas awkisjama, taykasjama, jan ukax jila kullakasjamaw yanaptʼapxistu (Mar. 10:29, 30).

 Ukampisa, jilat kullakanakasampix kunaymanitwa jan waltʼayasiñanakax utjarakispa. Sañäni, maynin pantjasitap uñjasax jankʼakiw colerasna, ukat kamisarak ukhamänisti sasaw kʼumiraksna. Jiwasatï ukhamästanxa, ak amtañasawa, pantjasirïkstansa Diosax taqiniruw munasiñampi uñjistu. Amtapuniñäni, “jiwasatix sañäni: ‘Janiw juchanïkti’ sasa, ukapachax jiwas pachpaw kʼarintastan, janirakiw jiwasan chiqa luräwix utjkiti” (1 Juan 1:8). Ukhamasti, “jumanak purax llampʼu chuymampi sarnaqapxam, maynit maynirus perdonasipxarakim” siski uka arunakar istʼañaw jukʼamp askixa (Col. 3:13).

Ana kullakax munkir jan munkirwa jilat kullakanakar sum uñjañ yatiqawayi. Ukat kunjamtï Jesusax herencia tukuntir waynat parlkänxa, niya ukhamarakiw tamat jithiqtxäna, ukat sum amuytatasisax kuttʼanxarakïna (Luc. 15:11-24). ¿Kunsa yatiqawayäna? Anax akham siwa: “Tamar kuttʼankta ukhatxa, pantjasirïpkchisa taqi jilat kullakanakaruw jukʼamp munasta. Nayrax jankʼakiw kamis ukhamänixa sasin kʼumirïta, ukampis jichhax janiw kunas jupanakat jayarstʼaykitaniti. Diosan tamapanakwa, Jehová Diosampisa jilat kullakanakampis sum apastanxa, ukasti mä paraisokaspas ukhamawa. Tama jaytasiñ sarxañax janiw kuna askïkisa, kunattix akapachanxa janiw kuna sumas kawkins utjkiti” sasa.

Bendicionanakat yuspärañ janipun armasiñäniti

Diosan Apnaqäwipakiw taqi jan waltʼäwinak tukjani, uka suytʼäwisax qurit qullqit sipansa jukʼamp valoraniwa. Diosan Reinopax kuna bendicionanaksa apanini uk istʼasax walpun yuspärirïtanxa. Ukat kunjamtï Jesusax alakip lurir mä jaqit parlkänxa ukhamarakiw lurtanxa, uka jaqix “wali jila alan perla jikxati” ukat “taqi kunatix jupan utjkis uka aljantasinwa uka perla alasxi” (Mat. 13:45, 46). ¿Tiempompix uka perlapar janit munasxpachäna? Jesusan arunakapax janiw ukham amuyaykänti. Jiwasax suma suytʼäwisat yuspärañxa, janirakiw chuymasat chhaqtayañasäkiti (1 Tes. 5:8; Heb. 6:19).

Juana kullakat yatiqasiñäni, jupax walja maranakaw Jehová Diosarux yupaychaski. Ukat akham siwa: “Kuna suytʼäwitï Diosan Reinopat utjkitu ukanak jan armañatakix jaqinakar yatiyañaw yanaptʼitu. Kunapachatï jaqinakar Diosan Reinopax kamsañsa muni uk yatiykta ukhaxa, wal kusisipxi, ukax kusisiyarakituwa. Ukat kunapachatï Bibliat mä yatiqirix Diosan arunakaparjam sarnaqxi ukhaxa, yatiyktan uka yatichäwinakax kunja chʼamanis ukwa qhan amuyta” sasa.

Kunjamtï uñjaniwayktanxa, Diosan taqi bendicionanakapat yuspärañax waliw utji. Jichhürunakanx kunayman jan waltʼäwinakanwa uñjastanxa, arknaqata, usuntañanakana, chuymankipstata, qullqit pistʼata, awisax munat mä familiarasaw jiwaspa. Ukampis machaq uraqinxa, Diosan Reinopax taqi uka jan waltʼäwinakwa jan mayampitak tukjani, ukat Diosar yupaychäwisanx wali sumaw jikxatasirakiñäni (Apo. 21:4).

Uka suma tiempo puriniñapkamasti, kuna bendicionanaktï Diosax jichhürun churkistu ukanakarux salmonak qillqirjamarak askirjam uñjañäni, jupasti akham sänwa: “Dios Tatay, muspharkañ luratanakamax waljawa, nanakat khuyapayasitamas waljarakiwa: janiw khitis jumjamax utjkiti. Ukanakxat yatiyañ yantʼta, arsuñ yantʼarakta, nayatakisti janiw jaktʼañjamäkiti” sasa (Sal. 40:5).

[Qhanañchäwi]

[18 janan fotopa]

Kawkïr bendicionanakas jumatak wali askixa