Chʼamachasitasax janiw inamayäkaniti

BIBLIAT yatxataña ukat familiana Diosar Yupaychañataki Arumax wali askiw wawanakar “chiqapar yatichasina sum uywa[ñatakixa], Tatitur iyawsapxañapataki” (Efe. 6:4). Ukampis wawanakax ratukiw qaripxi. ¿Kunjamatsa awk taykax yanaptʼapxaspa? Estados Unidos markankir pä chacha warmix kuns lurapxäna uk uñjañäni.

Californiankir George jilatax akham siwa: “Wawanakajax jiskʼäsipkäna ukhaxa, Bibliat yatxatkasax jukʼamp yatiqañ munapxañapatakiw esposajämpix chʼamachasipxirïta. Awisaxa, Bibliat apstʼata sarnaqäwinaka sat librot qhanañchañatakix ukan utjki ukarjamaw isthapisipxirïta. Janiw ukakïkänti, espadanaka, thujrunaka, canastanaka ukat yaqhanakamp lurapxirïta. Biblian parlki uka jaqjamaw familiat maynix uñachtʼayiri, ukat nanakax khitis ukwa sapxirïta. Ukat “¿khitïts nayaxa?” sat anatañwa anatapxarakirïta, ukat Bibliat apstʼat kunayman jisktʼanakan mä anatañwa lurapxarakirïta. Noé chachax lurkäna ukar uñtasit mä arca ukat marat maratjamax kunanakas pasäna ukanakwa qillqtʼapxirïta. Ukat Biblian parlki uka sarnaqäwinakan jaqinakwa dibujapxirïta. Jichhax Efesios 6:11-17 qillqatan parlki uka armadurwa dibujapxäxa. Ukat uka armaduran partenakapax kamsañsa muni ukwa sapa maynix qhanañchapjäxa. Taqi ukanakaw Bibliat familian sum yatxatañ yanaptʼapxitu” sasa.

Michigan markankir Debi kullakax akham sarakiwa: “Imill wawajax kimsa maranïkäna ukhaxa, yatichatax janikiw yäqapxirïkituti. Mä uruxa, Bibliat apstʼata sarnaqäwinaka librotxa, Isaacampit Rebecampit liytʼarapiskayäta, ukat pä muñecapamp uñachtʼäwinak lurasaw yatichirïta. ¡Ukhapï sum istʼitänxa! Qhipatxa uka muñecanakampix yaqha sarnaqäwinakatwa yatichapxirïta. Tukuyarusti, jikxatañkamaw yaqhanak thaqtaniri, ukhamat mayan yaqha anatañanakamp yatiqañataki. Rahab warmin utap uñachtʼayañatakix mä cajonampi ukat wila color jiskʼa pitampikiw munasïna. Ukat Números 21:4-9 qillqatan parlki uka broncet lurata katari uñachtʼayañatakixa, pichañ lawaruw mä metro chikatan anatañ asiru muyuntayapxirïta. Taqi ukanak mä bolsaruw imapxirïta. Wawajar ‘Bibliat apstʼat sarnaqäwinakani bolsitap’ thaqtasin amuyuparjam pachpa arunakapamp qhanañchtʼir istʼañax wal kusisiyapxirïtu” sasa.

Wawanak uywañax chʼamakiwa, Diosar taqi chuyma servipxañapatakix sapa semanan yatichañat sipans jukʼampiw munasi. Ukampis Bibliat yatxatasa ukat familiana Diosar Yupaychañataki Aruman yatiqasaw wawanakarux Diosar taqi chuyma yupaychapxañapatakix yanaptʼsna. Ukatpï ukatak chʼamachasiñax jan inamayäkitixa.