¿Kunatsa kusisit jakassna?

JISKʼA celulanakasa ukat qutuchthaptat walja galaxianakasa, Diosax taqi kunsa yäpar uchatapwa uñachtʼayistu. Ukhamasti, Lurir Diosax taqi kuns yäpar apnaqiriwa (1 Cor. 14:33, NM). Diosax kuntï Jupar yupaychañasatak uttʼayawayki ukax muspharkañarakiwa. ¿Kuna tuqitsa parlasktanxa? Alaxpachankiri ukat aka Uraqinkir wali amuytʼasir wawanakapat parlasktanxa, jupanakax taqi kuns chuymaparjam amtirïpxiwa ukat mä familiakiw Jehová Diosar yupaychapxi. ¡Ukax wali kusiskañapuniwa!

Nayra Israel markanxa, aka Uraqinkir Diosan markapaxa Israel markänwa. Diosan templopasa ukat ajllit reyis ukankarakïnwa. Babilonia markan katuntat uñjasir mä israelitaxa, qhawqsa uka qullan markarux munasïna ukxa akham sasaw arsüna: “Jerusalén marka, janitix jumat amtaskä, janitix jukʼamp jumat kusiskä ukapachaxa, laxraxax lakaxar pharkatasin lipʼkatpan” sasa (Sal. 137:6).

¿Diosan markapar ukhamti jumax munasirakta? ¿Taqi kunat sipans markapankañat jukʼamp kusiskañaxa? ¿Kunjamas Diosan markapax aka Uraqin qalltawayi ukat kunanaksa lurapxi uk wawanakamax yatipxiti? ¿Jehová Diosan Uraqpachankir tamap taypinkapxatap amuyasipxiti? (1 Ped. 2:17.) Familiana Diosar Yupaychañatak Aruman aka iwxtʼanakarjam lurapxätaxa, jukʼampiw Diosan markaparux munasipxäta.

“Nayra pachanaka[twa]” parltʼapxasma

Israelit familianakaxa sapa maraw pascua amtañatakix tantachasipxirïna. Ukat pascua fiesta utʼayasxäna ukhaxa, akham sasaw Moisesax iwxtʼäna: “Qhipärmanthitix wawanakamax jisktʼapxätam: ‘¿Kunatsa akham lurapxta?’ sasa, ukkhaxa sapxätawa: ‘Tatituw chʼamapampi Egipto markana tʼaqhisis jakañatxa apsunipxituʼ” sasa (Éxo. 13:14). Jïsa, kuntï Diosax markap layk lurkäna ukxa, awk taykanakax janiw armapxañapäkänti. Ukat waljaniw jupanakatxa, Moisesan iwxtʼapar istʼapxäna, kunattix walja maranak qhipatxa, akham sasaw salmonak qillqirix maytʼasïna: “Diosay, jinchunakaxampiw istʼapxta, awkinakaxaw yatiyapxitu: urunakapan lurawinakamata, nayra pachanakan luratanakamata” sasa (Sal. 44:1).

Yaqhip wayn tawaqunakaxa, aka qhipa patak maranakan kunanakas Jehová Diosan markapan pasäna ukanakxa, “nayra pachanaka[nwa]” paspachäna sasin inas amuyapxchi. ¿Kunjamsa ukham jan amuyapxañapatakix yanaptʼapxasma? Yaqhipa awk taykanakaxa, Los testigos de Jehová, proclamadores del Reino de Dios ukat Anuario sat libronakampiw yanaptʼapxi, jilat kullanakat parlki uka revistanakampi, ukat jichha tiemponkir Diosan markapat parlki uka machaq videonakampis yanaptʼapxaraki. Alemania nazi, jan ukax Unión Soviética markanakanx kunjamsa Diosan markaparux arknaqapxäna, uka tuqinakat uñachtʼayki uka videonakaxa, jan waltʼäwinkasas Jehová Diosar atinisipxañapatakiw familianakar yanaptʼi. ¿Janit familiana Diosar yupaychañatak sat wakichäwin ukanakamp yatxatapkasma? Ukhamatwa wawanakamax iyawsäwipan wali suma saytʼapxani, yantʼat uñjasipxani ukhasa janirakiw Diosat jithiqtapkaniti.

Ukhamarus ak amuyapxañamarakiwa, nayra sarnaqäwinakat yatxatañaxa, wawanakarux qariyaspawa. Ukatwa, jupanakax arstʼapxañaparaki. Kawkïr markanakat yatxatañsa munapxi uk ajlliyapxäta, ukat kunjamsa uka markan Diosat yatiyasiski uk familiamar  qhanañchañapatakiw mayïta. Tamaman inas walja maranak Diosar yupaychir mä jilatas jan ukax mä kullakas utjchi, juparux Familiana Diosar Yupaychañataki Arumatakix awisax jawstʼapxasmawa. Ukat experiencianakap arstʼañapatakiw wawanakamax jisktʼapxaspa. Maysa tuqitxa, kunjamas mä sucursalax lurasiski, kunjamas walja markanakat jachʼa tantachäwixa, kunjamsa fonógrafo satäkis ukamp yatiyasïna, jan ukax kunanaksa Diosar jukʼamp yupaychañatakix lurasiwayi ukanak dibujapxañapatakiw mayipxasma.

“Yäparu uchata[nakapat]” yatxatañäni

Tamax mä cuerpomp sasiwa sasaw apóstol Pablox säna. Ukatwa säna: “Cristo laykuw taqpach cuerpox suma yäparu uchata, jupanakpura mayaru tukutaraki. Kunapachatix taqpach cuerpox sum saraski ukaxa, taqpachaw munasiñanx jiltaraki” sasa (Efe. 4:16). Kunjam lurtʼatätansa uk yatxatasax ¿walxay Luririsatak musphartanxa? Ukhamaxa, Uraqpachankir tamanakat yatxatañänixa, ukhamarakiw “Diosan yatiñapxa taqi tuqita” yatxatasax muspharañäni (Efe. 3:10).

Alaxpachankir markapax kunjamasa ukxa Diosax sumwa yatiyistu. Ukanakat mayasti kuntï apóstol Juanar siskäna ukawa. Nayraqatxa Diosaw Wawapar yatiyäna. Ukxarusti, “Jesucristox aka uñachtʼäwxa mä angelap tuqwa Juan serviriparu yatiyi. Juan serviripasti kuntix uñjkatayna ukxa ukhampachwa arsu” (Apo. 1:1, 2). Kunjamtï alaxpachankir markap Jehová Diosax uñachtʼaykistuxa, ukhamarakiw aka Uraqinkir markapan “suma yäparu ucha[täpxi]” ukanak sum yatiñas muni.

Tamanak tumptʼir jilatas tamamar visitkaspa ukham amuytʼañäni. ¿Kuna luräwinaksa uka jilatax phuqi ukat kunjamsa jilat kullakanakar yanaptʼi ukanak familiamampi yatxatañax janit wakiskaspa? Awisasti, aka jisktʼanakatwa yatxatapxarakisma: ¿Qhawqha horanakas yatiytan ukanak yatiyañax kunatsa wakisi? ¿Diosan markapax kawkitsa qullqi jikxatapxi? ¿Uraqpachankir Jilïr Irpirinakax kunjamsa luräwinakap jaljasipxi? ¿Ukat kunjamsa Bibliat apstʼat qillqatanak apayanistu?

Diosan markapax kunjam uttʼayatasa uk yatiñaxa, ¿kunjamsa yanaptʼistani? Mä kimsa tuqitwa yanaptʼistani, mayaxa, Diosan markapan jiwas layku wal trabajasipki ukanakxa jukʼamp askitwa uñjañäni (1 Tes. 5:12, 13). Ukat kunanaktï mayipkistu ukanakampix jukʼamp sumwa phuqañäni (Hech. 16:4, 5). Ukxarusti, Diosan markap sarayirinakax kuna amtar puriñatakisa, ukat kunanakas taman lurasiñapa ukanak yatichañatakis Diosan Aruparjam amtapxatap yatisaxa, jukʼampwa jupanakarux atinisiñäni (Heb. 13:7).

“Utanaka[m] uñakipa[pxam]”

“Sión qull muytapxpan, torrenakap jaktʼapxpan, pirqanakap amuyapxpan, suma utanakap uñakipapxpan: jutir mita jaqinakar yatiyañataki” (Sal. 48:12, 13). Uka arunakampixa, salmonak qillqirix Jerusalén jakʼat uñjanipxañapatakiw markarux wiytaskäna. Sañäni Judío familianakax Jerusalén qullan markar sapa maran fiesta amtañatak sarasin uñjapxänwa, muspharkañ templo lurata. Chiqas uñjapkäna ukax muspharkañapunïnwa, ukatwa “jutïr mita jaqinakar” yatiyañ wal munapxäna.

Seba markankir reinat amuytʼañäni, Salomón reyin wali yatiñanïñapata ukat muspharkañ apnaqäwipat yatiyapkäna ukhaxa janiw chiqäkpachati sasaw säna. Chiqäpachaw sañatakix ¿kunsa luräna? Jupa pachpaw akham säna: “Ukampis nayax janiw iyawskayätti jupanakan arunakaparuxa, nayax jutasina, ukhamarak nayraxampi uñjasinwa amuyta. Chiqpachansa janiw jupanakax juman yatiñ kankañamatxa ni chikatarus yatiyapkitütuti, ukampis jumax jilanktawa nayax istʼkayäta ukat sipana” sasa (2 Cró. 9:6). Chiqas nayrasamp kuns uñjtan ukhax jukʼampwa musphartanxa.

Diosan markapar uñjapkaspas ukham amuyapxañapatakixa, ¿kunjamsa wawanakamar yanaptʼasma? Betel utax inas jakʼankakchi, uñtʼir sarañatak chʼamachasiñax wali askïspawa. Mandy ukat Bethany sat kullakanakat  amuytʼañäni. Sucursalat 1.500 kilometronak wali jayankapkchïnsa, familiapan taqiniw sucursal visitirix sarapxapunirïna. Jupanakax akham sapxiwa: “Betel janïr uñtʼkasaxa, chuyman jaqinakakis wali formal trabajipkaspa ukham amuyirïta, ukampis janiw ukhamäkataynati, sarapkayäta ukhaxa, walja wayn tawaqunakaruw wali kʼuchik Diosatak trabajir uñjaniwayapxta. Sapa kuti sarasinwa jukʼamp Diosar yupaychañatak chʼamachtʼasipxirïta” sasa. Diosan markap yäpar uttʼayat uñjasaxa, Mandy ukat Bethany sat kullakanakax precursoräxapxänwa, ukat qhiparux Betelan mä qhawqha tiempotak yanaptʼapxañapatakiw jawstʼapxäna.

Jichha tiemponxa, Jehová Diosan markapar uñtʼañatakix kunayman yanaptʼanakaw apsusiwayi, nayra Israelit tiemponxa janiw ukanakax utjkänti. Aka qhipa maranakanxa, Diosan markapat parliri videonakaw apsusiwayi, sañäni, Los testigos de Jehová: organizados para predicar las buenas nuevas, Toda nuestra asociación de hermanos ukat Unidos gracias a la enseñanza divina sat videonakaw utjistu. Kunjamsa betelitanakasa, jan waltʼäwinakan yanaptʼirinakasa, misioneronakasa, ukat jachʼa tantachäwinak wakichtʼirinakas chʼamachtʼasipxi uk uñjasaxa, jumasa familiamasa jukʼampwa Uraqpachankir jilat kullakanakar munasiñanakamax jilxattani.

Chiqas utas jakʼankir tamaw sapa maynirux yanaptʼistu ukat Diosan arunakapat yatiyir saraskakiñatakis yanapatʼarakistu. Ukampis familjamax Uraqpachankir taqi uka jilat kullanakanakat lupʼiñasarakiwa. Ukham lupʼiñaw ‘iyawsañanakasan’ suma saytʼataskakiñatakisa ukat wali kusisita sarnaqañatakis yanaptʼistani (1 Ped. 5:9).

 [18 janan recuadropa/fotopa]

Diosan tamapat yatxatañax wali askipuniwa

Jehová Diosan markapax kunjamasa ukat kuna pachatsa qalltawayi ukanak yatxatañatakix waliw yanaptʼanakax utjistu. Ukatakix inas akïr jisktʼanakampi qalltañax wakischispa:

☞¿Kunapachatsa tamanak tumptʼir jilatanakarux ajllisiwayi, ukat kunjamsa? Los testigos de Jehová, proclamadores del Reino de Dios, 222 janat 228 janakama.

☞¿“Día de los hijos” sat jachʼa tantachäwix 1941 maran apaskäna ukax kunatsa wali askïnxa? Los testigos de Jehová, proclamadores del Reino de Dios, 86 janat 88 janakama.

☞¿Uraqpachan Jilïr Irpirinakax kunjamsa amtanakar puripxi? “Testimonio cabal” del Reino de Dios, 108 janat 114 janakama.