¿Diosan qullan ajayupamp irpayasisktanti?
¿Diosan qullan ajayupamp irpayasisktanti?
“[Suma] ajayumax chiqa thakinjamay irpitpan.” (SAL. 143:10.)
1, 2. 1) Kunjamsa Jehová Diosax yupaychirinakapar qullan ajayupampix yanaptʼawayi ukanak qhanañchtʼma. 2) ¿Wakiski jan ukax jan waltʼäwinak utjki ukhakit qullan ajayux yanaptʼpachïstu? Uka tuqit qhanañchtʼma.
DIOSAN qullan ajayupan luräwinakapat istʼasax ¿kunanaksa amtasma? Inas Gedeón ukat Sansón chachanakan muspharkañ luratanakapat amtasta (Jue. 6:33, 34; 15:14, 15). Jan ukax jan axsartʼir nayrïr cristianonakata ukat Estebanax Sanedrinan wali pacienciampi arsuskäna ukanak amtasiraksta (Hech. 4:31; 6:15). Ukat jichhürunakat amuytʼasax inas kunja kusisitas walja markanakat jachʼa tantachäwinakan jilat kullakanakax tantachasipxi, ukat kunjamsa yaqhipanakax politicar jan mitisipxatap laykux carcelan jistʼantatpachas Diosar taqi chuyma yupaychasipki ukat kunjamsa Diosan arunakapax taqi chiqan yatiyasiski ukanak amtaraksta. Chiqas taqi ukanakaw Diosan qullan ajayupax yanaptʼaskatap amuytʼayistu.
2 Ukhamasti, ¿wakiski jan ukax jan waltʼäwinak utjki ukhakit qullan ajayux yanaptʼpachïstu? Janiwa. Biblianxa, cristianonakax qullan “ajayun munañaparjam sarnaqap[xi]”, ‘ajayumpiw irpayasipxi’ ukat “ajayu tu[qiw jakapxi]” sasaw qhanañchi (Gál. 5:16, 18, 25). Uka arunakax kunjamsa qullan ajayux sapür yanapistaspa ukwa amuytʼayistu. Ukatpï Jehová Diosarux qullan ajayumampiy suma amuyunïñsa, sum parlañsa ukat taqi kun sum lurañatakis yanaptʼita sasin sapüru mayisiñasaxa (Salmo 143:10 liytʼasiñapawa). Qullan ajayump yanaptʼayasiñänixa, suma luräwinakaw jakäwisan utjani, ukhamatwa Diosarux jachʼañchañäni ukat jaqi masisatakis askirakïni.
3. 1) ¿Kunatsa qullan ajayumpi irpayasiñax wakiskiripunixa? 2) ¿Kuna jisktʼanakatsa yatxataskañäni?
3 ¿Kunatsa qullan ajayumpi irpayasiñax wakisi? Kunatï qullan ajay conträki ukat jiwasar apnaqañ munkistu uka tuqiw sapür nuwastanxa. Kunjamtï Biblian siskixa, “janchin munañanaka[pampiw]” nuwastanxa. Uka arunakax jucharar chuymasax jan walinakar wiytkistu uk sañ muni, Adanaw ukarux aptʼawayistu (Gálatas 5:17 liytʼasiñapawa). Ukhamax ¿qullan ajayumpi irpayasiñax kamsañsa muni? ¿Jañchin munañanakapampi jan atipayasiñatakix kuns lursna? Uka jisktʼanakar qhanañchkasaxa, qullan ajayun achupatxa akïrinakatwa yatxatañäni: ‘Paciencianïña, suma jaqïña, suma chuymanïña, iyawsäwinïña, llampʼu chuymanïña, ukat munañasampi jan atipjayasiña’ (Gál. 5:22, 23, NM).
Taman sumankañatakix llampʼu chuymanïña paciencianïñaw yanaptʼistu
4. ¿Llampʼu chuymanïña ukat paciencianïñax kunjamsa taman sumankañatakix yanaptʼistu?
4 (Efesios 4:2, 3 liytʼasiñapawa.) Llampʼu chuymanïña ukat paciencianïñaw taman sumankaña utjañapatakix yanaptʼi. Ukanakaw chuym ustʼayapkistu ukhax munasiñamp uñjañatakisa, jan ratuk colerasiñatakisa ukat jan phuqsusiñatakis yanaptʼistu. Ukat mä jilatampis jan ukax mä kullakampis jan waltʼayastan ukhaxa, paciencianïñaw sum apasiskakiñatakisa ukat sumaptañatak chʼamachasiñatakis yanaptʼistu. Niyakixay juchararästanxa, llampʼu chuymanïña ukat paciencianïñaw wakiskirixa.
5. ¿Pablompir Bernabeampirux kunas pasäna ukat kunsa ukax uñachtʼayistu?
5 Pablompit Bernabeampit amtapxañäni. Jupanakax suma jaqïpxänwa ukat walja maranakaw Diosan arunakap yatiyasax irnaqapxäna. Ukampis mä kutix jupanakkamaw “wal chʼaxwapxäna, payar jaljtañkama” (Hech. 15:36-39). Ukhamax Diosar taqi chuyma yupaychir cristianonakkamas awisax janiw waltʼayasipkaspati. Jiwasatï ukhaman uñjasiñänixa, coleramp jan atipayasiñatakisa, tuqisiñar jan puriñatakisa, ¿kun lurañas wakisispa?
6, 7. 1) ¿Maynimpi jan waltʼayasisin tuqisiñar jan puriñatakix Biblian kawkïr iwxtʼapas yanaptʼistani? 2) ¿Sum istʼañasa, amuyump parlañasa ukat ratuk jan colerasiñas kunjamsa yanaptʼistani?
6 “Wal chʼaxwapxäna” siski uka arunakxa, yaqhip Biblianakanxa akatjamat wal tuqtasipxäna sasaw qhanañchapxi. Ukhamasti, mä cristianotix mayni jilapamp parlkasin colerasitap amuychixa, jankʼakiw kuntï Santiago 1:19, 20 qillqatan siski uka arunakarjam lurañapa, ukansti siwa: “Sapa maynis jumanakatxa jankʼakïñapaw istʼañataki, ukampis janiw jankʼaki kunsa parlañapäkiti ni colerasiñapäkarakisa. Colerat jaqisti janiw kunatix Diosatakix sumäki ukxa lurkiti” sasa. Kunjamächiniy uk amuytʼasaw yaqha tuqit parlaspa, jan ukax yaqha uruw uka tuqit parlañäni saspa ukat janïr kunäkipanwa sarxä sasin sumat sarxaspa (Pro. 12:16; 17:14; 29:11).
7 ¿Uka iwxtʼanakarjam lurasax kuna askinaksa jikxatsna? Jiwasatï pacienciañäni, Diosatsa maytʼasiñäni ukat kamsañänis uk sum amuytʼasiñäni ukhaxa, qullan ajayun irpayasitaswa uñachtʼayanäni (Pro. 15:1, 28). Ukaw llampʼu chuymanïñatakisa ukat paciencianïñatakis yanaptʼistani. Ukhamatwa Efesios 4:26, 29 qillqatarjam phuqañatakix wakichtʼatäñäni, ukansti siwa: “Colerasisinxa jan juch lurapxamti [...]. Jan wali arunakx jan parlapxamti, jan ukasti suma arunakamp parlapxam, ukhamata istʼirinakamax jiltañana yanaptʼatäñapataki” sasa. Jïsa, llampʼu chuymani ukat paciencianïñataki chʼamachasktan ukhaxa, taman sumankañ utjañapataki ukat mayachtʼatäñapatakiw yanaptʼtanxa.
Suma jaqïñasa suma chuymanïñas familiaruw yanaptʼi
8, 9. ¿Suma jaqïñas suma chuymanïñas kamsañsa muni ukat kunjamsa familiar yanaptʼaraki?
8 (Efesios 4:31, 32; 5:8, 9 liytʼasiñapawa.) ¡Wali juntʼüki ukhaxa thaytʼanitapasa, chʼuchʼu uma umxattʼañas wali sumawa! Suma jaqïñasa suma chuymanïñasa ukhamarakiwa. Familian sum jakasiñatakiw yanaptʼi. Ukhamax ¿suma jaqïñasa suma chuymanïñasa kamsañsa muni? Suma jaqïña siski uka arunakaxa, mayninakar taqi chuyma yanaptʼaña, ukat parlatampis munasiñ uñachtʼayaña sañ muni. Suma chuymanïñax niya ukhamarakiwa, mayninakar munasitas luratanakampi uñachtʼayaña sañ muni, mä arunxa, khuyaptʼayasiñampi mayninakar yanaptʼañawa (Hech. 9:36, 39; 16:14, 15). Ukampis janiw ukakïkiti.
9 Suma chuymanïñaxa, sum sarnaqañamp sasirakiwa. Luratasansa ukat kunjam jaqïtansa ukanwa qhan amuyasi. Sañäni, kunjamtï maynix familiapar churañatak muxsa, suma puqtʼata ukat manqhatsa patxatsa sumäki uka fruta khuchhunuqtʼasin churkixa, ukhamarakiw uka frutar uñtasit suma chuymanïñatakix qullan ajayux yanaptʼistu, ukat cristianonakarux taqi kunan suma chuymanïpxañapatakiw yanaptʼaraki.
10. ¿Qullan ajayun achuparjam sarnaqañatakix kunas familianakar yanaptʼaspa?
10 ¿Familian suma jaqïñatakisa ukat suma chuymanïñatakis kunas maynir yanaptʼaspa? Mä tuqitxa, Bibliat yatxatañaw wakisi (Col. 3:9, 10). Yaqhip awk taykanakaxa, Familiana Diosar Yupaychañataki Arumanwa qullan ajayun achupat yatxatapxi. Ukax janiw chʼamäkiti jumas ukhamarakiw lurasma. Yatxatañatakix walja yanaptʼanakaw utji, ukat arumat utjki uka qillqatanakatwa qullan ajayun achupat mayat maya yatxatapxasma. Tantachasisax mä qhawqha tʼaqanakakwa liytʼapxasma, ukat qullan ajayun achupat mä luräwipatwa walja semananak yatxatapxasma. Qillqatanakat liytʼapkäta ukhaxa, Biblian jiskʼa tʼaqanakaparjamaw arstʼapxarakïta. Ukxarux kunjamsa sapa maynix ukarjam phuqaspa ukwa lupʼipxäta, ukat Jehová Diosaruw yanaptʼa mayisipxarakïta (1 Tim. 4:15; 1 Juan 5:14, 15). ¿Ukax chiqapuniti familiamar yanaptʼani?
11, 12. ¿Suma jaqïña ukat suma chuymanïñ tuqit yatxatasax kuna askinaksa pä matrimoniox jikxatapxäna?
11 Mä chacha warmisti, qullan ajayun achupat suma chuymanïña tuqit yatxatañ amtapxäna. Ukat kuna askinakas utjäna uka tuqitxa, esposapax akham siwa: “Suma chuymanïñ tuqit yatxattʼañax purapat sum uñjasiñwa yanaptʼapxitu. Ukat iyawsirïña, perdonaña, kunan yanaptʼatas yuspärasirïña ukat kun jan wal lurasas perdón mayisiñwa yatiqawayapxta” sasa.
12 Yaqha chacha warmixa, jupanakkam jan waltʼayasipxatapwa amuyasipxäna ukatwa suma jaqïñ tuqit yatxatañ amtapxäna. Ukham yatxatasax kuna askinaksa jikxatawayapxi ukwa chachax akham qhanañchi: “Maynit jan wal amuyañat sipansa aski luräwinakapata, kunja suma jaqisa, taqi ukanak amtañwa yatiqawayapxta. Ukat sapa mayniw purapat kunan yanaptʼasiñatakis, sum uñjasiñatakis jukʼamp chʼamachasipxta. Nayasti, suma chuymanïtax uñachtʼayañatakixa, kunatï esposajan chuymapan utjki uk arsusiñapatak yanaptʼañajaw wakisïna, ukat amuyatapax nayatak jan waljamäki ukhax janiw jankʼak colerasiñajax wakiskänti. Jachʼa jachʼa tukuñsa armasiñajänwa. Ukat jukʼat jukʼatwa purapat sum apasxapxayäta ukat janirakiw ratuk colerasxapxayätti. Mä jathi qʼipsa apaqasipkirista ukhamänwa” sasa. ¿Jumatsa familiamatsa kamsasirakispasa? ¿Qullan ajayun achupat yatxatañax yanaptʼapxiristamti?
Jan khitis uñjkistu ukhas chiqa iyawsäwinïtas uñachtʼayañäni
13. ¿Kuna tuqitsa wal amuyasiñasa?
13 Cristianonakax sapüruw qullan ajayurjam sarnaqañasa, ukat jan khitis uñjkistu ukhas ukhamarakiw sarnaqañasa. Jichhürunakan kusistʼañanakax kunayman jan walinakampi phuqantatawa, ukaw Diosar yupaychäwisan aynachtʼayistaspa. Chiqas Supayax ukanakampiw katuntañ munistu, ukampis ¿kunjamatsa jarkʼaqassna? Biblian aka iwxtʼaparjam sarnaqañasawa: “Kunatix qʼañüki ukxa apanukupxam, ukhamarak jan walinakas wali phuqhantatäki uksa. Kuna arunakatix jumanakan chuymanakaman yapuchatäki ukxa llampʼu chuymampi katuqapxam, uka arunakasti chʼamaniwa almanakam qhispiyañatakixa” sasa (Sant. 1:21). Jehová Dios nayraqatan qʼumäñatakix iyawsäwinïñaw yanaptʼistani. Ukat kunjamsa iyawsäwix yanaptʼistu uk jichhax uñjañäni.
14. ¿Jan iyawsäwinïñax kunjamsa juchar puriyi?
14 Iyawsawinïsax Jehová Diosan utjatapat janiw pächasktanti. Jiwasatï Diosax janis utjkaspa ukham pächasiñänixa, jan kunakiw juchar purtʼassna. Kunanakas Ezequiel profetan tiemponakan pasäna ukanakat amuytʼañäni. Markapankir jaqinakax kuna axtaskañanaksa jamasat lurasipkäna ukanakwa Jehová Diosax Ezequiel profetar akham yatiyäna: “¿Uñjtati kuntix jamasan Israelankiri jilïri jaqinakax lurapki ukxa? ¿Sapa maynis idolonakapan tʼuxunakapanxa? Jupanakasti amuyapxarakiwa nayax janis ukanaka uñjkirista ukhama, ukhamaraki aka markarux apanukkiristsa ukhamwa amuyapxaraki” sasa (Eze. 8:12). ¿Kunatsa uka jan walinak lurapxäna uk amuytanti? Kuntï lurapki ukanak Jehová Diosax janis uñjkaspa ukham amuyapxäna, mä arunxa, Diosax janis chiqpachapun utjkaspa ukhamwa amuyapxäna.
15. ¿Chʼullqhi iyawsäwinïñax kunjamsa yanaptʼistu?
15 ¡José wayanax janiw ukhamäkänti! Familiapat wali jayankchïnsa, Potifar sat uywiripan esposapampi wachuqa jucha lurañatxa jithiqtänwa. Kunatsa sum sarnaqäna ukxa jupa pachpaw akham qhanañchi: ‘¿Kunjamaraki nayasti [...] Dios contra juch luririststi?’ sasa (Gén. 39:7-9). José waynax Diosar uñjkaspas ukhamwa sarnaqirïna. Jiwasatï Jehová Diosar ukham uñjarakiñäni ukhaxa, janirakiw kunatï Dios nayraqatan jan walïki ukanakxa lurkañäniti, sañäni jan khitin uñjkatas janipuniw kuna qʼañu luräwinaksa uñchʼukkañäniti. Ukat salmonak qillqirjamaw akham sañäni: “Utaxansa, sarnaqäwixax jan kamskayäniwa, ñanqha amtäwinakarux janiw nayranakaxamp uñtkäti” sasa (Sal. 101:2, 3).
Munañasampi jan atipjayasiñax chuymas jarkʼaqasiñatakiw yanaptʼistu
16, 17. 1) Proverbios qillqatarjamax ¿kunatsa “jan amuytʼasir” waynax juchar purtʼasïna? 2) Kunjamtï 26 janan uñjaskixa, ¿qhawqha maranïskañänis kunarus purtʼassna?
16 Munañasampi jan atipjayasiñaxa, qullan ajayun achupat qhip qhipïriwa. Ukaw chuymas imañataki ukat Diosax uñiski uka jan walinakat jithiqtañatakis yanaptʼistu (Pro. 4:23). Jichhax Proverbios 7:6-23 qillqatat amuytʼañäni. Ukansti, kunjamsa “jan amuytʼasiri” mä waynax qʼañu warmin amparapar jaltʼi ukwa qhanañchi, jupasti “calle thiyaru purisin[wa]” uka warmimp juchar purtʼasi. ¿Kunatsa uka callenjam sarañ amtpachäna? Inas uñjañ laykuk sarchïna. Ukampis jan amuytʼasisaw “jiwañapa jan yatisisina” wachuqa juchar purtʼasïna.
17 ¿Kunjamatsa uka juchat jithiqtasapäna? “Jan jupan qhipap saras chhaqamti” siski uka iwxtʼaruw istʼañapäna (Pro. 7:25). ¿Kunsa jiwasax ukat yatiqassna? Qullan ajayump irpayasiñ munstanxa, janipuniw jan walir puriñjamäki uka chiqanakar jakʼachasiñasäkiti. Khitis “jan amuytʼasiri” waynar uñtatax jan walir purtʼasiksnawa. ¿Kunjamatsa jan walinakar maynix purtʼasispa? Televisionan may maya thaqhasa, ukat Internetan mä chiqat yaqha chiqar mantasaw mä akatjamat jan walinakax uñstanispa, ukat pornografía uñchʼukiñaruw yatintaspa. Uk uñchʼukisax concienciapaw qʼañuchasispa ukat Jehová Diosampis janiw sum apasxaspati, ukat jiwañar kunaw purtʼasispa (Romanos 8:5-8 liytʼasiñapawa).
18. 1) ¿Chuymas jarkʼaqasiñatakix kunanaksa sapa maynix amtañasa? 2) ¿Ukat kunjamsa munañasampi jan atipjayasiñax yanaptʼistaspa?
18 Televisionansa, Internetansa qʼañu luräwinak uñstanispa ukhax janiw uñchʼukiñasäkiti. Jankʼakiw jithiqtañasa, ukhamatwa munañanakasar atipatas uñachtʼayañäni. Chiqas qalltatpachwa uka jan walinakat jithiqtañasa (Pro. 22:3). Ukat kunanaktï jan waltʼäwinakar jan puriñatakix amtawayktan ukarjam phuqañäni ukhaxa, munañasar atipatasax qhanäniwa. Yaqhipanakax taqin uñjkañäki uka chiqaruw computador uchañ amtapxi. Yaqhipanakasti, maynimpïsakiw Internetar mantapxi, televisionsa uñchʼukipxi. Ukat yaqhipax janiw Internetar mantxapxiti (Mateo 5:27-30 liytʼasiñapawa). Chiqas sapa mayniw kunjamatsa jupa pachpasa ukat familiaparusa jan walinakat jarkʼaqaspa ukanak amtxañapa, ukhamatwa ‘qʼuma chuymampi’ “suma chuymampi, [jan ukax suma concienciampi]” ukat “chiqpach iyawsäwimpi” Jehová Diosar yupaychapxani (1 Tim. 1:5).
19. ¿Qullan ajayumpi irpayasisax kuna askinaksa katuqtanxa?
19 Chiqas qullan ajayun achupatxa taqpachaw wali wakiskiripunixa. Llampʼu chuymanïñasa, paciencianïñas taman sumankaña utjañapatakiw yanaptʼi. Suma jaqïñasa, suma chuymanïñasa familiana kusisita jakasiñatakiw yanaptʼi. Ukat iyawsäwinïñasa munañasampi jan atipjayasiñasa, Jehová Diosan jakʼapankaskakiñataki ukat Jupatakjam qʼum sarnaqañatakiw yanaptʼistu. Ukat Gálatas 6:8 qillqatax akham sarakistuwa: “Ajayun munañapar yapuchchi [ukaruxa], ajayux wiñay jakañ achwa churarakini” sasa. Jïsa, Jehová Diosax Jesucriston luqtasitapxaruw wiñay jakañ churani. Ukampis qullan ajayupampi irpayasipki ukanakakiw wiñay jakañ katuqapxani.
Amtañäni
• ¿Llampʼu chuymanïñasa, paciencianïñas kunjamsa taman sumankaña utjañapatakix yanaptʼi?
• ¿Mä cristianorux kunas familiapan suma jaqïñatakisa ukat suma chuymanïñatakis yanaptʼani?
• ¿Iyawsäwinïñasa ukat munañasampi jan atipjayasiñasa kunjamsa chuymas jarkʼaqañatakix yanaptʼistu?
[Jiskt’anaka]
[24 janan fotopa]
¿Maynimpi tuqisiñar jan puriñatakix kuns lursna?
[25 janan fotopa]
Qullan ajayun achupat sum yatxatañax familiamaruw yanaptʼaspa
[26 janan fotopa]
Iyawsäwinïñasa ukat munañasampi jan atipjayasiñasa, ¿kuna jan walinakat jithiqtañsa yanaptʼistu?