Cristian familianaka, amuyasipxapunim
Cristian familianaka, amuyasipxapunim
‘Jan ikjañäniti [...] pʼarxtatäñasaw taqi amuyumpi.’ (1 TES. 5:6.)
1, 2. ¿Diosar yupaychañan jan ikjañatakisa, amuyasiñatakis kunas cristian familianakar yanaptʼaspa?
APÓSTOL Pabloxa, Jehová Diosan ‘axsarkaña’ ‘jachʼa urupata’ parlkasaxa, Tesalónica markankir cristianonakarux akham sasaw qillqäna: “Jilatanaka, janiw chʼamakanakankapktati [Jehová] Tatitun jutäwip urupax akatjamat jumanakar katuntañapataki, kunjämatix mä lunthatax akatjamat jutki ukhama. Taqi jumanakax qhanankirïpxtawa, urunkirïpxaraktawa. Janiw arumankirïktanti ni chʼamakankirïktansa. Ukatpï jan ikjañasäkitix mayninakjamaxa, jan ukasti pʼarxtatäñasawa taqi amuyumpi” sasa (Joel 2:31; 1 Tes. 5:4-6).
2 Pablox Tesalónica markankir cristianonakarus qillqkchïnxa, aka “tukuya” tiemponkir cristianonakatakix wali askirakiwa (Dan. 12:4). Chiqans Pablon iwxanakapar istʼañasawa ukat wal amuyasiñasawa. Kunattix akapachax tukusiñampiwa, ukat Supayax chiqa cristianonakar Diosat jithiqtayañatakiw wal chʼamachasiskaraki. Ukhamasti, ¿kunsa cristian familianakax Jehová Diosat jan jithiqtañatakix lurapxaspa? Sapa mayniw Diosan mayitanakap phuqañapa. Ukhamax kunjamsa chachasa, warmisa, wawanakas Diosar yupaychäwin jan ikjañatakix familiapar yanaptʼaspa ukwa yatxataskañäni.
Chachanaka, ‘suma awatirit’ yatiqasipxam
3. ¿Kunanakampis chachanakax 1 Timoteo 5:8 qillqatarjamax phuqapxañapa?
3 “Chachasti warmin pʼiqiparakiwa” sasaw Bibliax qhanañchi (1 Cor. 11:3). ¿Familiapan pʼiqtʼirjamax kunanakampis chachanakax phuqapxañapa? Bibliansti siwa: “Maynitix jupankirinakatxa jan llakiskchixa, ukhamarak pachpa familiapar yanaptʼañatsa jan llakiskchi ukïrixa, iyawsäwxa jan uñtʼiriwa tuku, mä jan iyawsirits jukʼampiwa” sasa (1 Tim. 5:8) Ukhamasti, chachax familiapatak trabajañapawa. Ukampis janiw qullqi tuqitak llakisiñapäkiti. Jan ukasti, familiapan Diosar yupaychañ tuqit amuyasipxañapatakixa, sapa mayniruw Jehová Diosamp jukʼamp sum apasipxañapataki ukat chʼullqhi iyawsäwinïñapatakix yanaptʼañapa (Pro. 24:3, 4). ¿Kunjamsa chachanakax ukamp phuqapxaspa?
4. ¿Familiapar Diosar yupaychañ tuqit chʼamañchtʼañatakix kunsa chachanakax lurapxañapa?
4 “Chachax warmin pʼiqipawa, kunjämatix Cristox [taman] pʼiqipäki ukhama”, ukatwa chachanakax kunjamsa Cristox tamar pʼiqtʼaski uk yatxatapxañapa, ukat jupat yatiqasisaw familiapar pʼiqtʼapxañaparaki (Efe. 5:23). Jesusax kunjamsa arkirinakapamp apasïna uk uñachtʼayañatakixa, jupax uwij awatirïkaspas ukham amuytʼayäna (Juan 10:14, 15 liytʼasiñapawa). Chiqas Jesusaw “Suma Awatirixa”. Ukatwa chachanakax jupat yatiqasipxañapa. Ukhamasti, familiapar Diosar yupaychañ tuqit chʼamañchtʼañatakixa, ¿kunsa chachanakax lurapxañapa? ‘Suma Awatirin’ luräwinakapa, arsutanakapa yatxatapxañapawa ukat “kayup arkapxaña[parakiwa]” (1 Ped. 2:21).
5. ¿Suma Awatirix kunjamsa uwijanakapar uñtʼatap uñachtʼayi?
5 Jesusax awatirimpit uwijanakampit parlkäna ukanxa, jupanakkamax sum uñtʼasipxi ukat atinisipxarakiwa. Mä arunxa, awatirix sumwa uwijanakapar uñtʼi, uwijanakapasti ukhamarakiw uñtʼapxi ukat atinisipxi, arup uñtʼasax istʼapxarakiwa. Ukatwa Jesusax “ovejanakaxsti uñtʼasiraktwa, ovejanakaxasti nayarux uñtʼasirakituwa” sänxa. Chiqas Jesucristox janiw tamanakar aliq ukhamak uñtʼkiti. Griego arunxa, “uñtʼasiraktwa” siski ukax “kunjamas sapa maynix uk sum uñtʼaña” sañ muni. Jïsa, Suma Awatirix sapa mayniruw sum uñtʼi. Kunsa sapa maynix muni ukat kuna pachas chʼamanïpxi jan ukax aynachtʼapxi ukanaksa sum yatiraki. Uwijanakapasti, sum uñtʼapxaraki, ukat taqi chuymaw jupamp irpayasipxi.
6. ¿Kunjamsa chachanakax Suma Awatirit yatiqasipxaspa?
6 ¿Kunjamsa casarat mä cristianox Jesusat yatiqasispa? Jupa pachpas awatirïkaspa ukham amuyasiñapawa ukat kunjamtï uwijanakar uñjañäki ukhamwa familiapar uñjañaparaki. Ukat sapa maynir sum uñtʼañatak chʼamachasiñapawa. Ukatakisti, sapa maynimpiw parltʼañapa, ukat kunanakas llakisiyi ukanaksa sum istʼañaparakiwa. Ukhamarakiw yatiqaskay sarnaqañatakix chʼamachasiñapa, ukat familpachax kunanaksa lurapxani ukanaksa sum ajlliñaparakiwa, sañäni: familiana Diosar yupaychaña, tantachäwinakar saraña, yatiyir saraña ukhamarak kusistʼañanaksa. Awkitix Biblian yatichäwinakaparjama ukat sapa maynir sum uñtʼasin kuns lurapxani uk amtanixa, jupar confiapxaniwa ukat Jehová Diosarus mayachtʼataw yupaychapxarakini. Chiqas ukaw mä awkitakix wali kusiskañaxa.
7, 8. Uwijanakapar munasiñampi uñjir Suma Awatiritxa, ¿kunsa chachanakax yatiqasipxaspa?
7 Mä suma awatirix janiw aliqak uwijanakapar uñtʼkiti, jan ukasti munasiñampiw uñjaraki. Jesusan sarnaqäwipata ukat kunjamsa Diosat yatiyäna ukanak yatxatasaxa, kunjsa arkirinakapar munasïna ukaw qhan amuyasi. Chiqas ‘ovejanakap laykuw’ Jesusax jiwawayi. Kawkïr chachatix Diosamp sum uñjatäñ munki ukaxa, Jesusat yatiqasisaw familiaparux munasiñampi uñjañapa. Ukat warmiparux munañaparu ukat qhuru chuymampi apnaqañat sipansa, “kunjämtix Cristox [tamar] munasi” ukhamwa munasiñapa (Efe. 5:25). Ukat suma chuymampiw parlxayañapa, warmix respetompi uñjatäñapawa (1 Ped. 3:7).
8 Bibliankir iwxanak wawanakar yatichkasaxa, awkinakax qhanwa arsupxañapa, ukat munasiñampi yatichañaparakiwa. Chiqas wawanakarux munasiñampiw yatichasiñapa. Yaqhip wawanakax janiw ratuk kunjamäpxañapas uk amuytʼasipkiti. Ukatwa awkinakax paciencianïpxañapa. Jesusat yatiqasiñatak sapüru chʼamachasipxanixa, familianx sumankañaw utjani, janirakiw axsarañax utjkaniti, ukat kunjamtï salmistax siskänxa, Diosaw familiapar yanaptʼarakini (Salmo 23:1-6 liytʼasiñapawa).
9. ¿Cristiano chachanakax kunsa Noé chachjamax lurapxañapa, ukat kunas ukamp phuqañatakix yanaptʼani?
9 Noé chachat amtañäni. Jehová Diosax jan wali jaqinakar tukjañ amtkäna uka tiemponwa jakäna. Ukampis “uma juicio puriyanïna” ukhaxa, “Noé saparukirakiw qhispiyänxa chiqa arunak parlatapata, jupamp chikasti paqallqunikiw qhispiyasïnxa” (2 Ped. 2:5). Familia pʼiqtʼirjamaxa, Noé chachax jan tukjatäpxañapatakiw sapa maynir yanaptʼañapäna. Aka qhipa urunakan ukhamarakiw chachanakax familiapar yanaptʼapxañapa (Mat. 24:37). ¿Ukamp phuqañatakix kuns lurapxaspa? Suma Awatirit yatxatapxañapa ukat jupat yatiqasiñatak chʼamachasipxañapawa.
Warminaka, familiamar sum uñjapxam
10. ¿“Chachanakamarux istʼapxam” siski uka iwxtʼax kamsañsa muni?
10 “Warminaka, chachanakamarux istʼapxam Tatiturjama” sasaw Pablox qillqatayna (Efe. 5:22). Uka arunakax janiw warminakar jiskʼachkiti. Eva sat nayrïr warmir janïr lurkasaxa, Jehová Diosax akham sänwa: “Janiw walïkiti jaqin sapakïñapaxa. Nayax jupatakix mayni jupampi chika jakiri, ukhamaraki yanaptʼiri lurarapï” sasa (Gén. 2:18). Ukhamax chachapampi jakañasa ukat kuntï Diosax chachanakar mayki ukanakampi phuqañapataki yanaptʼañas suma luräwiwa.
11. ¿Kunjamsa yatiñan warmix familiap ‘sum uñjasi’?
11 Yatiqaskay sarnaqir warmix familiapan sum jakasiñapatakiw yanaptʼi (Proverbios 14:1 liytʼasiñapawa). Jan amuytʼasir warmit Salomón reyix parlkäna ukat sipansa, yatiñan mä warmix Diosan Aruparjamaw chachapar istʼi, ukat taqi chuymaw respetaraki. Akapachankirinakjam munañapar sarnaqañat sipansa, chachapar istʼasapuniw sarnaqi (Efe. 2:2). Jan amuytʼasir warmix jankʼakiw chachaparux jiskʼachi. Ukampis yatiñan warmix wawanakapasa ukat yaqha jaqinakas respetomp uñjapxañapatakiw chʼamachasi. Janirakiw jiskʼachasasa, tuqisisasa chachapar aynachtʼaykiti, jan ukasti amuytʼasiwa. ¿Familian qullqipat kamsaraksnasa? Jan amuytʼasir warmix chʼaman jikxatat qullq ina chʼusarukiw tukji. Ukampis yatiñan warmixa, chachapar yanaptʼañatakix suma amuyumpiw qullq apnaqi, janirakiw sinti trabajañapatakis waytʼkiti.
12. Yupaychañ tuqit jan ikjañatakix ¿kunjamsa warmix familiapar yanaptʼaspa?
12 Yatiqaskay sarnaqir warmix wawanakar Diosan arunakap yatichañatakix chachapar yanaptʼiwa, ukhamatwa Diosar yupaychañ tuqit jan ikjañatakix familiapar yanaptʼi (Pro. 1:8). Ukat Familiana Diosar Yupaychañataki Aruma sat wakichäwinsa yanaptʼapuniwa. Kunapachatï chachax wawanakar iwxtʼki, jan ukax chiqañchki ukhaxa, janiw arxataskiti. Ukampis jan amuytʼasir warmix chachapar janiw yanaptʼkiti, wawanakaparus janchi tuqita ukat Diosar yupaychañ tuqitsa tʼaqhisiyiwa.
13. ¿Kunat warmix chachapar taman lurañanakapampi phuqañapatak yanaptʼañapax wakisi?
13 Ukat chachapar taman lurañanakapampi sum phuqir uñjasax ¿kunjamsa amuytʼasir warmix jikxatasi? Chachapax jilat kullakanakar yanaptʼañ laykux irpir chuymaninakan yanapiripata, irpir chuymanita, jan ukax Comité de Enlace con los Hospitales ukat Comité Regional de Construcción satäkis ukanakana, ukat taman yaqha lurañanakan taqi chuyma yanaptʼatap uñjasax wal kusisi. Chiqas arupampi luratanakapampi yanaptʼañatakix wal chʼamachasiñapawa. Ukham chʼamachasitapax janiw inamayäkaniti. Chachatix taman kunayman lurañanakapampi phuqasin Diosar yupaychanixa, familiapax janiw Diosar yupaychañan ikjkaniti.
14. 1) ¿Mä warmitakix kunas chʼamakïspa ukat kunjamsa ukar atipjaspa? 2) ¿Kunjamsa warmix familiana sum jakasiñ utjañapatakix yanaptʼaspa?
14 Ukampisa chachapax yaqha amtanïki ukhaxa, istʼañax warmitak chʼamakïspawa. Ukhampachasa, “llampʼu chuymampi” ukat ‘suma chuymampirakiw’ chachapax kuntï amtki uk sum phuqasiñapatakix yanaptʼi (1 Ped. 3:4, MT). Diosar taqi chuym yupaychir Sara, Rut, Abigail ukat María sat Jesusan mamapatsa yatiqasiñatakiw chʼamachasi (1 Ped. 3:5, 6). Ukhamarakiw jichha tiempon utjki uka ‘suma sarnaqiri’ jilïr kullakanakat yatiqasipxi (Tito 2:3, 4). Chachapar munasiñampi ukat respetomp uñjasax chacha warmi sum apasiñataki, familiapan sumankañ utjañapataki ukat jan axsaras jakasiñatakiw yanaptʼaraki. Chiqas uka kasta warmix Diosar yupaychiri chachatakix mä bendicionawa (Pro. 12:4).
Wawanaka, jan uñjaski uk thaqhapxam
15. ¿Familian Diosar yupaychañ tuqit jan ikjañatakix kunjamsa wayn tawaqunakax yanaptʼapxaspa?
15 Wayn tawaqu, ¿familiaman Diosar yupaychañ tuqit jan ikjañapatakix kunjamsa awk taykamar yanaptʼasma? Ukham luratamat kunsa Jehová Diosax churañ muntam uk lupʼiñamawa. Inas awk taykamax paraisox kunjamänis uk dibujonakamp wawatpach uñachtʼayapxchiyätam. Ukat jiltaskayäta ukhax Bibliampi ukat qillqatanakampiw kunjamänis paraison wiñay jakasiñax ukanak amuytʼayapxpachätam. Jumatakitï Diosar taqi chuyma luqtañax jakäwiman nayrankanixa, janiw ikjkätati.
16, 17. ¿Atipjañkam tʼijuñatakix kunsa wayn tawaqunakax lurapxaspa?
16 Apóstol Pablox kuntï 1 Corintios 9:24 (liytʼasiñapawa) qillqatan iwxtʼkatayna ukar istʼañamawa. Jakañ katuqañatakix atipjañkam tʼijuskakiñamawa. Kawkïr thakhitix wiñay jakañar irpkätam uknäm sarañamawa. Walja wayn tawaqunakaw yänak jikxatañ laykux uka thakit saranukupxi. Ukampis yänakax tukusirikiwa ukat inamayakiwa. Qullqi jikxatañ laykuki jakañax janiw kuna kusisiñsa apankiti. Ukatpï “kuntix jan uñjktan” ukar ‘chuym churañasaxa’, ukanakasti “wiñayatakiwa” (2 Cor. 4:18).
17 Diosan reinopax kuna bendicionanaktï apankani ukanakax “jan uñjktan” ukanak taypinkiwa. Jutïrinx kunanakamps phuqasma ukanak amtañamawa. Jumatï kusisitäñ munstaxa, Jehová Diosar yupaychañatakiw jakañama. Mä waynatakix walja lurañanakaw utji, mä qhawqhanakxa jichpachaw phuqasma ukat mayninakx tiempompiw phuqarakisma. * Jumatix phuqañjam luräwinak amtätaxa, Diosar yupaychäwinx janiw ikjkätati, ukat kuna premios utji uksa janirakiw armkätati (1 Juan 2:17).
18, 19. ¿Kunjamsa wayn tawaqunakax Diosamp sum apasiskiti janicha uk amuytʼasipxaspa?
18 Jakañ churiri thaknäm sarañ qalltañatakixa, Jehová Diosamp sum apasiñaw wakisi. ¿Jumax ukhamti luraskta? Akham jisktʼasiñamawa: “¿Taman utjki uka lurañanakampix taqi chuymat yanaptʼasktxa, jan ukax awk taykajan jariyatakich lurtxa? ¿Tantachäwinakarus yatiyiris sarapuntti? ¿Diosat mayisiñatakisa, Arupat yatxatañatakis tiempo apsusiskti? ¿Diosar kusisiyañatakix suma jaqïñatakit chʼamachasisktxa? ¿Diosar yupaychañan kunanaksa sapa semanan luräxa ukanak qillqtʼastti, ukat ukarjam phuqañatakit chʼamachastxa? ¿Jehová Diosampix sumti apasisktxa?” sasa (Sant. 4:8).
19 Moisesat amuytʼañäni, juparux yaqha costumbrenaksa yatichapkchïnxa, jupax Faraonan phuchapan wawapat uñtʼayasiñat sipansa Diosan yupaychiripat uñtʼayasïna (Hebreos 11:24-27 liytʼasiñapawa). Cristian wayn tawaqunaka, jumanakax Jehová Diosar taqi chuyma yupaychañ munapxstaxa, ukham amtapxañamarakiwa. Ukhamatwa kusisitax sum jakasipxäta ukat “wiñay jakaña katuqa[ñsa]” suyapxarakïta (1 Tim. 6:19).
20. ¿Wiñay jakañ katuqañataki tʼijurinakatxa khitinakas premio katuqapxani?
20 Apóstol Pablox tʼijurinak tuqit parlkäna ukanxa, atipjirix mayakïnwa, ukampis jakañ katuqañataki tʼijuñanxa janiw ukhamäkiti. Diosax “taqinin qhispiyatäñapwa muni” ukat “kunatix chiqäki uk uñtʼapxañaparaki” (1 Tim. 2:3, 4). Jumat nayrax waljaniw uka tʼijuñan atipjawayapxi, jichhas juma chika tʼijurinakax waljanirakiwa (Heb. 12:1, 2). Ukampis puriñkam tʼijupkani ukanakaw premio katuqapxani. Jumax uka premio katuqarakismawa.
21. ¿Kuna tuqitsa jutïr yatichäwin yatxataskañäni?
21 Jehová Diosan ‘wali axsarkaya’ ‘jachʼa urupax’ purinipuniniwa (Mal. 4:5). Cristian familianakax janiw Diosan urupampix akatjamat katjayasipxañapäkiti. Jan ukasti, kuna lurañtï Diosax sapa maynir churawayki ukamp phuqasipkañapaw wakisi. Ukhamasti, ¿Jehová Diosamp jukʼamp sum apasiñatakisa, ukat yupaychäwisan amuyasiñatakis kunanakampsa lursna? Familpacha Diosar sum yupachañatakix kunanakamp lurañas wakisi ukanakwa jutïr yatichäwin kimsa tuqit yatxataskañäni.
[Qhanañchäwi]
¿Amtasktati?
• ¿Kunatsa familianakax Diosar yupaychäwin wali amuyump sarnaqapxañapa?
• ¿Kunjamsa chachanakax Suma Awatirit yatiqasipxaspa?
• ¿Yatiqaskay sarnaqir warmix kunjamsa chachapar yanaptʼi?
• ¿Familian Diosar yupaychañ tuqit jan ikjañatakix kunjamsa wawanakax yanaptʼapxaspa?
[Jiskt’anaka]
[9 janan fotopa]
Diosar yupaychir chachatakixa, yanaptʼasir suma warmix mä bendicionawa