Cristian familianaka, wakichtʼatäpxapunim

“Ukhamarakiy jumanakax wakichatäpxamxa; Jaqin Yuqapasti kuna horasatï jan amuyasipkäta, ukkhaw jutani.” (LUC. 12:40.)

1, 2. ¿‘Amuyasipxam’ siski uka iwxtʼarux kunatsa taqi chuyma istʼañasa?

 “KUNAPACHATIX Jaqin Yuqapax reyjama jutkani” ukat jaqinakarus ‘jaljarakini’ ukhaxa, ¿familiasax kunjamansa jikxatasini? (Mat. 25:31, 32.) Niyakixay Jesusax mä akatjamat jutchinixa, ‘amuyasipxam’ siski uka iwxtʼarux taqi chuyma istʼañasawa (Luc. 12:40).

² Nayrïr yatichäwinxa, familian Diosar yupaychañ tuqit jan ikjañatakix sapa mayniw kuntix lurañapäki ukanakamp phuqapxañapa sasaw yatxataskayätanxa. Jichhasti, familian Diosar yupaychañ tuqit suma saytʼatäñatakix kunanakampsa sapa maynix luraspa ukwa yatxatarakiñäni.

‘Nayrasax wali sumäñapawa’

3, 4. 1) ¿Cristian familianakax kuna tuqitsa amuyasipxañapa? 2) ¿Suma nayranïñax kamsañsa muni?

³ Jesucriston puriniñapatakix familiasan wakichtʼatäñap munstanxa, kunanakatï Diosar yupaychañat saranukuykistaspa ukanakat  amuyasiñasawa. Walja familianakaw qullqi chuymanïñar purtʼasipxi.Ukatwa suma nayranïpxam sasin Jesusax iwxtʼkäna ukar istʼañax wali wakiskirixa (Mateo 6:22, 23 liytʼasiñapawa). Kunjamtï mä farolax aruman thak sarkasin jan tinkuñatak sum qhantʼkistuxa, ukhamarakiw ‘chuymasan nayranakapax’ juchanakar jan puriñatakix yanaptʼistu (Efe. 1:18, NM).

⁴ Kunjamtï nayrasax qhan uñjañatakix kʼumarañapäki ukat yäpar taqi kuns uñjañapäkixa. Ukhamäñaparakiw ‘chuymasan nayranakapaxa’. Suma nayranïktan ukhaxa, mä tuqirukiw uñttanxa, mä arunxa qullqi jikxatañata, ukat familiatak irnaqañatakik llakisiñat sipansa Diosar yupaychañaw nayranki (Mat. 6:33). Ukat kunanaktï Diosax jakañatak churkistu ukanakamp kusisitakïtanwa, ukat Diosar yupaychañaw jiwasatakix nayrankaraki (Heb. 13:5).

5. ¿Etiopía markankir mä tawaqux kunjamsa Diosar yupaychañ nayrar uchatap uñachtʼayäna?

⁵ Wawanakar suma nayranïña yatichañänixa walja askinakwa jikxatañäni. Etiopía markankir mä tawaqut parltʼañäni. Colegio tukuyxäna ukhaxa, jukʼampi yatiqañapatakiw mä beca churañ munapxäna. Ukampis jupax janiw munkänti, kunattix precursorjam luqtañaw jupatakix nayrankäna. Qhipatxa, mä trabajonwa katuqañ munapxäna, sapa phaxsix 3.000 euronaka (4.200 dolaranaka) pagapxaspäna, markapan pagaskäna ukat sipans wali jilänwa. Ukampis wasitampiw precursoräskakiñ munasax janiw säna. Uka tawaqux chuymapatwa kuns lurani uk amtäna. Ukat ¿awk taykapax kamsapxänsa? Phuchapan ukham luratapatxa wal kusisipxäna.

6, 7. ¿Kunatsa wal ‘amuyasiñasäspa’?

⁶ Mateo 6:22, 23 qillqatanxa Jesusax wali qhanwa maynitakiki taqi kuns munañxat iwxtʼäna. ‘Jan wali’ siski uka aruxa, “jan chuymani, jan ukax envidiasiri”, mä arunxa, maynitakik taqi kuns munaña sañ muni. ¿Jehová Diosax kamspachas uka tuqitxa? Bibliax akham siwa: “Janiw utjañapäkxiti wachuqa jucha lurañanakax, kuna casta jan wali luräwinakasa ni [‘maynitakik taqi kun munañasa’, NM]” sasa (Efe. 5:3).

⁷ Jaqi masisax jupatakik taqi kun munirïtapxa ratukiw amuysna, ukampis jiwas pachpat amuyasiñax chʼamakiwa. Ukatpï Jesusan iwxtʼapar istʼañasaxa, jupasti sänwa: “Amuyasipxam jumanakatakik taqi kuns munañxata” sasa (Luc. 12:15). Uka iwxtʼarjam phuqañatakixa, kunas chuymasan nayranki uka tuqit sum amuytʼasiñasawa. Kusistʼañatakis yänak jikxatañatakis qhawqha tiempsa, qullqsa aptʼasiski ukwa sapa familiax amuytʼasiñapa.

8. ¿Yänak alañatakix kunas ‘amuytʼasiñ’ yanaptʼistani?

⁸ Kunanak alañatakis janiw qullqi tuqitak amuytʼasiñasäkiti. Jan ukasti, akham jisktʼasiñasarakiwa: “¿Kuntï alkä uk apnaqañatakisa ukat sum uñjañatakis tiempojax utjaniti? ¿Qhawqha tiempotsa ukanak apnaqañ yatiqiristxa?” sasa. Maysa tuqitxa, aljirinakax ak alasim uk alasim sapki uka arunakampix walja wayn tawaqunakaw apayasipxi, ukatwa jila alani isinaksa jan ukax yänak alayasiñatakix awk taykapar waytʼapxi. Cristiano wayn tawaqu jan jumax ukhamar purtʼasimti. Chiqas familian sapa mayniw ukanakat amuytʼasiñapa. Ukat akham jisktʼasipxañapawa: ¿Nayatï taqi kun munkta ukanak alasiskä ukhaxa, Jesucriston jutañapatakix familiajax wakichtʼatäniti? sasa. Jehová Diosax “janiw kunapachas jaytkämati ni armtʼaskämasa” sistuwa, ukhamasti familianakax uka arunakar taqi chuym atinisiñasawa (Heb. 13:5).

Diosar jukʼamp yupaychañ amtapxañäni

9. ¿Diosar jukʼamp yupaychañatak amtasax kuna askinaksa familianakax jikxatapxi?

⁹ Familianakax iyawsäwipan chʼamachtʼasiñatakisa ukat Diosamp jukʼamp sum apasiñatakis ¿kunanakampsa lurapxarakispa? Jutïrin  kunanak lurañas askïspa ukanak sum amtasaxa, ukarjam phuqañatakiw chʼamachasipxañapa. Ukhamatwa Jehová Diosar yupaychañanx nayrar sartasipkiti janicha ukat kunanak lurañas jukʼamp wakiskirix uk amuytʼasipxani (Filipenses 1:10 liytʼasiñapawa).

10, 11. ¿Kunanak lurañsa familiaman amtawayapxta, ukat jutïritakix kunanak lurañsa amtapxarakisma?

¹⁰ Familpachax kuna lurañanakampis jichpach phuqsna ukanakak amtasax askinakwa jikxatañäni. Uka lurañanakat maynïrixa, Diosan Arupat sapür yatxatañataki sat folletot familpach liytʼañawa. Yatxatkasax mayn mayni arstʼanipxani ukhaw awkix kunjam chuymampis Diosar yupaychasipki uk amuyaspa. Maysa tuqitxa, familpach Diosan Arup liytʼañax wali askirakiwa, ukhaw wawanakax sum liytʼañsa yatiqapxaspa ukat Biblian yatichäwinakap jukʼamp amuytʼapxarakispa (Sal. 1:1, 2). Ukhamasti, ¿kunjamsa Diosat mayisisktan uka tuqit amuytʼasiñax janit wakiskaspa? Ukat qullan ajayun achuparjam sarnaqañatakiw jukʼamp chʼamachasiñ amtaraksna (Gál. 5:22, 23). Jan ukax yatiykta uka jaqinakax kunjamsa jikxatasipxi uk amuyañatakiw chʼamachassna. Ukhamatwa wawanakarux khuyaptʼayasiñ yatichsna. Ukat inas wawanakax mayninakar yanaptʼañ laykux precursorjam, jan ukax misionerjam Jehová Diosar luqtañ amtapxchispa.

¹¹ ¿Kunanakamp lurañsa familiamampix amtapxarakisma? ¿Janit Diosan arunakapat jukʼamp yatiyañ amtapkasma? ¿Telefonotsa, callensa ukat qhatunakansa jan axsartʼas yatiyañatak chʼamachasiñax wakisispati? ¿Kawkintï Diosan arunakapat yatiyirinakax  munaski uka chiqanakar sarañat kamsapxasmasa? ¿Janit familiamat maynïrix yaqha markankirinakar yatiyañatakix yaqha aru parlañ yatiqkaspa?

12. ¿Diosar sum yupaychañatakix kunjamsa mä awkix familiapar yanaptʼaspa?

¹² Diosar yupaychañan nayrar sartañatakix kunanakampsa familpachax lurapxaspa ukwa mä awkix amuytʼañapa. Ukat sapa maynix kunanaksa chʼamaparjam phuqaspa uk amuytʼasaw kunanaksa familian lurapxani uk amtañaparaki (Pro. 13:12). Chiqas wakiskir amtanak phuqañatakix tiempow munasi. Ukatwa televisión uñchʼukisasa yaqha ukhamanakampis tiempo jan ina chʼusar aptʼasipxañapäkiti, antisas Diosar yupaychañatakiw tiempo apstʼasipxañapa (Efe. 5:15, 16). Ukhamarus sapürunjam wal chʼamachasisakiw familianakax amtanakap phuqapxaspa (Gál. 6:9). Ukat nayar sartapxatapsa ‘taqiniw uñjapxani’ (1 Tim. 4:15).

Familiana Diosar Yupaychañataki Arumat jan armasiñäniti

13. ¿Tantachäwinakatxa kunas mayjtʼawayi, ukat kamsasas jisktʼasiñasa?

¹³ Enero phaxsit 2009 marat aksaruxa, janiw sapa semanax kimsa kuti tantachasxtanti. Ukaw familianakarux Jesucriston jutäwip wali amuyumpi suyapxañapatakix yanaptʼaski. Librot Yatiqañataki Taman Tantachäwipax semanan yaqha urunwa apasïna. Ukampis jichhax Yatiyañataki Diosan Yatichäwipa, ukat Yatiyañataki Tantachäwimp chikaw apasxi. Ukhamatwa familpach Bibliat yatxatasin Diosar yupaychañ tuqit chʼamachtʼasiñatak mä arumax utji. Jichhakamax pä maräxiwa, ukatwa akham jisktʼasiñasäspa: “¿Ukham tiempo utjipanxa, familiana Diosar yupaychañataki, jan ukax Diosan arunakapat sapak yatxatañatakis tiempo apsusiskti? ¿Kuna amtampitix wakichasiwayki ukarjamat nayar yanaptʼaskitu?” sasa.

14. 1) ¿Familiana Diosar yupaychañ arumasa ukat sapaki Bibliat yatxatañas kuna amtampi wakichatasa? 2) ¿Kunatsa semanan mä arumax Bibliat yatxatañax wali wakiskirixa?

¹⁴ Familiana Diosar yupaychañataki arumasa ukat Bibliat sapak yatxatañasa, Diosar jukʼampi jakʼachasiñatak wakichatawa (Sant. 4:8). Kunapachatï sapa semanan Bibliat yatxatktan ukat taqi kun Lurir Diosat yatiqktan ukhaxa, jukʼamp sumwa Jupampix apastanxa. Ukham sum apasisax taqi chuymampi, taqi almampi, taqi amuyumpi ukat taqi chʼamampiw munasiraktanxa (Mar. 12:30). Ukat Jupar istʼañsa ukat yatiqasiñsa taqi chuymaw muntanxa (Efe. 5:1). Kunjamtï uñjktanxa, sapa semana familiana Diosar yupaychañax wali wakiskiriwa, ukhamatwa familiasax ‘jachʼa tʼaqhisïwi’ puriniñapatakix wakichtʼatäni (Mat. 24:21, NM). Chiqas ukham lurasakiw qhispiyasiñäni.

15. ¿Familiana Diosar Yupaychañataki Arumax kunjamsa familianakar mayachthapi?

¹⁵ Familiana Diosar Yupaychañataki Aruma satäkis ukaxa, familia taypin jukʼamp munasiñ utjañapatak wakichtʼatarakiwa. Chiqansa, sapa seman familpacha Diosat yatxatasax maynit maynikamaw jukʼamp suma chuymampi uñjasipxi. Sañäni, chacha warmix wakiskir yatichäwinak Bibliat yatxatasax jukʼampwa jupanakkamax munasipxi (Eclesiastés 4:12 liytʼasiñapawa). Ukat awk taykax wawanakapamp chika Diosar yupaychapxi ukhaxa, munasiñan mayachtʼatäpxiwa, kunattix “munasiñasti mayaruw tukuyi” (Col. 3:14).

16. ¿Sapa seman Diosan arupat yatxatasax kuna askinaksa kimsa kullakax jikxatawayapxi?

¹⁶ Kimsa viuda kullakanakat parltʼañäni. Chuymankipstat uka kullakanakaxa, kimspachani Bibliat yatxatañatakiw tiempo apsusipxäna. Jupanakax janiw familiaräpkiti, ukampis nayratpach suma amigapxiwa. Pachpa markankirïpxatap laykuxa, janiw kusistʼañatakik tantachasiñasäkiti, jan ukasti Jehová  Diosan arunakapat yatxatañatakis tantachasiñasapuniwa sasaw amtapxäna. Ukatwa Bibliat sapa semana yatxatañatak amtapxarakïna. Ukhamaw “Testimonio cabal” del Reino de Dios sat librot yatxatañ qalltapxäna. Jupanakat maynïrix akham siwa: “Kunjamsa nayrïr cristianonakax jan waltʼäwinakar saykatapxäna uk uñjapkiristsa ukham amuytʼapxirïta, ukat jiwasax ukham uñjasisax kamachsnasa sasaw parltʼasipxirïta. Ukat kuntï yatiqapkayäta ukarjam yatiyañatakiw chʼamachasipxayäta. Ukaw jukʼamp sum yatiyañatakisa ukat yatichañatakis wal yanaptʼawayapxitu. Yatxatañax khusapuniwa, niya sapa kutiw mä hora jilax yatxatapxirïta” sasa. Ukham lurasax Jehová Diosar yupaychañ tuqit jukʼamp chʼamachtʼatapxänwa ukat jupanakkamas jukʼamp sum apasipxäna. “Ukham yatxatañatak tantachtʼasiñax wali askipuniwa” sasaw kimspachanix sapxi.

17. ¿Familiana Diosaru Yupaychañataki Aruman sumäñapatakix kunanakas yanaptʼaspa?

¹⁷ Familiana Diosar yupaychañataki arumasa ukhamarak Bibliat sapaki yatxatañasa, ¿kunjamsa jiwasarux yanaptʼistu? Jiwasatï Diosan Arupat yatxatañatak tiemponïkasak tantachasiñänixa, janiw kuna askinaksa jikxatkañäniti. Janirakiw jan wakiskir luräwinakampix tiempo apaqasiñasäkiti. Tantachasiñ horasarus taqiniw wakichtʼat suyapxañapa. Ukat kuna yatichäwinakas familiatakix askïspa ukanak yatxatañatakiw ajllisiñaparaki. Ukampis ¿uka tantachäwin sumäñapatakix kun lurañasäspasa? Sum yatichañatak iwxtʼanak utjki ukarjam yatichañasawa ukat sumankañasa respetosa utjañaparakiwa (Sant. 3:18). *

‘Jan ikjañäniti’ ukat ‘wakichtʼatäñäni’

18, 19. ¿Jesucriston puriniñap jakʼankatap yatisax kunsa jumasa familiamas lurapxañama?

¹⁸ Aka pachan kunayman jan waltʼäwinak utjatapax ¿kuns uñachtʼayistu? 1914 marat aksarux Supayan ñanqha pachapax niya tukusiñampïxatapwa uñachtʼayistu. Kuna jan waltʼäwinakatï Armagedonamp chika purinkani ukanakas jakʼankarakiwa. Niyarakiw Jesucristox jucharar jaqinakar taripirix jutani (Sal. 37:10; Pro. 2:21, 22). Taqi ukanakat amuyasax kunsa sapa maynis ukat familpachas lurañäni uk amuytʼasiñasawa.

¹⁹ ¿‘Suma nayranïña’ tuqit Jesusax parlkäna ukarjam phuqasktati? Akapachankir jaqinakax wali uñtʼatäña, wali munañanïña, qamirïña, ukanakakwa thaqhasipki, ukampis ¿Jehová Diosar jukʼampi yupaychañatakix familiamamp chikati chʼamachasiskta? ¿Familiana Diosar Yupaychañataki Arumansa jan ukax sapaki Bibliat yatxatasas askinak jikxatasktati? ¿Kunanak lurañtix amtkayäta ukanakamp phuqasktati? Kunjamtï nayrïr yatichäwin yatiqkayätanxa, ¿kuna lurañtï Diosax sapa maynïr jaytawaykistu ukanakamp phuqasax familiaman jan ikjañapatakix yanaptʼasktati? (1 Tes. 5:6.) Jumatï uka jisktʼanakarjam phuqaskstaxa, familiamax Jesucriston puriniñapatakix suma wakichtʼataw suyarakini.

[Qhanañchäwi]

¿Amtasktati?

• ¿‘Suma nayranïñax’ kunjamsa familian wakichtʼatäñapatakix yanaptʼi?

• ¿Diosar jukʼamp yupaychañataki amtanakax kunjamsa familian sum wakichtʼatäñapatakix yanaptʼi?

• ¿Familiana Diosar Yupaychañataki Aruman tantachasiñax kunjamsa familian sum wakichtʼatäñapatakix yanaptʼi?

[Jiskt’anaka]

[13 janan fotopa]

Suma nayranïñaw akapachampi jan apayasiñatakix yanaptʼistani