Diosar confiasisax janiw axsarkañäniti
Diosar confiasisax janiw axsarkañäniti
“Kunapachatix nayax [Jehová Diosar] arnaqaskä ukkhasa Jupax istʼarakitaniwa.” (SAL. 4:3, Aymar Biblia, 1992 [AB].)
1, 2. 1) ¿Kuna jan waltʼäwinsa Davitax uñjasïna? 2) ¿Kawkïr salmonakatsa yatxataskañäni?
DAVITAX walja maranakaw Israel mark reyjam apnaqäna. Ukhaw mä jachʼa llakin uñjasïnxa. Absalón yuqapaw Davitat munkir jan munkir reynop apaqasin reyit uttʼasïna. Ukatwa Davitax Jerusalenat sarxäna. Ahitofel sat iwxtʼiripas jupa contraw saytʼxarakïna. Jupat jan jithiqtiri chachanakampiw qʼara kayu ukat jachtʼasisa Olivo sat qullnäm sarxäna. Ukatxa, Saúl reyin familiapat jutir Simeí chachan jiskʼachataw uñjasïna, jupasti laqʼampi ukat qalanakampiw jaqjäna (2 Sam. 15:30, 31; 16:5-14).
2 ¿Taqi uka llakinakax jiwañarut apäna? Janiwa. Kunjamtï Salmo 3 qillqatan siskixa, Davitax taqi chuymaw Jehová Diosar confiasïna. Ukanwa Jerusalenat escapatap qhañancharaki. Ukat Salmos libron 4 jaljapxa, juparakiw qillqäna, ukansti Jehová Diosax taqi chuyma yupaychirinakaparux sum istʼirïtapa ukat mayisitaparjam yanaptʼirïtapwa qhanañchi (Sal. 3:4; 4:3). Uka salmonakaxa, Diosax arumay uru yupaychirinakapar uñjatapa ukat yanaptʼatapa, sumankaña ukhamarak jan axsaras jakasiñ churatapwa uñachtʼayi (Sal. 3:5; 4:8). Ukhamasti, uka pä qʼuchunakat yatxatkasaxa, kunjamsa Jehová Diosar jukʼamp confiasiñatakix yanaptʼistaspa uk amuytʼañasawa.
“Waljaniw nayatakix saytʼapxi”
3. Salmo 3:1, 2 qillqatarjamaxa, ¿kuna jan waltʼäwinsa Davitax jikxatasïna?
3 “Israelita jaqinakax Absalonaruw jaqkkatxapxi” sasaw Davitar yatiyapxäna (2 Sam. 15:13). Absalón yuqapamp walja jaqinak mayachtʼasitapatxa, Davitax akham sänwa: “Tatay, waljaniw nayamp timasirinakaxa, waljaniw nayatakix saytʼapxi; waljaniw nayat sapxi: ‘Janiw Diosax jupar qhispiykaniti’ sasa” (Sal. 3:1, 2). Kunjamtï amuyaskixa, Jehová Diosax janiw Absalonatsa ni arkirinakapatsa Davitar qhispiykaniti sasaw walja israelitanakax parlapxäna.
4, 5. 1) ¿Kunarus Davitax wal atinisïnxa? 2) ¿‘Jumaw chʼamañchirixätaxa’ sasinxa kamsañsa muni?
4 Davitasti, Diosar taqi chuym atinisitap laykux janiw axsarkänti. Ukatwa akham qʼuchüna: “Tatay, jumaw nayan arxatirixätaxa, jumaw jachʼar aptirixätaxa, jumarakiw chʼamañchirixätasa” sasa (Sal. 3:3). Kunjamtï escudox mä soldador jarkʼaqkixa, ukhamarakiw Diosax jarkʼaqitani sasaw Davitax atinisïna. Chuymankipstat reyix pʼiqis chʼuqtʼata ukat alintataw jiskʼachatäsax escapxäna. Ukampis Jehová Diosax jachʼaruw qhipat aptxañapäna. Ukat janirakiw pʼiqis alintat ukat aynachtʼatax sarnaqxañapäkänti. Ukatwa Jehová Diosarux jan pächasis maytʼasïna. ¿Jiwasat kamsasirakispasa? ¿Davitjamati Diosar taqi chuyma confiyastanxa?
5 ‘Jumaw chʼamañchirixätaxa’ sasin qʼuchusaxa, Jehová Diosarux yanaptʼiriparjam uñjatapwa Davitax uñachtʼayäna. Ukat reyïñat apaqatäsax Davitax wal llakisïna. Ukampis Diosan ‘chʼamañchtʼatäsax’ janiw axsarxänti, iyawsäwipans chʼamañchtʼatäxarakïnwa.
Mayisitaxärux ‘istʼitaniwa’
6. ¿Kunatsa Davitax Diosaw qullan qullupat istʼanitani sasin sispachäna?
6 Jehová Diosar taqi chuym atinisisaw Davitax akham mayisiskakïna: “Jachʼat artʼasisaw [Jehová] Tatitut mayista, jupasti qullan qullupatpach istʼitu” sasa (Sal. 3:4). ‘Diosamp arustʼäwir mantat arcaxa’ Davitan apayataw Sión qullunkaskäna, ukat Diosax markapampïskatapwa uñachtʼayäna (2 Samuel 15:23-25 liytʼasiñapawa). Ukatwa Davitax Diosaw qullan qullupat istʼanitani sasin atinispachänxa.
7. ¿Kunatsa Davitax jan axsarkänxa?
7 Mayisitanakapan jan inamayätap yatisaxa, Davitax janiw axsarkänti, ukatwa akham qʼuchtʼasïna: “Ukampis nayax sumakiw iktʼasxta, ukhamarak sartxarakta, Diosax nayar imaskatap uka layku” sasa (Sal. 3:5, AB). Davitarux akatjamatwa mä aruman katuntapxaspäna, ukampis janiw axsarkänti, ukatwa iktʼasxäna. Arumanthix sartaskäwa sasaw atinisirakïna. Nayra maranakanxa, Jehová Diosax walja kutiw yanaptʼatayna, ukatwa wal confiasïnxa. Jiwasatï “Tatitun thakipan” sarnaqaskakiñäni ukat janirak Jupat jithiqtkañäni ukhaxa, Davitjamarakiw Diosarux taqi chuyma atinisiñäni (2 Samuel 22:21, 22 liytʼasiñapawa).
8. ¿Salmo 27:1-4 qillqatanx kunjamsa Davitax Diosar confiasitap qhanañchi?
8 Diosan amuytʼayat maynïr salmonxa, Davitax Diosar taqi chuyma atinisitap akham sasaw qhanañcharaki: “[Jehová] Tatituw qhanaxasa, qhispiyasiñaxasa, ¿khitirurak axsarästi? Tatituw jakañaxar arxati, ¿kunarurak axsarästi? [...] Nuwasir tamas nayatak tantachasiskpan, chuymaxax janiw khathatkaniti [...]. Tatitut mä mayisiñaxakiw utji, ukakirak thaqä: jakañ urunakaxan utapan utjasiña; utapan jupar yupaychañataki, qhapaq kankañap uñjasin kusisiñataki” sasa (Sal. 27:1-4). ¿Kunjamsa Davitjam chuymanïtas uñachtʼaysna? Ukatakix taqi tantachäwinakaruw sarañasa, janipun kunas kamachañjamäxani ukhakiw janix sarxsnati (Heb. 10:23-25).
9, 10. Salmo 3:6, 7 qillqatax janiw Davitax phuqsusir jaqïtap uñachtʼayañ munkiti, ¿kunatsa ukham sistanxa?
9 Davitan yuqapax jupa contraw saytʼasïna, ukat waljanirakiw Absalón yuqapampix sarxapxäna, ukhampachas akham qʼuchtʼasïna: “Nayar katuntañatak muyuntir jaqinakax janiw axsaraykituti. ¡[Jehová] Tatay, sartasikimaya! ¡Dios Tatituxay, qhispiyasikitaya! Jumaw timanakaxan ajanupat tʼaxllinuqäta, ñanqha lurir jaqinakan laka chʼakhanakap tʼunsurakïta” sasa (Sal. 3:6, 7).
10 Davitax janiw phuqsusir jaqïkänti. Janiw jupa pachpax uñisirinakapar ‘ajanupat tʼaxllinuqkaspänti’, jan ukasti Diosakiw ukham luraspäna. ‘Phuqsusiñ uru jutkani’ ukhax nayaw phuqsusiskäxa sasaw Jehová Diosax Leyipanx qhanañchäna, uksti Davitax sum yatïna, kunattix jupa pachpaw uka Leyinakat qillqaqasïna (Deu. 17:14, 15, 18; 32:35). Ukatxa, Jehová Diosaw “ñanqha lurir jaqinakan laka chʼakhanakap tʼuns[kaspas]” ukham lurarakini sasaw atinisirakïna. Mä arunxa, Diosaw ñanqha jaqinakat jarkʼaqaspäna. Jupax ‘jaqin chuymap yatiwa’ ukatwa jan wali jaqïpki ukanakar uñtʼaraki (1 Sam. 16:7). Alaxpachankir awkisax iyawsäwisan sum saytʼatäñatakiw yanaptʼistu ukat chʼam churistu ukhamat ñanqha Supayar saykatañasataki. ¡Ukatpï Juparux wal yuspärtanxa! Jehová Diosax niyarakiw kutkatasir Supayarux mikʼayar jaquntayani. Uka pachatakixa, Supayax jan laka chʼakhanakani leonar uñtasitakiw tukjatäñ suyxani (1 Ped. 5:8, 9; Apo. 20:1, 2, 7-10).
Jehová Diosaw ‘qhispiyirisaxa’
11. ¿Kunatsa jilat kullakanakatakix Diosat mayisiñasa?
11 Jehová Dios sapakiw qhispiyitaspa sasaw Davitax atinisïna. Ukampis janiw jupa sapak qhispiyatäñ suykänti, jan ukasti markpach qhispiyasiñapwa munäna. Ukatwa Diosan amuytʼayatäsax akham sasin qʼuchuñ tukuyäna: “Tatay, jumaw qhispiyiritaxa; ¡markamarux askinakampiy phuqhantam!” sasa (Sal. 3:8). Davitax wali llakinakansa uñjaskchïnxa, markatakiw Diosat mayïna ukat bendicionap mayiñsa janiw armaskänti. ¿Janit jilat kullakanakasatakix ukham mayiñasäkarakispa? Diosat mayiskasax jilat kullakanakasat amtasiñasapuniwa. Arunakam jan axsaras yatiyir sarapxañapatakix qullan ajayumamp yanaptʼakimaya sasaw tamankirinakatakix Diosat maytʼasiñasa (Efe. 6:17-20).
12, 13. ¿Kunarus Absalonax purtʼasïna, ukat Davitax uk yatisax kuns luräna?
12 Absalonax mä phinqʼaw jiwxäna, ukax khitinakatï jaqi masipar tʼaqhisiyapki, jan ukax khitinakatï David reyirjama, mä arunx Diosan ajllitanakapar tʼaqhisiyapki ukanakan amuyasipxañapatakiwa (Proverbios 3:31-35 liytʼasiñapawa). Davitan reinop contra saytʼir ejercitox atipjata uñjasxäna ukhaxa, Absalonax mä mulatwa escapxäna. Ukampis mulat saraskipanx ñikʼutapaw ramanakar achuntäna. Ukat warkkatatäskipanwa Joab chachax kimsa flechanakamp chuymat chhuqhuntäna (2 Sam. 18:6-17).
13 ¿Absalón yuqapan jiwatapatxa Davitax kusisïnti? Janiwa. Antisaw uks aksa jachtʼasis sarnaqäna ukat sarakïnwa: “Absalón, wawaxa, Absalón wawaxa! ¡Nayaw juma lanti jiwañxa muniriskäyäta! ¡Wawaxa, Absalón wawaxa!” sasa (2 Sam. 18:24-33). Joab chachakiw llakit reyirux chuymachtʼäna. Absalón pachpaw ukham purtʼasïna, jupatak taqi kun munatap laykusti, janiw awkip contrakix saytʼaskänti, jan ukasti Diosan ajllit rey contraw saytʼasïna (2 Sam. 19:1-8; Pro. 12:21; 24:21, 22).
Davitax mayampwa Diosar confiyasitap uñachtʼayi
14. ¿Salmo 4 qillqatat kamsnasa?
14 Salmo 4 qillqatanxa Salmo 3 qillqatanjamarakiw Davitax Diosar taqi chuyma confiasisax maytʼasi (Sal. 3:4; 4:3). Davitax inas Absalón yuqapat qhispitap laykux Jehová Diosar yuspärañatak ukham qillqchïna. Jan ukax inas levitanakan qʼuchupxañapatak qillqarakchïna. Ukampis jumatix Jehová Diosar atinisïtaxa uka Salmonak yatxatasax wali chʼamachtʼataw jikxatasïta.
15. ¿Kunatsa Jesús tuqix Diosar jan pächasis jakʼachassna?
15 Davitax mayampwa Jehová Diosar wal atinisitapsa ukat oracionas kunja chʼamanisa uk uñachtʼayi. Jupasti akham siwa: “Mayisinsma ukapachax istʼakitaya, jumaw llakisiñaxan chuymax qhanartayista, ¡nayat khuyaptʼayasita, mayisitaxarux istʼakimaya!” sasa (Sal. 4:1). Chiqapar uñjir Jehová Diosax chiqapar sarnaqirinakarux bendiciwa. Jiwasatï Dios nayraqatan kunatix chiqäki ukanak lurañänixa, Davitjamarakiw Diosarux taqi chuyma atinisiñäni. Ukat Jesucriston jiwatapar iyawsañänixa, jan pächasisaw Diosax istʼitaniw sasin Jesucristo tuqix mayisiñäni (Juan 3:16, 36). ¡Uk yatiñasti walpun chuymachtʼistu!
16. ¿Kunas Davitarux aynachtʼaypachäna?
16 Awisax kunayman llakinakan uñjasisaw jukʼat jukʼat aynachtʼsna. Davitax inas ukham jikxatasirakchïna, jupax akham qʼuchüna: “Jachʼa jachʼa tukur jaqinaka, ¿kunapachkamasa nayar jiskʼachapxitätaxa? ¿Kunapachkamarakis jan walinaka munapxäta, ukhamarak kunatix jan chiqäki uka thaqapxarakïta?” sasa (Sal. 4:2, AB). “Jachʼa jachʼa tukur jaqinaka” sasinxa, taqpach jaqinakatwa parlaskäna. Ukat Diosar jan uñtʼiri jaqinakaruw ukham saskarakïna, jupanakax “jan walinaka munap[xi]” sasaw saraki. Ukhamasti, mayninakan jan wal sarnaqapxatapat aynachtʼkasasa, janipuniw Jehová Diosat taqi chuym mayisiñ armañasäkiti ukat jan pächasis atinisiskakiñasawa.
17. ¿Kunjamsa Salmo 4:3 qillqatax yanaptʼistaspa?
17 Davitax may kutimpiw Diosar taqi chuyma atinisitapxa akham sasin uñachtʼayäna: “Yatipxam Diosax ajllisiwa taqi chuyma arkir jaqinakaru. Yatipxarakim kunapachatix nayax jupar arnaqaskä ukkhasa jupax istʼarakitaniwa” sasa (Sal. 4:3, AB). Ukhamasti, Diosar taqi chuyma yupaychañatakix jan axsartʼirïñasawa, iyawsäwisansa suma saytʼatäñasarakiwa. Ukanakaw familiasat maynix juchapat jan arrepentisitap layku tamat jaqsut uñjasini ukhas yanaptʼistani. Chiqas khitinakatï Jehová Diosat jan jithiqtasa ukat aruparjam phuqas sarnaqapki ukanakakiw bendicionanak katuqapxi. Ukat Diosar taqi chuym yupaychasa ukat Jupar confiasisax taman sumankañ utjañapatakiw yanaptʼapxi (Sal. 84:11, 12).
18. ¿Maynix arumpisa jan ukax luratapampis chuyma ustʼayistaspa ukhax kunsa Salmo 4:4 qillqatarjamax lursna?
18 Maynix arupampis jan ukax luratapampis chuyma ustʼayistaspa ukhaxa, ¿kamachsnasa? Davitan aka iwtʼaparjam lurañänix kusisitäskakiñäniwa, jupasti sänwa: “Colerasisinxa, ¡janirak jucha lurapxamti! Ikiñankkasinsti uñjasipxam chuymanakamax kunjamäkitix uka” sasa (Sal. 4:4, AB). Maynix arumpisa, jan ukax luratampis chuym ustʼaychistux janiw kuttʼayañasäkiti (Rom. 12:17-19). Jan ukasti, kunas chuym ustʼayistu ukxa utanwa Diosar yatiyxañasa. Ukat Jehová Diosampi uka tuqit parltʼasaxa, sumpachwa amuytʼasxsna, ukat munasiñatwa perdonxaraksna (1 Ped. 4:8). Apóstol Pablox Salmo 4:4 qillqatat amtasaw akham iwxtʼarakïna: “Colerasisinxa jan juch lurapxamti, uka colerasiñanakamax jan jornalpachäpati. Janirak Supayarus jakʼachayasipxamti” sasa (Efe. 4:26, 27).
19. ¿Kunjamsa Salmo 4:5 qillqatarjamax Jehová Diosar yupaychsna?
19 Davitax mayampiw Diosar iyawsañax kunja wakiskiris ukxa akham sasin qhanañchäna: “Chiqpach luqtäwinak jupar katuyapxam, Tatiturusti taqi chuymamp iyawsapxam [jan ukax ‘confiasipxam’, NM]” sasa (Sal. 4:5). Israelitanakax ofrendanakap suma chuymamp luqtapxasapäna ukhakiw Diosax katuqasapänxa (Isa. 1:11-17). Diosarux suma chuymampi ukat Jupar atinisis yupaychañäni ukhakiw taqi kuntix jupar yupaychañatak lurktan ukanak katuqarakistani (Proverbios 3:5, 6 ukat Hebreos 13:15, 16 liytʼasiñapawa).
20. ¿Jehová Diosar confiasitasatxa kuna askinaksa katuqtanxa?
20 Davitasti saskakïnwa: “Waljaniw sapxi: ‘¿Khitirak kusisiñ churistanisti?’ [...]. ¡Tatay, khuyapayasiñampiy uñtanipxita!” sasa (Sal. 4:6). Jehová Diosar wal confiasitas laykuw bendicionanak katuqtanxa ukat munañap luraskatas yatisax wal kusisiraktanxa.
21. ¿Cosecha apthapiñan yanaptʼasax kunsa jikxatañäni?
21 Kunjamtï yapuchirinakax apthapiñ horasan wal kusisipkixa, ukat sipansa jukʼamp kusisiñ Diosax churitani sasaw Davitax atinisïna. Ukatwa akham sasin qʼuchüna: “Jumaw chuymaxarux jukʼamp kusisiñ uchtaxa jilarkir trigoninakat sipansa, vinoninakat sipansa” sasa (Sal. 4:7). Jiwasatï cosecha apthapiñäni, mä arunxa, Diosan arunakap taqi chuyma yatiyañänixa, ukhamarakiw wali kusisit jikxatasiñäni (Luc. 10:2). Jichhürunakanxa, alaxpachar sarañataki ajllit cristianonakarux waljaniw Diosan arunakap yatiyañatakix yanaptʼasipki, uk uñjasax walrakwa kusistanxa. Ukatpï sapa maynix akham sasin jisktʼasiñasaxa: “¿Diosan arunakap yatiyasax kusisitarakïtti?” sasa.
Jehová Diosar confiasisax nayrar sarantaskakiñäni
22. Salmo 4:8 qillqatarjamaxa, ¿Diosan Leyinakaparjam sarnaqir israelitax kunjamsa jikxatasïnxa?
22 Davitax akham sasaw qʼuchup tukuyi: “Nayax jan kuna llakiniw ikintta, mäkiw ikjarakta, Tatay, jumakiw iyawsañ chuymamp jakayistaxa” sasa (Sal. 4:8). Kunapachatï israelitanakax Diosan Leyinakaparjam sarnaqapkäna ukhaxa, jan kun axsarasaw sumaki jakasipxäna. Amuytʼañäni, Salomón reyix apnaqkäna ukhaxa, “Judá, Israel jaqinakaxa, [...] samaratakiw jakapxäna” (1 Rey. 4:25). Yaqha markanakan arknaqat uñjasipkäna ukhasa, khitinakatï Diosar taqi chuym atinisipkäna ukanakax janiw sinti llakisipkänti. Jichha tiemponx Diosaw samarañ churarakistu, ukatwa Davitjamax jan kuna llakin iktʼasxaraktanxa.
23. ¿Diosar taqi chuyma confiasisax kunjamas jikxatastanxa?
23 Ukhamasti, Jehová Diosarux jan pächasis yupaychaskakiñäni. Jupar taqi chuym iyawsasin jakʼachasiñänixa, “kuntix jaqix amuytʼkaspas ukat jukʼamp ja[chʼa]” sumankañ jikxatañäni (Fili. 4:6, 7). Uk yatisax walpun kusistanxa. Ukat Jehová Diosar taqi chuym confiasisaxa, kunanakay jutïrinakan paschini ukanakarus janiw axsarktanti.
¿Kamsasmasa?
• ¿Absalón chachan juchapatxa kuna jan waltʼäwinakansa Davitax jikxatasïnxa?
• ¿Salmo 3 qillqatax kunjamsa confiasiñatakix yanaptʼistu?
• ¿Salmo 4 qillqatax kunjamsa Jehová Diosar jukʼamp confiasiñatakix yanaptʼistu?
• ¿Jehová Diosar taqi chuyma confiasisax kuna bendicionanaksa katuqtanxa?
[Jiskt’anaka]
[29 janan fotopa]
Absalón yuqapat escapkäna ukhas Davitax taqi chuymaw Jehová Diosar confiasïna
[32 janan fotonakapa]
¿Jehová Diosarux taqi chuymat confiyastanxa?