Sum pʼiqtʼir Jesucristor arkapxañäni

KHITINAKATÏ politiconakar arkapki ukanakaxa, chuym ustʼataw qhiparapxi. Ukampis Jesucristor arkirinakax walja bendicionanak katuqapxi. Jesús pachpaw akham säna: “Nayar jutapxam taqi qarjatanaka jatjatanaka, nayaw samarayapxäma. Nayan yugoxa apapxam, ukatsti nayat yatiqasipxarakita. Nayasti llampʼu chuymani, altʼat chuymanirakïtwa, ukatwa almaman samarañapxa jikxatapxäta” sasa (Mat. 11:28, 29). Chiqpachansa, Jesusan pʼiqtʼatäsax wali chʼamañchtʼataw jikxatastanxa. Jupax aynachtʼatanakatsa, llakitanakatsa wal khuyaptʼayasi, ukatwa yugopar jawsi, mä arunx munasiñampi apnaqäwiparuw jawsaski. Ukhamasti, ¿Cristor arkañax kamsañsa muni?

Apóstol Pedrox akham qhanañchistu: “Cristox jumanak laykuw tʼaqhisïna, jumanakar mä uñachtʼäwi churasa, ukhamat kayup arkapxañamataki” sasa (1 Ped. 2:21). ¿Kunatsa Jesusar arkañax wali wakiskirixa? Hospitalansa jikxataskasma ukham amuytʼañäni. Jumas mayninakas wali usutäpxasma, ukat mä doctoraki uka usum qullañ yatispa ukhaxa, ¿qullasiñ laykux janit kuntï sisktam ukat mayktam ukarjam phuqkasma? Ukhamarakiw jutïrin wali sum jakasiñ munstan ukhax kuntï Jesusax yatichawaykistu ukarjam sarnaqañasaxa. Mä arunxa, qhispiyasiñatakix Jesusat yatiqasis sarnaqañatak chʼamachasiñasawa. Ukatxa, khitinakarutï tamap pʼiqtʼañapatak jaytawayki ukanakarus istʼañasarakiwa ukat yanaptʼañasarakiwa.

Jesusan arunakap istʼasaw sarnaqtanxa

Wali Uñtʼat Arstʼäwipan niya tukuyaruxa, Jesusax akham sarakïnwa: “Khititix istʼkitu ukat kuntix siskta uk lurarakixa, ukax mä suma amuyun jaqimpi sasiwa, utapsa mä qarqa pataru luraskaspa ukhama. Jallu purintatapatsti jawiranakaw wal sarti, ukamp chikasti walirakiw thayax thaytʼani uka utaruxa, ukampis janiw tinkuykiti qarqa patankatap laykuxa” sasa (Mat. 7:24, 25).

Khititï arup istʼki ukat ukarjam sarnaqki ukarux “suma amuyun” jaqiwa sasaw Jesusax säna. ¿Jiwasat kamsasirakispasa? ¿Jesucriston arunakap taqi chuymati istʼasktanxa, ukham lurasax yatiqaskay sarnaqäwipar respetatassa ukat wali askit uñjatasti uñachtʼayasktanti? ¿Jan ukax jan chʼamäki ukat munktan ukhakich phuqtanxa? Amtañäni, “nayax [Awkijar] kusisiykirpun kuns lur[ta]” sasaw Jesusax säna (Juan 8:29). Jiwasax jupat yatiqasiñasawa.

Nayrïr maranakanxa, apostolanakax taqi chuymaw Jesucristor istʼapxäna. Amuytʼañäni, Pedrox akham sasaw Yatichiriparux säna: “Tata, nanakasti taqi kun jaytanukusinxay arkanipxsmaxa” sasa (Mar. 10:28). Kunjamtï amuyktanxa, apostolanakatakix Jesusamp pʼiqtʼatäñax wali askïnwa, ukatwa jan pächasis taqi kun jaytanukusax Jesusar arkapxänxa (Mat. 4:18-22).

Jusucriston jilanakapar istʼañäni

Khitinak tuqis Jesusax pʼiqtʼarakistu ukxa jiwañap jakʼaw akham säna: “Khititix katuqki nayan khitataxaru ukaxa nayaruw katuqitu” sasa (Juan 13:20). Jesusax sutipxar khitki uka ajllitanakarux ‘jilaja’ sasaw säna (Mat. 25:40). Ukat jiwatat jaktasin alaxpachar sarxasinxa, Jesusaw jupanakarux ‘khitanakjam’ jupa lanti jaytawayäna. Ukatwa Uywirina, mä arunx Jesusan sutipxarux jaqinakar Jehová Diosamp sumankthapipxam sasin jawsapxañapäna (2 Cor. 5:18-20). Ukhamasti, Jesusar istʼañ munstanxa,  “jilanakaparu”, mä arunx alaxpachar sarañataki ajllit cristianonakar istʼañasarakiwa.

Diosan Arupat yatxatasa, Bibliat apstʼat qillqatanak liytʼasa ukat tantachäwinakan istʼktan uka suma iwxanak kunjamsa katuqasisktan ukxa taqiniw amuytʼasiñasa. Chiqas taqi ukanakaw Jesusan arunakapxa amtayistu (2 Ped. 3:1, 2). Uka yanaptʼanakat yuspärañ munstanxa, Diosan arunakap yatxatañatakix mä horario apsusiñasawa. ¿Pachpa tuqit mayampi iwxtʼapkistu ukhax kunjamsa katuqastanxa? Sañäni, casarasiñ munstax “iyawsirik iyawsirïpaxa” sasaw iwxtʼapxistu (1 Cor. 7:39). Chiqas nayra maranakatpachwa uka tuqit Yatiyañataki revistan walja kuti iwxtʼapxistu. Diosan amuytʼayat uka iwxtʼasa, yaqha ukham iwxtʼanakasa, Jesucriston jilanakapax chiqapun jiwasat llakisipxatapwa uñachtʼayistu. Ukhamasti, taqi iwxanakapar istʼasax Jesusarus istʼasksna ukhamawa.

Proverbios 4:18 qillqatan akham qhanañchi: “Aski jaqinakan sarnaqäwinakapasti willjta qhanjamawa; phuqhatpach qhantañkamaw jukʼat jukʼat qhanti” sasa. Uka arunakarjamaxa, Jesusax jan samartʼasaw sapür irpaskistu. Ukhamasti, ¿kunjamsa Jesusan “jilanakaparux” yanaptʼaraksna? Kunapachatï ‘Amuyasiri Chiqapa Uywatax’ mä yatichäwit jukʼamp qhanañchkistu ukhax taqi chuymaw istʼañasa (Mat. 24:45, MT).

¿Kunjamsa Jesusan jilanakapar mä arunx alaxpachar sarañatak ajllitanakar respetomp uñjatas uñachtʼayaraksna? Taman irpir chuyman jilatanakar istʼasa. Apóstol Pablox akham sasaw iwxtʼäna: “lstʼapxam irpirinakamaruxa, jaysapxarakim jupanakaruxa; jupanakaw almanakamatxa llakisipxi” sasa (Heb. 13:17). Inas irpir chuyman mä jilatax sapa semanan Familiana Diosar Yupaychañataki Aruman tantachasiñamax wali askïspaw sasin iwxtʼchistaspa, jan ukax Diosar yupaychäwimanx aka tuqit jukʼamp chʼamachasiñamaw sasin iwxtʼarakchistaspa. Jan ukax inas tamanak tumptʼir jilatax Diosar yupaychañ tuqit iwxtʼarakchistaspa. Uka iwxtʼanak taqi chuym katuqasktan ukat ukarjam phuqaraktan ukhaxa Jesusar istʼataswa uñachtʼaytanxa.

Akapachanxa jan wali pʼiqtʼirinakakiw utji. Ukampis Jesucristox wali munasiñampiw pʼiqtʼistu, ukax wali askipuniwa. Ukatwa khitinak tuqitï Jesusax markapar irpaski ukanakar taqi chuyma istʼañ muntanxa.

[27 janan fotonakapa]

¿Diosar jan iyawsirinakampix jan casarasipxamti siski uka iwxtʼar istʼasktati?