“Suma irpir chuymani ukhamarak wali munat amigo”

JOHN BARR sat jilataxa, sábado alwaruw diciembre phaxsit pusi urunak saraqatar 2010 maran aka Uraqin jakäwip tuktʼayawayxi, jupax 97 maranïxänwa. Ukat Jehová Diosan Qhanañchirinakapan Uraqpachan Jilïr Irpirinakatxa maynirïnwa, jupar uñtʼirinakatakix “suma irpir chuymani ukhamarak wali munat amigo” ukhamänwa. *

John Barr jilatan familiapax Escociankir Aberdeen sat markankirïnwa ukat kimsa wawatxa sullkïriwa, awk taykapax alaxpachar sarañatak ajllitäpxänwa. Wawäkasax kunja kusisitas familiapamp jakasïna ukxa wali munasiñampiw amtirïna ukat awk taykapan yatiqaskay sum sarnaqapxatapsa ukhamarakiw wal yuspäränxa.

Niya qʼaxu waynituxän ukhax wali axsarirïnwa. Ukampis jan axsaras jaqimp parlañatak wal chʼamachasisax janiw axsarirïxänti. Ukatwa 1927 maran domingo jaypʼux 14 maranïxäna ukhax jumamp chikaw utat uta yatiyir sarañ munta sasin tatapar säna. Ukhamatwa walja maranak Jehová Diosatak irnaqtʼañ qalltawayäna. Chiqas jiwañapkamaw Diosan arunakap taqi chuym yatiyäna.

John jilatan mamitapax niyapuniw mä accidenten jiwatayna. Ukatwa waynitükän ukhax jakäwipat amuytʼasisax 1929 maran Jehová Diosar taqi chuym katuyasxäna. Ukampis kunaymaninak pasipanwa, 1934 maran bautisasiskäna. Ukat phisqa mara qhipatsti, Londres markar sarasaw Inglaterra markankir Betel utankxäna. Ukhamatwa 71 maranakax Jehová Diosatak sapür irnaqtʼañ qalltawayänxa.

Khä 1960 maran octubre phaxsit 29 urunak saraqatarux mä kullakamp uñtʼasïna, jupampix sum apasipxäna. Uka kullakax Mildred Willett satänwa ukat jupampirakiw qhipat casarasxäna, uka kullakax walja maranakaw precursorjama ukat misionerjamax Jehová Diosan arunakap taqi chuym yatiyäna. Ukat 2004 maran octubre phaxsinwa Mildred sat kullakax jakäwip aka Uraqin tuktʼayawayxi. Jupanakan Diosar yupaychapxatapasa ukat mayachtʼat sarnaqapxatapas yatiqaskayänwa. Casarasipkän ukhatpachwa paninpachax Biblia sapüru liyipxirïna.

John Barr jilatax suma arunakamp iwxtʼasiri, amuytʼasiri, khuyaptʼayasiri ukat Diosan Arupar taqi chuym atinisiri ukhamat uñtʼatänwa. Ukat Diosatakis taqi chuym irnaqtʼiri, “munasir irpir chuymani ukat suma amigo” ukhamarakïnwa. Parlatapansa, arstʼäwinakapansa, oracionapansa, Jehová Diosamp wali sum apasitapa ukat taqi chuym yupaychatap uñachtʼayäna.

Wali munat jilatax chʼuspun jaytawayistu. Ukampis wiñayan wiñayapataki jakañwa katuqxi ukaw jukʼamp kusiskañaxa, jupax taqi chuymarakiw uk suyäna, parlkasas ukpun arstʼirïna. Chiqas uka suytʼäwiparjamaw wal chʼamachasirakïnxa (1 Cor. 15:53, 54). *

[Qhanañchäwi]