¿Bautisasiñatakix wawäsipkiti?

FILIPINAS markankir Carlos jilatax akham siwa: “Jiskʼa imill wawajan Diosar yupaychirïxatapatxa walpun kusista, jupas kusisirakpachawa” sasa *. Grecia markankir mä jilatax akham qillqarakitayna: “Esposajampix wali kusisitäpxtwa, kunattix kimsa wawanakajax qʼaxu wayn tawaqükasinwa Bautisasipxi. Diosar yupaychañanx sum jiltasipki, ukat kusisitaw yupaychasipkaraki” sasa.

Wawanakapan bautisasipxatapatxa, awk taykanakax wal kusisipxi. Ukampisa, awisax llakisipxarakiwa. Mä kullakax akham siwa: “Kusisitäkchiyätsa, kunanaktï wawajax lurkani ukanakatxa Diosar cuenta churañapätap yatisax llakisirakiyätwa” sasa.

Taqi wayn tawaqunakaw bautisasiñ amtañapa. Ukampis yaqhip cristianonakax inas akham amuyapxchi: “Wawajan Jehová Diosar taqi chuym yupaychatap yatisktwa, ukampis ¿wachuq juchanakar jan puriñatakisa ukat Dios nayraqatan qʼum sarnaqaskakiñatakisa wakichtʼatäpachati?” sasa. Yaqha awk taykanakax inas akham jisktʼasipxchi: “¿Wawajax kusisitati Diosar yupaychaskpachäni, jan ukax yänak munañampich apayaspachäni?” sasa. Ukampis wawanakapax bautisasiñatak wakichatäpxiti janicha uk amuytʼañatakixa, ¿Biblian kawkïr iwxtʼanakapas awk taykanakar yanaptʼaspa?

Jesucriston arkiripäpxañapawa

Qhawqha maranis maynix bautisasispa ukxa Bibliax janiw siskiti, jan ukasti, bautisasiñ munirix Dios nayraqatan kunjamsa sarnaqañapa ukwa qhanañchi. Jesusax arkirinakaparux sänwa: “Taqi akapachankir jaqinakar yatiyir sarapxam, nayar arkir tukuyapxam; bautisapxam” sasa (Mat. 28:19). Ukhamax Jesusan arkiripäxi ukakiw bautisasispa.

¿Jesusan arkiripäñax kamsañs muni? “Jesusan arkirinakapax janiw khitinakatix Jesusar iyawsapki ukanakakïkiti jan ukasti Criston yatichäwinakapar taqi chuym arkapki ukanakawa” sasaw Perspicacia para comprender las Escrituras sat librox qhanañchi. Ukhamasti, ¿waynitükasax Criston arkiripäspati? Mä  kullakax pusi tunka jila maranakaw Latinoamérica uksan misionerjam irnaqtʼaski, jupax akham siwa: “[Pä kullakajampixa] kunatsa Diosar yupaychañsa ukat paraison jakasiñsa munapxta uk sum amuytʼasxapxayäta. Ukat bautisasiñax kuna yantʼanakantï wayn tawaqükasax jikxatasipki ukanakar atipjañatakiw yanaptʼawayapxitu. Tawaqitäkasas bautisasipkstxa janiw arrepentisipkti” sasa.

Awk taykanaka, wawanakamax kunjamasa sarnaqasipki uk uñjasaw Jesusan chiqpach arkiripati janicha uk amuyapxasma. Ukatpï Bibliax akham sispachaxa: “Mä waynan chiqa sarnaqatapaxa, luratanakapatwa uñtʼasi” sasa (Pro. 20:11). Jesusan arkiripjamax jiltasipkiti janicha uk uñachtʼayañatakix kunanaksa lurasipki uk amuytʼapxañamawa (1 Tim. 4:15).

¿Kunjamatsa Jesusan chiqpach arkirïpatap yatsna?

¿Istʼasiriti? (Col. 3:20.) ¿Utan lurañanak churtax phuqiti? Jesusax 12 maranïkan ukhax awk taykapar istʼasaw sarnaqäna sasaw Bibliax qhanañchi (Luc. 2:51). Chiqas janiw khiti wawas jan pantjasisax awk taykapar istʼkaspati. Ukatpï chiqa cristianonakax Jesusat yatiqasipxañapaxa, ukhamarak “kayup arkapxaña[paxa]”. Ukat bautisasiñatakix tama taypin istʼasir wawat uñtʼatäñapawa (1 Ped. 2:21).

Akhamwa jisktʼasirakisma: ¿Wawajax taqi chuym yatiyasati “Diosan rein[op]” nayraqat thaqhaski? (Mat. 6:33.) ¿Yatiyir sarañapatakix jariyañati? ¿Diosan arunakap yatiyirjamax phuqaskiti? ¿Bibliat yatxatañ munirinakar yanaptʼañatak kuttʼaskiti? ¿Yatiqir masinakapampisa, jan ukax yatichirinakapampis Jehová Diosan Qhanañchiripat uñtʼayasiti?

¿Wawamatakix tantachäwinakar sarañax wakiskiriti? (Sal. 122:1.) ¿Yatiyañataki revistat Yatxatañataki, Taman Bibliat Yatxatañataki, Yatiyañataki Diosan Yatichäwipa, sat tantachäwinakan taqi chuymat arstʼaski? (Heb. 10:24, 25.)

¿Escuelansa, yaqha chiqansa, qʼum sarnaqañatakix jan wali masinakat jithiqtaskiti? (Pro. 13:20.) ¿Kuna kasta musicanaksa, peliculanaksa, anatañ videonaksa, ajllisi, ukat televisionansa, Internetansa kuns uñchʼukiski? ¿Arsutapansa, sarnaqatapansa, Bibliarjam sarnaqañ munatapti uñachtʼayaski?

¿Diosan Arup sumti uñtʼi? ¿Familiana Diosar Yupaychañataki Arumanx chuymapatti arstʼaski? ¿Biblian qallta yatichäwinakapat qhañachtʼaspati? (Pro. 2:6-9.) ¿Diosan Arup taqi chuymat liytʼaski, ukat Amuyasiri Chiqapa Uywatax apayankistu uka qillqatatsa yatxataskiti? (Mat. 24:45, MT.) ¿Biblian mä jiskʼa tʼaqapatsa jan ukax mä yatichäwitsa jisktʼasiti?

Diosar yupaychañan jiltaskiti janicha uk amuytʼañatakixa, uka jisktʼanakaw yanaptʼätamxa. Uka jisktʼanakat amuykiptʼasaxa, wawajax bautisasiñatakix chʼamachasiskakiñapawa sasin inas amuychïta. Maysa tuqitxa,  bautisasiñatak wakichtʼatäxatapwa amuyarakisma, kunattix Diosar katuyasxatapasa, Jesusan arkiripäxatap uñachtʼayatapas qhanäxaspawa.

Wayn tawaqux Diosaruw jachʼañchaspa

Waljaniw Diosarux qʼaxu wayn tawaqükasina, jan ukax jukʼamp sullkäkasin Diosar yupaychañ qalltawayapxi. José, Samuel, Josías ukat Jesusampit amtañäni (Gén. 37:2; 39:1-3; 1 Sam. 1:24-28; 2:18-20; 2 Cró. 34:1-3; Luc. 2:42-49). Jan ukax Felipe chachan pusi phuchhanakapat amtañäni, jupanakax profetisanakäpxänwa, ukhamasti wawatpachwa jupanakarux Diosat yatichapxpachäna (Hech. 21:8, 9).

Greciankir mä jilatax akham siwa: “Tunka payani maraniw bautisasiwayta, ukat janipuniw ukham luratajät arrepentiskti. Bautisasitajatxa pä tunka pusini maranakaxiwa, pä tunka kimsani maranakarakiw precursorjam Diosatak irnaqtʼaskta. Waynäkayäta ukhax munasir Jehová Diosaw jan waltʼäwinakar atipjañ yanaptʼawayitu. Chiqas tunka maranïsax janiw kunjamtï jichhax Bibliat yatkta ukham yatkayätti, ukampis taqi chuymaw Diosarux munasiyäta, wiñayatakiw Jupar yupaychañ munayäta. Dios pachpaw Jupar yupaychaskakiñajatakix yanaptʼawayitu, ukatwa wali kusisitätxa” sasa.

Maynitix Jesucriston arkiripjam sarnaqchixa, qhawqha maranïskpas bautisasispawa. Pablox akham sänwa: “Chuymampiwa iyawsañaxa Diosampi katuqatäñatakixa, lakampisti arsuñawa [...] qhispiyatäñatakixa” sasa (Rom. 10:10). Awk taykanaka, wawamax bautisaskani ukhaxa, familpachan amtap phuqasir uñjapxäta, ukat wal kusisipxarakïta. Ukhamasti kunas kunäskpan uka amtanakam phuqasiñapatakix chʼamachasisipkakim.

[Qhanañchäwi]

[5 janan recuadropa]

Jan sinti llakisipxamti

Wawajan bautisasiñapax wali askïniwa, ukampis llakinakax utjarakiniwa, bautisasiñax auto apnaqañatak permiso apsusiñamp sasiwa sasaw yaqhip awk taykanakax sapxi. Ukampis ¿bautisasiñansa, Diosar yupaychañans chiqapunit llakinakax utjpacha? Bibliarjamax janiw chiqäkiti. Proverbios 10: 22 qillqatanx akham siwa: “[Jehová] Tatitun bendicionapawa qamiriptayi; janiw kuna llakisiñsa ukampi chikax apayankiti” sasa. Pablox Timoteo waynar akham qillqäna: “Taqi kunäniñax Dios chuymäñanakwa utji, kunatix utjarapkistu ukampiki kusisitästan ukapacha” sasa (1 Tim. 6:6).

Ukampix janiw sañ munktanti Diosar yupaychañax janis kuna chʼamäkaspa ukhamxa. Jeremías profetat amuytʼañäni, Diosan arunakap yatiykasax walja jan waltʼäwinakanwa jikxatasïna. Ukampis taqi chuymaw Diosar yupaychäna, ukatwa akham säna: “Kunapachatix jumax nayaru parlxayista ukapachaxa, arunakamxa nayax manqʼjamwa manqʼayäta; uka arunakamaw chuymaxarux kusisiyarakïnxa, nayasti jumankarakstxaya, taqi chʼamani Dios Tatitu” sasa (Jer. 15:16). Kunjamtï Jeremiasax siskänxa, chiqa yupaychäwix kusisiñwa churistu. Ukampis Supayan apnaqat aka pachax jan waltʼäwinakakwa utjayi. Awk taykanaka, uka tuqit amuyasiñwa wawanakamar yanaptʼapxañama (Jer. 1:19).

 [6 janan recuadropa/fotopa]

¿Suytʼañapat wakisispa?

Yaqhip awk taykanakaxa, wawanakapax bautisasiñatak wakichtʼatäpchisa, janiw bautisasiñap munapkiti. ¿Kunatsa?

“Bautisasitap qhiparux jachʼa juchar purisaw tamat jaqsut uñjasispa, ukaw llakisiyitu”. Ukampis ¿qhipat bautisasitap luykuti Diosax jan cuenta maykani? Salomón reyix wayn tawaqunakarux akham siwa: “Amtasim taqi [kuntï lurkäta] ukanakatxa Diosar cuenta churañamäniwa” sasa (Ecl. 11:9). Pablox taqiniruw akham sarakïna: “Taqi maynipï Diosarux luräwinakasat cuenta churañänixa” sasa (Rom. 14:12).

Diosar yupaychirinakatxa, bautisatäskpas janisa taqiniw cuenta churapxani. Amtapunim Diosaw wawanakamar jarkʼaqaskani, janirakiw ‘chʼamanakapat jukʼampi yantʼaru antutkaniti’ (1 Cor. 10:13). Ukat “wali amuy[umpi]” sarnaqapxanixa, Diosaw yanaptʼani (1 Ped. 5:6-9). Mä kullakax akham siwa: “Bautisasipki uka waynitunakaxa, jan walinakat jithiqtataw sarnaqapxi. Wawajax 15 maraniw bautisasiwayi. Ukat jan walinakat jarkʼaqatapsa amuyarakiwa, jupa pachpaw akham situ: ‘Jehová Diosar jan istʼañax janiw chuymajan utjkiti’ sasa. Bautisatäñax chiqapar sarnaqañatakiw chʼamachtʼistu” sasa.

¿Diosar taqi chuym istʼañti wawamar yatichaskta ukat yatiqaskayat sarnaqaskta? Ukhamächi ukhax bautisasxani uka qhipatxa Diosat janirakiw jithiqtkaniti. Proverbios 20:7 qillqatax akham siwa: “Taqi kunans askïnwa chiqa jaqix jakawayi kusisiñanïpxiwa jupan wawanakapaxa” sasa.

“Wawajan yaqha amtanakap nayraqat phuqañapwa munirista.” Inas wawanakapan jachʼa yatiqañ utanakar sarapxañap munapxchispa. Chiqas wayn tawaqunakax sapak jakañatak wakichtʼatäpxañapawa. Ukampis Jehová Diosar jukʼamp yupaychapxañapatak chamañchtʼañat sipansa, jachʼa yatiqañ utanakar sarañapataki, ukat qullqi jikxatañar wiytañax jan walinakaruw puriyaspa. Amtañäni, kunjamtï Jesusax siskänxa, yaqha lurañanakax ‘jathana’, mä arunx Diosan Apnaqäwipat suma yatiyäwinakapxa janiw jiltaykaspati. Ukat sarakïnwa: “Chʼaphi taypinakar jalantat jatha misturisti akamp sasiwa: Suma arunak istʼkasinsa, sintwa llakisipxi akapach yänakatsa, qullqitsa. Taqi ukanakasti juparux atipjiwa, suma arunakasti janirakiw jupan chuymapanxa jiltkaspati” sasa (Mat. 13:22). Chiqas Diosar yupaychañat sipansa qullqi jikxatañaru nayraqat sarki ukaxa, janiw chuymapanx Diosar yupaychañax utjxaspati.

Awk taykanakax amanuki wawapan jan bautisasiñap munapki ukhaxa, wawaparuw jan waltʼayapxaspa. Irpir chuyman mä jilatax siwa: “Bautisasiñ jarkʼapxaspaxa, Diosar yupaychañanx janiw jiltxapxaspati, ayñachtʼxapxakispawa” sasa. Tamanak tumptʼir mä jilatax sarakiwa: “Diosar yupaychañ tuqitxa pächasxaspawa ukat janis Diosar yupaychañapatakix askïkaspa ukham amuyasispa. Ukat amtanakap phuqañatakix aka pacharukiw sarxapxaspa” sasa.

[Foto]

¿Universidadar sarañat nayrankañapa?

[3 janan fotopa]

Waynitükasaw yaqhipanakax Jesusan arkiripäpxatap uñachtʼayapxi

[3 janan fotonakapa]

Tantachäwinakatakiw wakichasipxi ukat arstʼapxarakiwa

[4 janan fotopa]

Awk taykaparuw istʼapxi

[4 janan fotopa]

Diosan arunakap yatiyapxi

[4 janan fotopa]

Jehová Diosat mayisipxi