Jehová Diosan ‘uwijanakapsti sum awatipxam’

“Tatitun ovejanakapsti sum awatipxam, ukanakasti jumanakar katuyatawa. Taqi munasiñampi ukxa lurapxam [...], janiw phuqha[m] sat laykukiti.” (1 PED. 5:2.)

1. ¿Pedrox nayrïr cartap qillqkäna ukhax kunjamansa cristianonakax jikxatasipxäna?

 NERÓN sat emperadoraxa, Roma markankir cristianonakar arknaqañatakix niya qalltañampixänwa, ukhaw apóstol Pedrox nayrïr cartap qillqäna. “Supayasti mä leonar uñtataw warartʼasisa” cristianonakar manqʼantañatak muyupayaskäna, ukatwa Pedrox jilat kullakanakar chʼamachtʼañ wal munänxa. Ukhamasti Supay contra saytʼasiñatakix “wali amuytʼasi[saw]” sarnaqapxañapäna ukat Dios nayraqatansa ‘jiskʼaruw tukupxañapäna’ (1 Ped. 5:6, 8). Ukhamarus mä wawakiw jakasipxañapäna. Janiw jupanakkamax ‘achjasiñsa ukat manqʼantasiñsa’ munapkaspa ukham sarnaqapxañapäkänti. Ukham lurasax ‘jupanakkamaw tukjasipxaspäna’ (Gál. 5:15).

2, 3. ¿Khiti contras nuwastanxa, ukat kuna tuqinakatsa yatxataskañäni?

² Supayax ukhamarakiw manqʼantañatak muyupayaskistu (Apo. 12:12). Ukat niyaw “[jachʼa] tʼaqhisiñanaka[s] utjarakini. Ukham tʼaqhisiñsti janiw jichhürkamax khitis uñjkiti aka uraqi luraski ukürutpacha” (Mat. 24:21). Kunjamtï nayrïr cristianonakax jupanakkam jan waltʼayasiñanakat jithiqtapkänxa, ukham lurañasarakiwa. Ukatakisti, irpir chuymaninakan yanaptʼapaw wakisi.

³ ¿Jehová Diosan ‘uwijanakap sum awatiñatakix’ kunas irpir chuymaninakar yanaptʼaspa? (1 Ped. 5:2.) ¿Kunjamsa Diosan uwijanakapar uñjapxañapa? Aka yatichäwinwa uka jisktʼanakat yatxatañäni. Ukat “jumanak taypina irnaqapki, sarayapkaraki, ukhamarak Tatitun sutipar iwxapki ukanakarux istʼapxam [jan ukax respetapxam]” siski uka iwxtʼarjamax kunjamsa phuqsna ukwa jutïr yatichäwin yatxatarakiñäni (1 Tes. 5:12). Uka yatichäwiw Supay contra saytʼañatakisa ukat jupampi nuwasiskatas jan armañatakis yanaptʼistani (Efe. 6:12).

Diosan uwijanakapsti “sum awatipxam”

4, 5. ¿Diosan tamaparux kunjamsa irpir chuymaninakax uñjapxañapa? Uk mä uñachtʼäwimp qhanañchtʼma.

⁴ Kunjam chuymampis tamar uñjapxañapa ukwa nayrïr maranakan jakir irpir chuymaninakar Pedrox iwxtʼäna (1 Pedro 5:1, 2 liytʼasiñapawa). Taman mä jilirïkasinsa, Pedrox janiw jachʼachasisax jupanakamp parlkänti, jan ukasti jupanakat maynirïkaspas ukhamwa uñjäna (Gál. 2:9). Ukham chuymampirakiw Uraqpachan Jilïri Irpirinakax Diosan tamar sum uñjapxam sasin irpir chuymaninakar iwxtʼapxi.

⁵ ‘Diosan uwijanakapax’ irpir chuymaninakar katuyatawa sasaw Pedrox säna. Ukhamasti jilat kullakanakax Jehová Diosampin Jesucristompin uwijanakapawa ukwa irpir chuymaninakax amuyapxañapäna. Ukat kunjamxay uka uwijanakar uñjapxchini ukarjamaw Diosarusa, Jesusarus cuenta churapxani uksa amuyapxañaparakïnwa. Amuytʼañäni, mä amigosax wawanakap jaytawayistaspa ukhax ¿manqʼa  churañatakis sum uñjañatakis walxay chʼamachasnaxa? ¿Usuntaspa ukhas jankʼakixay qullaysnaxa? Niya ukhamarakiw irpir chuymaninakax ‘Diosan tamap uñjapxañapatak ajllitäpxatap’ yatisipxi. Ukat Jehová Diosax ‘Yuqapan wilapampi uka tamap alasitapsa’ yatipxarakiwa (Hech. 20:28, NM). Sapa mayni uwijanakax Jesucriston wilapampi alatäpxatap janiw armapkiti. Uka uwijanakat cuenta churapxañapätap yatisaw sum uñjapxi, manqʼayapxi, jan walinakatsa jarkʼaqapxaraki.

6. ¿Biblia qillqaskän uka tiemponx kunjamsa awatirix uwijanakap uñjäna?

⁶ Biblia qillqaskäna uka tiempon kunjamtï awatirinakax uwijanakap uñjapkänxa, ukhamarakiw irpir chuymaninakax lurapxañapa. Uka tiemponxa, “lupin qhatintata, arumasti thayan thayjataw” uwijanakap awatipxirïna (Gén. 31:40). Janiw ukakïkänti uwijanakap laykux jakäwips aptʼasipxaspänwa. Davitax ukhamwa uwijanakap uñjäna, waynitükasinsa leonatsa, osotsa aparasïnwa. Uka tuqit parlkasax akham siwa: ‘Lakat katusin chʼiytʼirïyäta, jiwayañkama’ sasa (1 Sam. 17:34, 35). Uka animalanakar sinti jakʼachasisax jan axsarirïtapwa Davitax uñachtʼayäna. Uwijanakapar jarkʼaqañatakix janiw kunarus axsarkänti.

7. ¿Supayan amparapar mä uwijax jaltʼki ukhax kunjamsa irpir chuymaninakax yanaptʼapxi?

⁷ Jichhürunakanxa, kunjamsa Supayax uwijanakar manqʼantañ muni ukxa irpir chuymaninakax sum amuyapxi. Mä cristianox Supayan amparapar jaltʼki ukhaxa, Davitjamarakiw jan axsartʼas aparasipxi. Ukat Supayan amparapar jaltʼirjamäpki ukhas jankʼakiw amuytʼayapxi (Judas 22, 23 liytʼasiñapawa). Mä uwijatï usuchjatächixa, jankʼakiw chʼuqtʼapxi ukat Diosan Arupampis mä aceitempjam qullartʼapxaraki. Chiqas Diosan yanaptʼapampikiw ukham phuqapxi.

8. ¿Irpir chuymaninakax kun lurapxañapatakis jilat kullakanakar yanaptʼapxi, ukat kunjamsa uk lurapxi?

⁸ Kunjamtï awatirinakax chʼuxña pastonakaru, umas utjki ukar uwijanakap anakipkixa, ukhamarakiw irpir chuymaninakax jilat kullakanakar tamar jan faltasis sarapxañapatakix yanaptʼapxi, ukhamat “horasapar manqʼanaks”  katuqapxañapataki ukat chʼamañchtʼat jikxatasipxañapataki (Mat. 24:45). Diosar yupaychañ tuqit aynachtʼapki ukanakar yanaptʼañatakix tiempo apsusipxi ukat Diosan Arupampi chʼamachtʼasiñapatakis pacienciampiw iwxtʼapxi. Tamat saranukut mä uwijax kuttʼaniñ munki ukhasa, axsarayañat sipansa suma chuymampiw uñjapxi ukat Bibliarjam sarnaqañapatakiw yanaptʼapxi.

9, 10. ¿Diosar yupaychañ tuqit aynachtʼatanakarux kunjamsa irpir chuymaninakax uñjapxañapa?

⁹ Amuytʼañäni, usuntat uñjasisax ¿kuna kasta doctorampis qullayasiñ munsna? ¿Jan yäqas istʼistaspa ukat yaqha usutar uñjañ layku apur apuraki qullanaksa churistaspa ukampi? Jan ukax ¿taqi amuyump istʼaspa, kuna usunïtansa uk sum qhanañchtʼistaspa ukat kunjams qullasiñäni uks sarakistaspa ukampicha?

¹⁰ Uka uñachtʼäwix irpir chuymaninakan yatiqasipxañapatakiwa. Diosar yupaychañ tuqit aynachtʼat mä cristianor yanaptʼañatakixa, taqi amuyumpi istʼapxañapawa ukat Diosan “sutipxaru aceitempi” qullartʼapxañapawa (Santiago 5:14, 15 liytʼasiñapawa). Diosan Arupax kunjamtï bálsamo de Galaad sat aceitex qullartʼkixa ukhamarakiwa (Jer. 8:22; Eze. 34:16, NM). Diosan Aruparjam sarnaqasaxa, aynachtʼatanakax chʼamachtʼataw jikxatasipxani. Irpir chuymaninakax aynachtʼat jilat kullakanakar istʼapki ukat jupanakamp chik Diosat mayisipxi ukax ¡wali askipuniwa!

“Taqi munasiñampi ukxa lurapxam”

11. ¿Diosan tamapar taqi chuyma yanaptʼañatakix kunas irpir chuymaninakar yanaptʼi?

¹¹ Diosan tamapar uñjkasax kunsa lurapxañapa ukat kunsa jan lurapxañapäki ukwa Pedrox irpir chuymaninakar amtayäna. Nayraqatxa, “taqi munasiñampi ukxa lurapxam [...], janiw phuqha[m] sat laykukiti” sasaw chʼamachtʼäna. ¿Jilat kullakanakapar taqi chuyma yanaptʼañatakix kunas irpir chuymaninakar yanaptʼañapäna? ¿Jesusan uwijanakapar awatiñatakisa manqʼayañatakis kunas Pedrorux yanaptʼäna? Taqi kunat sipansa Jesusar wal munasitapaw yanaptʼäna (Juan 21:15-17). Irpir chuymaninakax munasiñatwa ‘jupanakpachatak [jan] jakxapxiti’, jan ukasti “jupanak layku jiwasina jaktki ukataki[w]” jakapxi (2 Cor. 5:14, 15). Ukat Jehová Diosaru, jilat kullakanakar wal munasipxatap laykurakiw tamar yanaptʼañatakix chʼamachtʼasipxi ukat qullqsa, tiempsa apsusipxaraki (Mat. 22:37-39). Ukampis taqi chuymaw irnaqtʼapxi janiw jariyatakix phuqapkiti.

12. ¿Kunjam chuymampis Pablox jilat kullakanakar yanaptʼäna?

¹² ¿Kunjamsa irpir chuymaninakax chʼamachtʼasipxi? Pabljamarakiw taqi chuym jilat kullakanakar uñjapxi, jupax Jesusat yatiqasisaw ukham luräna (1 Cor. 11:1). Pablosa ukat jupamp chik sarir jilatanakasa, Tasalonicankir jilat kullakanakarux wal munasipxäna, ‘janiw Diosan arunakapak churañ munapkänti, jan ukasti pachpa jakañanakapsa churapxaspänwa’. Ukat “kunjämatix mä taykax wawanakaparu uywi, uñjaraki” ukhamwa jilat kullakanakar uñjapxirïna (1 Tes. 2:7, 8). Chiqas mä warmix asu wawapar wal munasitap laykux chika arumpachas ñuñtʼayakiwa, Pablox uk sum yatirakïna.

13. ¿Kunjamsa mä irpir chuymanix taman lurañanakap phuqaspa ukat familiaparus yanaptʼarakispa?

¹³ Irpir chuymaninakaxa, tamar uñjkasax janirakiw familiapat armtʼasipxañapäkiti (1 Tim. 5:8). Amtapuniñäni, esposapampi ukat wawanakapampïskañat sipansa, taman lurañanakapampi sum phuqañatakiw tiempo apsusipxi. Familiaparu ukat jilat kullakanakar yanaptʼañatakixa, Familiana Diosar Yupaychañataki Aruma satäkis ukaruw jilat kullakanakar jawstʼapxaspa. Ukhamwa irpir chuymanjam irnaqtʼir Masanao sat jilatax Japón markan familiapamp chikax luri. Jupasti walja maranakaw solter jilat kullakanakarusa ukat Diosar yupaychañan sapäpki ukanakarus jawstʼi. Ukatxa, utapar sarapkäna uka jilatanakat yaqhipax irpir chuymanjamaw irnaqtʼasipki ukat Masanao jilatjamarakiw lurapxi.

 “Ni qullqi munañ laykukisa, jan ukasti taqi chuyma ukxa lurapxam”

14, 15. ¿Kunatsa irpir chuymaninakax “qullqi” munañamp jan apayasipxañapäki, ukat kunjamsa Pablot yatiqasipxaspa?

¹⁴ Irpir chuymaninakaxa, janiw “qullqi munañ laykukisa, jan ukasti taqi chuyma[w]” tamar uñjapxañapa sasaw Pedrox säna. Lurañanakap phuqañatakix walja tiempsa apsusipkchixa, janiw qullq mayipkiti. Ukampis “qullqi muna[ñxat]” iwxtʼañax Pedrotak wakiskirïnwa. Tamar uñjatap laykux qullqi mayiñxa maynix munakispawa. Chiqas ukhamwa “jachʼa Babilonian” pastoranakapax qamirïsin uñachtʼayapxi, ukampis tamapankirinakax wali pisinwa jakasipxi (Apo. 18:2, 3). Irpir chuymaninakax janipuniw ukham lurapxañapäkiti.

¹⁵ Jan ukasti apóstol Pablot yatiqasipxañapawa. Apostoläkchïnsa, Tesalónica markankir jilat kullakanakatakix janiw ‘mä llakïñ munkänti’. Antisas “uruy arumaw irna[qäna]” (2 Tes. 3:8). Irpir chuymaninakasa, tamanak tumptʼir jilatanakasa, waljaniw ukham lurapxaraki, ukasti yatiqaskayarakiwa. Jilat kullakanakan utapan katuqtʼatäpkchisa janiw jupanakatakix mä ‘llakïpkiti’ (1 Tes. 2:9).

16. ¿Irpir chuymaninakax kunjamsa tamar “taqi chuyma” uñjapxarakispa?

¹⁶ Irpir chuymaninakax taman lurañanakapxa “taqi chuyma[w]” phuqapxaraki. Kusisitaw jilat kullakanakar yanaptʼañatakix chʼamachtʼasipxi. Wals yanaptʼañ munapkchixa, kuntï jilat kullakanakax lurirjamäpki ukakwa mayipxi ukat janiw atip atip Diosar yupaychapxañapatakix wiytapkiti (Gál. 5:26). Taqi jilat kullakanakan jan kipkäpxatap yatipxiwa, ukat kusisit chuymampi Diosar yupaychapxañapatakiw sapa maynir yanaptʼapxi.

Jan jachʼa jachʼa tukupxamti, jan ukasti yatiqaskay sarnaqapxam

17, 18. 1) ¿Kunatsa apostolanakatakix altʼat chuymanïñax chʼamakïnxa? 2) ¿Apostolanakan pantjasitapat kunsa yatiqsna?

¹⁷ Kunjamtï uñjktanxa, tamax janiw irpir chuymaninakankkiti, jan ukasti Jehová Diosankiwa, janiw uk armapxañapäkiti. Ukatwa irpir chuymaninakax ‘Diosan tamaparux’, (NM) qhuru chuymamp jan uñjapxañapäkiti (1 Pedro 5:3 liytʼasiñapawa). Jesusan apostolanakapaxa, awisax askip thaqhasakiw jilirïñ munapxäna. Uka tiemponkir autoridädanakjamaw jilirïñ munañampix apayasipxäna (Marcos 10:42-45 liytʼasiñapawa).

¹⁸ Jichha tiemponxa, mä cristianotix taman “jilirïña munchi ukaxa”, kunatsa uk amti uk sum amuytʼasiñapawa (1 Tim. 3:1). Irpir chuymaninakax taqi chuymaw akham amuytʼasipxañapa: “¿Apostolanakjamat pantjasiskpachätxa?” sasa. Jupanakax jilirïñ wal munapxäna, irpir chuymaninakax ukhamarakïspawa. Ukatwa wal amuyasipxañapa.

19. ¿Jan walinakat tamar jarkʼaqañax wakiski ukhax kunsa irpir chuymaninakax amtapxañapa?

¹⁹ Chiqpachansa, awisax irpir chuymaninakax wali chʼamampiw saytʼasipxañapa. Sañäni, kunapachatï “qamaqinakax ovejanakar tukjañataki jutapkixa” ukhaw wali chʼamampix saytʼasipxañapa (Hech. 20:28-30). Pablox akham sasaw Titorux iwxtʼäna: “Akanakwa jumax yatichañamaxa, [...] taqi jilïr kankañampi iwxtʼasa [jan ukax chiqañchasa]” sasa, irpir chuymaninakax uka iwxtʼarjam phuqañatakis chʼamampirakiw saytʼasipxañapa (Tito 2:15). Ukampis chiqañchañ wakiski ukanakarux respetompi ukat munasiñampiw chiqañchapxañapa. Chuymar purtʼkir iwxtʼañatakixa,  janiw qhuru chuymampi kʼumiñax wakiskiti, jan ukasti munasiñampi amuytʼayañaw jukʼamp yanaptʼi, uksti irpir chuymaninakax yatipxarakiwa.

20. ¿Jesusan sarnaqäwipat yatxatañax kunjamsa irpir chuymaninakar yanaptʼi?

²⁰ Ukat Mateo, Marcos, Lucas, Juan libronak liytʼasaxa, irpir chuymaninakax Jesusat yatiqasisin Diosan tamar munasiñampi uñjañatakiw chʼamachasipxi (Juan 13:12-15). Aka Uraqinkkasax kunjamsa Jesusax arkirinakapar yatichäna ukax chuymar purtʼkiriwa. Arkirinakapatakix ukhamarakïnwa, ukatwa Suma Yatichirin altʼat chuymanïtap uñjasax jupat yatiqasiñatak chʼamachasipxäna ukat “maynix jupat jukʼamp sumäkaspas” ukhamwa amuyxapxarakïna (Fili. 2:3). Jichhürunakanxa, irpir chuymaninakax Jesusatwa yatiqasipxaraki, ukat “ovejanakarux mä suma yatichäwi” churañ munapxaraki.

21. ¿Kuna suytʼäwis irpir chuymaninakatakix utji?

²¹ Pedrox kuna suytʼäwis jupanakatakix utjki uka tuqit parlasaw iwxtʼañ tukuyäna (1 Pedro 5:4 liytʼasiñapawa). Alaxpachar sarañatak ajllit irpir chuymaninakaxa, Jesucristomp chikaw alaxpachan “wiñay corona” katuqapxani. Ukat ‘yaqha uwijanaka’ taypinkirinakasti, “awatirinakan jachʼa jilïripax” Apnaqxani ukhaw Uraqpachan Diosan tamaparux uñjapxani (Juan 10:16). Tama irpirinakarux kunjamanakatsa sapa maynix yanaptʼsna ukwa jutïr yatichäwin yatxatañäni.

Amtañataki

• ¿Diosan tamaparux sum uñjapxam sasin irpir chuymaninakar Pedron iwxtʼatapax kunatsa wakiskirïnxa?

• ¿Diosar yupaychañ tuqit ayñachtʼatanakarux kunjamsa irpir chuymaninakax yanaptʼapxañapa?

• ¿Diosan tamapar sum uñjañatakix kunas irpir chuymaninakar yanaptʼi?

[Jiskt’anaka]

[21 janan fotopa]

Nayra tiempon awatirinakjamaw irpir chuymaninakax Diosan tamapar uñjapxi