¿Diosan samarañapar mantxtati?
¿Diosan samarañapar mantxtati?
“Diosan arupasti jakaskiwa, jachʼa chʼamanirakiwa.” (HEB. 4:12.)
1. ¿Diosan samarañapar mantañatakix kun lurañasasa, ukat kunatsa uk lurañax chʼamakïspa?
KUNJAMTÏ pasïr yatichäwin yatiqtanxa, Diosan samarañapar mantañatakix istʼasirïñasawa ukat Diosan amtaparjam sarnaqañasawa. Ukhamarus ukarjam phuqañax chʼamakïspawa. Amuytʼañäni, kunanaktï lurañ munktan ukanak apanukuñ Diosax maykistu ukhaxa, istʼasirïñax chʼamakïspawa. Ukhamächi ukhaxa, janiw ‘jankʼaki istʼasir’ jaqïtas uñachtʼayksnati (Sant. 3:17, NM). Kunanakansa istʼasirïtas uñachtʼaysna, mä arunxa, kunjamsa Diosan amtaparjam jakañ munatas uñachtʼaysna ukwa aka yatichäwin yatiqaskañäni.
2, 3. ¿Jehová Diosar kusisiyañatakix kun lurañasasa?
2 ¿Bibliarjam iwxtʼapkistu ukhax jankʼakit ukarjam lurtanxa? Amuytʼañäni. Jehová Diosax ‘taqi markanakan suma munkañanakapxa’ mayaruw tantachthapiñ muni sasaw Biblian qhanañchi, mä arunxa, chiqapar sarnaqirinakarux Jehová Diosax wal munasi, ukatwa tantachthapiñ muni (Ageo 2:7, NM). Chiqas Bibliat janïr yatxatkayätan ukhax niya taqiniw munañasar jan walinak lurayätanxa. Ukampis Jehová Diosaru ukat Jesusar wal munasitas laykuw jan wali amtanaksa, luratanaksa apanuktanxa. Ukat Jehová Diosar kusisiyañatakix wal chʼamachaspachätanxa ukat Juparus wal mayisirakpachätanxa. Ukhamatwa Jehová Diosar katuyasisin bautisastanxa (Colosenses 1:9, 10 liytʼasiñapawa).
3 Ukhamarus janiw bautisasxtan ukaruk tukuskiti. Jan ukasti, jucharar jaqjamax chʼamachasiskakiñasawa. Jiwasatï jan qarjtas Jehová Diosatakjam sarnaqañatak chʼamachasiskakiñäni ukhaxa, Jupax bendicistaniwa.
Iwxtʼanak katuqasiñäni
4. ¿Kunjamanakatsa Jehová Diosax iwxtʼanakapamp yanaptʼistu?
4 Aynachtʼaykistu ukanakamp jan atipayasiñatakixa, nayraqat kunanakas aynachtʼayistu ukanak yatiñasawa. Ukhamarus uk yatiñatakix ¿kunjamsa Jehová Diosax yanaptʼistu? Mä arstʼäwi tuqiw amuytʼayistaspa, jan ukax Bibliat apstʼat mä qillqatampiw chuymar purtʼistaspa. Ukampis uka iwxtʼanakapat jan amuykañäni ukat janiraki ukarjamas sarnaqañäni ukhaxa, tamankir jilat kullakanakampiw yanaptʼistaspa (Gálatas 6:1 liytʼasiñapawa).
5. ¿Kunatsa irpir chuymaninakax jilat kullakanakar yanaptʼapxañapa, ukat iwxtʼapkistu ukhax kunsa jan lurañasäki?
5 Kunapachatï maynix suma arunakampi iwxtʼkistu ukhaxa, awisax jiwasjam pantjasirïtap yatisax janikiw sum katuqasksnati. Ukampis jan armañäniti, Gálatas 6:1 qillqatarjamaxa, Jehová Diosaw irpir chuymaninakarux “yanaptʼapxañamaw [jilat kullakanakamaruxa]. Uksti llampʼu chuymampi lurapxañamawa” sasin iwxtʼi. Ukhamax jiwasatï iwxtʼanakap sum katuqasiñänixa, Dios nayraqatan wali munatäñäniwa. Chiqas Jehová Diosar mayisktan ukhaxa, qhanwa jan wali luratanakas arsustanxa. Ukampis mä irpir chuymanix jan wali luratasat qhanañchkistu ukhaxa, janikiw juchas uñtʼasiñ munxsnati. Ukat yanaptʼayasiñat sipansa, janiw munasiñamp iwxtʼkituti sakiw chuym usuyasxsna, panjasitasax janis kunäkaspa ukham uñjaraksna, jan ukax janikiw juchas uñtʼasiñ munxsnati (2 Rey. 5:11). Ukat kunapachatï isisiñatsa, kʼachachasiñatsa, qʼumachasiñ tuqitsa, jan walinakamp kusistʼañatsa, jan ukax mä familiaran jan wal sarnaqatapat iwxtʼapkistu ukhasa, inas colerassna, jan ukax arsutasampis irpir chuymanir chuym ustʼaysna. Ukampis sumpach amuytʼastan ukhakiw jan wal luratas amuyastanxa ukat jilatan iwxtʼatapas wali askïtap amuyasiraktanxa.
6. ¿Kunjamsa Bibliax “lupʼïwinaksa, chuyman amtäwinakapsa” qhanstayi?
6 Aka yatichäwi qalltanxa, Bibliat qillqaqat jiskʼa tʼaqax akham siwa: “Diosan arupasti [...] jachʼa chʼamanirakiwa” sasa. Chiqpachansa, Diosan Arupax jan walinak apanukuñatakiw yanaptʼawayistu, ukat janïr bautisaskayätan ukhasa, uka qhipatsa yanaptʼaskakistuwa. Uka pacha qillqatanxa Apóstol Pablox akham saskakiwa: “Diosan arupasti [...] almampir ajayumpirux jukʼamp manqhakamaw puri, lupʼïwinaksa, chuyman amtäwinakapsa qhanstayarakiwa” sasa (Heb. 4:12). Uka qillqatarjamaxa, ‘alma’ sasinxa, kunatix uñjatäki ukanakat parlaski. Ukat ‘ajayu’ sasinxa chuymas manqhasat parli, mä arunxa, kunjam jaqïtansa uka tuqitwa parlaski. Diosan arunakapat yatxatasax kunsa Diosax mayistu uk sum amuyastanxa, ukampis yatiqatarjam istʼasktanti janicha ukaw kunjam jaqïtansa uk qhan uñachtʼayi, ukwa Pablox uka arunakampix qhanañchañ munäna. ¿Jiwasat kamsasirakispasa? ¿Kunatï chuymasan utjki ukxa qhanti luratanakasamp uñachtʼaytanxa? (Mateo 23:27, 28 liytʼasiñapawa.) Ukhamax kunsa akham jan waltʼäwinakan uñjasisax lursna uka tuqit yatxatañäni.
Jehová Diosan markapamp sarnaqapxañäni
7, 8. 1) ¿Kunatsa judionakat jutir cristianonakax Moisesar churat Leyinakarjam phuqañ munasipkakïna? 2) ¿Kunatsa Jehová Diosan amtap contraw sarnaqasipkäna sasin sistanxa?
7 Proverbios 4:18 qillqatat waljaniw amuypachätanxa. Ukan akham sasaw qhanañchi: “Aski jaqinakan sarnaqäwinakapasti willjta qhanjamawa; phuqhatpach qhantañkamaw jukʼat jukʼat qhanti” sasa. ¿Kunsa uka arunakat amuytanxa? Tiempompix cristianjamax jukʼamp sumwa sarnaqañasa ukat Jehová Diosan amtanakapsa jukʼamp sumwa amuyañasaxa ukwa uka arunakax amuytʼayistu.
8 Kunjamatï pasïr yatichäwin uñjaniwayktanxa, Jesusax jiwxäna uka qhipatxa, judionakat jutir walja cristianonakaw Moisesar churat Leyinakarjam phuqañ munasipkakïna (Hech. 21:20). Diosan amuytʼayat qillqatapanxa, janiw uka Leyinakar istʼañax wakisxiti sasaw Pablox qhanañchäna, ukampis yaqhipanakax janiw istʼasipkänti (Col. 2:13-15). ¿Kunatsa jan istʼapxäna? Jupanakax Moisesar churat Leyinakarjam mä qhawqsa phuqañänixa, janiw judionakax uñisxistaniti sasaw amuyapxäna. Pablox Hebreonakar apaykäna uka cartanxa, Diosan amtap contra sarnaqasipkakïtaxa, janiw Jehová Diosan samarañapar mantapkätati sasaw qhanañchäna (Heb. 4:1, 2, 6; Hebreos 4:11 liytʼasiñapawa). * Ukhamax Jehová Diosamp katuqatäñatakixa, kunjamsa Jupax markapar irpaskäna ukwa amuyapxañapäna.
9. ¿Biblian yatichäwinakapax jukʼamp qhanañchaski ukhax kunjamsa katuqtanxa?
9 Kunjamsa jichhürunakan Biblian yatichäwinakapax jukʼamp qhanañchasi ukanaks uñjaraktanwa. Uka qhanañchäwinakax Amuyasiri Chiqapa Uywatar jukʼamp atinisiñatakiw yanaptʼistu. Chiqas Uraqpachan Jilïr Irpirinakaxa, Amuyasiri Chiqapa Uywatan sutipxaruw irnaqapxi, uk sum yattanxa, ukat kunapachatix mä yatichäwit uñakiptʼañasa jan ukax askichañas wakiski ukhaxa, jan pächasisaw uk lurapxaraki, ukat janirakiw kʼumiyasiñsa axsarapkiti. Uka jilatanakatakix taqi kunat sipans Jehová Diosan amtap phuqasiñapatak yanaptʼañaw nayranki. ¿Jiwasat kamsasirakispasa? ¿Biblian yatichäwinakapax jukʼamp qhanañchaski ukhax kunjamsa katuqtanxa? (Lucas 5:39 liytʼasiñapawa.)
10, 11. ¿Diosan Arupat yatiyañax mayjtʼayasxäna uka tiempotx kunsa yatiqtanxa?
10 Yaqha tuqit jichhax amuytʼañäni. Khä 1800 maranak tukuyaru ukat 1900 maranak qalltanxa, Bibliat Yatiqirinakatxa, yaqhipax taman sum arstʼasaw Diosan Arupat jaqinakar yatichsna sasaw amuyapxäna. Ukat taqin uñjkat arstʼañax jupanakatakix wali askïnwa, yaqhipanakasti tantachasirinakan jachʼañchatäsax wali kusisitaw jikxatasipxäna. Ukampis mä tiemponx Jehová Diosan munañap sum amuykiptʼasaxa, Diosan Arupat yatiyañatakix utat ut yatiyiriw mistupxäna. Ukat kunapachatï ukham yatiyasxäna ukhaxa, yaqhip suma arstʼirinakax janiw ukamp phuqañ munapkänti. Jupanakax Dios chuymäpkaspasa ukat Diosatakis wal irnaqtʼirïpkaspa ukham uñachtʼayapxäna. Ukampis niyak Jehová Diosan munañap qhanañchxataxa, kunjam jaqïpxisa, kunjam chuymanïpxisa, kunjam amtanïpxisa, taqi ukanakax qhanaw amuyasxäna. Ukham jaqïpxatapatxa Diosamp janiw sum uñjatäxapxänti, ukat jupanak pachpaw Diosan markapats mistxapxäna (Mat. 10:1-6; Hech. 5:42; 20:20).
11 ¿Jehová Diosar taqi chuym yupaychirinakax kuns lurapxäna? Chiqas qalltanxa, utat ut yatiyir sarañax waljanitakiw chʼamänxa. Ukampis istʼasirïpxänwa, ukatwa utat ut yatiyir sarapxäna. Ukatxa, jukʼat jukʼatwa jan axsarxapxänti ukat Jehová Diosax jupanakar bendicirakïnwa. Kunapachatï yatiyañatak iwxtʼanakax purinkistu ukhax ¿kunjam chuymampis jumax katuqasta? ¿Jankʼakit ukarjam phuqaskta?
¿Familiarasax Diosat jithiqtxani ukhax kamachañänisa?
12, 13. 1) ¿Kunatsa Jehová Diosax jachʼa juchanak lurapki ukat jan arrepentisipki ukanakarux tamat jaqsupxam sasin sispacha? 2) ¿Kuna jan waltʼäwinakansa yaqhip awk taykanakax jikxatasipxi?
12 Kunjamtï yattanxa, khitinakatï jañchi tuqitsa, sarnaqäwinsa ukat Diosar yupaychañans qʼum sarnaqapki ukanakakiw Jehová Diosamp sum apasipxi (Tito 2:14 liytʼasiñapawa). Chiqas awisanakaxa, Diosan kamachinakaparjam sarnaqañax wali chʼamäspawa. Amuytʼañatakix mä casarat chacha warmit parltʼañäni. Jupanakan mä sapa wawapaw Diosan markapat mistxi, ukat awk taykapampisa ukat Jehová Diosampisa janiw sum apasiñ munkiti, jan ukasti “mä jukʼa tiempo juchanakan kusis[ist]” sarnaqañ amtxi, ukhamatwa tamat jaqsut uñjasiwayi (Heb. 11:25).
13 Awk taykapax wali llaktʼataw jikxatasipxi. Chiqas jupanakax yatipxiwa, Biblian akham satapxa: “Jan chikachasipxamti khititix iyawsirïkasina wachuqa juchan sarnaqaski, michʼasiski, idolonakar yupaychaski, arunak apnaqaski, machaski, lunthatasiski ukanakampixa. Janirakiw ukanakampix manqʼapxañamäkisa” sasa (1 Cor. 5:11, 13). “Khititix iyawsirïkasina” siski uka arunakaxa, utan jan jakapki uka familiaranakat kunwa parlaski, uksa yatipxarakiwa. Ukhamasti wawapar wal munasipxatap laykuxa akham inas amuyapxchispa: “Janipun chikachasxañäni ukhax ¿kunjamarak Diosan markapar kuttʼaniñ yanaptʼañänisti? ¿Janipunit mä jukʼas jupamp parlañax wakiskaspa?” sasa. *
14, 15. ¿Tamat jaqsutarux kunjamsa uñjapxani uk amtañatakix kunsa awk taykanakax jan armapxañapäki?
14 Kunjamtï uka awk taykanakax jikxatasipki ukhamarakiw jiwasax jikxatastanxa. Janiw jupanakax ukhaman uñjasiñatakix juchanïpkiti, jan ukasti, wawapaw arrepentisiñat sipansa jan wali thakir saranukuñ amtawayi. Ukat ukham lurasax janiw familiapampis tamampis sum apasxaniti uk yatkasaw uk lurañ amtawayi. Ukatwa awk taykapax jan kamachtʼirjam wali llakit jikxatasipxi.
15 Ukampis Jehová Diosarut istʼapxani janicha uksa awk taykax amtañaparakiwa. Ukat awisax familia tuqit wawapamp parlañax wakisispawa. Ukampis ¿uka amtanikit wawapamp parlañax jan wakiskani ukhas parlxapxani? Ukat kun lurañs amtapxani ukhaxa, uka tuqit kamsis Jehová Diosax uk janiw armapxañapäkiti. ¿Kuna amtampis Jehová Diosax juchapat jan arrepentisirinakar tamapat jaqsuñ amtawayi? Markapan qʼumäñapatakiwa, ukat inas juchachasirir arrepentisiñ yanaptʼarakchispa. ¿Kunjamsa awk taykanakax Diosan uka amtap phuqasiñapatakix yanaptʼapxaspa?
16, 17. ¿Kunsa Aarón chachat yatiqtanxa?
16 Moisesan Aarón sat jilapax ukhamanwa uñjasïna. Kunapachatï Nadab ukat Abiú wawanakapax jan luqtañakäna uka incienso luqtapkäna ukhaxa, Jehová Diosax jiwarayänwa. ¡Janipuniw mayamps parlxäti ni jikisxäsa sasaw awkipax wal llakispachäna! Ukampis janiw ukakïkänti. Aaronan mayni wawanakaparuxa akham sasaw Jehová Diosax säna: “Jan jichhax ñikʼutanakamsa jararasipxamti [...], ukhamata usuyasitanakama uñachtʼayañatakixa, ukataraki jumanakamppacha jiwarasipkasma, Tatitusti aka markxaru colerasiñapsa wartasinkarakispa” sasa (Lev. 10:1-6). ¿Kunsa uka sarnaqäwit yatiqtanxa? Familiaranakar munasiñat sipansa, Jehová Diosar munasiñaw nayrankañapa, yamas juchanakap jan arrepentisipki ukhax jukʼampïñapawa.
17 Jichhürunakanxa, Diosax kamachip pʼakintirinakarux janiw ukspach jiwaykiti, jan ukasti, munasiñapatwa juchanakapat arrepentisipxañap suyaski. Chiqansa, juchapat jan arrepentisitap laykuw mä wawax tamat jaqsut uñjasi. Ukampis awk taykatix wawapamp jan wakiski ukhas chikachasiskakini ukhax ¿kamachaspasa? ¿Jehová Diosax Juparus yantʼañ munapkaspa ukham janit amuykaspa?
18, 19. Kunjamsa tamat jaqsut familiaranakar uñjasiñapa ukxa, qhanwa Jehová Diosax iwxtʼistu, ¿ukarjam phuqir cristianonakax kuna bendicionanaksa katuqapxi?
18 Familiaranakajasa amigonakajasa janipuniw nayampix parlapkänti ukaw tamar kuttʼañatakix yanaptʼitu sasaw tamat jaqsutapkäna ukat wasitamp kuttʼanir jilat kullakanakax sapxi. Ukhamarakwa tamar kuttʼanir mä tawaqux säna. Jupasti, “kunjamtï tamat jaqsutanakar uñjañäki ukarjamaw jilajax phuqäna” sasaw mä carta tuqix irpir chuymaninakar qillqäna. Ukat jilajar “Diosan kamachinakap taqi chuym phuqir uñjañaw tamar kuttʼaniñatakix yanaptʼitu” sasaw jupax sarakïna.
19 Kunjamtï aka yatichäwin uñjawayktanxa, jan walinakarux janiw chuymasamp apayasiñasäkiti ukat Diosan kamachinakap phuqañax chʼamäkchisa, ukat jan walinakar kunjam saykatañas Diosakiw yatichistaspa, ukatwa taqi chuym Jupar istʼañasaxa.
“Diosan arupasti jakaskiwa”
20. ¿Kunjamsa Hebreo 4:12 qillqatax pä tuqit amuyasispa? (Qhanañchtʼäwip uñxattʼäta.)
20 Kunapachatï apóstol Pablox Hebreos 4:12 qillqatan “Diosan arupasti jakaskiwa” siskäna ukhaxa, janiw Bibliatpun parlkänti. Jan ukasti, kuna bendicionanaktï jutïrin Diosax churkistani taqi ukanakatwa parlaskäna. * Ukat Diosan arsutanakapax janiw inamay arunakakikïti jan ukasti phuqasipuniwa sañwa munarakïna. Jehová Diosax uka tuqit akham sarakïnwa: “Arunaka[ja]xa, janiw nayan ukarux chʼusaki jan kun lurasax kuttankaniti [...], kuntix nayax siskta ukwa phuqharaki” sasa (Isa. 55:11). Ukhamax kunanaktï phuqasiñap munktan ukanakax jan jankʼak phuqasxani ukhax janiw llakisiñasäkiti. Jehová Diosax ‘irnaqaskakiwa’ ukat amtap phuqasiñapkamax irnaqaskakiniwa (Juan 5:17).
21. ¿Chuymankipstat jilat kullakanakarux kunjamsa Hebreos 4:12 qillqatax yanaptʼi?
21 ‘Walja jaqinakat’ uñtʼatäpki ukanakaxa, walja maranakaw Jehová Diosar luqtasipki (Apo. 7:9). Ukat jupanakatxa, janiw aka ñanqha pachan chuymankipstañkam jakañ amtapkänti, Ukampis jupanakax janiw aynachtʼapkiti (Sal. 92:14). ¿Kunats ukhamäpacha? Kunjamtï yatktanxa, “Diosan arupasti jakaskiwa” siski uka arunakaxa janiw jupanakax armapkiti, ukhamarus Jehová Diosax jichhakamaw amtanakap phuqasiñapatakix irnaqaski, uksa yatipxarakiwa. Chiqas Jehová Diosax wal amtanakap phuqasiyañ muni, ukat jiwasax phuqasiñap munaraktan ukhax wal kusisiraki. Ukat kunjamsa amtapax phuqasini ukat kunjamsa markapax uka amtaparjam sarnaqaskakini uka tuqitx sum Jehová Diosax yati, ukatwa paqallqu urupankasax Jupax jichhakam samaraskaki. Kunjamtï uñjktanxa, taqi jaqinakaw Diosan samarañaparux mantapxaspa. ¿Jumax Diosan samarañapar mantaraktati?
[Qhanañchäwinaka]
^ Judionakar pʼiqtʼapkäna ukanakatxa, waljaniw Moisesar churat Leyinakarjamax phuqapxäna. Ukampis Jesusax jutkäna ukhax janiw Mesiasarjam katuqapkänti. Ukat kunjamasa Diosax amtap phuqaskäna uks janirakiw yatiñ munapkänti.
^ Uka tuqit jukʼamp yatxatañatakixa,“Diosan munasiñapan jakasipxañäni” siski uka librotwa 207 janat 209 janakam uñxattʼäta.
^ Jichha tiemponxa, Diosax Biblia tuqiw parlistu, ukhamatwa jakäwisanx kuna jan walinaks apanuktanxa. Ukhamax Pablon Hebreos 4:12 qillqatan qhanañchatapaxa, Bibliampitwa parlaskäna.
¿Jumax amtasktati?
• ¿Diosan samarañapar mantañatakix kun lurañasasa?
• ‘Diosan Arupat’ liytʼasax kun lurañassa Diosax muni uk amuyasax ¿kunjamsa Jupar kusisiyañ munatas uñachtʼaytanxa?
• ¿Kunatsa Diosar istʼasiñax wakisi, ukat kunapachas Diosar istʼasirïtas uñachtʼaysna?
• ¿Kunjamsa Hebreo 4:12 qillqatax pä tuqit amuyasispa?
[Jiskt’anaka]
[31 janan fotopa]
Awk taykapax wali llaktʼataw jikxatasipxi
