Aka revista liytʼirinakan jisktʼäwinakapa

Mesiasat parlir qhawqha profecianakas Hebreo Arut Qullan Qillqatanakan utji, ¿uk yatsnati?

Hebreo Arut Qullan Qillqatanak yatxatktan ukhaxa, Jesucriston phuqasir walja profecianakwa jikxattanxa. Kawkitsa Mesiasax jutañapäna, kunjamsa Israel markan uñstañapäna, kunanaksa lurañapäna, kuna jan walinakans jikxatasiñapäna ukat kunjams Jehová Diosan amtap phuqañatakix irnaqañapäna taqi ukanakwa uka profecianakax yatiyäna. Uka profecianakax Jesusan Mesiasätap sum uñtʼañwa yanaptʼistu. Ukampis ¿qhawqha profecianakapunis Mesiasar phuqasïna?

Jesucristor phuqasir profecianakatxa qhawqhapunis utji ukax janiw yatiñjamäkiti. Nayra rabinonakan qillqatanakapanxa 456 jiskʼa tʼaqanakaw Mesiasan phuqasi sasaw qhanañchasi sasinwa mä qillqatax saraki (Comentario bíblico histórico de Alfred Edersheim). Ukampis uka 456 qillqatanak sum uñakipasinxa, pächasiñjamawa, kawkïrinakapunis Jesucristor phuqasi ukax janiw sum yatisxiti. Génesis 8:11 qillqatan utjki uka profeciax Mesiasarus phuqaskaspa ukhamwa nayra judionakax amuyapxäna. Jupanakax akham sapxänwa: “Mesiasan Montepatwa palomax olivo laphi achunitayna” sasa. Ukat Éxodo 12:42 qillqatat akham amuyapxarakïna: “Kunjamatï Moisesax wasarat mistunkänxa, ukhamarakiw Mesiasax Roma markat jutañapäna” sasa. Ukampis Bibliat tuqit yatxattʼat walja jaqinakax mayj amuyapxi, uka qillqatanakax janiw Jesucristor phuqaskaspati sasaw sapxi.

Ukhamarus Jesucristor chiqapuni phuqaskäna uka profecianak jaktʼañ munsna ukhax chʼamäspawa, kunattix janiw phuqatpach yatiñjamäkiti. Uka tuqit Isaías 53:2-7 qillqat uñjañäni, ukanx akham sasaw Mesías tuqit qhanañchaski: “Janiw jupax sumäkänti, [...] jaqinakax juparux jiskʼachapxänwa, apanukupxarakïnwa. [...] Ukampis jupax jiwasan tʼaqhisiñanakas aptʼatäskänwa, pachpa ayquñanakaswa apxäsiskänxa. [...] Ukampis jupax jiwasan Diosasataki saytʼasitas laykuw chhuxriñchjatänxa [...]; khariñ ovejar uñtatwa jiwayañatak apapxäna” sasa. Ukhamasti, ¿aka chiqanxa mä profeciakit utji jan ukax walja profeciach utji?

Jichhax amutʼarakiñäni Isaías 11:1 qillqatata, ukanxa akham siwa: “Uka troncox Isaí chachawa, jiskʼa aliw chʼichsu (jiltanini), mä aliw saphinakapatxa chʼichtanirakini” sasa. Ukat 10 jiskʼa tʼaqapansti niya ukhamaraki parli, ukat pachpa arump qillqtʼatawa. Ukhamasti, ¿panpach jiskʼa tʼaqanakxa yaqha yaqti jakhuñasa, jan ukax mayakïkaspas ukhamch jakhuñasa? Isaías 53 ukat 11 jaljanakan jikxataski uka profecianak jakhusaxa, ¿qhawqharus pursna? Janiw phuqatpachpun yatksnati.

Ukhamasti, qhawqha profeciapunis Mesiasar phuqasïna uk yatxatañatakix janiw inamaya tirañasakiti. Jan ukasti, Jehová Diosan markapax apayankistu uka qillqatanakan kuna profecianakas Mesiasan phuqasïna ukanakxa sum qhanañchistu. * Uka profecianakax sapaki Bibliat yatxatasktan ukhasa, familiansa ukat yatiyir sarktan ukhasa yanaptʼarakistaspawa. Ukat aka profecianakax qhawqhäskpansa, Mesiasaruw sum uñtʼañ yanaptʼistu.

[Qhanañchäwi]