Aka tantachäwit amtasipuniñäniwa

STEPHEN LETT jilatax akham sasaw tantachasirinakar jukʼamp kusisiyäna: “‘Aka tantachäwix Jehová Diosan markapanx amtasipuniniwa’ sasaw tukuyarux sañäni” sasa. Uka tantachäwix octubre 2, 2010 maranwa Jachʼa Tantachäwinak apañ Utan Nueva Jersey (Estados Unidos) markan apasïna. Maran mä kuti apañäki uka tantachäwxa, Watch Tower Bible and Tract Society of Pennsylvania ukankirinakaw 126 tantachäwip apapxäna. ¿Uka tantachäwit kawkïrinakas jukʼamp amtatänixa?

Qalltañatak arstʼäwinxa, Lett jilataw Jehová Diosan alaxpachankir carropat kunjamtï Ezequiel libron parlki ukham qhanañchäna. Uka jachʼa ukat muspharkaña carropaxa alaxpachan uttʼayat tamapamp sasiwa, uksti Jehová Dios pachpaw apnaqaraki. Alaxpachankir tamapanxa, angelanakaw jankʼak unxtasisipki, kunjamtï arstʼir jilatax siskänxa, Jehová Diosan amuyupar uñtataw kuns jankʼak lurapxi. Ukat kunjamtï aka qhipa maranakan amuyaskixa, aka Uraqinkir tamapax ukhamarakiw jankʼak sarantaski.

Amuytʼañäni, yaqhip sucursalanakax mayachasiwayxiwa, ukhamatwa Betel utan irnaqapkäna uka jilat kullakanakax Diosan arunakap yatiyir sarañatakix tiempsa chʼamsa jukʼamp apstʼasipxi. Uraqpachan Jilïr Irpirinakamp pʼiqtʼatäsax Amuyasiri Chiqapa Uywataxa, Jehová Diosar taqi chuyma ukat wali amuyumpi yupaychasipkakiñapatakiw Jehová Diosar mayipxäta sasaw tantachasirinakar Lett jilatax iwxtʼäna (Mat. 24:45-47).

Wali chuymachtʼkir yatiyäwinaka ukat entrevistanaka

Haití markankir sucursal pʼiqtʼir Tab Honsberger jilataxa, uka markan enero 12, 2010 maran uraq khathatix 300.000 jaqinak jiwaraykäna uka tuqit yatiyäna. Uka markan Iglesia pʼiqtʼirinakaxa, Diosaw jan wali jaqinakar ukham castigawayi ukat suma jaqinakarux Juparakiw qhispiyi sasaw jaqinakar sapxäna sasaw sarakïna. Ukatï chiqäspaxa, ¿kunjamarak carcelankir jan wali jaqinakasti pirqanak allitattipan ukhamak sarxapxaspänsti? Uka markankir suma chuyman jaqinakax kunatsa ukanakax utji uk qhanañchtʼatax wali chuymachtʼataw jikxatasipxi. Ukat mä jilataxa, “sapürupuniw jachta. Qhawqha tiempompiy ukhamächini ukxa janiw yatkti, ukampis Diosan markapaw munasiñapamp wal chuymachtʼitu. Kuna suytʼäwis jiwasatak utji uk sum yatisax jaqinakar yatiyaniñ munarakta” sasaw uka jan waltʼäwin esposap jiwayasisax säna, sasaw Honsberger jilatax sarakïna.

Brooklyn markankir Betel utan irnaqtʼir Mark Sanderson jilatax Filipinas markatwa yatiyäna,  jupax uka sucursalanwa nayrax pʼiqtʼaskäna. Diosan markapax 32 kutiw sapa phaxsin jukʼamp jilxattawayi, ukat yatiyirinakat sipans jukʼamp yatiqirinakaw utji sasaw wali kusisit yatiyäna. Ukat Miguel jilatan sarnaqäwipat mä jukʼa qhanañchtʼäna. Allchhipar jiwayir jaqir carcelar jistʼantayañatakix wal chʼamachasiwayi. Mä urux carcelar yatiyir sarasax pachpa jaqimpiw jikisitayna. Jupampi parlasax mayjtʼaskchïnsa, suma chuymampiw aruntäna ukat Bibliat yatichañatakiw parlxayäna. Uka jaqix iyaw sarakïnwa, ukhamatwa Jehová Diosar wal munasitap laykux bautisasxäna. Jichhürunx Miguel jilatan wali amigopäxarakiwa, ukat carcelat jankʼak mistuñapatakiw yanaptʼaskaraki. *

Ukxarusti Departamento de Escuelas Teocráticas satäkis ukan yatichir Mark Noumair jilataw kimsa matrimonionakar entrevistäna; Alex ukat Sarah Reinmueller, David ukat Krista Schafer, Robert ukat Ketra Ciranko jilat kullakanakaru. Comité de Publicación siski ukan yanaptʼir Reinmueller jilataxa, kunjamsa 15 maranïkasax Biblian chiqa yatichäwinakapat wali askïtap amuytʼäna uk arstʼarakïna. Uka tiemponsti, precursorjamaw Canadá markankaskäna ukat awisax sapakiw yatiyirïna. Betelan khitinakas jukʼamp yanaptʼawaytam sataxa, kimsa jilatanak aytäna, ukat kunjamsa jupanakax Diosar yupaychañ tuqit yanaptʼapxäna ukwa qhanañchtʼarakïna. Sarah esposapasti, China markan walja maranak carcelan jistʼantat uñjasir mä kullakan amigapätapwa qhanañchäna. Ukat oración tuqi maytʼasisaw Jehová Diosar atinisiñ yatiqawayta sarakïnwa.

Yatichañ tuqit Uñjirinakan David Schafer yanapirixa, kunjamsa mamapax Diosar taqi chuyma yupaychäna ukwa arstʼarakïna. Ukat qʼaxu waynitükayäta ukhaxa, precursor auxiliarjam irnaqtʼañatakix lawa khuchhur walja jilatanakaw yanaptʼapxitäna sasaw säna. Krista sat esposapaja, kunjamsa Betel utankir chuymankipstat jilat kullakanakax chʼamachtʼapxäna ukwa amtäna, kunjamtï Jesusax siskänxa, ukhamarakiw jupanakax “jukʼa apnaqañanakan chiqapäki” ukarjam lurapxatayna (Luc. 16:10).

Qillqirinakan Uñjirinakar yanapiri Robert Ciranko jilataxa, Hungría markankir alaxpachar sarañatak ajllit pä awichapampit pä achachilapampit parläna. Ukat 1950 maranakan apaskäna uka jachʼa tantachäwinakar sarañaw wawäkan ukhax yanaptʼatayna, uka tantachäwinakanwa tamapankirit sipans jukʼamp jilat kullakanak utjatap uñjatayna. Ketra esposapasti, Diosan markap contra parlirinaka ukat  yaqha jan walinak utjir tamanwa Jehová Diosar taqi chuyma yupaychañ yatiqawayatayna. Jupax janipuniw Diosat jithiqtkänti, uka qhipatsti precursor especialat uttʼayapxäna ukat mä wawak taqi chuyma Diosar yupaychir tamaruw khitapxäna.

Ukxarusti Manfred Tonak jilataw Etiopía markat mä imforme katuyäna. Biblia qillqaskäna uka tiempotpachwa uka markax utjäna, jichhax 9.000 jilat kullakanakaw utjaraki. Jila partex Adís Abeba markana ukat uka jakʼanakan jakapxaraki. Ukhamasti uka markat jaya chiqan jakirinakar yanaptʼañatakixa, Etiopía markatäsin yaqha markanakar sarxir jilat kullakanakaruw Etiopiankirinakar yanaptʼapxañapatak invittʼasïna. Ukat waljanirakiw mä qhawqha tiempotak uka chiqanakar sarapxäna. Bibliat yatiqañ munirinakar waljanirus jikxatapkchïnxa, taqinitakiw wali kusiskañänxa.

Ukat mayachtʼat arstʼäwinx kunjamsa Rusia markankir jilat kullakanakax jucionakan uñjasipxäna uk qhanañchañax wali askirakiwa. Uka markankir sucursal pʼiqtʼir Aulis Bergdahl jilatasti, kunjamsa yaqha markanakat sipans Moscú markan arknaqat uñjasipxäna ukwa mä qhawqhanak arstʼarakïna. Estados Unidos markankir sucursalan Departamento Legal ukan irnaqtʼir Philip Brumley jilataxa, Tribunal Europeo de Derechos Humanos ukanxa, Jehová Diosan Qhanañchirinakap contra llätunka demandanak yatxatapkäna uka qhipat kunanakas pasaskäna ukwa qhanañchäna. Tribunalanxa, taqpach demandanakat janiw chiqätapax uñachtʼayaskiti, antisaw kʼarikïtapax qhanstawayi sänwa. Tribunalan amtatanak kunjamxay jaqinakax uñjapxchini ukx janiw yatktanti, ukampis yaqha markanakan uka kikpa jucionakaruw yanaptʼani sasaw Brumley jilatax sarakïna.

Uka yatiyäwinak tukuyarusti, Francia markankir gobiernox Jehová Diosan Qhanañchirinakapar nayratpach impuesto maykäna uka tuqitwa uka Tribunalan uñakipasiski sasaw Lett jilatax yatiyarakïna. Jan armañäniti uka Tribunalax wali respetatawa ukat janirakiw taqpach demandanak katuqkiti. Jichhakamasti, Jehová Diosan Qhanañchirinakapat 39 demandanakaw yatxatasiwayi, ukanakatsti, 37 jucionakwa atipawaytanxa. Jilata arstʼirix uka tuqit Jehová Diosar mayiskakiñäni sasaw amtayarakïna.

Qhip qhipa yatiyäwsti, Richard Morlan jilataw arstʼarakïna, jupasti Tama Irpir Chuymaninakatak Escuelasan yatichiriwa, wali kusisitaw uka escuelan utjatapatsa ukat irpir chuymaninakan wal yuspärapxatapsa arstʼarakïna.

 Uraqpachan Jilïr Irpirinakat yaqha arstʼirinaka

Ukxarusti, Uraqpachan Jilïr Irpirinakat yaqhanakaw arstʼapxarakïna. Nayraqat Guy Pierce jilataw 2011 marataki Bibliat apstʼat arunakxat jukʼamp qhanañchäna, ukasti akham siwa: Jehová Diosan sutipar imantasipxañäni, sasa (Sof. 3:12, NM). Aka qhipa urunakax wali askiw jiwasatakixa, ukampis wali amuyumpi sarnaqañasaw kunattix Diosan Urupaw jakʼachasisinki. Ukampis jaqinakax kʼari religionanakaru, politicaru, qullqiru jan ukax kunanakatï llakinakap armasiykaspa ukanakaruw imantasiñ thaqapxi. Ukampis qhispiñatakix Jehová Diosan Sutipar imantasiñasawa, ukatakix Diosar sum uñtʼañasawa, taqi chuymaw respetañasa, munasiñasa ukat atinisiñasaraki.

Ukxarusti, David Splane jilataw arstʼarakïna, pʼiqinchäwipax akham sänwa: “¿Diosan samarañ urupar mantxtanti?” sasa. Jehová Diosax samarañ urupankchisa jan inaktʼasaw irnaqaski sänwa. Ukat aka Uraqin amtanakap phuqasiñapatakix Jesucristo wawapampi chikaw ‘jichhakam irnaqaski’ (Juan 5:17). Ukhamax ¿kunjamatsa Diosan samarañapar mantsna? Nayraqatxa, taqi juchanak apanukuñasawa ukat janirakiw suma luratanakasampikis aski jaqïksnas ukham amuyañasäkiti. Janiw ukakïkiti, taqi chuymaw Diosan amtanakapar confiañasa ukat ukarjamaw sarnaqañasaraki. Awisax ukampi phuqañax chʼamakïspawa, ukampis Diosan markapan iwxtʼanakapaw yanaptʼistani. Tukuyañatakix Diosan samarañ urupar mantañatak chʼamachasiñasawa sasaw arstʼarakïna.

Qhip qhipa arstʼäwxa, Anthony Morris jilataw qhanañchaskäna, ukat pʼiqinchäwipax akham sänwa: “¿Kunas suyistu ?” sasa. Ukat wali munasiñampiw tantachasirinakarux kuna tiemponktansa ukat kunatsa Biblian profecianakap phuqasir suyañax wali wakiskirix ukwa amtayarakïna, sañäni: ‘Taqi kunas sumakïpan, janik kunas paskpanti’ sasin mayisir istʼaña, ukat kʼari religionanakan tʼunjatäñapa (1 Tes. 5:2, 3; Apo. 17:15-17). Ukampis amuyasiñasawa, yatiyäwinak istʼasax janiw Armagedonaw qalltxi sasin jankʼaki amuyañasäkiti sasaw arstʼirix iwxtʼarakïna. Ukxarusti, kunjamtï Miqueas 7:7 qillqatan siski ukarjamaw pacienciampi ukat kusisit chuymampi suyañasa sarakïnwa. Ukat kunjamtï soldadonakax guerra tukuyañatakix mayachtʼatäpki ukhamarakiw Uraqpachan Jilïr Irpirinakampix mayachtʼatäñasa sarakïnwa. Ukat akham sasaw tuktʼayxäna: “Tatitur suytʼirinaka, chʼamañchasipxam, jan axsarir chuymanïpxarakim” sasa (Sal. 31:24).

Uka tantachäwi tukuyañatakix wakiskir yatiyäwinakaw arstʼasiskäna. Geoffrey Jackson jilataxa, Yatiyañataki revistax Inglés aru jukʼak uñtʼirinakar yanaptʼañatakiw wali uñtʼat arunakamp mä revistax lurasini, ukat mä maraw ukampix yantʼasirakini sasaw yatiyäna. Ukat Stephen Lett jilataxa, Estados Unidos markan tamanak tumptʼir jilatanakax esposanakapamp chika chʼamañchtʼkir visitanak katuqapxañapatakiw Uraqpachan Jilïr Irpirinakax amtawayapxi sasaw yatiyäna. Ukat Escuela de Entrenamiento Ministerial satäkan ukaxa, Soltero Jilatanakan Bibliat Yatxatapxañapatak Escuela satäxaniwa ukat niyarakiw Cristiano Matrimonionakan Bibliat Yatxatapxañapatak Escuelax utjxani. Ukhamatwa chacha warmix Diosan markapar yanaptʼañatak jukʼampi wakichtʼatäpxani. Ukat Lett jilataxa, tamanak tumptʼir jilatanakataki ukat esposanakapampitakix maran pä escuelaw utjani, ukat sucursalan pʼiqtʼir jilatanakampi esposanakapampitakixa ukhamarakiw pä escuelax utjani, ukanakasti Patterson markan apasini sasaw yatiyäna. Uka escuelar saririnakax tiempompix wasitampiw sarapxaspa.

Tantachäwi tukuyañatakix Barr jilataw wali altʼat chuymamp mä oracionamp tukuyxäna, jupasti 97 maranïxänwa, ukat walja maranakaw Uraqpachan Jilïr Irpirinak chikax irnaqtʼäna. * Jachʼa Tantachäwinak apañ Utatxa, taqiniw aka tantachäwix amtkañapunïniw sasin mistxapxäna.

[Qhanañchäwinaka]

[19 janan qhanañchäwipa]

Entrevistanak istʼasax taqiniw wali kusisit jikxatasipxäna.

[20 janan qhanañchäwipa]

Etiopía markan yatiyasiñapatakix Jehová Diosaw yanaptʼawayi