¿Jumax amttati?

¿Aka qhipa phaxsinakan mistkäna Yatiyañataki sat revista liytʼtati? Ukhamächi ukhaxa, aka jisktʼanakar qhanañchtʼma:

• Janiw akapachan jan walinak yatiqasiñ munktanti, ¿kunanakas yanaptʼistaspa?

Akanakaw yanaptʼistaspa: 1) Diosar suma chuymamp axsartʼaña (1 Ped. 3:12). 2) Bibliampi yatichat suma conciencianïña. 3) Kunatï jakañatak munaski ukanakamp kusisitakïña (4/15, 6 janat 7 janakama).

• Diosan munañap phuqañatakis chʼamachasstanxa, ¿kunanakats jan armasiñasäki?

Janiw jilat kullakanakampi kusistʼañxa armasiñasäkiti. Jesusax jaqinakar Diosan arunakapat yatichañas nayrankchïnxa, samartʼañatakisa, mayninakampi parltʼasiñatakis tiempo apsusirakïnwa. Ukat wawanakas jupar jakʼachasipxakïnwa (4/15, 10 jana).

• ¿“Marta, walja lurañanakamp mayjtʼatäsktawa. Ukampis mayaw wakisixa” sasaxa, ¿Jesusax kun sañs munaskäna? (Luc. 10:41, 42.)

¿Martax akapachankirinakjam amtanïkaspas ukat suma manqʼa phayañax janis kuna chʼamäkaspa ukhamti sañ munpachäna? Janiwa. Kunatï nayrankañapäki ukanakwa Jesusax amatayañ munäna. Yatichäwinakap istʼañaw wali wakiskirïnxa (7/1, 13 jana).

• ¿Romanos 11 jaljan parlki uka olivo quqax kamsañs muni?

Olivo quqaxa Abrahaman wawanakap taypin jakhutäki uka cristianonakaruw uñtayistu, jupanakaw alaxpach Israel satäpxi. Jehová Diosax uka quqan saphipäkaspas ukat Jesusas troncopäkaspas ukhamawa. Jila part judionakax Jesús contra saytʼapkäna uka qhipatwa yaqha markat jutir cristianonakarux uka quqar ayrkatasïna, ukhamata Abrahaman wawanakapar phuqachañataki (5/15, 22 janat 25 janakama).

• ¿Jehová Diosax janiw juch perdonkitaniti sasin amuystan ukhax kun amtañas wakisispa?

Manasés reyix jan walinakwa Jehová Diosan nayraqatapan luräna. Wawapsa ninaruw phichhantäna. Ukampis qhipat arrepentisïnwa. “Diosaparuwa artʼasïna”, “Diosap nayraqatanxa walipuniwa jiskʼaru” tuküna. Taqi chuymapuniw Diosar mayisïna (2 Cró. 33:12, 13). Ukatwa Diosax perdonäna. Jiwasatix janiw Diosax perdonkitaspati sasin amuytan ukhaxa, Manasés reyit amtañasawa (4/1, 20 jana).

• ¿Kunjam arunakampis Jesusax Caifasar jaysäna? (Mat. 26:63, 64.)

Jesusax akham sänwa: “Jïsa nayätwa, kunjämtix jumax sisktas ukaxa” sasa. Ukham sasaw nayra judionakax kunan chiqätapsa qhanañchapxirïna. “Jumätati Diosan Yuqapa Cristoxa” sasaw Caifasax jisktʼäna. Ukatwa Jesusax ukham säna (7/1, 18 jana).

• Jesusax wawanakanïspän ukhaxa, ¿uka wawanakapax jaqinakar juchat qhispiyapxaspänti?

Chiqas Jesusax jan juchani millón millón wawanakanïspänwa. Ukampis janiw uka wawanakapax jaqinakar juchat qhispiyapkaspänti. Jesús sapakiw Adanan juchap lantix jiwañapäna (1 Tim. 2:6; 6/15, 13 jana).

• Hechos 20:29, 30 qillqatanxa, kʼari yatichäwinakat amuyasipxam sistuwa, ¿kunjamtsa uka arunak taqi chuym katuqasitas uñachtʼaysna?

Janiw kʼari yatichäwinakxa utar katuqasiñasäkiti ni iyawsañasäkisa (Rom. 16:17; 2 Juan 9-11). Janirakiw Diosan markap contra saytʼirinakan lurat libronaksa liyiñasäkiti, ni televisionansa Internetansa uñchʼukiñasäkiti (7/15, 15 janat 16 janakama).

• ¿Kunjamatsa nayra cristianonakax Diosan samarañapar mantapxaspäna?

Sabadot parlasaxa, cristianonakax Diosan samarañapar mantapxaspawa sasaw qhanañchäna: “Mä aski samarañaw Diosan markapatakix utjaski. Khititix Diosampi samarir mantki ukax samariw irnaqäwipatxa” sasa (Heb. 4:8-10). Ukhamax Diosamp sum apasiñatakix janiw Moisesar churat Leyinak phuqañax wakisxänti. Diosamp katuqayasiñatakix Jesucristoruw iyawsapxañapäna (7/15, 27 jana).