¿Finees chachjamati jan walinakar saykatäta?

IRPIR chuymaninakan luräwinakapax wali wakisiriwa. Ukampis qillqatanx siwa, jupanakan walja luräwinakapax janiw jasäkiti, chʼamakiwa. Jupanakasti, “Tatitun sutiparuwa” jachʼa juchanakxa chiqapar uñjapxañapa (2 Cró. 19:6). Yaqha lurañanakaparakiw utji, ukat ukanakatakix inas jan sum wakichatäpkchi. Ukhamarakiw Moisés profetax uñjasïna kunapachatï mä luräwi Diosat katuqkäna ukapachaxa, jupasti altʼat chuymampiw akham säna: “¿Khitïtsa nayaxa, faraonan ukaru sara[ñatakixa]” sasa (Éxo. 3:11).

Kunjamtï yatktanxa, Bibliax qullan ajayumpi amuytʼayatawa, uka qullan ajayumpirakiw irpir chuymaninakarux uttʼayasi. Ukat nayra tiempon irpir chuymaninakax kunjams jan waltʼäwinakarux saykatapxäna ukanaksa Bibliax parlarakiwa. Finees chachax ukhamarakiw jan walinakar saykatatayna. Jichhax uka tuqit uñjañäni. Jupasti Eleazar chachan yuqapänwa, mä arunxa, Aaronan allchhipänwa. Ukhamax jupaw jilïr sacerdotjamax niya uttʼasiñapäna. Ukampis kimsa jan waltʼäwiruw saykatatayna, ukanx jan axsartʼiri, amuytʼasiri ukat Diosar atinisiri jaqïtapwa uñachtʼayäna. Jichhürunakanx irpir chuymaninakax uka pachparakiw lurapxarakispa.

Jankʼakiw sartäna

Waynäskasax walja jan waltʼäwinakanwa Fineesax uñjasïna. Kunapachatï israelitanakax Moab qullun jikxatasipkäna ukhaxa, “chachanakax moabita warminakampiw wachuqa jucha lurañ qalltapxäna [...] ukatsti israelitanakax manqʼanakapatwa manqʼapxäna, ukhamarakiw moabitanakan diosanakaparusa yupaychapxäna” (Núm. 25:1, 2). Jehová Diosax mä castigo apayanitayna uka juch luririnakatakixa. ¿Amuysnati, kunjamas jachʼa juchanak utjatapatxa Fineesax jikxataspachäna?

“Mä israelita jaqix utaparuw mä madianita warmirux irpasïna, Moisesan uñjkata ukhamarak taqi israelitanakan uñjkata, ukäñkamasti jupanakax jachasipkänwa Tatitumpi Jikisiñ Carpa mantañana.” (Núm. 25:6.) ¿Fineesax kamachäñsa? Uka juchani jaqix jupat jilïr waynänwa ukat juparakiw Israel markanxa yupaychäw pʼiqtʼirïnxa (Núm. 25:14).

Fineesax Jehová Diosaruw axsaräna jaqit sipansa. Kunapachatï uka juchachasir jaqinak uñjäna ukhaxa, utaparuw arkantasin lanzamp jiwarayäna. ¿Uk luratapat kamsänsa Jehová Diosaxa? Ukham jan axsartʼasa ukat wali amuyump luratapatxa “jupampiru, wawanakapampirux wiñayatak[iw]” sacerdotet uttʼayapxäma sasaw Diosax jupar säna. Ukat janiw castigox utjxänti (Núm. 25:7-13).

Chiqansa, jichhürunakanxa janiw irpir chuymaninakax khitirus Fineesjamax jiwayapkiti. Ukampis jupjam jan axsartʼasaw juchachasirinakarux uñjapxani. Ukhamarakiwa Guillermo jilatax jikxatasitayna, jupax mä  qhawqha phaxsinakakiw irpir chuymanjam irnaqaskäna. Ukampis kawkir irpir chuymanitï jupar wal yanaptʼkatayna uka jilataw jucharu purtʼasitayna, uka juch uñjañatakiw jawsapxäna. Ukat akham siwa: “Janiw sum jikxataskayätti, ni ikis purkitänti, ukak lupʼiskayätxa, kunattix janiw pantjasiñ munkayätti. Uka juch uñjañatakixa, Diosarus wal mayisiyätxa ukat Bibliat apstʼat qillqatanaks sum yatxatayätxa” sasa. Ukhamatwa uka juchanimp tantachasiñatakisa ukat Diosan Arupampi yanaptʼañatakisa jan axsartʼas saräna (1 Tim. 4:11, 12).

Ukhamarakiw irpir chuymaninakax juchachasirinakar uñjapxañapa. Wal amuytʼasisa, jan axsartʼasa ukat sum wakichasisaw juchanak sum uñjapxañapaxa. Ukhamatwa mayni jilat kullakanakas yatiqasipxaspa. Ukampis jachʼa juchanak tama taypin lurapxani ukhaxa, taqi cristianonakaw jan axsartʼasax yatiyapxañapa irpir chuymaninakaru, ukatxa kunjamtï Diosax siskixa ukhamarakiw tamat jaqsutanakarus uñjasiñapa. Janiw amigojaw, familiarajaw sasax khitis mayj uñjañasäkiti (1 Cor. 5:11-13).

Amuytʼasirïtap laykux jan walinakat mistuñs yanaptʼänwa

Fineesax jan axsartʼiri, wali yatiñani ukat amuyasir waynänwa. Amuytʼañäni, kunapachatï Rubén ukat Gad tribunakampi ukat Manasés chikat tribumpix Jordán jawir jakʼana mä altara lurapxäna ukhaxa, Diosan markap contraw saytʼapxi sasaw mayni israelitanakax sapxäna. Ukatwa jupanakampi nuwasir sarañatakix tantachasipxäna (Jos. 22:11, 12).

Uk yatisaxa, ¿Fineesax kunjamas jikxatasïna? Amuytʼasir jaqjamax taqi Israel pʼiqtʼirinakampiw tantachasïna ukat altar luririnakarux akham jisktʼäna: “¿Kunats uka altar lurapxta?” sasa. Jupanakasti sapxänwa: ‘Uka altarxa nanakaw lurapxta, jan jitiqtas “Diosar serviñasataki”, yupaychañataki ukat jupar wal munasitas uñachtʼayañataki’ sasa. Uk istʼasax janiw jupanakampix nuwasxapxänti (Jos. 22:13-34).

Kunapachatï yaqha jilat kullakat jan wali amtampi parlapxani ukhaxa, Fineesjam amuytʼasirïñasawa ukat janiw chuym ustʼayasiñasäkiti ni jan walinaks parlañasäkiti (Pro. 19:11).

¿Kunjamsa irpir chuyman jilatanakax Fineesjam amuytʼasirïpxaspa? Jaime jilatax tunka mara jilaw tamanak tumptʼirjamax serviskäna, ukat jupax akham sarakiwa: “Kunapachatï mä jilatas jan ukax mä kullakas maynimpiw jan wal apasta situ ukhaxa, chiqaparjam uñjañatakiw Jehová Diosar nayraqat mayista, ukatxa wakichasiraktwa Aruparjam iwxtʼañataki. Mä kutix mä kullakaw quejasir juti, yaqha taman irpir chuymaniw chuym ustʼayitu sasa. Uka irpir chuymanix amigojäkchïnsa, jupar jan kamskasaw uka kullakarux sumat amuytʼayta. Diosan Arupatwa  mä qhawqha liytʼarapta. Jilatampi parltʼañax kunatsa wakisi ukwa qhanañchta (Mat. 5:23, 24). Ukhamarjam lurkasas kullakax janiw sumankthapkänti, ukatwa Bibliat yaqha jiskʼa tʼaqanak liytʼarapta. Kullakasti, iyaw sasaw Diosarux wal mayisïna ukat perdonañatakis chʼamachasïna” sasa.

¿Kunjamarus tukuyxäna? Jaimex akham saskakiwa: “Mä qhawqha phaxsinak pasatatsti kullakax wasitampiw parltʼatayna, ukat sarakituwa, irpir chuymanix perdón mayisxituwa, jichhax jupampiw Diosan arunakap yatiyiri mistupxarakïxa, ukampis sum apasxapxta sasaw kullakax kusisita jikxatasïna. Uka jan waltʼäwir mitisisax chiqapar uñjañax chʼamäspänwa, ukat janirakiw sumarus mantapkaspänti” sasa. Ukatwa Bibliax akham sispacha: “Jan mäkhi saramti jan waltʼäw uñjirixa” sasa (Pro. 25:8, NM). Ukatwa amuyasir irpir chuymaninakax mayninakampi jan waltʼayasir jilat kullakanakarux Diosan Aruparjam iwxtʼapxi.

Jehová Diosaruw jisktʼäna

Walja maranak qhipatxa, Finees chachax jilïr sacerdotjamaw Israel markan irnaqxäna. Chiqansa, waynatpachwa jan axsarirïtapsa, amuytʼasirïtapsa uñachtʼayäna, ukhamatwa jan walinakar saykatäna. Ukham sum sarantañatakix Jehová Diosaruw wal atinisïna.

Mä kutixa, Gabaa markankir chachanakax Benjamín tribunkir mä levitan concubinaparuw munkir jan munkir abusapxatayna ukat jiwayapxatayna. Uk yatisax mayni tribunakax nuwasiñatakiw mistunipxatayna (Jue. 20:1-11). Janïr nuwasir sarkasax Diosatwa mayisipxäna, ukampis atipjataw uñjasipxäna (Jue. 20:14-25). ‘Diosatx inamayaw mayistanxa, janiw jan wali luräwinak chhaqtayañ munkpachati’, ¿sasat amuyapxäna?

Jupanakax Diosar atinisisipkakïnwa, janiw jithiqtapkänti, ukatatwa Finees jilïr sacerdotex Diosar akham sas jisktʼäna: “¿Wakisispati wastatampi nuwasiña Benjamín sat tribunkir jilanakaxampi, jan ukax atipjatäxapxakïcha?” sasa. Uk sataxa, sarapxam ukat jumanakax atipjapxätawa, phichhantapxañamawa ukat qʼal tʼunjapxañamarakiwa sasaw Jehová Diosax säna (Jue. 20:27-48).

¿Kuns jiwasax yatiqassna? Tamanakanxa jan waltʼäwinakax utjapuniwa, ukatwa irpir chuymaninakax amuytʼasisin chiqañchapxañapaxa, ukat Diosarus yanapa mayisipxañaparakiwa. Ukxarux Jesusan arunakap amtapxañapawa, jupax akham sänwa: “Mayipxam, Diosasti churapxätamwa; thaqapxam, jikxatapxätawa; punk liqtʼapxam, jistʼaratäpxätawa” sasa (Luc. 11:9). Diosax janis mayisitanakasar jankʼaki istʼkchixa, tiempoparuw yanaptʼistani.

Niya ukhamarakiw Irlanda markanxa pasatayna. Jankʼakiw mä Tantachasiñ Uta lurañ munapxäna, ukampis marka funcionariox janiw permiso churañ munkänti. Ukatwa jilïr funcionarion uk sarapxäna permiso apsuñataki, janïr sarkasax Diosaruw mayisipxäna. ¿Finees chacharjamat Diosax istʼpachäna?

Uka taman irpir chuymanix akham sänwa: “Walja oracionanak lurasaw sarapxta jilïr autoridadan oficinaparu, qhipa planonak aptʼata. Phisqa minututxa permisxa churapxakituwa, yanaptʼapxitänwa Tantachasiñ Uta lurañatakisa. Oracionax kunja chʼamanis uk sum amuyapxta” sasa. Chiqansa, irpir chuymaninakan mayisitanakaparux Diosax istʼiwa.

Finees chachatakix Israel markar sum uñjañax chʼamänwa. Ukhampachasa, jan axsartʼasa, amuyumpi ukat Diosar atinisisaw jan walinakansa saytʼasïna. Ukham lurasaw Diosan chuymapar purtʼäna. Waranq mara qhipatxa, Esdras chachax akham sasaw qillqatayna: “Nayrasti Eleazar chachan Finees wawapaw jupanakan jilïripänxa. ¡Tatitux jupampïpan!” sasa (1 Cró. 9:20). ¡Jichhürunakanxa ukhamarakiw irpir chuymaninakatsa, Diosat jan jithiqtir jilat kullakanakatsa sasirakispa!