Nayaw juman herenciamäyäxa

“Nayaw juman uraqimäyäxa, herenciamäyäsa.” (NÚM. 18:20.)

1, 2. 1) ¿Josué tatax israelitanakar uraq jalanuqkäna ukhax kunas levitanakampix pasäna? 2) ¿Jehová Diosax levitanakar kamsänsa?

 ISRAELITANAKAX Suma Uraqir purxapxäna ukhaxa, Josué tatampi, Eleazar jilïr sacerdotempi ukat tribunak pʼiqtʼir jilïrinakampiw uraqi jalanuqasin sapa tribur churapxäna (Núm. 34:13-29). Ukampis levitanakarux janiw kuna uraqsa churapkänti (Jos. 14:1-5). ¿Kunatsa? ¿Jupanakat armasipxpachänti?

² Chiqansa, Jehová Diosax janiw jupanakat armaskänti, akham sasaw säna: “Nayaw juman uraqimäyäxa, herenciamäyäsa, Israel markanxa” sasa (Núm. 18:20). ¿Janit uka arunak istʼañax levitanakataki wali askïkpachäna? “Nayaw juman uraqimäyäxa”, mä arunxa nayaw jumanakar uñjasipkäma sasin Diosax sistaspa ukhaxa, ¿kunjamakis jiwasax jikxatassna? Inas qalltan akham sissna: “¿Kamisaraki jucharar jaqinakan herenciapänisti? Janiw jichha tiempo cristianonakar ukham sum uñjkaspati” sasa. Uka tuqinakat sum amuytʼañax wali askiwa sapa maynitakis ukat familiatakisa. Ukhamasti, “nayaw juman [...] herenciamäyäsa” siski uka arunakax kamsañs munpacha, kunjamatsa Jehová Diosax alaxpachar saririnakatakisa ukat aka uraqin wiñay jakañ suyir cristianonakatakis mä herenciar tukuspa, mä arunxa kunjamatsa jumatakis mä herenciäspa uka tuqinakat yatxatañäni.

Diosax janiw levitanakat armaskänti

3. ¿Kunjamatsa levitanakax sacerdotjam luqtañ qalltapxäna?

³ Diosax israelitanakar janïra Leyinakap churkäna ukhaxa, familia pʼiqtʼirinakaw sacerdotet luqtapxäna. Ukampis Moisés tuqi Leyinak churkäna uka qhipatsti, levitanakaw sacerdotet sapüru luqtapxitani sasaw Diosax säna. ¿Kunatsa ukham amtpachäna? Egipto markan jilïr wawanakar jiwarayäna ukhaxa, israelit jilïr wawanakaruw Diosax jupataki yaqhachasïna. Uka wawanakaw sacerdotet luqtapxañapäna. Ukampis qhipatxa akham sarakïnwa: “Taqi israelitanak taypitxa, levitanakaruw ajllista, sapa familian jilïri wawapat sipansa” sasa. Ukat niyakixay israelit jilïr wawanakax levitanakat sipansa waljanïpxchïnxa, “jiläki uka [...] jilïri wawanak kutsuyasipxañapatakix” qullqiw mayisïna (Núm. 3:11-13, 41, 46, 47). Ukhamatwa levitanakax Israel markan Diosar luqtañ qalltapxäna.

4, 5. 1) ¿Kunjamatsa Jehová Diosax levitanakan herenciapänxa? 2) ¿Kunjamsa Diosax levitanakar yanaptʼäna?

 ⁴ Ukhamasti, uraqi katuqañat sipansa, levitanakax yaqha kasta herencia katuqapxäna. ‘Diosar sacerdotjam serviñaw jupanakar waktʼäna’ (Jos. 18:7). Ukatwa Números 18:20 qillqatanxa jupanakat Jehová Diosax akham säna: “Nayaw juman uraqimäyäxa, herenciamäyäsa” sasa. Ukampis janirakiw jan kunani jaytjkänti (Números 18:19, 21, 24 liytʼasiñapawa). ‘Herenciäkaspas ukhamwa israelitanakax achunakapat sapa tunkat maya churapxäna’. Jïsa, levitanakax pagükaspas ukhamwa mayni israelitanakatxa achunaksa animalanaksa katuqapxäna. Ukat katuqasaxa, sacerdotenakatakiw suma achunaksa, suma uywanaksa levitanakax jiltʼayapxäna, sapa tunkat maya (Núm. 18:25-29). * Ukhamax israelitanakan apanit qullan churäwinakwa sacerdotenakax katuqapxäna. Ukatwa Jehová Diosar atinisipxañapäna, kunatix munaski ukanakxa Jupaw churaskistani sasa.

⁵ Ukat amuyataxa, jachʼa tantachäwinakar sarañatakiw israelitanakax kunatï munaski ukanak imasipxarakïna (Deu. 14:22-27). Uka imasit yänakampiw pobrenakarus levitanakarus israelitanakax yanaptʼapxarakïna. Temploruw apapxirïna. ¿Ukanakxa kunapachas apasipkakïnti? Janiwa. Sapa paqallq marax mä jachʼa fiesta amtapkäna uka urunakat kimsa mara ukat suxta mara saraqataruw apapxirïna. Ukampis ¿kunatsa levitanakax katuqapxäna? Jupanakax janiw Israel markanxa uraqinïpkänsa ni herencianïpkänsa (Deu. 14:28, 29).

6. ¿Kawkinsa levitanakax jakapxäna?

⁶ Ukhamax ¿kawkinsa levitanakax jakapxäna? Kunayman jiskʼa ukat jachʼa markanakanwa jakapxäna. Ukat imantasiñ suxta markanakans jakapxarakïnwa. Chiqas niya 48 markanakanwa utjasipxäna (Núm. 35:6-8). Kunapachatï templon lurañanakap tukuyapxäna ukhaxa, uka markanakaruw sarxapxäna. Chiqansa, Jehová Diosaw jupanakar sum uñjaskäna, janiw kunsa faltaykänti. Ukampis ¿kunsa levitanakax uñachtʼayapxañapäna? Diosax taqi kunan yanaptʼañatakis jankʼakiwa ukat chʼamanirakiwa sasaw Diosar taqi chuym atinisipxañapäna.

7. ¿Kunsa levitanakax uñachtʼayapxañapäna, ukat kunjamsa?

⁷ Ukampis yaqhip israelitanakax janiw Leyinakarjamax phuqapkänti. Awisax kuntï churapxañapäkän ukanak armasipxänwa, ukhamatwa levitanakas sacerdotenakas pistʼayasipxäna. Nehemías profetan urunakapanxa, yaqhip levitanakax Diosar luqtañat sipansa yapunakapan qhiparapxäna (Nehemías 13:10 liytʼasiñapawa). Ukhamasti, levitanakas sacerdotenakas Jehová Diosar atinisipxañapänwa, kunattix mayni israelitanak tuqiw Diosax jupanakar yanaptʼäna.

Sapa mayni levitanakatwa Diosax amtasïna

8. ¿Kuna jan walinsa Asaf chachax jikxatasïna?

⁸ Taqpach levitanakarus Jehová Diosax sum uñjkchïnxa, janirakiw maynitsa armaskänti. Ukatwa yaqhipax akham sapxäna: “Nayatakix Tatitukiw taqi kunaxa” sasa (Lam. 3:24). Mayni levitax wali sumwa music tocañsa ukat machaq musicanak apsuñsa yatïna. Jupaw Davitan urunakapanxa cantirinakxarux  pʼiqtʼäna, Asaf satänwa, jan ukaxa, inas familiapächïna (1 Cró. 6:31-43). Uka levitax jan wali jaqinak uñjasaw llakisïna sasaw Salmo 73 qillqatanx parli. Kunjamsa ñanqha jaqinakax sumaki sarnaqtʼasipxäna uk uñjasaw chuym usuyasïna. Ukatwa akham säna: “¡Inamayakiw chuyma qʼumachasitaxaxa! ¡Inamayakiw amparanakax ñanqhat jariqasitaxasa!” sasa. Amuyataxa, janiw Jehová Diosar taqi chuym atinisxänti, janis Diosar luqtañax askïkaspa ukham amuyäna. Ukampis Diosan qullan temploparuw mantäna (Sal. 73:2, 3, 12, 13, 17).

9, 10. ¿Kunatsa Asaf chachax “Diosaw wiñay katuqäwixaxa” sasin säna?

⁹ Ukat Diosan Utapar mantasaw Asaf chachax wal amuytatasïna. Jichhürunakanxa uka pachparakiw yaqhip jilat kullakanakax jikxatasipxi. Diosar serviñax janis wali askïkaspa ukham amuyasaw yänak jikxatañar uchasipxi. Ukampis Diosan Arupat yatxatasin ukat tantachäwinakar sarasaw sum amuytʼasipxi. ¿Asaf chachax kunsa amuyäna? Jan wali jaqinakax kunjamas qhipat uñjasipxani, ukat kuna bendicionanaksa Diosat jupax katuqäna ukanakwa amtäna. Ukat Jupaw irpaskitani sasaw atinisïna. Ukatwa Jehová Diosar akham säna: “Jumamp chik utjasax janiw kuns aka uraqin munkti” sasa (Sal. 73:23, 25). Kunas kunäpan, usutäskäsa, llakitäskäsa “Diosaw wiñay katuqäwixaxa” sasaw säna (Salmo 73:26 liytʼasiñapawa). Chiqansa, Jehová Diosax mä amigor uñtataw wiñayataki uñjaskitani ukat janiw luratanakajat armaskaniti sasaw Asaf chachax säna (Ecl. 7:1). Ukatwa chuymapan wali kusisita jikxatasisax akham säna: “Nayasti Diosaruw jakʼachasï, ukaw nayarux kusisiyitu. Tatay, jumaw arxatirixätaxa” sasa (Sal. 73:28).

¹⁰ Ukampis ¿yänak katuqasakit Asaf chachax Diosarux herenciaparjam uñjäna? Janiwa. “Diosaw wiñay katuqäwixaxa” sasinxa, Jupampi sum apasiñata ukat templon luqtañampitwa parlaskäna (Sant. 2:21-23). Ukat Jehová Diosampi sum apasiñatakix taqi chuym iyawsañapänwa. Ukatxa arunakap istʼasax Jupaw sum uñjaskitani sasaw taqi chuym atinisïna. Ukat ¿jiwasat kamsaraksnasa, Asaf chachjamat Diosar atinisiraktanxa?

11. ¿Kunas Jeremiasar llakisiyäna, ukat kunjamsa Diosax amuytʼayäna?

¹¹ Jichhax Jerusalén jakʼankir Anatot markan jakasiri yaqha levitat parltʼarakiñäni, jupax Jeremiasawa. Jehová Diosaw herenciajaxa sasaw jupax sarakïna (Jer. 1:1). Mä kutix akham sasaw chuym usuyasïna: “¿Kunatsa ñanqha jaqinakatakix taqi kunasa sumaki lurasirapi?” sasa (Jer. 12:1). Jïsa, kunanakas Jerusalén markansa Judá markansa pasaskäna ukanak uñjasax wali mayjtʼataw chuymapan jikxatasïna. Ukampis ¿kunjamsa Diosax jupar amuytʼayäna? Jan wali jaqinakax kunjam taripatas uñjasipxani uk yatiyir saram sasaw khitäna. Ukat uka arunakarjamaw Jehová Diosax sum phuqasiyäna. Jan istʼasirinakax jiwañaruw puripxäna. Ukampis istʼasirinakax “jakañanakapsa qhispiyasipxa[rakïnwa]” (Jer. 21:9).

12, 13. 1) ¿Kunatsa Jeremiasax “nayatakix Tatitukiw taqi kunaxa” sasin säna, ukat kunjam chuymampis suytʼäna? 2) ¿Kunatsa israelitanakax Jehová Diosar suytʼapxañapäna?

 ¹² Qhipatxa qʼala tukjataw markax uñjasïna. Ukatwa Jeremiasax wal llakisirakïna, chʼamak taypinsa sarnaqkaspa ukhamwa amuyasïna. “Kawkïrinakatix nayrax jiwarxapxi ukanakar uñtata[w]” jikxatasïna (Lam. 1:1, 16; 3:6). ¿Kunjamatsa taqi ukanakax pasäna? Janiw jaqinakax Jehová Diosar istʼañsa, ni jan wali luratanakapsa apanukuñ munapkänti. Ukatwa Jerusalén markasa Judá markas qʼala tʼunjata uñjasïna. Taqi ukanak pasir uñjasaxa, walpunwa Jeremías profetax chuymapan llakisïna. Ukampis akham sasaw qhipat säna: “Tatitun munasiñapasti, khuyapayasiñapasa jan tukuskirirakiwa” sasa. Ukat Jehová Diosan khuyapayasiñapax “sapärmanthiw machaqar tukuraki [...]. ‘Nayatakix Tatitukiw taqi kunaxa’” sasaw sarakïna. Ukat jupatakix Jehová Diosan profetapjam irnaqañax wali askïnwa (Lamentaciones 3:22-24 liytʼasiñapawa).

¹³ Ukat “nayatakix Tatitukiw taqi kunaxa” sasaxa, ¿kunsa Jeremiasax uñachtʼayäna? Jehová Diosar taqi chuym atinisisin Jupar suytʼatapwa uñachtʼayäna. Chiqas taqpach israelitanakaw jan walin uñjasipxäna, markas qʼala tukjata, jan kunani ukhamaw uñjasipxäna. Ukhamax ¿kun lurañas wakisïna? Jeremiasat yatiqasisaw Jehová Diosar paqallq tunka maranak suytʼapxañapäna (Jer. 25:11). Ukat ¿Diosax jupanakar yanaptʼänti? Jïsa, yanaptʼänwa, paqallq tunka maranakatxa wasitampiw markapar qhispiyasin kuttʼayäna. Ukatsti, may kutimpiw Diosar pachpa markapan yupaychxapxäna (2 Cró. 36:20-23).

Diosax yaqhanakatsa amtasirakïnwa

14, 15. ¿Jehová Diosax khitirus mä levitarjam uñjarakïna, ukat kunatsa?

¹⁴ Ukampis amtañäni, Asaf ukat Jeremías chachanakax levitanakäpxänwa. Ukhamax ¿uka tribunkirinakakit Jehová Diosar luqtapxaspäna? Janiwa. Israel markan David reyipax waynäskän ukhax akham sasaw Diosar säna: “Jumakiw aka jakañ uraqin taqi kunaxätasa” sasa (Salmo 142:1, 5 liytʼasiñapawa). ¿Kawkinsa ukham sispachäna? ¿Mä jachʼa suma utan jakkasat uka arunak qillqpachäna? Janiwa. Uñisirinakapat jaltasin mä qullu pʼiyan imantasiskäna ukhaw uka arunak qillqpachäna. Inas Adulam satäki uka chiqan jan ukax En-gadi siski uka wasar pampan Salmo 142 jalja qillqchïna.

¹⁵ Davitax Saúl reyin amparapat qhispisaw uka Salmo qillqatayna. Chiqansa, jan jikxatkañ mä puturuw imantasïna (1 Sam. 22:1, 4). Uka chiqanxa janiw jupatakix khiti yanapiris ni arxatiris utjkänti (Sal. 142:4). Ukatwa Jehová Diosar yanaptʼita sasin taqi chuym jakʼachasïna.

16, 17. 1) ¿Kunatsa Davitax wali llaktʼata jikxatasïna? 2) ¿Khitis Davitar jan jaytas yanaptʼäna?

¹⁶ Davitax Salmo 142 qillqkasaxa wali llakitaw jikxatasïna. Ahimelec sat jilïr sacerdoteruw jiwayapxatayna. ¿Khitis ukat kunatsa jiwayänxa? Uka sacerdotex jan yatkasaw Davitarux Saulat qhispiñ yanaptʼatayna. Ukatwa Saulax juparusa ukat familiaparus jiwarayatayna (1 Sam. 22:11, 18, 19). Uk yatisaxa, jupas jiwañar aptʼkaspa ukhamwa Davitax amuyasïna. Ukat niyaw Saulax jupar jikxatañampïskäna. ¿Janit jiwasax ukhaman jikxatasisax wal llakisksna?

 ¹⁷ Ukxarusti, khititix reyïñapataki ajllkäna uka Samuel profetaw jiwxarakïna (1 Sam. 25:1). Uk yatisaxa, janis khiti yanapiris utjkaspa ukat sapakis uñjaskaspa ukhamwa Davitax amuyaspachäna. Ukampis Jehová Diosaw yanaptʼitani sasaw chuymapan amtasïna. Chiqansa, janiw levitanakarjam uttʼaykänti. Ukampis Israel markar apnaqañapatakiw ajllitayna (1 Sam. 16:1, 13). Ukatxa, taqi chuymapuniw Diosar achiktʼasïna ukat kamachinakaparjam sarnaqañatakis chʼamachasirakïnwa. ¿Jehová Diosax jiwasar ukham yanaptʼarakistaspati? Jïsa, ukatakisti, Jupar taqi chuym atinisiñasawa, ukat herenciasarjam uñjañasarakiwa. Ukhamatwa Jupar sum serviñäni.

18. ¿Kunjamatsa levitanakas ukat mayni israelitanakas Jehová Diosar herenciaparjam uñjapxäna?

¹⁸ Kunjamtï aka yatichäwin uñjawayktanxa, levitanakas ukat mayni israelitanakas herenciaparjamaw Jehová Diosar uñjapxirïna. ¿Ukax kamsañs muni? Jehová Diosat luräwinak katuqasax taqi chuymaw ukanak phuqañatakix chʼamachasipxäna ukat Jupar wal atinisipxarakïna. ¿Janit jiwasax Jehová Diosarux herenciasarjam uñjañ munkaraktanxa, ukat kunjamsa uk uñachtʼaysna? Uka tuqitwa jutïr yatichäwin yatxatañäni.

[Qhanañchäwi]

¿Kamsasmasa?

• ¿Jehová Diosax kunjamatsa levitanakatakix mä herenciänxa?

• ¿Kunjamatsa Asaf, Jeremías ukat David chachanakax Jehová Diosar herenciaparjam uñjapxäna?

• ¿Kunjamatsa Diosax herenciasäspa?

[Jiskt’anaka]

[8 janan qhanañchäwipa]

Levitanakax janiw uraq katuqapkänti. Jehová Diosar serviñaw jupanakatakix mä suma herenciänxa

[7 janan fotopa]

¿Kunjamatsa Jehová Diosax levitanakatakis sacerdotenakatakis mä suma herenciänxa?

[9 janan fotopa]

¿Jehová Diosar herenciaparjam uñjaskakiñatakix kunas Asaf chachar yanaptʼäna?