Jehová Diosar serviñax kusiskañawa

Fred Rusk sat jilatan arsutaparjama

Salmo 27:10 qillqatax akham siwa: “Awkixas, taykaxas apanukchitanixa, Tatituw nayarux uywaskitani” sasa. Kunatsa uka arunakax wawakäyat ukhatpach chuymajar wal purtʼitäna uk cuentʼapxäma.

ESTADOS UNIDOS markan Georgia sat markax jikxataskis ukanwa jilsuwayta, ukanxa qhiywa yapuchapxi, 1930 uka pach maranakanxa qullqi jan waltʼañaw utjäna. Ukapachasti papitujax mamitajan ukat jiskʼa asu sullkajan jiwatapatxa jaya markaruw irnaqir sarawayxi, ukatwa nayarux achachilajamp jakañajataki jaytawayitu. Ukat qhipatsti papitujax walja kutiw jupamp jakasir sarxañaj munäna, ukampis inakiw chʼamachasiwayi.

Achachilajan jilïr phuchhanakapaw utanx apnaqapxäna. Jupanakasti, Bautista del Sur sat iglesiapam kamachinakap phuqasapuniw sarnaqapxäna, ukampis achachilajax janiw añcha ukhamäkänti. Ukat nayas sapa domingow sararakiyäta, kunattix tianakajax jan sarkäta ukhax jawqʼjamaw sasaw axsarayapxitäna, ukatakwa sarayäta. iglesiar sarañat sipansa escuelar sarasin wal anattʼañ munirïta.

Mä visitaw yanaptʼawayitu

Khä 1941 maran 15 maranikayät ukhaw chuymankipstat mä chacha warmix utajar mä jaypʼux purinipxi. Jupax “tío Talmadge Rusk” sasaw sapxitu, janiw kunapachas jupat parlir istʼirïkti. Jupanakax Jehová Diosan Qhanañchiripäpxataynawa. Diosax aka uraqin wiñay jakasiñaswa muni, sasaw yatichtʼapxitu. Sarkäyät uka iglesianx janiw kunapachas ukham yatichapkitänti, familiajax janiw istʼan munapkänti. Ukat utar katuqañs janiw qhipatx munxapxänti. Ukampis Mary tiajax mä Bibliampi ukat walja qillqatanak kunwa yatxatañatakix mayisïna, jupax nayat kimsa mara jilïrirakïnwa.

Yatxatasaxa, akaw chiqa yatichäwixa sasaw jupax säna, ukat 1942 maranwa Jehová Diosan Qhanañchiripjam bautisasxi. Ukham luratapatxa familiaranakan yaqhachataw uñjasïna, kunjamtï Jesusax siskäna ukhama: ‘Maynit maynikama familpachan uñisisiñaw utjani’ sasa (Mat. 10:34-36). Ukat qhipatsti, jilïr kullakapax alcaldemp parliriw saratayna. Talmadge chachax jan permiso mayisaw aljaski, uk luratapatxa juchañchapxañamawa sasaw satayna.

Mä periodicox akham sasaw uka tuqit satayna: “Juchañchatäkis uka jaqix [...] qillqatanak jaqir churki ukaxa, jan waltʼayir venenowa” sasaw juezjam irnaqkatayna uka alcaldex qhanañchi sasa. Ukampis tiojax yaqha autoridadanakar sarasinwa, jan juchañchayaskiti, ukampis tunka urunakaw carcelan jistʼantatäna.

 Tiajaw yanaptʼitu

Mary tiajax Bibliat yatiqkäna ukxa, nayaru ukhamarak vecinonakar kunaw yatiyäna. Mä uruxa, El Nuevo Mundo * sat libromp Bibliat mä chachar yatichkäna, ukaruw sarapxta. Warmipax arum paqaraw liytxa sasaw säna. Uka tiemponxa, nayax janiw religion tuqit kuns yatiñ munkayätti. Ukampis kuntï istʼkta ukaw chuymajar purtʼitäna. Qhipatsti, Jehová Diosan Qhanañchirinakapax kunjamtï jaqinakar uñjapkäna uk uñjasaw chiqpachapun Diosan markapäpxatap amuyawayta.

Mä uruxa, tomat yapuchapkäyät uka yaput utar kutʼkasinxa, qʼañunak phichhantapki ukanwa Mary tiajan gramofonopa, ukat Biblian apsut yatichäwinakan nayra jachʼa disconaka, ukhamarak walja qillqatanakapampi phichhantat uñjapxta. Mayni tianakajaw phichhantarapitayna. Uk uñjasax kunats phichhantapxta sasaw nayax sista, uk istʼasinxa maynir tiajax qhuru arumpiw akham situ: “Ukham lurapxatäjatxa mä uruw yusparapxitäta” sasa.

Mary tiajäx janiw religionapsa ni jaqinakar Diosat yatichañsa jaytañ munkänti. Ukatwa 1943 maranxa yaqhawjar utat sarawayxi. Ukapachasti, Diosan sutip yatiqasa, Diosax munasiritapa ukat janiw jaqinakarux ninampi phichhankiti, markapax utjatapa, ukat wali munasirïpxatapa, taqi ukanak yatiqasaxa wali kusisitaw jikxatasiyäta. Ukhakamax janiw mä kutis tantachäwinakarux sarkayätti.

Mä uruxa pastonak khuchhuskäyäta, ukhaw mä autox naya jakʼar saytʼi ukat jumat Fred satäta sasaw maynïrix jisktʼitu. Jehová Diosan Qhanañchiripäpxatap yatisaxa, “automar makhatanï ukat yaqhachiqar parltʼasir sarañäni” sasaw sista. Jupanakarux tiajaw Diosan arunakap nayar yatichañapatak khitanitayna. Maynïrixa, Shield Toutjian satänwa, jupax tamanak tumptʼiritaynawa, jupaw kunapachatï yanaptʼa munkayät ukhax wal chʼamañchtʼitu, suma iwxanaks ukhamarakiw churitu, ukarakiw kuntï Jehová Diosan Qhanañchirinakapax yatichapki ukanakar arxatañatakisa, ukat familiajan naya contra saytʼapkän ukar saykatañatakis yanaptʼawayitu.

Ukat 1943 maranxa, jumatï Jehová Diosar luqtañ amtsta ukhax nayamp jakasir jutxam sasaw Mary tiajax mä carta apayanitu, jupax Virginia markaruw sarxatayna. Jan pächasisaw sarañ amtta. Ukatsti Octubre phaxsin mä viernes jaypʼuw cosasanakäj mä cajar apthapista, ukat uta jakʼan utjkäna uka quqaruw chinkatanta. Ukat qhiparmanthiw uka caja aptir sarta, uta qhipäxam mistsuwayasaw mä vecinojan utapar purta, jupaw markar puriñ yanaptʼitu. Ukhatsti Roanoke tuqiruw sarawayta, Edna Fowlkes sat mä maman utaparuw purta, tiajax ukanwa qurpachasitayna.

 Bautisasxtwa ukat Betelanwa irnaqxta

Edna kullakaxa, Biblian qillqatäki uka Lidia kullakjam wali munasiri ukat mayninakat llakisiri ukhamänwa, alquilat utaparux waljaniruw qurpachäna. Tiajaru, jilapan warmiparu ukat phuchhanakapampiruw qurpachäna. Jupanakax janiw Jehová Diosan Qhanañchiripäpkänti. Ukat tiempompix Gladys, Grace Gregory uka pä tawaqitanakaxa, misionerjamaw luqtxapxäna. Gladys kullakaxa, Japón sucursalanwa Jehová Diosar jichhakam luqtaski, 90 jila maranïxiwa.

Edna kullakan utapar purinkta ukhat aksarux tantachäwinakar sarapuntwa, ukat jaqinakar sum yatichañatakis chʼamachasiraktwa. Tantachäwinakan sum istʼasa ukat Biblia liyisaw jukʼampi chʼamañchasta. Ukatsti, junio phaxsit 14 urunak saraqataruw 1944 maran bautisasxta. Maysa tuqitxa, Mary ukat Gregory kullakanakaxa, precursorjamaw luqtxapxäna, Virginia markan alay tuqiruw khitatäpxäna. Ukan wal irnaqtʼapxatapatxa, Leesburg markanx mä tamaw uttʼäyasiwayi. Ukat 1946 qallta maranxa, nayax precursorjamaw luqtxarakta, ukat yaqha chiqaruw sarta. Uka juntʼu tiemporakiw taqini Cleveland (Ohio) markan 4-11 agosto phaxsin walja markanakat jachʼa tantachäwix utjkäna ukar sarapxta.

Ukat Brooklyn Betel utanxa mä jachʼa altus utaw qamañatak lurasini ukat libronak luraski uka jakʼan yaqha utaw lurasirakini, ukatakix yanaptʼir walja wayn tawaqunakaw munasi sasaw Nathan Knorr jilatax uka jan armkaya jachʼa tantachäwin qhanañchäna. Nayax ukanwa Jehová Diosar luqtañ munta sasax jankʼakiw solicitud churta. Ukat mä qhawqha phaxsitxa, diciembre nayrïr uru saraqatarux 1946 maran Betel utan irnaqañ qallta.

Mä mara pasatatsti, Max Larson imprentan irnaqirinakar uñjkis uka jilataw Departamento de Envíos siski ukar mantani. Ukat Departamento de Servicio siski ukanwa jichhax irnaqxäta sasaw yatiyitu. Uka irnaqäwinwa kunjamsa Diosan markapax sartaski ukat kunjamsa Biblian yatichäwinakapar istʼaña uk yatiqta, jukʼampis Thomas J. Sullivan jilatamp irnaqasax jukʼamp yatiqawayta, amigonakapatakix Bud satänwa. Jupax irnaqäwijan pʼiqtʼirïnwa.

Qhipa maranakatsti papitüjax religion tuqit jukʼampiw yatiñ munxäna. Walja kutiw Betelar visitir juti, ukat 1965 maranwa qhipa kuti jutasax akham situ: “Visittʼañ munitäta ukhax jutaskakïtawa, nayax janiw jutxäti” sasa. Ukhamwa lurta, walja kutiw visittʼir sarawayta jiwañapkama. Alaxpacharuw nayax sarä sasins sirïkchïnxa, aka uraqin mä suma paraison wiñay jakasiñapatak Jehová Diosax jupat amtasispa ukat jaktayaspa ukwa suytʼaskta.

Jachʼa tantachäwinaka ukat yupaychañ utanaka

Jachʼa tantachäwinakax ajay tuqit nayrar sartañatak mä suma yanaptʼawa. Chiqansa, Estadio  de los Yankees de Nueva York siski ukan walja markanakat jachʼa tantachäwix 1950 uka maranakan utjkäna ukax ukhamapunïnwa. Ukat Polo Grounds siski uka estadionampinxa 253.922 jaqinakaw 123 markanakata ukat yaqha chiqanakat jutasax 1958 maran tantachasipxäna. Ukan kunatï paskitäna ukxa janipuniw armaskäti. Uka uruxa, jachʼa tantachäw oficinankaskayät ukhaxa akatjamatwa Knorr jilatax apurata jakʼachasitu, ukat akham situwa: “Fred, precursoranakaw aka jakʼan utjki uka alquilat mä localan suyasipki, ukampis janiw khiti arstʼiris utjkiti, armasitätwa. ¿Sarasmati mä suma arstʼäw arstʼiri? kuna tuqitxay sarkasin arstʼañ amtchïta ukwa arstʼasma” sasa. Ukspachaw Jehová Diosar oración wal mayista, ukatsti ukawjar wali qaritaw purta.

Nueva York markanxa, 1950 ukat 1960 uka maranakanxa, tamanakax waljapuniw jilxattawayi, ukhamïpansti, alquilat Tantachasiñ Utanakat sarxañaw wakisïna. Ukatwa 1970 ukat 1990 uka maranakan Manhattan sat chiqaru kimsa jachʼa altus utanak alapxta, ukat wakisitarjamaw askichtʼapxta. Ukat comités de construcción sasin uñtʼätaki ukanxa nayaw pʼiqtʼirjam uñjarakiyäta. Chiqansa, tamanakax qullqimpi jan ukax chʼamapampi Tantachasiñ Utanak lurasiñapatak yanaptʼapxatapat kunjamsa Jehová Diosax bendeci uk uñjañax kusiskañänwa. Uka Tantachasiñ Utanakanxa jichhakamas tantachasisipkiwa.

Jakäwijax janiw nayrjamäxiti

Khä 1957 maran mä uruxa, Betel utat kawkhantï qillqatanakax luraski ukawjar irnaqir sarkasaw jallux purinti, ukat betelan irnaqir mä kullakaruw jallun chʼarañjayasiskir uñjta. Jupax chuchi ñikʼutani ukat wali suma uñnaqtʼani tawaqünwa. Jankʼakiw nayax paraguajaru nayamp chik jallut imtʼasiñapatak jawsta. Ukhamatwa Marjorie sat kullakamp uñtʼasipxta, ukat jupampirakiw 1960 maran casarasxapta. Ukhat uksarux walinsa jan walinsa, jallüskpasa jan ukax lupïskapasa, wali kusisitaw Jehová Diosar luqtawayapxta. Septiembre phaxsi 2010 maraw 50 maranak chacha warm sarnaqasax phuqapxta.

Casarasisin mä qhawqha urunak yaqha chiqar sarasin kuttʼanxapxta ukspachaw Knorr jilatax Escuela de Galaad siski ukan yatiqirinakar jumaw yatichäta, sasax yatiyitu. Ukatsti, 1961 ukat 1965 uka maranakanxa, phisqa cursonakaruw yatichta. Ukaxa, sucursalanak pʼiqtʼasipki jupanakar jukʼamp yanaptʼañatakïnwa. Ukat 1965 maranxa, wasitampiw misionerjam luqtapxañapatakix phisqa phaxsi escuelax apasxarakïna.

Ukat 1972 maranxa, Departamento de correspondencia de Redacción siski ukan pʼiqtʼirjam uñjañatakiw uttʼayapxarakitu. Sum yanaptʼañatakixa, wal yatxatañäjanwa ukat walja jisktʼanakaruw jaysañäjarakïna, ukawa Biblian  yatichäwinakap jukʼamp sum yatxatañatakisa ukat ukarjam sarnaqañatakisa yanaptʼawayitu, ukhamarak yaqhanakar yanaptʼañatakisa.

Ukanxa 1987 marakamarakiw irnaqawayta, ukatsti, Servicios de Información sobre Hospitales siski ukan irnaqañäjatakiw khitapxitu, ukjakiw ukax uttʼayasiskäna. Ukatwa Comités de Enlace con los Hospitales siski ukan yanapapki uka irpir chuymaninakar kunjamsa wil jan uchayasiñ tuqit doctoranakaru, juesanakaru ukat ukan irnaqapki ukanakarus parlapxaspa, ukatakiw seminarionak wakichasïna. Kunattix Diosan Qhanañchirinakapan wawanakaparux munañaparukiw mediconakax wil uchapxirïna, yaqhippachaxa juesanakat mä orden apsusaw uchapxirïna. Ukanak uñjañaw nänakatakix jukʼamp chʼamäna.

Ukat kuna qullanakas jan wil uchasaki operañatak utjki uka tuqit doctoranakamp parlirïta ukhaxa, janiw uka qullanakax utjapkituti, jan ukax walja qullqitakiwa sasakiw sapxiri. Ukham sataxa “amparam uñachtʼayita mira amp suma” sasaw sirïta. Ukatsti “kunatï amparamankki ukaw mä suma yanaptʼaxa” uk sasinxa, akwa amtayaskayäta: Kunapachatï operañ kuchillox wali amuyumpi apnaqasi ukhaxa, janiw walja wilax ina chusar wartaskiti sasa.

Aka pä tunka qhipa maranakanxa, Jehová Diosan bendicionapampix doctoranakaru, juesanakaru wil jan uchayasiñ tuqit parlapxta ukatxa, walja doctoranakaw kuntï amtktan uk respetxapxi. Ukat jichhaxa, walxa doctoranakasa, hospitalanakasa wil jan uchasa operañatakix jiwasanakarux yanaptʼañxa munxapxarakiwa.

Ukatsti, 1996 maranxa Centro Educativo de la Watchtower de Patterson (Nueva York), markaruw jakasir esposäjamp sarxapta. Ukaxa, Brooklynat 110 kilometronak alay tuqir sarañanwa jikxatasi. Nayraqatxa Departamento de Servicio siski ukanwa irnaqta, ukat qhipatsti, sucursalanak pʼiqtʼapki ukanakaru ukat tamanak tumptʼir jilatanakan yatichiripjamaw irnaqtʼarakta. Ukat Correspondencia de Redacción ukan Brooklynat Patterson chiqar sarxatapatxa, 12 maraxiwa. Ukan wasitampi pʼiqtʼirjam yanaptʼañajatakiw invitapxitu, jichhakamas ukanwa irnaqtʼaskta.

Chuymankipstatäxasax janiw nayrjam irnaqxti

Chuymankipstatax janiw Betel utan luräwinakaj sum phuqirjamäxti, niyaw 80 jila maranïxta ukat tunka mara jilaw canserampi usuntatäxta. Mä arunxa Ezequías reyirjamaw Jehová Diosax jichhakama jakayasiskitu (Isa. 38:5). Ukat Marjorie esposäjax Alzheimer usumpi usuntatarakiwa, panpachaniw tʼaqhisipxta. Esposajax wali sum Jehová Diosarux luqtawayi, wayn tawaqunakarus wali sum yanaptʼawayi ukat nayatakix mä suma yanapiri esposapunïwa. Jupax Bibliat wali sum yatxattʼiri ukat wali suma yatichirirakïnwa. Diosar uñtʼañ yatichapkta uka jilat kullakanakampix parltʼasipxapuntwa, jupanakax wawanakajäkaspas ukhamäpxiwa.

Marzo phaxsi 2010 maranwa, Mary tiajax jiwawayxi, jupax 87 maranïxänwa. Jupaxa, Diosan arunakapat wali suma yatichirïnwa, walja maranakaw precursorjam irnaqtʼawayi, ukatxa waljaniruw Diosan markapar mantanipxañapatak yanaptʼawayi. Jupaw nayarux chiqa yatichäwinaksa ukat Diosan markapar mantañsa yanaptʼawayitu, ukatwa juparux taqi chuym yuspärta. Jichhax esposopamp chikaw sementerion imtʼataski, esposopax Israel markanwa jakkasax misionerjam irnaqtʼawayäna, chiqas jupanakarux munasir Jehová Diosax jutïr pachanx jaktayaniwa.

Jehová Diosar 67 maranak luqtasax kunjamsa Jupax bendiciwayitu uk amtasax walpun yuspärta. Jupar luqtañax kusiskañapuniwa. Jesusax “taqi khitinakatix jaytanukuni utanakapa, jilanakapa, kullakanakapa, taykapa, awkipa, wawapa ukhamarak uraqipsa naya layku ukanakaxa, patak kuti ukkhampwa katuqapxani, ukhamaraki wiñay jakañampi” siskäna uka arunakax nayan phuqasirakispa ukwa munta (Mat. 19:29).

[Qhanañchäwi]

[19 janan fotopa]

Achachilajan qhiya yapupankasktwa, 1928 marana (Georgia, Estados Unidos)

[19 janan fotopa]

Mary tiajampi ukat Talmadge tiojampi

[20 janan fotopa]

Mary, Gladys ukat Grace

[20 janan fotopa]

Junio 14, 1944 maran bautisasta

[20 janan fotopa]

Departamento de Servicio, Betel

[21 janan fotopa]

1958 mara, Estadio de los Yankees, Mary tiajampiw mä jachʼa tantachäwinkasipkta

[21 janan fotopa]

Marjoriempi casaraskta uka uru

[21 janan fotopa]

Esposajampi 2008 marana