Kunas solteronakar ukat casadonakar yanaptʼaspa

“Jumanakan [...] taqi chuyma Tatitur servisina sarnaqapxañamatakiwa sapxsma.” (1 COR. 7:35.)

1, 2. ¿Casarasiñ tuqits solterüñ tuqitsa kunjamsa Bibliax yanaptʼistaspa?

 CASADONAKAX chacha warmi kusisit sarnaqañsa, llakit sarnaqañsa ukat jan walinakan uñjasiñsa sum yatipxi. Sapäsipki uka waynanakas tawaqunakamp parlasax ukhamarakiw kusisitas jan ukax llakitas jikxatasipxi, ukat uka pachpaw tawaqunakampis pasaraki. Ukatwa cristianonakax casaratäkasas jan ukax sapäkasas Jehová Diosar yanapa mayisipxi. Maysa tuqitxa, yaqhip wayn tawaqunakarux casarasxañamaw sasaw familiaranakas amigonakas wal arxayapxi. Yaqhipanakax jaqichasiñ munasipkchisa, janiw jupatakjam jikxatapkiti. Ukat casarasiñatak uñtʼasisipki ukanakax kunjamsa chacha warmix sarnaqapxani, lurañanaks phuqapxani, ukanakatwa lupʼipxaraki. Taqiniw llakinakan uñjastanxa ukat yanaps munaraktanxa.

² Chiqansa, kunjamsa jikxatastan ukarjamaw kusisitas jan ukax llakitas sarnaqtanxa, ukat Jehová Diosampis sum apasiraktanxa. Ukatwa kuntï apóstol Pablox casarasiñ tuqitsa solterüñ tuqitsa 1 Corintios 7 jaljan parlki uk yatxatañasaxa. Akham sasaw nayra cristian masinakapar amuytʼayäna: “Jumanakan askimatakiwa sapxsma, janiw jumanakar kun jarkʼañ munasati, jan ukasti taqi chuyma Tatitur servisina sarnaqapxañamatakiwa sapxsma” sasa (1 Corintios 7:35). Casaratanakas solteronakas Jehová Diosar yupaychañataki chʼamachasipxaspa ukwa Pablox munäna. Uka arunakax jiwasatakis wali askirakiwa.

Sapa mayniw amuytʼasxañasa

3, 4. 1) ¿Sapak sarnaqaskipan maynirux casarasxam sasin arxaysna ukhax kunas kamachaspa? 2) ¿Pablon iwxanakapax kunjams yanaptʼistu?

³ Nayra judionakatakixa, casarasiñax wali askit uñjatänwa. Jichhürunakanxa niya ukhamarakiwa. Kunapachatï mä waynas jan ukax tawaqus sapak sarnaqaski ukhaxa, familiaranakas amigonakas llakisipxiwa. Jankʼak khitimpis casarasxasma sasaw sapxi. Jan ukax jupanakaw khitis walïspa uk sapxi, awisax jupanakpachaw maynimp uñtʼasiñapatakix yanaptʼapxi. Ukampis maynitï ukham luraspa ukhaxa, chuym ustʼayasiñaw utjaspa, amigonakampis jachjayasiraksnawa.

⁴ Pablox janipuniw khitirus casarasiñamawa, jan ukax janiw casarasiñamäkiti sasin siskänti (1 Cor. 7:7). Jupax Jehová Diosar solterjam luqtasax wali kusisitas jikxataskchïnxa, casarasiñ munirinakarux respetompiw uñjirïna. Ukhamaxa, casarasiñas jan ukax sap sarnaqasiskañas sapa maynitäxiwa.

¿Solteronakax kuna askinaksa jikxatapxaspa?

5, 6. ¿Kunanaksa Pablox solterükasin luräna?

⁵ Corinto markankir tamaru carta qillqkäna ukanxa, solteronakax kuna askinaksa Diosar luqtasin jikxatapxaspa ukwa Pablox qhanañchäna (1 Corintios 7:8 liytʼasiñapawa). Jupax soltero sarnaqasisax janiw jachʼañchaskänti, kunjamtï kʼari yupaychäwinakan pʼiqtʼirinakax solterüsax jachʼañchasipxi ukhama.  Jan ukasti, Diosan arunakap yatiyir solter jilat kullakanakax kuna askinaksa jikxatapxi ukwa qhanañchäna.

⁶ Solteronakaxa, kuntï casaratanakax jan lurirjamäpki ukanakwa lurapxaspa. Amtañäni, Pablox “jan judiöpkis ukanakar” parliriw saräna (Rom. 11:13). Ukat Hechos 13 jaljat 20 jaljakam liytʼasaxa, kunjamsa Pablox yaqha misioner masinakapampix jaya markanakar sarapxäna ukwa amuytanxa. Diosan arunakapat jan yatiyaski ukawjanakar kunjamsa yatiyirix saräna ukat machaq tamanaks uttʼayäna ukwa amuyaraktanxa. Ukatxa, kunayman jan waltʼäwinakaruw saykatarakïna. Chiqansa, jichhürunakanxa mä qhawqhanikiw jupjam jan walinakan uñjastanxa (2 Cor. 11:23-27, 32, 33). Ukampis ukham irnaqasax wali kusisitaw jikxatasïna (1 Tes. 1:2-7, 9; 2:19). ¿Warminïspäna ukat wawanakanïspän ukhax ukham irnaqaspänti?

7. Kunjamsa solter jilat kullakanakax Diosan Reinopatak irnaqtʼapxaspa uk mä uñachtʼäwimp qhanañchtʼma.

⁷ Jichhürunakanxa ukhamarakiw solter jilat kullakanakatxa, waljanix Diosan Reinopat yatiyapxi. Bolivian luqtir pä precursor kullakat parltʼañäni, Sara ukat Limbania satäpxiwa. Jupanakax Diosan arunakap yatiyiriw mä jiskʼa markar sarapxatayna, ukanxa janiw lusax utjkiti, ukatxa walja maranakarakiw Jehová Diosan Qhanañchirinakapax uka chiqar jan sarxapxataynati. Uka kullakanakax akham sapxiwa: “Niyakixay televisionasa radiosa jan utjkchixa, jaqinakax libronak wal liyiñ yatipxi” sasa. Yaqhipaxa Diosan markapan apayanit nayra libronaksa liyisipkakiwa sasaw kullakanakax sapxi. Ukatxa niya sapa utanwa Bibliat yatiqañ munirinakax utji, ukat janiw taqinir purtʼañatakix tiempox utjirjamäkiti sasaw sapxaraki. Ukatxa, chuymankipstat mä warmix akham sasaw jupanakar satayna: “Juiciox wali jakʼankxpachawa, ukatwa Jehová Diosan Qhanañchirinakapas akakam purinipxpacha” sasa. Kullakanakax kunjamsa yatiyapxi uk uñjasaxa, waljaniw tantachasiñ qalltawayapxi.

8, 9. 1) ¿Kunsa Pablox solteronakar amuytʼayañ munäna? 2) Solteronakax jaqichatanakat sipansa, ¿kunanaksa lurapxaspa?

⁸ Chiqansa, casarat jilat kullakanakax wali sumwa Diosan arunakapat taqi chiqan yatiyapxi. Ukampis sapäsipki uka precursor jilat kullakanakax kawkirus yatiyir sarapxakispawa. Inas casaratanakatakis jan ukax wawaninakatakis  jupanakjam irnaqañax chʼamächispa. Kunapachatï Pablox Corinto markankir jilat kullakanakar cartap qillqäna ukhaxa, walipuniw lurañanakax utjäna. Ukatwa jaqinakar yatiyir sarasin arkir tukuyapxam sasax solteronakar chʼamañchäna. Jïsa, Diosar luqtasax jupjam wali kusisit jikxatasipxaspa ukwa Pablox munäna.

⁹ Estados Unidos markankir mä precursor kullakax akham siwa: “Jaqichasisakis maynix kusisit sarnaqañ yatkaspa ukham jaqinakax amuyapxi. Ukampis khititix Jehová Diosamp sum apaski ukaw chiqpach kusisiñ jikxati sasaw nayax sista. Chiqansa, sap sarnaqañax chʼamawa, ukampis askinak lurañatak chʼamachasktan ukhaxa, solterüñax wali khusawa. Sapäkasax wali kusisitaw sarnaqasta, janiw kunas kusisiñat jarkʼkituti. Ukat Jehová Diosax janiw khitirus yaqhachkiti, casaratanakarus solteronakarus pachpak uñji, taqiniruw munasistu” sasa. Uka kullakaxa, kawkhantï yatiyirinakax wal munaski uka chiqanwa jichhax Diosar kusisiñamp luqtaski. Jumax sapäsksta ukhaxa, ¿yaqha chiqanakar ukham yatichir sarañ munasmati? Ukham lurasma ukhaxa, kunatsa “solterüñax Jehová Diosan regalopawa” sistanxa, ukwa amuyäta.

Casarasiñ munir solteronakataki

10, 11. ¿Casarasiñ munapki ukat jan jikxatapki ukanakarux kunjams Diosax yanaptʼi?

¹⁰ Solterükasin Jehová Diosar luqtkasaxa, casarasiñwa yaqhipax munapxaraki. Ukatxa, mä suma warmi jan ukax mä suma chacha jikxatañatakixa, Jehová Diosaruw yanaptʼa mayisipxi.

¹¹ Jumatix casarasiñ amtasksta ukhaxa, khititix cristianjam suma chuymampi sarnaqaski uk thaqhañamawa, ukatxa Jehová Diosar yatiñamamp yanaptʼita sasin mayisiñamarakiwa (Fili. 4:6, 7). Inas suyañax wakisiskakchini, ukampis Diosar mayisiskakiñamawa, Jupaw jan sint llakisiñamatakix yanaptʼätamxa (Heb. 13:6).

12. ¿Casarasiñäni satax kunatsa wal amuytʼasiñasa?

¹² Casarasiñ munapki uka solter jilat kullakanakaruxa, awisax khitinakatï Diosar jan sum luqtapki jan ukax Diosar jan uñtʼapki ukanakaw casarasiñatak arxayapxi. Ukat iyaw sasin jaqichasipxani ukhaxa, llakitas sapäkasax jikxatasipkchixa, jukʼamp jan walinwa uñjasipxaspa, jachañaruw puripxaspa. Ukat casaratäxasax janiw qhipar kuttʼapkaspati, ukxa janipuniw armasipxañapäkiti (1 Cor. 7:27). Ukhamasti, janiw khitis jan saparstʼañ laykukix jaqichasiñapäkiti, qhipatxa amtasiñaw utjaspa (1 Corintios 7:39 liytʼasiñapawa).

Chacha warm sum sarnaqañatakix kunjams wakichassna

13-15. ¿Casarasiñatak uñtʼaskasax kuna tuqinakat parltʼasiñas askïspa?

¹³ Amtañäni, Diosar solterükasin luqtañax wali askiwa sasaw Pablox säna. Ukampis khitinakatï casarasiñ amtawayapki ukanakarux janiw jiskʼachkänti. Antisas qullan ajayun amuytʼayatäsax suma iwxtʼanakwa casaratanakatakix qillqäna. Kunjamsa mayachtʼat sarnaqasipxaspa ukat jan waltʼäwinakarus atipjapxaspa uka tuqinakatsa wali suma iwxanakwa jaytawayäna.

¹⁴ Janïr jaqichaskasaxa, wali sum jakasïxa sasaw casarasir wayn tawaqunakax amuyapxi, jupanakakis kusisit sarnaqañ yatipkaspa ukham amuyasipxi. Ukampis casarasxapxi uka qhipatxa, janiw ukax ukhamäxiti. Janiw sapürus wali kusisit sarnaqxapxiti. Chacha warmjam munasiñax askïkchisa, janiw uka kast munasiñampix jan walinakar atipjapkaspati. Ukatxa, kunayman jan walinakaw qhipat uñstaspa. Ukhamaxa, janïr casaraskasin sum amuytʼasiñasaw wakisi (1 Corintios 7:28 liytʼasiñapawa). *

¹⁵ Yaqhipax casarasxapxi uka qhipatakwa pisayasipxi, jan mä amtar purirjamäxasaxa, chuyms wal usuyasipxi. Qullqi tuqitsa, kusistʼañ tuqitsa, janikiw waltʼayasxapxiti. Ukat  kawkinsa jakapxani, qhawqha kutis familiaranakar visitapxani uka tuqinakatsa janikiw sum parltʼasipkiti. Jiskʼachasiñakiw purapat utjxi. Ukhamaxa, janïr jaqichaskasaw uka tuqinakat parltʼasiñax askïspa, qhipatxa amtasiñaw utjaspa.

16. ¿Jan walir saykatañatakix kunatsa chacha warminakax mayachtʼasipxañapa?

¹⁶ Mä chacha warmixa, purapat mayachtʼasipxañapawa, ukat lurañanakapsa phuqapxañaparakiwa, ukhamatwa utan sum jakasiñax utjani. Wawanakarux kunjamsa yatichapxani, chuymankipstat awk taykarus kunjams uñjapxani uka tuqinakat sum arustʼasipxañapawa. Chiqansa, taqi familianakanwa jan waltʼayasiñax utji, ukampis janiw uka jan walinakan tʼaqjtañax walïkaspati. Jan walinak askichapxam, jan askichañjamäkchi ukhax aguantapxam ukat kusisit jakasipxam sasaw Bibliax iwxtʼistu (1 Cor. 7:10, 11).

17. ¿Casadonakax kuna tuqinakatsa llakisipxi?

¹⁷ Jaqichatanakaxa yaqha tuqitwa llakisipxaraki sasaw apóstol Pablox qhanañchi (1 Corintios 7:32-34 liytʼasiñapawa). Ukax chiqäskapuniwa, “maynitix casadochi ukax taqi kunatwa llakisi”; manqʼañatsa, isitsa, utatsa llakisipxiwa. Amuytʼañäni, mä solteronxa Jehová Diosar luqtañatakix chʼamapasa tiempopasa jukʼampiw utji. Ukampis, mä casadox familiaparu, warmiparu jan ukax chachaparu uñjañapawa. Ukxa Jehová Diosax sum yati. Kunjamatsa chacha warmix purapat kusisit sarnaqasipxaspa, ukatakix qhawqha tiempos munasi ukat qhawqsa chʼamachasipxañapa ukxa, Diosax sum amuyi.

18. ¿Casadonakax kunsa kusistʼañ tuqit amuyasipxañapa?

¹⁸ Jichhax kusistʼañ tuqit amuytʼarakiñäni. Inas sapäkasax masinakamp kusistʼañatakix tiempos utjchïna. Ukampis casaratäxasax uka kusistʼäwinakat tiempo apsuñasarakiwa. ¿Kunatsa? Niyakixay chacharu jan ukax warmir uñjañatakix Jehová Diosar luqtañatsa tiempo apsustanxa, amigonakampi walja tiempo  kusistʼañat sipansa chachatakix warmipaw nayrankañapa ukat warmitakis chachapaw nayrankañaparaki. Jan ukhamäkaspaxa, saparstʼata, wali llakita ukat chuymas pʼakintata ukhamaw maynix jikxatasispa. Ukhamaxa, sapäkaspas ukham walja tiempo kusistʼañat sipansa, chacha warmi sum apasiñatak chʼamachasipxañapawa (Efe. 5:31).

Jehová Diosax sum sarnaqañaswa muni

19, 20. 1) ¿Kunatsa casaratanakas wachuq juchar puripxarakispaw sasax sistanxa? 2) ¿Mä chacha warmix purapat jan sum phuqasxapxaspa ukhax kunas kamachaspa?

¹⁹ Jehová Diosan luqtirinakapatxa janiw khitis qʼañu luräwinakar puriñ munktanti, ukatwa yaqhipax wachuq juchar jan puriñatakix casarasiñ amtapxi. Ukhamax ¿casaratanakax uka kast juchanakat suma jarkʼaqatäxapxiti? Janiwa. Amuytʼañäni, Bibliax qillqaskäna uka tiemponakanxa jachʼa pirqanakamp muyuntat markanakaw utjäna. Uyu anqäxanxa, kunayman jan wali jaqinakaw utjäna, ukat khitinakatï anqar mistsupkän ukanakaxa, lunthatanakan jalxatata ukat awisax jiwayat kunaw uñjasipxäna. Ukhamaxa janiw aliqat mistsupxañapäkänti. Jaqichasiñax uka markanakar uñtasitarakiwa, Jehová Diosan kamachinakapasti uka jachʼa pirqanakar uñtasitawa. Ukhamax wachuq juchar jan puriñatakix janiw uka kamachinakat mistsuñasäkiti.

²⁰ Kunjamsa uka kamachinakax jarkʼaqistaspa ukwa Pablox 1 Corintios 7:2-5 qillqatan qhanañchi. Chachax warmipampikiw sarnaqañapa ukat warmis chachapampikiw sarnaqañaparaki sasaw amtayistu. Jïsa, chacha warmix kunatï wakiski ukanakamp purapat ‘phuqhapxañapaw’ sasaw Diosan Arupax sistu. Ukampis mä chacha warmix trabajo layku jan ukax kun utjipansa jayarstʼayasipxaspa, ukat kunatï wakiski uk phuqañat armasipxaspa ukhaxa, Supayaw ukanak uñjasax jan walir puriyaspa. Mä chachatix warmipar ukhamak jaytani, kuntix warmipatak phuqañapäki uk jan phuqkani ukhaxa, warmix yantʼataw uñjasispa, ukat warmix jan phuqkani ukhaxa, chachas yantʼataw uñjasirakispa. Ukampis khitinakatï familiapar sum uñjañatak ukat kunatï munaski ukanak churañatak chʼamachasipki ukanakax Jehová Diosan bendicionanakap katuqapxani (Sal. 37:25).

Biblian utjki uka iwxanakar istʼañäni

21. 1) ¿Casarasiñ tuqit kun amtañas sapa maynitakis wali chʼamäspa? 2) ¿Kunatsa 1 Corintios 7 jaljan utjki uka iwxanakar istʼañax askïspa?

²¹ Mä tiempox taqiniw “casarasïti jan ukax sapakich sarnaqasiskäxa” sasax wal lupʼtanxa, ukat uk amuytʼañax janiw kuna faciläkisa. Ukampis casaratas jan casaratas taqinirakiw juchararätas laykux jan walinakan uñjastanxa. Ukat Jehová Diosan suma luqtiripäkasas jan ukax jupan yanaptʼkatasa janiw taqi jan walinakat jaltksnati, kunjamatsa llakinakax solteronakatakis casaratanakatakis utjakipuniwa. Ukampis kuntï 1 Corintios 7 jaljan yatiqktan ukarjam sarnaqañäni ukhaxa, walja jan walinakatwa qhispsna. Ukat taqinirakiw Dios Awkisan askit katuqatäsna (1 Corintios 7:37, 38 liytʼasiñapawa). Chiqansa, ukatakiw jaqichatanakas solteronakas wal chʼamachastanxa. Ukat mä suma uraqin jakasiñasatakiw Jupax yanaptʼistani, ukanxa janiw chacha warm llakit sarnaqañas utjxaniti, janirakiw soteronakas chuym usuyasxapxaniti.

[Qhanañchäwi]

¿Amuytati?

• ¿Casarxañamawa sasin yaqhanakar arxayañax kunatsa jan walïkaspa?

• ¿Sapäsksta ukhax tiempomampi kun lurasas yatiñanïtam uñachtʼayasma?

• ¿Casarañataki uñtʼasisipki ukanakax kunjamatsa chacha warm sum sarnaqañatakix wakichasipxaspa?

• ¿Jaqichasiñax janiw wachuq juchanakat sumpun jarkʼaqkiti sasax kunatsa sissna?

[Jiskt’anaka]

[14 janan fotonakapa]

Sapäkasin Diosatak wal irnaqtʼapki uka jilat kullakanakax wali kusisitaw jikxatasipxi

[16 janan fotopa]

¿Casaratäxasax kunsa chachatsa warmitsa lurañasa?