¿Kunatsa “suyapxapunim” sispachäna?

AKHAM sasaw arkirinakapax Jesusar jisktʼapxäna: “¿Kawkïrïnis chimpuxa jumax kuttʼankät ukkaxa, ukhamarak akapach tukuskan uka urutsa?” sasa (Mat. 24:3). Uk satax wali qhana chimpunakatwa Jesusax parläna, kunjamtï Mateo 24, Marcos 13 ukat Lucas 21 jaljanakan parlki ukhama. Ukatxa, “jumanakax suyapxapunim” mä arunxa amuyasipxapunim sasaw säna (Mat. 24:42).

Taqinin amuykañaw uka chimpunakax phuqasiñapäna. Ukampis ¿kunatsa amuyasipxam, “suyapxapunim” sispachäna? Mä tuqitxa, pachpa lurañanakapampi ukat kunatix akapachan utjki ukanakampi chʼamaktʼayataw maynix uka chimpunakat armasispa, ukat Diosar yupaychañ tuqitsa aynachtʼarakispawa. Maysa tuqitsti, inas maynix akham sarakchispa: “Janiw taqi chimpunakas Jesusan arunakaparjam taqi chiqan phuqaskiti, mä qhawq nayax uñjta. Ukhamax jachʼa tʼaqhisiñax jayat jutaskani” sasa. Ukham amuyasaw suyañ tiempot armasispa (Mat. 24:21).

Janiw “amuyasipkänti”

Arkirinakapan amuyasipxañapatakix Uma Juicio tiempon jakir jaqinakatwa Jesusax parläna. Kunjamsa Noé chachax mä jachʼa arca luraskäna ukat Diosan arunakapatsa yatiyäna ukanak sum uñjapxäna. Ukat jan wali luräwinakas taqinin uñjkataw jilxattaskäna. Ukampis uka jaqinakax janiw “amuyasipkänti” (Mat. 24:37-39). ¿Jichha tiempo kamsaraksnasa? Janis kunas paskaspa ukham sarnaqapxi. Amuytʼañäni, auto thakinakanxa jan chijinakar puriñatakix qhawqha sarañas wakisispa uk amuyasiñatakiw chimpunak uchapxi, ukampis yaqhipax jan yäqasaw auto wal jalayapxi. Ukatwa yaqhip chiqanakanxa autoridadanakax yaqha kasta jarkʼirinak uchapxi. Yaqhip jilat kullakanakax niya ukar uñtasitarakiw sarnaqapxi. Kuna chimpunakas aka urunakan phuqasiski uk sum yatkasaw maysar sarapxi. África tuqin jakasiri Arielle sat mä kullakitas ukhamarakiw pantjasitayna. Jupat jichhax parltʼañäni.

Uka kullakitax amparampi pelot anatir warminak televisionan uñchʼukiritayna, ukat jupax ukham anatañ wal munarakïna. Colegiopan pelot anatañ amtapxäna ukhaxa, jankʼakiw ukar qillqayasïna. Ukanakar mitisisax kunjamakis ajay tuqin jikxatasispa ukxa janiw amuyaskänti. Ukat jupax akham siwa: “Anatir tawaq masinakajan yaqhip uñtʼatanakapax cigarro pitiri ukat droganak apnaqir jan wali waynanakäpxänwa. Nayatsa wal larusipxiri” sasa. Uka jan walinakax janiw nayar kamachkitanisa sasaw Ariellex amuyasïna. Ukampis anatir sarasax jukʼat jukʼatwa jan walir saraskäna, jupax akham saskakiwa: “Amparampi pelot anatañakiw chuymajankaskiri. Tantachasiñ Utansa ukak pensaskirïta” sasa. Ukat chuymapas mayjaxänwa. Aliq anattʼasin kusisiñat sipansa, atipañak munaskäna, jan atipayasiñ laykux walja tiempow yatiqirix sararakïna. Llakis jukʼat jukʼatwa apxattarakïna ukat anatañ laykux suma amigonaksa aptʼasitaynawa.

 Uka kullakitan chuymapax yaqhapunïxänwa. Mä kutix mayni equiporuw penal taktʼañax waktʼäna. ¿Ariellex kamachpachänsa? Niyakixay arquerüchïnxa, jan golantayasiñatakix Jehová Diosaruw maytʼasitayna. “Ukhakiw jan walinkat amuyasta” sasaw jupax qhanañchi. Ukat ¿kamachpachänsa?

Jupax akham siwa: “Los jóvenes preguntan... ¿Qué haré con mi vida?, * siski uka video nayrax uñtayäta. Uk amtasax mayampiw uñtäxa sasaw sista. Videon uñstki uka André waynar uñtasitarakiw nayax uñjasta. Ukat kuntï irpir chuymanix André waynar siskäna ukax nayatakïkaspas ukham katuqasta. Filipenses 3:8 qillqat liytʼasax wal amuytʼasta. Ukhamatwa pelot anatañ equipot mistxta” sasa.

Kullakitax saskakiwa: “Pelot anatañ jaytasax nayraruw sartawayta. Nayrax atipañak munaskirïta, jichhax janiw ukhamäxtti. Ukat anatañ tuqit llakinakajas chhaqtawayxarakiwa. Wali sumaw jilat kullakanakampis apasta. Nayatakix Diosar serviñaw nayrankxi. Ukat tantachäwinakansa wali sum istʼarakta. Diosan arunakapatsa sum yatiyarakta. Ukat sapa kutiw precursor auxiliarjamax irnaqta” sasa.

¿Jiwasat kamsaraksnasa? Akapach yänakar munasax aynachtʼsnawa. Ukhamächi ukhaxa, Arielle kullakitjam amuytʼasiñasawa. Diosan markapan apayanit qillqatanakampi chʼamañchasiñasawa. Ukanakan jiwasatakjam suma yatichäwinak jikxatañatakix Índice de las publicaciones Watch Tower siski uka qillqatampi yanaptʼasiñasawa. Kawkinsa jiwasatakjam suma iwxanaksa ukat experiencianaksa jikxatsna ukwa uka Índice sat librox sum uñachtʼayistu. Ukat tantachäwinakar sarañataki sum wakichasiñasawa ukat sum istʼañatakix nayraqatar quntʼasiñasawa, ukat arstʼañataki jisktʼanakax utjani ukhax qalltatpach arstʼañataki chʼamachasiñasawa. Ukat kunanakas jichhax pasaski ukat ukanakax kunjamsa Jesusan arunakaparjam phuqasiski uk amuytʼañamarakiwa. Taqi ukanakaw amuyasiñatakix yanaptʼätamxa (2 Tim. 3:1-5; 2 Ped. 3:3, 4; Apo. 6:1-8).

‘Wakichtʼata suyapxañäni’

“Aka uraqpachanwa” señalanakax uñjasini sasaw Jesusax säna (Mat. 24:7, 14). Jïsa, ukanakax phuqasiskapuniwa. Walja millón jaqinakaw machʼan jakapxi, jan qullkañ usunakampi aynachtʼayat tʼaqhisipxi. Ukat uraq khatatinakas ukhan akhanwa uñjasiraki. Ukampis yaqhipax uka jan walinakan utjatap yatipkchisa, janiw uka kasta tʼaqhisiñanakan uñjasiñ yatipkiti, jichhakamax sumakiw jakasisipki. ¿Jumax uka sinti tʼaqhisiñanakan uñjasiñ yattati? Jan ukhamäkchi ukhaxa, inas jachʼa tʼaqhisiñ urunakax janïras jutañampïkaspa ukhamwa amuyasksna. Ukham amuyasax pantjasiñaruw pursna.

Jesusan arunakapat amuytʼañäni. ‘Manqʼat pistʼañanakampi’ ukat ‘usunakampiw’ utjani sasaw säna (Luc. 21:11, NM). Ukampix ¿mäkiw taqi ukanakax uraqpachan phuqantani sañt munäna? Janiwa, “walja chiqanakana” utjani sasaw säna. Ukhamax janiw taqi señalanakan sapa lugaran phuqasiñap suyañasäkiti. Ukampis señalanak jan uñjxasax yaqhip cristianonakax qhiparuw kuttʼapxi. Ukatwa Jesusax machʼanakampit usunakampit parlasaxa akham säna: “Amuyasipxam, jan chuymanakamxa vicionakampi machañanakampi qalarayasipxamti” sasa (Luc. 21:34). Chiqas janiw jiwasapunix taqi señalanakan uñjasiñ munktanti. Ukatxa, Diosan  reinopax jakʼankxani ukhaw ukanakax pasani sasaw Jesusax sarakïna (Luc. 21:31). Ukat kunjamatï yatiyäwinakan uñjaski ukat istʼaskixa, kuntï Jesusax siskäna ukanakax chiqapuniw yaqha chiqanakan phuqasiski.

Ukat maysa tuqit amuytʼarakiñäni. Jachʼa tʼaqhisïwix “kuna horasäkanitix jan ukax kuna urükanitix” ukxa Jehová Diosax sum yatxi (Mat. 24:36). Ukhamax kunanakatï aka Uraqin pasaski ukanakax janiw akchʼas uka uru jittʼaykaspati.

“Ukatpi jumanakax wakichtʼata suyapxañamaxa” sasaw Jesusax säna (Mat. 24:44). Jïsa, taqinis wali wakichtʼat suyañasawa ukat jankʼakïñasawa. Chiqansa, janiw khitis Diosar jan samartʼas luqtksnati, ni uruy arumas uñnaqksnati. Ukampis yaqhipax lurañanakapampi apayasisaw uka uru qhiparayañ munapxaspa, “kuna urus purinini ukxa janiw khitis yatktanti” sasa (Mat. 24:40, 41). Ukhamax ¿wakichtʼat suyañatakix kunas wakisispa?

Suxta phuchani mä chacha warmit parltʼañäni. Jilatax Emmanuel ukat kullakax Victorine satäpxiwa. África uksanwa jakasipxi. Markapanxa janiw jachʼa llakinakax paskiti, kuntï Jesusax siskäna uka chimpunakax janiw uka chiqan uñjañäkiti. Ukampis uka familianxa Diosan arunakapat sapür yatxatañatakiw chʼamachasipxi. ¿Kunatsa? Jupanakax wali wakichtʼataw suyañ munapxi. Jilatax akham siwa: “Familpachataki tiempo jikxatañax chʼamawa. Ukatwa willjtanakax Diosan Arupat yatiqapxta, sapüruw suxta horasax niya 30 minutonak tantachasipxta. Diosan Arupat sapür yatxatañataki siski uka qillqat liytʼasaxa, tantachäwinakatakiw mä jukʼa wakichasipxarakta” sasa. ¿Kuna askinaksa jikxatapxpacha? Jilatax irpir chuymaninakan sarayiripjamaw irnaqtʼaski, kullakasti walja kutiw maranxa precursor auxiliarjamax luqtaraki ukat waljaniruw Bibliat yaticharaki. Ukat phuchanakapax wali sumwa sarxarusipkaraki.

Ukat Jesusax akham sistuwa: “Suyapxam, amuyasipxam” sasa (Mar. 13:33). Kunanaktï cristianjamax lurañasäki ukanakat mays uñtasin suyañ urut armassna ukhax janiw walïkaspati. Arielle kullakampit Emmanuel jilatan familiapampit yatiqasipxañäni. Kuntï Diosax qillqatanak tuqis ukat tantachäwinak tuqis yatichkistu ukanak sum istʼapxañäni. “Suyapxapunim” sasaw Jesusax säna, ukhamax sapürus ukarjam sarnaqañäni.

[Qhanañchäwi]

[4 janan fotopa]

Diosan Arupat sapür yatxatasaw Emmanuel jilatan familiapax wakichtʼat suyaski