‘Akapachan sarir jaqïtanwa’
‘Akapachan sarir jaqïtanwa’
‘Taqi uka jaqinakax akapachana sarir jaqinakäpxatapwa yatiyapxäna.’ (HEB. 11:13.)
1. ¿Jesusan arkirinakapax kunjamsa akapachan sarnaqapxañapäna?
“JUPANAKAX akapacharuw qhiparapxi” sasaw Jesusax arkirinakapat säna. Ukat qhipatsti akham sarakïnwa: ‘Jupanakax janiw akapachankirïpkiti kunjämtix nayax jan akapachankirïktxa ukhama’ sasa (Juan 17:11, 14). Uk sasinxa, Diosan chiqpach arkirinakapax kuns Supayan apnaqat ‘akapachan’ lurapxañapäna, ukwa qhan uñachtʼayaskäna (2 Cor. 4:4). Aka ñanqha pach taypins jakapkchixa, janiw akapachankir jaqinakampix chikachasipxañapäkänti, mä arunxa ‘sarir jaqinakjamaw’ sarnaqapxañapäna (1 Ped. 2:11).
‘Sarir jaqinakjamaw’ jakapxäna
2, 3. Enoc, Noé, Abraham ukat Sara jupanakaxa, ¿kunjamsa sarir jaqinakjamax sarnaqapxäna?
2 Nayratpachaw Diosan luqtirinakapax jan wali lurir jaqinak taypin jakkasas jupanakat sipan mayjapxäna. Janïra Uma Juicio purinkäna ukhatpachaw Enoc ukat Noé chachanakax ‘Diosan munañaparjam sarnaqapxäna’ (Gén. 5:22-24; 6:9). Jan axsartʼasaw jupanakax kuntï Diosax Supayan apnaqat akapacharux lurañ amtäna uk yatiyapxäna (2 Pedro 2:5 ukat Judas 14, 15 liytʼasiñapawa). Ukat jan wali jaqinak taypin jakkasasa, Jehová Diosan munañaparjamapuniw sarnaqapxäna. Ukat Bibliax jupanakat akham siwa: ‘Enoc chachax Diosaruw kusisiyäna’ ukat “Noesti [...] jupa sapakiw Diosan munañaparjamax sarnaqäna” sasa (Heb. 11:5; Gén. 6:9).
3 Abrahamampi Sarampix Diosar istʼasaw sarnaqapxarakïna. Ur markat yänakap jaytasin sarxapxäna ukhaxa, sarir jaqjamaw yaqha chiqanakan sarnaqapxäna (Gén. 11:27, 28; 12:1). Pablox uka tuqit akham sänwa: “Iyawsäwi tuqirakiw Abrahamax kunapachatix Diosax jawskäna ukkhax istʼäna, ukatsti jupax mistuwayxänwa kawkharutix Diosax uraq churañapäkäna ukaru. Uraqipat mistusinsti janiw kawksar sarataps yatiskarakïnti. Iyawsäwi laykuw Abrahamax yaqha markat jutir jaqjam jakasïna, kawkïr uraqtix Diosax jupar churañatak arskäna uka uraqina. Jupax carpanakan jakäna, kamisatix Isaacas, Jacobus jakkäna ukhama. Jupanakasti, Diosax jupanakar churañatak arskäna uk katuqapxarakïna” sasa (Heb. 11:8, 9). Ukat akham sarakïnwa: “Taqi uka jaqinakax kuntix Diosax churañatak arsuwaykäna uk jan katuqasaw jiwarapxi, ukampis iyawsañanïpxatap laykux jayatak uñtapxäna. Ukhamatwa yatiyapxäna akapachana sarir jaqinakäpxatapa” sasa (Heb. 11:13).
Israelitanakax mä iwxtʼa katuqapxi
4. ¿Diosat uraq janïr katuqkasax kunsa israelitanakax jan armapxañapäkäna?
4 Tiempompix Abrahamax walja wawanakanïxänwa, Israel sat markjam uñtʼatäxapxänwa, leyinaksa ukat uraqsa Diosat katuqapxarakïna (Gén. 48:4; Deu. 6:1). Ukampis uraqix khitinkänsa ukxa janiw armapxañapäkänti (Lev. 25:23). Jehová Diosan inquilinopäpxänwa. Ukhamasti, Diosan amtanakap respetapxañapänwa. Ukat ‘jaqix janiw tʼantʼa sapampiki jakkiti’ siski uka arunaksa janiw armapxañapäkänti, ukatsti yänak jikxattasax janirakiw Diosat armasipxañapäkänti (Deu. 8:1-3). Janïr uraq churkasaxa, Jehová Diosax akham sänwa: “Jumanakan Tatitu Diosamasti kawkïri uraqti Abraham, Isaac, Jacob awkinakamaru churä siskatayna ukaruw puriyapxätam. Uka uraqisti wali jachʼa, ukhamarak suma markanakaniwa. Uka markanakasti janiw jumanakan luratäkarakiti. Utanakas suma yänakan phuqhantata, ukanakasti janiw jumanakan phuqhantatäkiti, ukhamaraki uma phuchʼunakani, uka phuchʼunakasti janiw jumanakan allitäkiti; uva ukhamaraki olivo yapunakani, uka yapunakasti janiw jumanakan yapuchatäkiti; ukatsti taqi ukanakatwa jumanakax manqʼapxäta sistʼasiñkama. Taqi ukanak pasxani ukkhax janipun jumanakax Tatitu Diosat armasipxamti” sasa (Deu. 6:10-12).
5. ¿Kunatsa Diosax Israel markar apanuküna, ukat kuna yaqha marksa uttʼayäna?
5 Ukampis israelitanakax janiw Diosar istʼapkänti. Nehemiasan urunakapanxa, mä qhawqha levitanakax janiw uka israelitanakat parlañ munapkänti. ¿Kunatsa? Suma Uraqir mantxapxäna uka qhipatxa, suma utanakan jakasipxäna, manqʼañasa ukat vinosa jilarkiriw utjäna. ‘Likʼintañkamaw suma manqʼanakampi sistʼasipxäna’. Ukatsti, Jehová Diosatxa armasxapxänwa, profetanakaparus jiwayapxänwa. Ukham lurapxatapatxa janiw Diosax enemigonakapat qhispiykänti (Nehemías 9:25-27 liytʼasiñapawa; Ose. 13:6-9). Walja maranak qhipatxa, Roma markampi apnaqat judionakax janiw Mesiasarux iyawsapkänti, jan ukasti jiwayapxänwa. Ukatwa Diosax jupanakar apanukxäna ukat yaqha machaq marka uttʼayäna: uka markax ‘Diosan Israelapa’ satawa (Mat. 21:43; Hech. 7:51, 52; Gál. 6:16, MT).
‘Janiw akapachankirïpkiti’
6, 7. 1) ¿Jesusan arkirinakapax kunjamsa akapachan sarnaqapxañapäna? 2) Apóstol Pedron iwxtʼaparjamaxa, ¿kunatsa cristianonakax akapachat jithiqtapxañapäna?
6 Kunjamtï qalltan uñjktanxa, arkirinakajax janiw Supayan apnaqat akapachampix chikachasipxañapäkiti sasaw taman pʼiqtʼir Jesucristox qhan säna. Jiwañapax jakʼäxäna ukhaxa, akham sasaw arkirinakapar säna: “Jumanakatix akapachankirïpxasmaxa, akapachankir jaqinakax munasipxiristamwa jupanakankirirjama. Ukampis nayaw jumanakar ajllisipxsma akapacha taypita, ukatwa akapachax uñisipxtam, jan akapachankirïxapxatam layku” sasa (Juan 15:19).
7 Tiempompix jukʼampiw cristian tamax jilxattäna. Roma markan apnaqat uraqinakans jakapxarakïnwa. Ukhamax ¿romanonakan munañaparut jakapxañapäna? Janiwa, kawkin jakkasasa, janipuniw Supayan apnaqat akapachampix apayasipxañapäkänti, jupanakax mayjäpxañapänwa. Jesusan jiwatapat 30 mara pasatatxa, apóstol Pedrox akham sasaw Roma markan jakir cristianonakarux säna: “Munat jilatanaka, sarir jaqinakarjamaw achiktʼapxsma, jan janchin munañanakaparjamax jakapxamti, uka janchin munañanakapasti almas contraw nuwasiñ muni. Jan Diosar uñtʼir jaqinak taypinsti sum sarnaqapxam” sasa (1 Ped. 1:1; 2:11, 12).
8. ¿Kunsa mä yatxattʼat jaqix cristianonakat satayna?
8 Nayra cristianonakax ‘sarir jaqinakjamaw’ Roma markan jakapxäna sasaw uka tuqit yatxattʼat mä jaqix satayna, ukat akham sarakiwa: ‘Jupanakaxa wali arknaqata ukat sapa kuti tʼaqhisiyataw uñjasipxäna. Ukat kʼari yupaychäwinakan costumbrenakapan jan chikachasipxatapatxa, janiw Diosar iyawsapkiti sasaw kʼarintapxäna. Ukat janirakiw fiestanakarus sarapkänti, ukanakansa kunayman jan walinak lurapxäna, qʼañunak kunwa lurapxäna. Ukatwa cristianonakax ukanakar jan sarapkänti. Ukanak uñjasaw jaqinakax jupanakar jan walit uñjapxäna, “jaqinakar uñisiri” sas kunaw sutichjapxäna’ (Historia del cristianismo, de Kenneth Scott Latourette).
Janiw akapach yänak thaqktanti
9. Chiqpach cristianonakaxa, janiw jaqi masisarux uñisktanti, ¿kunjamats uk uñachtʼaytanxa?
9 ¿Kunjamas jiwasanakax aka ‘ñanqha pachan’ qhip qhipa urunakapan sarnaqasktanxa? (Gál. 1:4, MT). Nayra cristianonakat yatiqasisaw sarnaqtanxa. Ukatwa yaqhipax jiwasat mayj amuyapxi. Awisax kʼarintapxistuwa ukat janirakiw istʼañs munapkiti. Ukampis janiw kunäkipansa “jaqinakar uñisirïktanti”. Antisasa, jaqi masisar munasiñatwa utat uta yatiyir sartanxa, ‘Diosan reinopat suma yatiyäwinak’ yatipxañapataki (Mat. 22:39; 24:14). Kunattix Jehová Diosan Reinopaw akapach apnaqäwinakarux niy tukjxani. Ukat Apnaqiripax wiñayatakiw sumankaña apanxani, ukaruw atinistanxa (Dan. 2:44; 2 Ped. 3:13).
10, 11. 1) Akapachan utjki ukanakxa, ¿kunjamsa jiwasax uñjtanxa? 2) ¿Kunjamsa cristianonakax akapachampi jan apayasiñatakix wal amuyastanxa?
10 Jehová Diosan luqtirinakapax janipuniw niya tukusir akapachampix apayasiñasäkiti. Pablon aka suma iwxtʼanakap istʼañasawa, jupax akham sänwa: “Jilatanaka, may sañ munapxaraksma: jukʼa tiempokiw utjxistu. Akat uksaruxa [...] alasirinakasti janis kunsa alasipkaspa ukhamarakiw sarnaqapxañapa. Akapachan kuna aski jikxatirinakasa, janis kunsa jikxatapkaspa ukhamaw tukupxañaparaki, aka uraqisti niyaw tukusiski” sasa (1 Cor. 7:29-31). ¿Kunjamsa cristianonakax akapachan utjki uka yänak uñjañasa ukat apnaqañasa? Kunatï akapachan utjki ukanakatxa awisax askinakwa apstanxa. Sañäni, tecnología tuqit uñstayasipki uka makinanakaxa, Diosan arunakapat yatiyañwa yanaptʼistu. Yaqha markanakansa ukat yaqha arunakansa ukanakan yanaptʼataw yatiyasiski. Ukat irnaqañatakisa yanaptʼarakistuwa, chiqas walja tuqit yanaptʼasi. Ukampis janiw ukaruk atinisktanti, jan ukasti wali amuyumpiw apnaqtanxa (1 Timoteo 6:9, 10 liytʼasiñapawa).
11 Cristianonakax jachʼa yatiqañ utanakar sarañxa wali amuyumpiw uñjtanxa, janiw sinti ukar chuym uchktanti. Ukampis wali uñtʼatäñatakisa, suma trabajonïñatakisa ukat qullqiniñatakisa jachʼa yatiqañ utanakar sarañax wakisipuniwa sasaw jaqinakax parlapxi. Chiqansa, jiwasax akapachan sarir jaqinakjamaw sarnaqtanxa, janiw ukanakar chuym uchktanti, jiwasan amtasaxa yaqhawa. Janiw ‘jachʼa jachʼa tukuñar’ apir yänak thaqktanti (Rom. 12:16; Jer. 45:5). Criston arkirinakapjamaxa, aka iwxtʼaparux sum istʼtanxa, jupax akham sänwa: “Amuyasipxam jumanakatakik taqi kuns munañxata; jaqin jakañapasti janiw kunatix utjarapki uka walja yänakapankkiti” sasa (Luc. 12:15). Jumatï waynäsksta jan ukax tawaqüsksta ukhaxa, Jehová Diosar sum luqtañatakiw chʼamachasiñama. Kunatï jakasiñatakix munaski ukanakatak mä jukʼa yatxatasaxa, janiw ukanakar chuym churañamäkiti. Antisasa, Jehová Diosar “taqi chuymamampi, taqi almamampi, taqi chʼamamampi, taqi amuyumampi” serviñamatakiw chʼamachasiñama (Luc. 10:27). Ukham lurasaxa, janiw ‘Dios nayraqatan jan kunani’ uñjaskätati (Luc. 12:21; Mateo 6:19-21 liytʼasiñapawa).
Akapach llakinakat amuyasiñäni
12, 13. Mateo 6:31-33 qillqatarjam sarnaqasaxa, ¿kunatsa cristianonakax akapachankirinakat mayjäpxi?
12 Yänakanïña tuqitxa cristianonakax janiw akapachankir jaqinakjam amuyktanti. Jesusax akham arkirinakapar iwxtʼkäna: “Jumanakax jan llakisipxamti akham sasa: ‘¿Kunsa manqʼañäni? ¿Kunsa umañäni, kunampirakis isisiñäni?’ sasa. Diosat jayankkis uka jaqinakakiw taqi aka yänakatxa llakisisipki, ukampis jumanakan alaxpachankir Awkimax yatiwa kuntix jumanakaru wakisipktam ukxa. Ukhamasti, nayraqatax Diosan reinopa munapxam, ukhamarak kunatix chiqäki jupan nayraqatapanxa ukanaka, ukatsti taqi aka yänakaxa jumanakarux churatakïpxätawa” sasa (Mat. 6:31-33). Ukax chiqapunïskiwa. Kunatï munaski ukanakxa, alaxpachankir Awkisax kunjamsa churistu ukxa sumwa chiqa cristianonakax yattanxa.
13 Chiqansa, jiwasax janiw akapach jaqinakjam amuyktanti (1 Tim. 6:6). Sañäni, jichhak casarasipki uka wayn tawaqunakaxa, jankʼakiw taqi kunanïñs munapxi. Utapax taqi kunampi suma phuqhantatäspa, mä suma autonïspa ukat jichhak uñstki uka televisionanïspa, radionïspa, computadoranïspa ukwa munapxi. Ukampis akapachan sarir jaqinakjamaxa, janiw ukanak thaqhañasäkiti, kunatï munaski ukampix kusisitakïñasawa. Jilapart jilat kullakanakax Diosan Reinopat taqi chuyma yatiyañatakiw chʼamachasipxi. Yaqhipanakaxa precursorjama, tamanak tumptʼirjama, misionerjamaw irnaqtʼapxi, yaqhipax Betel utanwa luqtapxaraki. Ukham irnaqtʼir jilat kullakanakax wali askpunwa luqtasipki.
14. ¿Jesusan uñachtʼäwipat kuns yatiqtanxa?
14 Akapachat llakisiñasa qullqit llakisiñas Jehová Diosar sum yupaychañatwa maynir jarkʼaspa sasaw Jesusax qhanañchäna (Mat. 13:22, MT). ¿Kunas uka sipitar jan puriñatakix yanaptʼistaspa? Kunatï utjkistu ukampi kusisitak jakasiñasawa, ukat akapachan sarir jaqjama sarnaqañasawa. Ukham lurañäni ukhaxa, “nayrasax sumaniwa” mä arunxa, janiw yaqha tuqir saranukkañäniti. Chiqansa, ukhamatwa taqi kunat sipansa Diosan Reinop nayrar uchañäni (Mat. 6:22).
“Akapachax tukusirikiwa”
15. ¿Apóstol Juanax kamsänsa akapachatxa?
15 Akapachax tukusiskiwa, uk amuyasaw cristianonakax ‘sarir jaqinakjamax’ jaktanxa (1 Ped. 2:11; 2 Ped. 3:7). Ukat ukarjamaw kun lurañsa, kunjam sarnaqañsa amttanxa. Akapachan utjki ukanakar jan munapxamti sasaw apóstol Juanax cristian masinakapar iwxtʼäna, ukat akham sarakiwa: “Akapachax tukusirikiwa jan wali luräwinakapamppacha, ukampis kawkïritix Diosan munañap lurki ukax wiñayatakiw jaki” sasa (1 Juan 2:15-17).
16. ¿Kunjamsa Diosatak yaqhachat markätas uñachtʼaytanxa?
16 Jumanakatï arunakajar istʼapxätaxa, “nayan suma munat markaxäpxätawa taqi markanak taypinxa” sasaw Jehová Diosax israelitanakar säna (Éxo. 19:5). Israelitanakax Diosar jan jithiqtas luqtapxäna ukhaxa, wali sumwa jakasipxäna ukat Diosarus sum luqtapxarakïna, janiw yaqha markanakjam sarnaqapkänti. Jichhürunakanxa, ukhamarakiw Jehová Diosax mä marka ajllisi, jupanakax janiw Supayan apnaqat akapachankir jaqinakjamax sarnaqapkiti. Apóstol Pablox akham sasaw säna: Diosaw “yaticharakistu juchampi, akapachar munañampi apanukxañasa. Ukatsti aka uraqinxa mä suma amuyumpi, chiqapana Dios chuymaraki sarnaqañasa. Yaticharakistuwa mä kusiskañ suytʼäwimpi jakañasa, jachʼa Qhispiyiri Jesucristo [Tatax] uñstankani uk suyasina. Jupawa jiwas layku jiwawayi jan walinakat jiwasar qhispiyañataki, [ukatxa mä marka jupataki] qʼumachañataki, ukhamata jupankañataki jan qarjasisa aski lurañasataki” sasa (Tito 2:11-14). “Marka” sasinxa, alaxpachar sarañataki ajllit cristianonakatwa parlaski, ukat jan jaktʼkañ millón millón “yaqha ovejanaka[mpitwa]” parlaraki, jupanakaw ajllit cristianonakarux wal yanaptʼasipki (Juan 10:16).
17. Taqi cristianonakas akapachan sarir jaqinakjam sarnaqasax janiw pisayasktanti, ¿kunatsa ukham sistanxa?
17 Ajllit cristianonakax “kusiskaña suytʼäwi[nïpxiwa], Cristomp chik apnaqiriw alaxpachar sarapxani (Apo. 5:10). Ukat yaqha ovejanaka sasin uñtʼatäpki ukanakasti, aka Uraqinwa wiñayataki jakasipxarakini. Janiw sarir jaqinakjamax jakxapxaniti, aka ñanqha pachax tukusxaniwa. Ukatsti, suma utanak utachasipxani, ukan jakasipxarakini, umañasa, manqʼañasa jilarkiriw jupanakatak utjani (Sal. 37:10, 11; Isa. 25:6; 65:21, 22). Janiw nayra israelitanakar uñtatax Jehová Diosan taqi bendicionanakapat armasipkaniti (Isa. 54:5). Alaxpachar saririnakasa ukat aka uraqin jakapkani ukanakasa, akapachan sarir jaqinakjam jakapxatapatxa janiw pisayasipkaniti.
¿Kamsnasa?
• ¿Nayrïr cristianonakax kunjams sarir jaqjam sarnaqapxäna?
• ¿Nayrïr cristianonakax kunjamsa akapachar uñjapxäna?
• ¿Kunjamsa cristianonakax akapachar uñjapxi, ukat kunjamsa yanaptʼayasipxi?
• ¿Akapachan sarir jaqjam sarnaqasax pisayasiñäniti?
[Jiskt’anaka]
[18 janan fotopa]
Nayra cristianonakax nuwasiñar ukat qʼañu luräwinakar wiytir anatañanakatxa jithiqtapxänwa
