“Jichhax suchʼurnukstatäktsa ¡janiw wiñay ukhamäkäti!”

Sara van der Monde sat kullakan arsutaparjama

Jaqinakax akham sapxirïtuwa: “Sara, lartʼasitamax wali sumawa. ¿Kunatsa wali kusisitapun sarnaqasta?” sasa. Ukham sataxa, “nayax mä aski suytʼawinïtwa” sasaw sirïta. “Añchhitax janiw sartirjamäkti, ukampis ¡janiw wiñay ukhamäkäti!”.

NAYAX 1947 maranwa París (Francia) markan nasiwayta. Ukat janiw sum jikhataskäyätti, parálisis cerebral sat usuniw nasiwayta. Ukhamïpansti janiw amparsa ni kaysa sum unxtayirïkti. Parlatajas janiw qhan amuyaskänti. Ukat tʼuku (epilepsia) usunirakiyätwa ukat kuna usumpis aynachtʼakirïtwa.

Pä maranikäyät ukhaxa Melbourne (Australia) sat markaruw apapxitu. Pä mara qhipatsti, tatajax jaytjawayapxituwa. Ukhatsa Diosar jakʼachaskirista ukham amtasta. Mamajax Jehová Diosan Qhanañchiripänwa, ukat tantachäwinakarux jupampiw saririyäta. Ukanwa Diosax wali munasirïtapa ukat nayats wal llakisitapxa yatiqawayta. Uk yatisaxa, sumakiw chuymajan jikxatasiyäta, mamajas wali munasiñampiw uñjitäna ukat chuymachtʼitäna.

Ukat mamajax Jehová Diosar mayisiñsa yaticharakituwa. Chiqasa, janis parlañ puedkstxa, Diosar mayisiñax janiw nayatakix chʼamäkiti, kuntï sañ munkta ukxa sum amuytxa. Arsutäjax janis amuyañjamäkchixa, Jehová Diosax kuntï munkta ukxa sum yati, ukaw nayarux wal kusisiyitu (Sal. 65:2).

Jan waltʼawinakaruw saykatta

Phisqa maranïkasax jukʼampiw usuntta. Unxtañas wali chʼamäxänwa, sarnaqañatakix mä jathi aparato ortopedicompiw uchapxitu. Ukampis yanaptʼañat sipansa, antisakiw jaqusiyirjamäxäna. Ukat 11 maranïxayät ukhaxa, janiw sartxayätti. Ikiñat sartañatakisa ukat silla de ruedar quntʼasiñatakis mä grua electricaw munasxäna, uka sillsti mä palankampirakiw apnaqayäta.

Awisax wali llakitaw jikxatasirakta, ukampis kuntï familiajan sañ yatipki uk amtasta. Akham sapxirïtwa: “Jan llakisimti, kunatï jan lurañjamäki ukxa, jan luramti, ukampis kuntï lurañjamäki ukxa luram” sasa. Uk amtasaw yatiqawayta caballor latʼxatañsa, botet sarañsa. Ukat auto apnaqañsa yatiqawayaraktwa. Luratanakampiw kuntï yatkta ukanakxa uñachtʼayta. Pʼitañsa, ikiñ chʼukuñsa, ñiqʼit phukunak jan ukax platonak lurañsa yatiraktwa.

Ukham suchʼurnukstata uñjasaxa, ‘janiw Diosar suma kʼumar jaqjam luqtkasmati’ sasaw jaqinakax sapxitu. Niya 18 maranïkäyat ukhaxa, mä yatichirix akham situwa:  “Utamat sarxam, mamamam religionapatsa mistxam. Kawkin jakañsa nayaw yanaptʼaskäma” sasa. Ukampis nayax akham sistwa: “Nayax Diosar yupaychaskakïwa, janiw jaytkäti. Ukat sap sarnaqañataki wakichtʼatäxä ukhakiw utajat sarxäxa” sasa.

Ukat mä qhawqha tiempotxa, Jehová Diosan Qhanañchiripjamaw bautisasiwayta. Ukat pä mara qhipatxa, mä jiskʼa utan sapak jakasiriw sarawayta. Yanapax janiw faltkiti. Ukat amtajarjamaw sarnaqasirakta.

Janiw suykayätti

Tiempompix kunayman yantʼäwinakan uñjasiwayta. Mä uruxa, “¿nayamp casarasiñ munasmati?” sasaw mä waynax situ. Jupax nayjam suchʼurakïnwa. Ukampis uk satax walpun muspharta. Qalltanxa wali khusäkaspas ukham amuyasiyäta. Ukampis usut pura casarasisaxa, kunjamaraki kusisit jakapxiriststi sasaw amuytʼasiyäta. Jupax yamas yaqha religionaruw saräna. Ukat janirakiw mä amtanïpkayätti. Nayax Jehová Diosan iwxanakapar istʼañatakiw chʼamachasta, Arupanxa akham siwa: “Iyawsirik iyawsirïpaxa” sasa (1 Cor. 7:39). Ukatwa uka waynarux jan chuym ustʼayasin “janiw” sista.

Walikpun janiw sistxa sasaw jichhakamas amtasta. Diosax arsutaparjam apankani uka paraisonxa wal kusisitaw jakasxäxa sasaw suyaskta (Sal. 145:16; 2 Ped. 3:13). Uk suyañkamaxa janipuniw Jehová Diosat jithiqtkäti. Usutäkasas wali kusisitaw jupar luqtäxa.

Mä uruxa, aka silla de rueda apanukxäwa sasaw wal suyaskta. Ukat thayar uñtataw tʼijnaqäxa. Ukaratuw akham säxa: “¡Janiw kuns lurirjamakayati, jichhaxa walikïxtwa ukat wiñayatakïniwa!” sasa.