¿Jumax amttati?

¿Aka qhipa phaxsinakan mistkäna Yatiyañataki sat revista liytʼtati? Ukhamächi ukhaxa, aka jisktʼanakar qhanañchtʼma:

• ¿Khitinakas wawanakar Dios tuqit yatichapxañapa?

Kunjamtï Biblian siskixa, awk taykaw wawanakar yatichapxañapa (Pro. 1:8, Efe. 6:4). Ukhamatwa wawanakax wali sum jakasipxani (10/1, 6 janat 7 janakama).

• “Nayaw juman uraqimäyäxa, herenciamäyäsa” sasinxa, ¿kunsa Jehová Diosax levitanakar saskäna?

Kunapachatï Israel markan tribunakax uraqi katuqapkäna ukhaxa, nayaw jumanakan “uraqimäyäxa, herenciamäyäsa” sasaw Jehová Diosax levitanakar säna (Núm. 18:20). Jupanakax janis uraq katuqapkchïnxa, yaqha suma luräwinakwa katuqapxäna. Ukat Jehová Diosarakiw jupanakar sum uñjaskäna, janiw kunsa faltaykänti. Jiwasatix Diosan Apnaqäwipataki ukham irnaqañäni ukhaxa, kunatix jakañatak munaski ukanakxa Jupaw churaskistani (9/15, 7 janat 8 janakama, 13).

• ¿Kunanaksa Israel markan achuyapxäna?

Israel uraqix lomanakani, vallenakani, quta jakʼan pampa uraqinakani, qullunakani, jawiranakani ukat uma jalsunakan suma uraqïnwa, ukatxa kunayman suma achunakaw churäna sasaw Bibliax qhanañchi. Israelitanakax kunja “Suma Uraqsa” katuqapxañapäna uk amuyapxañapatakix akham sasaw Moisesax säna: “Uka uraqinxa achurakiwa trigo, cebada, uva, higo, granado, olivo, ukhamaraki miskʼis utjaraki” sasa (Deu 8:7, 8; 10/1, 11 janat 13 janakama).

• ¿Kuna kasta kusistʼäwinak ajlliñas walïspa, ukat kunjamatsa uka tuqinakat sum amuytʼassna?

Kawkïr kusistʼäwis askïspa uk yatiñatakixa, sapa mayniw akham sasin jisktʼasiñasa: “¿Kunampisa, kunapachas ukat khitimpis kusistxa?” sasa (10/15, 9 janat 12 janakama).

• ¿Kunatsa Dorcas kullakax wali munatäpachäna?

Uka kullakax walja askinakwa luräna ukat suma regalonak churirïna sasaw Bibliax qhanañchi. Jupax wali suma isinakwa viudanakatak lurirïna. Ukat Jesusat yatiqasisaw Jehová Diosatsa jaqinakar yatiyarakïna (Hech. 9:36-43; 10/1, 14 janat 15 janakama).

• Proverbios 7:6-23 qillqatan utjki uka uñachtʼäwixa, ¿kunjamsa qʼañu luräwinak jan uñchʼukiñatakix yanaptʼistaspa?

Kawkintï qʼañu luräwinakan sarnaqir mä warmix jakki uka chiqanwa mä waynax sarnaqaskäna, ukat uka warmin jawsataw uka waynax juchar purïna sasaw uka qillqatan uñachtʼayistu. Jichhürunakanxa ukhamaw pasaraki. Internetansa wachuq juchar apir jan walinakakiw utji, ukanak jan uñchʼukiñatakix janïr mantkasinxa Jehová Diosar mayisiñasawa. Ukhamatwa uka qʼañu luräwinak jan uñchʼukiñatakix jukʼampi chʼamañchasiñäni (11/15, 9 janat 10 janakama).

• ¿Nayra judionakax kunjamsa arumanakax kuna horäxis uk yatipxäna?

Urutakixa Intin saräwiparjam horanak uñachtʼayir relojunïpxänwa. Ukampis chʼuraw urunakatakisa jan ukax arumanakatakisa, clepsidra sat relojunïpxänwa, ukax umani relojünwa. Ukat egipcionakasa, griegonakasa, romanonakasa ukat Persia markankirinakasa uka reloj apnaqapxarakirïnwa (10/1 23 jana).

• ¿Mä kast jaqirukit Diosax munaspacha?

Janiwa. “Diosatakix taqi casta jaqis mayakïta[nwa]. Jupasti kuna cast jaqirus katuqakiwa” sasaw Bibliax qhanañchi (Hech. 10:34, 35). Jehová Diosax janiw kuna kasta jañchin jaqïtansa ukat kunjam uñnaqtʼanïtansa ukak uñjkiti, jan ukasti kunjam chuymanïtansa ukwa uñjistu (1 Sam. 16:7; 10/1 31 jana).