¿Kunatsa Jehová Diosan qullan ajayupamp irpayasiñax wakisi?

“Munasir ajayumax chiqa thakinjamay irpitpan.” (SAL. 143:10.)

1. ¿Jan uñtʼat mä markan jan chhaqhañatakix kunsa lurasma?

 JAN uñtʼat mä markarus sarkasma ukham amuytʼañäni. ¿Jan chhaqhañatakix kamachasmasa? ¿Janit uka mark uñtʼir mä jaqimp yanaptʼayaskasma? Ukat uka jaqix sum uñtʼaspa ukhaxa, wali sumwa irpiristamxa. Ukampis jupar jan istʼkasma ukhax chhaqhasmawa.

2, 3. 1) ¿Kunan yanaptʼatas Jehová Diosax taqi kunsa luratayna? 2) ¿Kunatsa qullan ajayuw sum sarnaqañatakix yanaptʼistani sasax sissna?

² Sum sarnaqañatakix ukhamarakiw mä yanapir muntanxa. Ukampis ¿kunas yanaptʼistaspa? Wali chʼamani mä yanapiriw utji sasaw Bibliax qalltan parli, uka chʼaman yanaptʼataw Jehová Diosax “alaxpacha, ukhamarak akapacha luräna” sasaw Génesis librox parlaraki. Ukatxa, uka jan atipkañ jachʼa chʼamax “uma patxanwa unxtäna” sasaw saraki (Gén. 1:1, 2). ¿Kunäpachänsa uka chʼamaxa? Jehová Diosan qullan ajayupänwa. Uka chʼamampiw Diosax taqi kunsa luratayna, nayrïr chacha warmsa lurarakitayna (Job 33:4; Sal. 104:30).

³ Ukatxa, uka pachpa ajayumpi yanaptʼayasisin sum sarnaqassna ukwa Jupax munaraki. Ukatwa Jesusax akham sispachäna: “[Qullan ajayuw] taqi chiqakankañaru irpapxätam” sasa (Juan 16:13, MT). Ukampis ¿qullan ajayux kuna kasta chʼamäpachasa ukat kunjamsa jiwasanakar yanaptʼistu jan ukax irpistu?

¿Qullan ajayux kunäpachasa?

4, 5. 1) Diosax kimsat mayar apthapitaw sasinxa, ¿kunsa jaqinakax qullan ajayut amuyapxi? 2) ¿Kunas qullan ajayuxa, ukat kunjamsa jumax uka tuqit qhanañchtʼasma?

⁴ Kunapachatï Biblia tuqit yatiyir sarktan ukhaxa, Diosax kimsa diosanakat mayar apthapitawa sasaw yaqhipax sapxi, qullan ajayux mä diosäkaspas ukham amuyapxi (1 Cor. 8:6). Ukatwa yaqhip Biblianakanxa jachʼa letranakampi akham uchapxi: Qullan Ajayu sasa. Ukampis yaqhip Biblianakanxa, jiskʼa letranakampikiw akham sasin uchapxaraki: qullan ajayu sasa. Chiqansa, qullan ajayux janiw mä Diosäkiti sasaw Bibliax qhan uñachtʼayi.

⁵ Ukhamax ¿kunapunïpachas qullan ajayuxa? Génesis 1:2 jiskʼa tʼaqan “ajayu” sasin jaqukipatäki uka rú·aj hebreo aruxa, “thaya” sasaw yaqha chiqanakan jaqukipasiraki, jan tukuskir wali jachʼa chʼamäkaspas ukhamaw amuyasi (Génesis 3:8; 8:1 uñxattʼarakïta). Ukhamasti, qullan ajayux thayampi sasiwa, janiw uñjksnati. Ukampis kunanakas uka qullan ajay tuqix lurasi ukax qhanaw amuyasi. Uka qullan ajay tuqiw Diosax munañapsa jan ukax amtanakapsa phuqaraki. Ukhamax qullan ajayux Jehová Diosatwa juti (Isaías 40:12, 13 liytʼasiñapawa).

6. ¿Davitax kamsasas Jehová Diosar maytʼasïna?

⁶ ¿Jichha tiemponsa Jehová Diosax qullan ajayupamp yanaptʼaskakistaspati? Alaxpachankir Awkisax akham sasaw Davitar säna:  “Nayaw amuytʼayaskäma, nayaw sarañamäki uka thak uñachayaskäma” sasa (Sal. 32:8). Chiqas Davitax walpun yanaptʼayasiñ munäna, ukatwa akham sasin achiktʼasïna: “Munañam lurañ yatichita, nayan Diosaxatam layku. Munasir ajayumax chiqa thakinjamay irpitpan” sasa (Sal. 143:10). Jiwasax ukhamarakiw Diosan qullan ajayupampi yanaptʼayasiñ muntanxa. Ukampis ¿kunatsa? Uk jichax pusi tuqit amuytʼañäni.

Jaqix yanapir munapuntanwa

7, 8. 1) ¿Kunatsa janiw jaqi sapax nayrar sartksnati sasax sistanxa? 2) ¿Aka ñanqha pachan jan chhaqhañatakix kunatsa yanap muntanxa? Uk mä uñachtʼäwimpi qhanañchtʼma.

⁷ Nayraqatxa, jaqi sapakix janiw nayrar sartapksnati. Mä arunxa, janiw munañasarjam sarnaqir luratäktanti, ukatxa pantjasir jaqirakïtanwa. Jeremías profetax akham sasaw säna: “Tata, nayax yattwa jaqix janiw alaskiti pachpa jakañapxa, janirakiw tukuyäwipsa munañapar apnaqkaspati” sasa (Jer. 10:23). ¿Kunatsa ukham sispachäna? Akham sasaw Jehová Diosax jupar satayna: “Jaqin chuymapjama ñanqha, kʼarintirix janiw utjkiti. ¿Khitisa jaqin chuymapxa sum uñjaspa?” sasa (Jer. 17:9; Mat. 15:19). Ukhamasti, qullan ajayun yanaptʼapxa kunjamatsa munapuntanwa. Uka qullan ajayuw mä suma thak ajlliñsa ukat ukarjam sarnaqañsa yanaptʼistu.

⁸ Amuytʼañäni, wali axsarañjam mä monte manqhan sapaki jikxatasisma ukat thak jikxatxä sasin jukʼampik manqhar mantxasma, ukat janiraki khiti yanapiris ni mapas utjkaspa ukhaxa, ¿kunas kamachaspa? Janipuniw walïkaspati, yamas monte manqhan jan sarnaqañ yatkasma ukhax jiwañar kunaw purisma. Niya ukar uñtasitarakiw munañapar sarnaqir jaqinakax aka ñanqha pachan jikxatasipxi, ukat janirakiw Diosarus yanapxa mayisipkiti. Ukhamax ¿akapachan jan chhaqhañatakix kun lurañas wakisispa? Davitat yatiqasiñasawa, ‘kayunakajan thakiman thurtʼata sarnaqañapataki’ ukat ‘thakimat jan jithiqtañapataki’ yanaptʼita sasaw Jehová Diosar mayisïna (Sal. 17:5; 23:3). Ukampis ¿Diosan thakipan suma thurtʼatäñatakix kun lurañas wakisispa?

9. Kunjamtï 17 janan uñjaskixa, ¿kunjamsa qullan ajayux yanaptʼistaspa?

⁹ Jiwasatix altʼat chuymanïñäni ukat Diosar taqi chuym atinisiñäni ukhaxa, Jupaw mä suma thakinjam sarnaqañatakix qullan ajayup tuqi irpistani. Ukampis ¿kunjamsa yanaptʼistaspa? “Awkijaw qullan ajayu khitanini.” Uka qullan ajayuw “jumanakar taqi kuns yatichapxätam, amtayapxarakïtamwa kuntix nayax jumanakaru sapxsma ukanaka” sasaw Jesusax arkirinakapar säna (Juan 14:26). Ukhamasti, yanaptʼita sasin Jehová Diosar sapa kuti mayisiñasawa, ukat Bibliatsa yatxatañasarakiwa, ukanwa Jesusan yatichäwinakapax jikxatasi. Ukanakaw Diosan jan amuytʼkañ amtanakap yatxatañsa ukat  ukarjam sarnaqañsa yanaptʼistani (1 Cor. 2:10). Ukat akatjamat jan walinakan uñjasiñäni ukhasa, uka qullan ajayurakiw mä thaki uñachtʼayistani. Mä arunxa, Biblian yatichäwinakap amtañatakiw yanaptʼistani, ukat kunjamsa uka yatichäwinakarjamax lursna ukwa amuytʼayarakistani.

Qullan ajayun irpataw Jesusax sarnaqäna

10, 11. ¿Kunas Jesusar wal chʼamañchäna, ukat kunjamsa?

¹⁰ Payïr tuqit jichhax amuytʼañäni. Jehová Diosax qullan ajayup tuqirakiw pachpa Yuqaparus yanaptʼäna. Mä profeciax Jesusat akham sasaw nayratpach säna: “Tatitun ajayupasti jupxankapuniniwa, ukatsti yatiñampi, chʼikhi kankañampi, suma amuytʼa chuymampi, chʼamampi, Tatitur uñtʼañampi jupar axsarañampwa churani” sasa (Isa. 11:2). Janïr aka Uraqir jutkasaw Jesusax uka arunak yatxäna. Chiqas aka Uraqinxa, kunayman jan waltʼäwinakan uñjasiñapänwa. Ukhamasti, kunjamsa qullan ajayux jupar yanaptʼañapäna uk yatisax wali chʼamañchtʼataw jikxataspachäna.

¹¹ Aka Uraqinkxäna ukhaxa, chiqapuniw qullan ajayux Jesusar yanaptʼaskäna. Bautisasxäna ukhaxa, “qullan ajayun phuqtʼataw [Jesusax] Jordán jawirat kuttanxäna, ukatsti ajayuw wasararu irpäna” sasaw Lucasax qillqirix qhanañchi (Luc. 4:1). Jïsa, wasarar sarasaw Jesusax ayunäna, Diosatsa taqi chuymampi mayisïna ukat wal lupʼirakïna. Ukanwa Jehová Diosax Yuqapar jukʼamp wakichpachäna, kunanakas pasani ukanaksa jukʼampwa amuytʼayarakpachäna. Maysa tuqitxa, qullan ajayun yanaptʼatarakiw Jesusax pʼiqipansa chuymapansa sumpach amuytʼpachäna. Ukhamatwa aka Uraqinkkasax wali amuyumpi sarnaqawayäna ukat amtanakar puriñatakis sum amuytʼasirakïna, ukat taqi kunsa Awkipan munañaparjamaw phuqarakïna.

12. ¿Kunatsa Jehová Diosarux qullan ajayupa mayisiñasa?

¹² Qullan ajayun yanaptʼatapuniw Jesusax sarnaqäna. Ukatwa arkirinakaparus akham säna: qullan ajayu Diosar “mayipxam” ukat ukarjam sarnaqapxarakim sasa (Lucas 11:9-13 liytʼasiñapawa). Ukhamasti, jiwasatix jan wali amuyunak apanukusin, jupjam suma amuyunïñ munstan ukhaxa, qullan ajayum churita sasin Jehová Diosar mayisiñasawa (Rom. 12:2; 1 Cor. 2:16). Ukat ukarjam sarnaqañäni ukhax Jesusar uñtasitaw kunsa amuyañäni ukat sarnaqañäni (1 Ped. 2:21).

Akapach ajayux chhaqhañaruw apistaspa

13. ¿Kunas akapach ajayuxa, ukat kuna jan walirus puriyistaspa?

¹³ Kimsïr tuqit amuytʼarakiñäni. Qullan ajayumpi jan yanaptʼayasksna ukhaxa, akapach ñanqha ajayuw jan walir apistaspa. Chiqas niya taqiniw uka chʼaman apnaqatax sarnaqapxi. Ukatwa kunayman jan walinak  lurapxi ukat qullan ajay contras sarnaqapxi. Ukat Criston amuyupa yatiqasin sum sarnaqañat sipansa, akapach apnaqir Supayat yatiqasisaw maysar saranukupxi (Efesios 2:1-3 ukat Tito 3:3 liytʼasiñapawa). Ukampis khitinakatix akapach ajayun munañaparjam sarnaqapxani ukat jañchin munañanakapar arkapxani ukanakax janiw Diosan Reinopan katuqatäpkaniti (Gál. 5:19-21).

14, 15. ¿Akapach ajayumpi jan atipayasiñatakix kunas yanaptʼistaspa?

¹⁴ Uka jan wali ajayur saykatañatakix walpun Jehová Diosax yanaptʼistu, ukatwa apóstol Pablox akham säna: “Jichhax jilatanaka, chʼamañchasipxam Tatitumpi, ukhamarak jachʼa chʼamapampisa. [...] Ukhamat jan wali urun atipjapxañamataki” sasa (Efe. 6:10, 13). Ukhamasti, Supayan yantʼanakapar atipañatakix Jehová Diosat qullan ajay mayiñasawa (Apo. 12:9). Chiqas akapach ajayut janiw jaltksnati, ukat chʼamanirakiwa. Ukampis wal saytʼasiñasawa, janiw munañapampix apayasiñasäkiti. Ukat qullan ajayumpi yanaptʼayasiñäni ukhaxa, akapach ajayur atipañäniwa.

¹⁵ Jesusan nayra arkirinakapatxa, yaqhipax tamat yaqhaqtasaw sarnaqxapxäna, jupanakax “chiqa thaki apanukusawa, saranukupxi” sasaw apóstol Pedrox säna (2 Ped. 2:15, MT). Ukampis jiwasax “janiw akapachankir ajayu katuqktanti, jan ukasti Diosan ajayupwa katuqapxtanxa” (1 Cor. 2:12). Uka qullan ajayuw chiqa thakit jan saranukuñatakix yanaptʼistu, ukat yaqha tuqinakatwa Jehová Diosax yanaptʼarakistu, ukanakampi chʼamañchasiñasawa. Ukhamatwa akapach ajayurus saykatarakiñäni (Gál. 5:16).

Qullan ajayux suma achuniwa

16. ¿Kunanakansa qullan ajayun achupax yanaptʼistu?

¹⁶ Jichhax pusïr tuqit parltʼañäni. Kunapachatï qullan ajayumpi irpayastan ukhaxa, suma achupwa uchañtʼaytanxa, mä arunxa, aski luräwinakaw jiwasan utji (Gálatas 5:22, 23 liytʼasiñapawa). Chiqansa, taqi cristianonakaw wali munasirïñsa, llampʼu chuymanïñsa ukat kusisit jakasiñsa muntanxa. Ukat taqinirakiw khuyapayasirïñsa, suma jaqïñsa ukat wali paciencianïñsa munaraktanxa. Ukatxa, jañchin munañanakapar atipañatakisa, iyawsäwinïñatakisa ukat suma chuymanïñatakisa taqiniw chʼamachasiñasaraki. Uka suma luräwinakaparjam sarnaqañäni ukhaxa, jiwas pachpatakis wali askïniwa, ukhamatwa jilat kullakanakampis sum apasiñäni, ukat familiansa kusisit jakasiñäni.

17. ¿Kunjamatsa qullan ajayun achuparjam sarnaqatas jukʼamp uñachtʼaysna?

¹⁷ Sapa maynis akham sasin jisktʼasiñasawa: “¿Arunakajasa luratanakajas kunsa uñachtʼayi? ¿Qullan ajayun achuparjam phuqatajax qhanat amuyasiski?” sasa (2 Cor. 13:5; Gál. 5:25). Ukampis ukanakampi phuqañataki faltaskchistu ukhaxa, ¿kamachañasasa? Qullan ajayurjam sarnaqañataki jukʼampi chʼamachasiñasawa. Ukatakix Bibliat yatxatañsa ukat Diosan markapax apayankistu uka qillqatanakat yatxatañsa janiw armasiñasäkiti. Ukat kunjamsa yanaptʼistaspa uk sum amuytʼasin ukarjam sarnaqañasarakiwa. * Ukhamatwa qullan ajayun achupax jiwasansa ukat jilat kullakanakansa qhan amuyasini. Ukaw qullan ajayun yanaptʼapax kunja wakiskiris uk amuyañxa yanaptʼistani.

¿Jumax qullan ajayumpi yanaptʼayastati?

18. Qullan ajayumpi yanaptʼayasiñ tuqitxa, ¿kunsa Jesusat yatiqassna?

¹⁸ Jesusax qullan ajayun yanaptʼataw aka Uraqin sarnaqawayäna sasaw Bibliax qhanañchi.  Chiqas jupax walpun qullan ajayumpi yanaptʼayasiñ munäna, ukat ukarjam sarnaqañatakiw chʼamachasirakïna (Mar. 1:12, 13; Luc. 4:14). ¿Jiwasax qullan ajayumpi yanaptʼayasiñ munaraktanti?

19. ¿Qullan ajayumpi yanaptʼayasiñatakix kun lurañasasa?

¹⁹ Jiwasatix qullan ajayumpi irpayasiñ munstan ukhaxa, kunjamtï Jehová Diosax nayra luqtirinakapar yanaptʼkänxa ukhamarakiw mä suma thakinjam sarañatakix qullan ajayupampi yanaptʼistaspa. Ukampis ¿uka qullan ajay katuqañatakix kun lurañas wakisispa? Qullan ajayum churanita ukat ukarjam sarnaqañataki yanaptʼita sasin Jehová Diosar sapür mayisiñasawa (Efesios 3:16 liytʼasiñapawa). Ukatxa, mayisitasarjam sarnaqañataki chʼamachasiñasawa, ukhamatwa uka qullan ajay tuqi amuytʼayat Qullan Qillqatanakarjam sarnaqatas uñachtʼayañäni (2 Tim. 3:16, 17). Ukat Biblian yatichäwinakapar istʼañatakisa ukat qullan ajayurjam sarnaqañatakisa jankʼakïñasawa. Ukham lurañäni ukhaxa, Jehová Diosaw qullan ajayup tuqix aka jan wali urunakan sum irpnaqasistani, ukat jiwasax taqi chuymaw Jupar atinisiraktanxa.

[Qhanañchäwi]

¿Kuna yatichäwinaksa jikxatawaytanxa?

• ¿Kunjamsa qullan ajayux jakäwisan yanaptʼistu?

• ¿Kunatsa qullan ajayun yanaptʼapax wali wakiskirixa? Uk pusi tuqit qhanañchtʼma.

• ¿Qullan ajayumpi yanaptʼayasiñatakix kun lurañas wakisi?

[Jiskt’anaka]

[15 janan fotopa]

Diosan qullan ajayupampi irpatapuniw Jesusax sarnaqäna

[17 janan fotopa]

Qullan ajayun achup uñachtʼayañataki chʼamachasipxañäni