Usuntatäkasas jan llakimp aynachtʼañäniti

AWISAXA ratuk urux tukusxaspa sasaw sañ yattanxa. ¿Kunatsa? Kunattix mä urumpiw wali usuta, llakita ukham aguantañasäski. Inas Job chachjam jikxatastan, jupax akham sänwa: “Tʼaqhisita jakañat sipansa, jiwxañakiw nayatakix walispaxa” sasa (Job 7:15). Ukat mara mara ukham usuntat jikxatasiskaksna ukhax ¿kunjamakïspasa?

Jonatanax Davitan amigopänwa ukat yuqapasti Mefiboset satarakïnwa, uka yuqapaw ukham jan waltʼäwin uñjasïna. Kunapachatï phisqa maranikän ukhaxa, ‘jankʼak jaltasaw tinküna, ukatwa cojo qhiparxänaʼ (2 Sam. 4:4). Ukat qhipatsti, rey contraw saytʼi sasaw jupar kʼarintapxarakïna. Yänakapsa aptʼasirakïnwa, ukhaman uñjasisaxa, chuymapan jukʼamp llakita, usuntataw uñjaspachäna. Ukampis Mefiboset chachax taqi uka jan waltʼäwinakar kunjams saykatäna ukax yatiqaskañapuniwa. Jupax janiw kunäkipansa aynachtʼaykänti, kusisitakiskänwa (2 Sam. 9:6-10; 16:1-4; 19:24-30).

Apóstol Pablox ukham jan waltʼäwinwa uñjasirakïna. Nayax mä tʼaqhisiñwa “mä chʼaphir uñtata” katuqta sasaw mä kutix qillqatayna (2 Cor. 12:7). Inas mä usunïchïna jan ukax apostoljam irnaqatapat jiskʼachata jikxataschïna. Ukampisa, jaya tiempow ukham llakita aynachtʼata tʼaqhisïna (2 Cor. 12:9, 10).

Ukhamarakiw Jehová Diosan walja luqtirinakapax jan qullañjam usumpi usuta jan ukax llakimpi aynachtʼayatas jichhürunakan jikxatasipxaraki. Magdalena kullakarux 18 maranïkän ukhaxa, lupus eritematoso sistémico sat usunïtaw sasaw doctorax satayna. Uka usuxa, kunatï cuerpos manqhan usunakat jarkʼaqañataki utjki uka pachpaw cuerpo kikpar jan waltʼayxiti. Jupax akham siwa: “Uk yatisaxa, wali llakitapuniw jikxatasiyäta. Tiempompixa jukʼamp usutaw uñjasxäyäta, janiw sum manqʼxayätti, lakas llixtintxitänwa ukat tiroides satäkis ukat usutaxarakiyätwa” sasa. Ukat Isabelan usupax janis qhan amuyaskchïnxa. Jupax akham siwa: “Wawaskäyät ukhatpachaw wali llakit uñjasirïta. Ukaw jichhax jan waltʼaykituti, kunatsa sustjasxaktwa, samaqiñas chʼamawa ukat purakas wal kʼichirakitu. Ukat wali qaritäkiristsa ukhamaw sapa kuti jikxatasta” sasa.

Kuntï lurirjamäkta ukak lurañama

Usuntañanakasa ukat usump tʼaqhisiñanakasa, aynachtʼayistaspawa. Ukhaman uñjastan ukhaxa, kunats ukham jikxatastan uka tuqit sum amuytʼasiñasaw wakisispa. Janis usutaksna ukhamwa awisax taqi kuns lurañ muntanxa. Magdalenax akham siwa: “Urut urutjamaw jukʼamp usut uñjasta. Ukat niya sapakutiw jan chʼamani qarita, ikiñats jan sartirjamaw uñjasta. Ukat kuna ratus usut jikxatasï uk jan yatisisaxa, tiempükipan kun lurañ amtañasa wali chʼamawa. Janiw Jehová Diosarux nayrjam sum luqtañ puedxti ukaw jukʼam aynachtʼayitu” sasa.

Zbigniew jilatax akham sarakiwa: “Sapa maratjamaw artritis reumatoide satäki uka usux  aynachtʼayaskitu, ukat chʼakha muqunakarus mayat mayaruw jan waltayxitu. Ukat awisax qʼal pʼusuntxitu ukhaxa, janiw kuns lurirjämäxti. Ukaw jukʼamp aynachtʼayitu” sasa.

Barbararux lixwiman mä tumoranitawa sasaw doctorax mä qhawqha maranak nayrax sarakitayna. Jupax akham siwa: “Akatjamatwa jan wal jikxatasxirïta. Jan chʼamani, pʼiqijas sapakutiw wal usxitu ukat kun lurkasasa armasxaktwa. Taqi ukanak sum amuytʼasisaxa, qhawqhatï lurirjamäkt ukak lurta, janiw jukʼamp chʼamachasxti” sasa.

Uka experiencianak cuentʼapkistu ukanakax Jehová Diosar luqtirinakapäpxiwa. Jupanakatakix Diosan munañap phuqañaw nayranki. Ukat Jehová Diosarurakiw taqi chuyma atinisipxi, ukat Jupaw jupanakarux yanaptʼi (Pro. 3:5, 6).

¿Kunjamsa Jehová Diosax yanaptʼi?

Usut uñjastan ukhaxa, Jehová Diosax nayat armasxpachawa sasax, janiw amuyañasäkiti (Lam. 3:33). Job chachat amtañäni, jupax ‘chiqa, aski jaqit uñtʼatäkchïnsa’ ukhamarakiw wal tʼaqhisïna (Job 1:8). Jehová Diosaxa, janiw kuna jan walimpis maynir yantʼkiti (Sant. 1:13). Adanan ukat Evan pantjasipxatapatwa ukham kunayman usunakamp tʼaqhistanxa (Rom. 5:12).

Jehová Diosasa, Jesucristosa aski jaqinakarux janiw jaytkaniti yanaptʼapuniniwa (Sal. 34:15). Jan waltʼawin uñjasktan ukhaw Jehová Diosax jiwasatakix mä ‘imantasiñakaspasa, jarkʼaqasiñäkaspasa’ ukhamätap sum amuytanxa (Sal. 91:2). Ukhamasti, jan qullkañjam usump tʼaqhisiskstan ukhaxa, ¿kunanakas kusisitakïskañatakix yanaptʼistaspa?

Diosar mayisiña: Jehová Diosan nayra luqtirinakapjamaw taqi llakinakas oración tuqi Diosar katuyasna ukat Jupaw yanaptʼistani (Sal. 55:22). Ukham lurasaxa, ‘Diosan samarañapax jiwasanakan chuymassa, amuyussa imaniwa’ (Fili. 4:6, 7). Magdalena kullakaxa Jehová Diosar taqi chuyma maytʼasisaw usuparux saykati. Jupax akham siwa: “Llakinakaj Diosar katuyta ukhaxa kusisitakiw jikxatasta. Jichhaw chiqpachapun sapüru Jehová Diosan yanaptʼap munatasxa sum amuyta” sasa (2 Cor. 1:3, 4).

Diosax qullan ajayup tuqi, Arup tuqi ukat markap tuqiw mayisitanakas istʼistaspa ukat  chʼamachtʼarakistaspa. Ukampis Diosax janiw mä milagro tuqix usunakas qullkistaspati. Antisas jan waltäwisar saykatañatakiw chʼam churistani ukat amuytʼasiñatakis yatiñkankañ churarakistaniwa (Pro. 2:7). Jupaw ‘jachʼa chʼamapa’ churistani sasaw Bibliax qhanañchi (2 Cor. 4:7).

Familiasa: Familia taypin munasiña, khuyaptʼayasiña utjki ukhaxa, usutanakax janiw aynachtʼapkiti. Familiapaw jan wali jikxatasipki ukhax yanaptʼapxi, ukampis usutan familiapaxa ukhamarakiw wal tʼaqhisipxaraki, awisax janis khiti yanaptʼiripax utjkaspa ukhamwa amuyasipxi. Ukhamaxa, jupanakax familjam oración mayisipxani ukhaxa, chuymanakapan samarañxa jikxatapxaniwa (Pro. 14:30).

Ukat Barbara kullakax phuchapampit ukat tamankir yaqha tawaq kullakanakat akham sarakiwa: “Jupanakaw yatiyir sarañatakix wal yanaptʼapxitu. Jupanakar kusisit uñjasax chuymas wal qhanartitu” sasa. Ukat Zbigniew jilatarux esposapaw yanaptʼaraki. Jupax akham siwa: “Utan lurañanakax utjki ukxa jupaw jilapartix luri, ukat tantachäwinakar sarañatakisa ukhamarak yatiyir sarañatakisa, jupaw isthapiyitu ukat maletinajs aparapitu” sasa.

Tamankir jilat kullakanaka: Ukat tama taypinkir jilat kullakanakaw chuymachtʼistu ukat chʼamachtʼarakistu. Maynitï usutäkasin tantachäwinakar jan sarxchi ukhax ¿kunjams yanaptʼapxi? Magdalena kullakax akham siwa: “Tamankir jilat kullakanakaxa, ajay tuqit jan aynachtʼañajatakix, tantachäwin arstʼawinaksa grabtʼarapipxituwa. Ukat nayar yanaptʼañatakixa, visittʼiris jutapxarakiwa. Chuymachtʼkir cartanaksa apayanipxarakituwa. Taqi ukanakaw jan aynachtʼañatakix wal yanaptʼitu” sasa.

Kunas llakimp jan aynachtʼañatakix maynir yanaptʼi uka tuqit Izabela kullakax akham siwa: “Tama taypinx walja awk taykanakaw utjitu, jupanakaw llakinakäjs istʼapxitu ukat kunjamtï jikxatskta uk amuytʼañatakis chʼamachasipxarakiwa. Tamankir jilat kullakanakaw familiajaxa, ukanwa kusisiñsa samarañsa jikxatta” sasa.

Khitinakatï ukham jan waltʼäwin uñjasipki ukanakax janiw saparstʼapxañapax wakiskiti. Antisas jilat kullakanakamp tantachtʼasiñatakiw chʼamachtʼasipxañapa (Pro. 18:1). Ukhamat  yaqhanakax jupanakar uñjasax chʼamañchtʼata uñjasipxarakini. Ukat usutäpki uka jilat kullakanakax inas tamankir jilat kullakanakar yanaptʼa mayiñ axsarayasipxchispa. Ukampisa, kuna yanaptʼtï jupanakax munapki uk qhan sapxani ukhaxa, ‘munasiñampiwa’ jilat kullakanakax taqi chuyma yanaptʼapxani (1 Ped. 1:22). Jumatï ukhaman jikxatasta ukhaxa, tantachäwinakar irpita, yatiyir jumamp sarañ munta jan ukax jumampiw parltʼasiñ munta sasin ¿janit tamankir jilat kullakanakar siskasma? Chiqansa, kunatï wakiski ukakirakwa mayiñasa, ukat yanaptʼax yuspärañasawa.

Janiw llakimp aynachtʼañasäkiti: Usunakampi jan aynachtʼañatakixa, jiwas pachpaw chʼamachasiñasaraki. Llakisiña ukat aynachtʼat sarnaqañaxa, maynirux janis kunatak askïkaspa ukham amuyañaruw puriyaspa. Bibliaxa akham siwa: “Usutarux chʼam katxatatapawa wayxäsi, ukampis chʼam thayjtatarusti, ¿khitirak wayxäsispasti?” sasa (Pro. 18:14).

Magdalena kullakax akham siwa: “Usujat jan sint llakisiñatakiw chʼamachasta. Ukat sumak jikxataskta uka urunaka janiw ina chʼusar aptʼkti, kuna askinaksa lurapuntwa. Ukat kunjamsa yaqhip jilat kullakanakax jan wali usumpi usutäkasas nayrar sarantasipkaki uka experiencianak liyiñaw wal chʼamañchitu” sasa. Ukat Izabela kullakarusti Jehová Diosax jupar wal munasitapa, wali askit uñjatap yatiñaw wal chʼamañchtʼi. Jupax akham siwa: “Mayninakatakix wali wakiskirïkiristsa ukham amuyasta, khitir yanaptʼañajas utjapuniwa, ukat jutïrinxa janiw usutäxäti ukas kusisiyarakituwa” sasa.

Zbigniew jilatax akham sarakiwa: “Usujaxa, altʼat chuymanïña, istʼasirïña, amuytʼasirïña, ukat maynir taqi chuym perdonañwa yanaptʼitu. Ukat Jehová Diosar kusisiñ chuymampi luqtaña, ukat jan naya kikpat sinttʼasis luqtañwa yatiqawayta. Ukampirusa, Diosar yupaychañanxa jukʼamp nayrar sartañatakiw yanaptʼitu” sasa.

Jehová Diosax kunjamtï taqi uka jan waltʼäwinak aguantaskta ukxa sum yati, uk janipun armasimti. Bibliax akham siwa: “Diosasti [...] janiw armaskaniti kuntix lurapkta, ukhamarak munasiñanakamsa uñachtʼayapxarakta” sutip layku ukxa sasa (Heb. 6:10). Kuntï Diosax churapxamaw siskistu ukar atinisiñamawa, Jupax akham siwa: “Janiw kunapachas jaytkämati ni armtʼaskämasa” sasa (Heb. 13:5).

Ukat kuna pachas llakita jikxatasïta ukhaxa, niyas paraisonkasma ukham amuyasiñamawa. Niyaw kuna bendicionanaktï Diosan Reinopax apankani uk juma pachpa uñjäta.

[28, 29 jananakan recuadropa/fotonakapa]

Wali usutäkasas Diosan arunakapxa yatiyasipkakiwa

“Janiw callenakan sapak sarnaqirjamäxti, esposajampi jan ukax jaqha jilatampiw Diosan arunakap yatiyirix sarta. Kuntï jaqinakamp parlkä uksa ukat Biblian jiskʼa tʼaqanakapsa pʼiqijaruw yatsta.” (Jerzy jilataxa, janiw sum uñjkiti.)

“Cartanakwa qillqta ukat jukʼamp yatiqañ munapki ukanakat mä qhawqhanirux sapakutiw carta tuqi yatichta. Ukat hospitalan qullayasiskt ukhaxa, ikiñ jakʼaruw Biblia ukat Bibliat apstʼat qillqatanaksa uchasta. Ukaw yaqhanakamp Dios tuqit parltʼañatakis wal yanaptʼitu.” (Magdalena kullakax lupus eritematoso sistémico sat usuniwa.)

“Bibliat jukʼamp yatiqañ munapki ukar kuttʼañasa ukat Bibliat yatichiri sarapki ukanakar compañtʼañasa wal gustarakitu. Ukat usux apaqtitu ukhaxa, utat ut yatiyiris sararaktwa.” (Barbarax pʼiqipanxa mä tumoraniwa.)

“Utat ut yatiyir sarañax wal gustitu, ukampis jan mistsurjamäkta ukhax telefonotwa yatiyarakta.” (Izabela kullakax llaki usuniwa.)

“Mä qhawqha revistakakwa jan jathïñapatakix apasta. Ukat kunaratutï jukʼamp usxitu ukhakamakiw yatiyarakta.” (Zbigniew jilatax, artritis usuniwa.)

[30 janan fotopa]

Wawanakas jilïrinakasa, taqiniw usutanakar chʼamañchtʼasna