‘Janjakiw Diosan arunakapat yatiykiristti’

Yaqhip jilat kullakanakax wali usuntatpachas Diosan arunakapat yatiyasipkakiwa, janiw aynachtʼapkaspati. Chiqas ukham chuyman jilat kullakanakax taqi chiqanwa utji. Jichhax Dalia sat mä kullakat parltʼañäni, jupax Lituania markana Vilna sat capitalapanwa jakasi.

Daliax niyaw 35 maranak phuqaski. Jupax wali usuntatawa, wawäkän ukhatpachwa pʼiqi usumpi aynachtʼatayna. Janiw sartirjamäkiti ukat jichhakamas ukhamakïskiwa ukat parlatapas janirakiw amuyañjamäkiti, familiaranakapakiw kun sañs muni uk amuyapxi. Galina sat mamitapaw sapürus uñjaski. Daliax wali usutäkasas ukat llakinakan uñjaskasasa janiw aynachtʼkiti, amuyupanxa nayrar sartañ munaskakiwa. ¿Kunas jupar yanaptʼpacha?

Mamapax akham siwa: “Apolonija sat mä familiaraw 1999 maranxa utar visittʼir jutatayna, jupax Jehová Diosan Qhanañchiripawa. Bibliat yatitapax qhanapunïnwa. Dalian kunayman tuqit jisktʼatax wali sumwa qhanañchawayi. Ukatwa Daliax jupampi Bibliat yatiqañ amtawayi. Awisax jupanak taypin quntʼasisaw nayax kuntï Daliax sañ munki uk qhanañchirïta. Ukat kunjamsa wawajar Bibliat yatiqañax yanaptʼi uk amuyasax nayamppachaw Bibliat yatiqañ qalltawayarakta” sasa.

Ukat Bibliat yatiqkasax mä tuqitwa Daliax llakisitayna. Janiw chuymapan imxäsirjamäkänti. Ukatwa mä urux yatichiripar akham satayna: “Janirakis sartirjamäktsä, janjakiw Diosan arunakapat yatiykiristti” sasa (Mat. 28:19, 20). Apolonija kullakax akham sasaw sumachtʼatayna: “Jan llakisimti, Jehová Diosaw yanaptʼaskätam” sasa. Ukax chiqapuniw phuqasiskäna.

¿Kunjamsa Daliax Diosan arunakapat yatiypacha? Nayraqatxa, cartanak tuqiw jaqinakar yatiyi, walja kullakanakaw jupar qillqañ yanaptʼapxi. Ukatxa, celularat qillqatanak apayasas yatiyarakiwa. Ukat suma urunakanxa, plazanakar ukat callenakar mistuñwa jilat kullakanakax Daliar yanaptʼapxi, ukhamatwa jaqinakampix parlaraki.

Daliampi mamitapampix wali sumwa Diosan markapamp chikax sarxaruwayapxi. Ukatwa 2004 maran noviembre phaxsinxa panpachani bautisasiwayapxi, ukhamata Diosar katuyasitanakap uñachtʼayañataki. Ukat septiembre, 2008 maranxa, polaco aru parlir mä grupow Vilnius markan uttʼasiwayaraki. Niyakixay uka grupon yanapirinakax wal munaschixa, jichhax ukanwa yanaptʼasipki. Dalia kullakitax akham siwa: “Janirakis phaxsin mä kutis yatiyir mistkttixä sasaw awisax llakista. Ukampis Jehová Diosaruw mayista, khitir yatiyañsa jupax khitanipuniwa” sasa. Ukat usupatxa akham sarakiwa: “Cuerpojax jan unxtkiri qʼala suchʼuptatawa, ukampis amuyujax walikïskiwa. Dios Awkijat jaqinakar yatiyasax wal kusista” sasa.