“Kuntix lurapxät ukxa lurapxam taqi chuymampi, Tatitutakis lurapkasma ukhama.” (COL. 3:23.)

1-3. 1) Niyakixay Jesucristox jakäwip jiwasanak layku luqtasiwaychixa, ukhamax ¿janit kuna sacrificios munasxi? Qhanañchtʼma. 2) ¿Jehová Diosatak sacrificionak lurasax kunsa amtañasa?

 NAYRA maranakanxa, Moisesan katuqat Leyinakax Jesucriston jiwatapampiw tukusxi sasaw Jehová Diosax markapar qhanañchäna (Col. 2:13, 14). Ukatwa kuntï judionakax animalanak ukat yaqhanak luqtapkäna ukanakax jichhürunakan jan wakisxiti, ukat janirakiw valoranïxiti. Moisesan katuqat Leyinakax ‘mä wawa uywirjamaw’ kunatï lurañapäkäna ukanak phuqäna, mä arunxa judionakaruw Jesucristor uñtʼapxañapatak yanaptʼäna (Gál. 3:24).

² Ukhamax ¿janit uka nayra sacrificionakat kun yatiñas wakiskpacha? Janiw ukham sañ munkiti. Antisas apóstol Pedrox uka tuqitxa akham sänwa: “Jesucristo tuqi taqi ajayun sacrificionak Diosar luqtapxaña[sawa ukhamat] Diosax katuqañapatakiraki” sasa (1 Ped. 2:5). Jehová Diosar yupaychasax taqi kunanaktï lurawayktan jan ukax lurktan ukanakax mä sacrificiomp sasirakiwa, sasaw apóstol Pablox qhan arsuwayarakïna (Rom. 12:1).

³ Ukampis ¿kuna kasta sacrificionaksa jiwasax Diosatak lurtanxa? Nayraqatxa, kuntï jupax munki ukanak lurañatakiw chʼamachastanxa ukat kuntï pantjasir chuymasax munki ukanaksa apanukuraktanwa. Ukampis uka sacrificionakax Diosan chuymapar purtʼañapawa. Ukat israelitanakar kunjam sacrificionaktï maykäna ukxa janiw armañasäkarakiti.

¿KUNA SACRIFICIONAKSA SAPÜRUS LURTANXA?

4. ¿Lurañanakasampi sapüru phuqkasax kuns amtañasa?

⁴ Kunjamsa Diosatakix sapürus sacrificionak lursna uk amuyañax chʼamäspawa. Sañäni, utan lurañanak phuqañasa, yatiqañ utar sarañasa, trabajañasa, kun altʼasir  sarañasa ukat yaqha lurañanakampi phuqañasa Diosar yupaychañat sipansa yaqhächixay sasaw awisax amuysna. Ukampis Jehová Diosar jakäwis katuyasxstan jan ukax jichhak bautisasiñ amtaskstan ukhaxa, taqi kunsa wali amuyumpi sum phuqañasawa. Niyakixay arumay uru Jehová Diosan Qhanañchiripästanxa, Biblian kamachinakaparjam sapüru sarnaqañasawa. Apóstol Pablox akham sänwa: “Kuntix lurapxät ukxa lurapxam taqi chuymampi, Tatitutakis lurapkasma ukhama, jan jaqinakatakjamaxa” sasa (Colosenses 3:18-24 liytʼasiñapawa).

5, 6. ¿Kunas sum sarnaqañatakisa ukat isisiñatakisa yanaptʼistaspa?

⁵ Chiqansa, janiw taqi luräwinakasampix Jehová Diosar yupaychkapuntanti. Ukampis apóstol Pablox “kuntix lurapxät ukxa lurapxam taqi chuymampi, [Jehová Diosatakis] lurapkasma ukhama” sasaw iwxtʼistu. Ukhamaxa, kunanaktï lurktan ukanakat sum amuytʼasiñasawa. Ukat akham jisktʼasiñasarakiwa: ¿Cristianjamat sarnaqtxa ukat isisiraktxa? ¿Jan ukax sarnaqatajasa ukat isisitajasa Jehová Diosan Qhanañchiripat uñtʼayasiñax phinqʼasiñjamati? Ukhamäspa ukhaxa, janipuniw akchʼas walïkaspati. Jehová Diosan serviripjamaxa, Diosan sutipxa jachʼaruw aptañ muntanxa, janiw jiskʼachayañ munktanti (Isa. 43:10; 2 Cor. 6:3, 4, 9).

⁶ Jehová Diosar “taqi chuymampi” luqtañ munatasax kunjamsa taqi luräwinakan yanaptʼistu uk amuytʼañäni. Ukatxa, Jehová Diosax kuna kasta sacrificionak luqtayasiñsa nayrax munäna uk amtapxarakiñäni (Éxo. 23:19).

TAQI KUNANSA DIOSATAKJAM SARNAQAÑÄNI

7. ¿Jehová Diosar katuyasitasax kamsañsa muni?

⁷ Kunapachatï Jehová Diosar jakäwis katuyastan ukhaxa, taqi chuymaw Jupar serviñ amttanxa. Mä arunxa, kuna jan waltʼäwin uñjasisas Juman munañamwa nayraqat phuqäxa sasaw Jehová Diosar sistanxa (Hebreos 10:7 liytʼasiñapawa). Chiqas ukham amtatasax wali askipuniwa. Ukat Jehová Diosax kunanak lurañassa muni ukanak sum yatxattan ukat ukarjam phuqañatak chʼamachastan ukhaxa, taqi kunas sumakiw misturaki (Isa. 48:17, 18). Diosan qullan markapanxa wali kusisitaw jikxatastanxa, kunattix Jupat yatiqasisaw sarnaqtanxa (Lev. 11:44; 1 Tim. 1:11).

8. ¿Jehová Diosax israelitanakan sacrificionakap qullanat uñjatapax kunsa yatichistu?

⁸ Jehová Diosatakixa, suma chuyman israelitanakan sacrificionakapax qullanänwa (Lev. 6:25; 7:1). Ukat hebreo arun “qullana” siski uka aruxa, kunanakatï Diosatak yaqhachatäki uk sañ muni. Ukhamasti, sacrificionakasa, mä arunxa, kunanaktï Dios laykux lurañ munktan ukanak katuqasiñapatakixa, qʼumäñapawa, janiw akapachankir kuna jan walinakampis qʼañuchatäñapäkiti. Kunanaktï Diosax uñiski ukanakxa uñisiñasarakiwa (1 Juan 2:15-17 liytʼasiñapawa). Sañäni, kunanakatï Dios nayraqatan  qʼañut uñjaykistaspa, jan ukax khitinakampitï sarnaqktan ukax jan walit uñjayistaspa ukanakat jithiqtañasawa (Isa. 2:4; Apo. 18:4). Ukat janirakiw qʼañu luräwinak uñchʼukiñax chuyma qhanartayirïkaspas ukham uñjañasäkiti, ni akapachankir jan wali luräwinakatsa lupʼiñasäkiti (Col. 3:5, 6).

9. ¿Kunatsa jaqi masisar munasiñampi uñjañasax wakisi?

⁹ Pablox akham sasaw jilat kullakanakar säna: “Janiraki armtʼasipxamti aski lurañatxa, ukhamarak maynit maynikama kunanakamatix utjapktam uk jaljasiñsa; uka casta sacrificiow Diosarux kusisiyi” sasa (Heb. 13:16). Ukhamasti, Diosan munañap phuqañatak luratanakassa ukat mayninakar yanaptʼatassa, Jehová Diosax mä sacrificiökaspas ukham katuqasi. Chiqas jaqi masir ukham munasisax Jesucriston chiqpach arkiripätaswa uñachtʼaytanxa (Juan 13:34, 35; Col. 1:10).

DIOSAR YUPAYCHKASAX SACRIFICIONAK LURAPXAÑÄNI

10, 11. ¿Jehová Diosax kunjamsa arunakapat yatiyatassa, yupaychäwissa uñji, ukat ukax kunjamsa yanaptʼistu?

¹⁰ “Iyawsäwisanxa kuntix suytʼktan” ukanakxa jan pächasis yatiyañasawa, ukhamatwa jaqinakarux yanaptʼaraksna. ¿Kawkinsa kuna horasasa jaqi masisar yatiyañatakix chʼamachasisktanti? Ukham lurasaw Diosarux “suma sacrificiot chur[tan]xa, lakanakasampi yupaycha[sa]” sasaw apóstol Pablox sarakïna (Heb. 10:23; 13:15; Ose. 14:2). Chiqansa, qhawqha tiemposa ukat kunjamsa Diosan Reinopat yatiytan uk sañax waliw utjaspa, ukat Yatiyañataki Tantachäwinsa sapa semanaw kunjamsa yatiyañasa uk yatiqtanxa. Ukat niyakixay sapaki yatiyatasasa, jan ukax tamampi yatiyatasas “lakanakasampi yupaycha[sin]” Jehová Diosatak mä sacrificiokaspas ukham churstanxa, sum phuqañatakiw chʼamachasiñasa. Chiqas janiw taqinipunix walja horanak yatiyksnati, ukampis qhawqha horanaksa Diosan arunakap yatiytan ukanwa jiwasatakix Diosar yupaychañax kunja wakiskiris ukax qhan amuyasirakini.

¹¹ Chiqa cristianonakax tamampi jan ukax sapakisa, Jehová Diosar yupaychañatakix sapa semanaw tiempo apstʼastanxa. Ukxa Dios pachpaw jaytawayistu. Chiqas sábado uru imañax janiw cristianonakatakix wakisxiti, ni Jerusalenar sapa mara sarañasas wakisxarakiti. Ukampis Diosar yupaychañatakix wakiskir lurañanakaw nayra tiemponx utjarakïna, jichha tiempons ukhamarakiw utji. Arunakapat yatxatañatakisa, oración lurañatakisa ukat tamampi tantachasiñatakisa tiempo apstʼassna  ukwa Jehová Diosax muni, kunjamtï nayra tiempon maykäna ukhama. Ukat familian pʼiqtʼirinakax Diosar yupaychapxañapatak familiapar yanaptʼapxañapwa munaraki (1 Tes. 5:17; Heb. 10:24, 25). Taqiniw akham jisktʼasiñasa: “¿Diosar yupaychkasax jukʼamp sum luqtiristti?” sasa.

12. 1) ¿Altaran incienso naktʼayapkäna ukar uñtasitxa kunsa jiwasax Diosar churaraksna? 2) Bibliarjamax oracionax mä suma inciensomp sasiwa, ukhamasti, ¿oracionasax kunjamäñapasa?

¹² David reyix akham sasaw Diosar qʼuchüna: “Mayisitaxax inciensor uñtat nayraqatamar makhatanpan” sasa (Sal. 141:2). Aka jisktʼanakarjam amuytʼasiñäni: ¿Diosampix kunjams parltʼastxa? ¿Taqi chuymat sapürus maytʼastxa? Apocalipsis qillqatanxa “qullananakan oracionanaka[pax]” mä suma incienson qʼaphipäkaspas ukhamwa Diosarux makati sasaw qhanañchi (Apo. 5:8, MT). Israelitanakax altaran incienso sapüru nakhayapkäna ukhaxa, kunjamtï mayiskäna ukarjam wakichatäñapänwa. Ukat Diosan mayitanakarjam jan phuqapkäna ukhaxa, Diosax janiw katuqkänti (Éxo. 30:34-37; Lev. 10:1, 2). Ukax ¿kuns yatichistu? Jehová Diosampi oración istʼayasiñ munstan ukhaxa, ukhamarakiw maytʼasiñasa.

CHURASAX KATUQARAKTANWA

13, 14. 1) ¿Epafroditosa ukat jilat kullakanakasa kunjamsa Pablor yanaptʼapxäna ukat jupax kunjamsa katuqasirakïna? 2) ¿Epafrodito jilatatsa ukat Filipos markankir jila kullakanakatsa kunsa yatiqassna?

¹³ Uraqpachan yatiyasiski ukar yanaptʼañatakix waljsa jan ukax jukʼaksa churstan ukaxa, mä sacrificiomp sasirakiwa (Mar. 12:41-44). Nayra maranakanxa, Filipos markankir tamax Epafrodito jilataruw Pablor yanaptʼañapatakix Roma markar khitapxäna, qullqimpi mä qhawqha regalonakampwa apayapxäna. Chiqas nayratpachwa ukham yanaptʼapxäna. Ukham lurasaxa, Pablox qullqit jan llakisiñapataki, ukat Diosan arunakap jukʼamp yatiyañapatakiw yanaptʼañ munapxäna. ¿Pablox kunjamsa uka regalonak katuqasïna? “Mä suma qʼapkiri inciensökaspas ukhamwa Diosax mä suma sacrificiot katuqaraki” sasaw Pablox säna (Filipenses 4:15-19 liytʼasiñapawa). Ukham yanaptʼataxa, Pablox wal yuspäräna, ukat Jehová Diosatakis wali askirakïnwa.

¹⁴ Jichhürunakanxa, uraqpachan yatiyasiñapataki yanaptʼatasxa ukham askitwa Jehová Diosax uñjaraki. Ukat jiwasatï Jehová Diosan Reinopa nayrar uchañäni ukhaxa, Jupaw kunatï jakañatak wakiski ukanak churistani ukat Jupar yupaychaskakiñatakis yanaptʼarakistaniwa (Mat. 6:33; Luc. 6:38).

YUSPÄRTANWA

15. ¿Jumax kunanakatsa Jehová Diosar wal yuspärta?

¹⁵ Jehová Diosarux qhawqha manütansa uk jakthapiñatakix tiempos faltistaspawa. ¿Janit pachpa jakäwisat sapüru yuspärañasax wakiskaspa? Ukatxa juparaki kunatï jakañatak wakiski ukanaksa churistu. Sañäni: Jupaw manqʼañsa, utsa, issa, samansa churistu. Chiqas janiw kunsa faltaykistuti. Ukhamarakiw arunakapat kunatï chiqäki uksa sum yatichistu, ukhamatwa iyasawinïtansa ukat suytʼawinirakïtansa. Ukhamasti, Jehová Diosax kunjamasa, ukat kunanaksa jiwas laykux luri ukanakat lupʼisaxa, taqi chuyma yupaychasa ukat Arupat yatiyasakiw Jupar jachʼañchsna ukat yuspäratassa uñachtʼayaraksna (Apocalipsis 4:11 liytʼasiñapawa).

16. ¿Jesucriston jakäwip luqtasitaparux kunjamsa uñjañasa?

¹⁶ Kunjamtï pasir yatichäwin yatiqawayktanxa, Jesusax juchanakasat qhispiyañ laykuw jiwawayi, ukax Jehová Diosan mä suma regalopawa. Ukham lurasaxa, ¡Diosax wali munasirïtapwa uñachtʼayistu! (1 Juan 4:10.) ¿Ukanakat kunjamsa yuspärsna? Pablox akham siwa: “Criston munasiñaparakiw jariyapxitu, maynin taqinitaki jiwatap yatxasina [...] Cristox taqinitakiw jiwi, khitinakatix jakasipki ukanakax  jan jupanakpachataki jakxapxañapataki, jan ukasti Cristotaki jakxapxañapataki, jupanak layku jiwasina jaktki ukataki” sasa (2 Cor. 5:14, 15). Ukham sasaxa, Jehová Diosan jachʼa khuyaptʼayasiñapat yuspärstan ukhaxa, Juparu ukat Yuqaparu jachʼañchañaw jakäwisanxa taqi kunat sipans nayrankañapa, sasaw Pablox saskäna. Ukampis ¿kunjamatsa Diosar ukat Cristor yuspäratas uñachtʼaytanxa? Taqi kunan istʼasa, yaqhanakar arunakapat taqi chuyma yatiyasa ukat yatichasaw uñachtʼaytanxa (1 Tim. 2:3, 4; 1 Juan 5:3).

17, 18. ¿Yaqhip jilat kullakanakax kunjamsa Jehová Diosar jukʼamp serviñatak chʼamachasipxi? Mä uñachtʼäwimp qhanañchtʼma.

¹⁷ ¿Arunakamp jukʼamp yatiyañatak Jehová Diosar mä sacrificiokaspas ukham luqtañatakix chʼamachasnati? Jehová Diosax kunanaktï jupanak laykux lurki ukanak amuykiptʼasaw walja jilat kullakanakax Diosar jukʼamp yupaychañatak tiempo apstʼasipxi. Ukhamatwa, walja horanak Diosan Reinopat yatiyapxi ukat kunanaktï cristianjamax phuqañasäki ukanakampis jukʼamp sum phuqapxaraki. Yaqhip jilat kullakanakax maran maya jan ukax walja phaxsinakaw precursor auxiliarjamax irnaqtʼapxi. Ukat yaqhipasti precursor regularjamaw Diosar servipxaraki. Yaqhip jilat kullakanakax Diosar yupaychañatak utanak lurañwa yanaptʼapxaraki. Taqi ukanak lurasin Jehová Diosar ukham yuspärañaxa, ¿janit wali khusäki? Ukat suma chuymampi ukanak phuqapki ukhaxa, Jehová Diosax wali kusisitaw qatuqasi. Ukhamasti, jupar yuspärañatwa maynix taqi ukanak lurañapa.

¹⁸ Walja jilat kullakanakax Jehová Diosar wali manüpkaspas ukham amuyasisax jukʼamp lurañatakiw chʼamachasipxi. Morena sutini mä kullakat parltʼañäni. Jupax Católica Iglesian yatichataw jilsuwayäna, ukatwa Bibliat jisktʼanakapar qhanañchañatakixa uka religionana ukat Asia tuqin utjir religionanakan thaqhäna, ukampis janiw qhanañchapkänti. Jehová Diosan Qhanañchirinakapampi Bibliat yatxatasakiw jisktʼanakapxa sum amuyxäna. Bibliax taqi jisktʼanakap sum qhanañchatapatxa wal kusisïna, ukat sum jakasxarakïna, ukatwa Jehová Diosar katuyasisin yuspärañ munäna. Bautisasisax jankʼakiw precursor auxiliarjamax Diosar servïna, ukat jukʼamp tiempo apstʼasisax precursor regularjamaw qhipat luqtxarakïna. Jichhakamax kimsa tunka maranakaw Diosatakix sapürunjam wal irnaqtʼaski.

19. ¿Kunjamsa sapa maynis Jehová Diosar jukʼamp yupaychañatakix chʼamachassna?

¹⁹ Kunjamtï yatktanxa, Diosar taqi chuyma servirinakatxa, janiw taqinipunix precursoräpkaspati. Ukampisa, Jehová Diosar yupaychañatakix taqiniw chʼamasarjamax kuns lursna, mä sacrificiökaspas ukhama. Nayraqatax sum sarnaqañ tuqit amtañäni, Diosan arunakapar respetañasawa ukat Diosan sutip apatasxa janipuniw armañasäkiti. Ukat ¿iyawsäwi tuqit kamsaraksnasa? Diosan amtanakapax kunjamsa phuqasiski ukanakar taqi chuyma confiañasawa. Ukatxa, suma luratanakasampiw Diosar sacrificionak luqtatas uñachtʼayaraksna, mayax Jupan arunakapat jaqinakar yatiyañawa. Jïsa, jiwasax laykux wali askinakwa Jehová Diosax lurawayi ukat jiwasax taqi chuymaw Jupar yuspäraraktanxa. Ukhamaxa, Jehová Diosar suma sacrificionak churañataki chʼamachasisipkakiñäni.

[Jiskt’anaka]

[25 janan qhanañchäwipa]

¿Jehová Diosan wali khuyaptʼayasirïtapax jukʼamp sum yupaychañatakit yanaptʼistu?

[23 janan fotopa]

¿Jehová Diosan arunakapat kawkinsa, kuna horasasa yatiyapuntanti?